Fasilidade sira neʼebé fó glória ba ita-nia Mestre Boot

Jeová gosta atu hanorin ninia povu. Tan neʼe, ninia organizasaun halaʼo eskola balu neʼebé treinu estudante sira atu halo sira-nia knaar ho diʼak liután. Eskola ida mak Eskola ba Haklaken-Naʼin Tempu-Tomak (EHNTT). Iha tinan hirak neʼe nia laran, Maromak nia organizasaun fokus atu hadiʼa matéria, maibé mós ba fatin neʼebé uza atu halaʼo eskola teokrátiku sira-neʼe. Objetivu importante mak atu prepara ambiente neʼebé diʼak ba instrutór no estudante sira. Oinsá mak Ita-nia kontribuisaun ajuda ami atu kumpre objetivu neʼe?

Estudante barak liután iha ambiente neʼebé diʼak liután

Ba tinan barak, eskola teokrátiku halaʼo iha Reuniaun-Fatin no Salaun Asembleia sira. Entaun, tanbasá foin lalais neʼe ita harii ka renova fasilidade balu neʼebé agora uza ba eskola teokrátiku deʼit? Hanoin toʼok razaun tolu tuirmai neʼe.

Presiza ema barak liután. Christopher Mavor, ajuda-naʼin ba Komisaun Serbisu nian husi Grupu Administradór, hatete: “Sukursál sira fó sai katak presiza haklaken-naʼin barak liután. Porezemplu, iha tinan 2019, sukursál Brazíl fó sai katak presiza tan ema neʼebé tuir EHNTT maizumenus naʼin-7.600 atu ajuda iha sira-nia territóriu.” Sukursál Estadus Unidus fó sai katak presiza tebetebes pioneiru sira neʼebé kumpre kritériu atu bele treinu ema seluk haklaken públiku espesiál iha sidade boot, haklaken iha ponte-kais no iha komarka. Presiza mós irmaun sira atu serbí iha Departamentu Planeamentu no Konstrusaun Lokál no Komisaun neʼebé Komunika ho Ospitál. Irmaun-irmán sira neʼebé gradua ona husi EHNTT bele kumpre knaar sira-neʼe.

Estudante sira aumenta barak. Sukursál barak hetan formuláriu EHNTT husi irmaun-irmán sira, no neʼe barak liu fali númeru neʼebé sira bele simu. Porezemplu, iha Brazíl, ema neʼebé aplika ba EHNTT maizumenus naʼin-2.500 iha tinan ida deʼit nia laran. Maibé tanba fasilidade atu halaʼo eskola mak uitoan, entaun sukursál bele simu estudante naʼin-950 deʼit.

Hela-fatin neʼebé diʼak. Bainhira estudante sira tuir eskola iha Reuniaun-Fatin ka Salaun Asembleia, baibain sira hela iha irmaun no irmán sira-nia uma iha área neʼe. Arranju neʼe laʼo diʼak iha fatin sira neʼebé halaʼo klase uitoan deʼit iha tinan ida nia laran. Maibé iha fatin neʼebé halaʼo klase barak, irmaun-irmán lokál labele oferese sira-nia hela-fatin ba estudante sira ba fulan barak durante tinan ida nia laran. Entaun ami harii fasilidade sira neʼebé besik klase no diʼak ba estudante sira.

Fasilidade ida iha sala estuda nian ida, no mós hela-fatin ba instrutór sira no estudante maizumenus naʼin-30 no fatin seluk tan neʼebé sira presiza. Atu halo fasilidade hanesan neʼe, bele gasta osan dolar Amerikanu millaun balu, depende ba área no buat seluk tan.

Eskola nia fasilidade

Baibain, fatin atu halaʼo eskola mak iha área neʼebé hakmatek no dook husi sidade boot, maibé besik ho transporte públiku. Irmaun sira prefere liu área sira neʼebé iha haklaken-naʼin barak hodi bele ajuda eskola laʼo ho diʼak no bele tau matan ba fatin no ekipamentu sira.

Fasilidade sira iha biblioteka, área atu estuda, komputadór, printer, no buat sira seluk tan. Dala barak, iha sala han-fatin neʼebé estudante ho instrutór bele han hamutuk. Iha mós fatin neʼebé bele uza atu halo ezersísiu no halimar.

Irmaun sira mós halo planu didiʼak kona-ba sala estuda nian. Irmaun Troy neʼebé serbisu ho Departamentu Planeamentu no Konstrusaun ba mundu tomak iha Warwick, Novaiorke hatete: “Ami kontaktu Departamentu Eskola Teokrátiku nian hodi husu ideia oinsá halo sala estuda nian iha dalan neʼebé halo fasil ba estudante atu aprende. Irmaun sira iha neʼebá fó ami matadalan kona-ba medida no dezeñu ba sala estuda nian, inklui lampu no mós ekipamentu ba áudio vídeo.” Kona-ba ekipamentu áudio nian, instrutór ida naran Zoltán iha rai-Ungria hatete: “Uluk, ami la iha mikrofone sira, entaun ami sempre fó hanoin ba estudante sira atu koʼalia ho lian makaʼas. Maibé agora iha mikrofone iha meza ida-idak, entaun problema neʼe rezolve ona!”

“Jeová nia bainaka espesiál”

Hodi hadiʼa fasilidade sira, oinsá neʼe kona instrutór no estudante sira? Irmán Angela neʼebé atende eskola EHNTT iha Florida, Amérika hatete: “Fatin neʼe hakmatek tebes. Irmaun sira harii fasilidade ho didiʼak, neʼe inklui sala estuda nian no kuartu sira, atu ami bele fokus ba estuda no aprende.” Irmaun Csaba mak instrutór ida iha rai-Ungria, nia kontente tanba iha oportunidade atu han hamutuk ho estudante sira. Nia dehan katak iha situasaun hanesan neʼe, “dala barak estudante sira fó sai sira-nia sentimentu no koʼalia kona-ba buat neʼebé akontese ba sira. Neʼe halo ami koñese estudante sira diʼak liután. Neʼe mós ajuda ami atu hanorin matéria iha dalan neʼebé kona sira-nia situasaun.”

Estudante no instrutór sira sente katak eskola nia fasilidade neʼebé sai diʼak liután mak bensaun husi Jeová, ita-nia “Mestre Boot”. (Isaias 30:20, 21) Irmán ida iha Filipinas neʼebé tuir EHNTT iha fasilidade neʼebé hadiʼa ona, hatete: “Eskola nia ambiente fó-hanoin ami katak ami laʼós estudante deʼit, maibé ami mak Jeová nia bainaka espesiál. Nia hakarak ami atu estuda didiʼak ninia Liafuan ho laran kontente.”

Ami bele harii, renova, no halo manutensaun ba eskola nia fasilidade sira tanba kontribuisaun neʼebé imi fó, neʼebé dala barak imi fó liuhusi donate.jw.org. Ami agradese tebes ba laran-luak neʼebé imi hatudu.