Halo buat ruma neʼebé lori benefísiu ba irmaun-irmán sira no ita-nia planeta

Nuʼudar Testemuña ba Jeová, ita hatene katak lakleur tan Maromak Jeová sei hadiʼa fali ita-nia planeta neʼebé ema estraga ona. (Apokalipse 11:18) Maski nuneʼe, ita mós presiza halo buat ruma atu tau matan ba mundu neʼe. Porezemplu, ita harii ona fasilidade sira neʼebé ita uza atu adora Jeová iha dalan neʼebé la estraga ambiente.

Ita-nia organizasaun halo ona projetu sira ho objetivu atu hamenus impaktu negativu ba ambiente. Projetu saida deʼit mak ita halo ona? No oinsá ida-neʼe ajuda ita atu uza kontribuisaun ho matenek?

Dalan atu halo salaun Asembleia nafatin malirin

Uluk, Salaun ba Asembleia Matola iha Mosambike nia uma-leten taka ho kaleen, no parte sorin-sorin la didin. Loro-matan kona kaleen neʼe no halo salaun laran sai manas loos. Irmaun ida hatete: “Ami kosar tanba manas! Bainhira programa remata, irmaun sira halai sai lalais atu buka anin fresku.” Saida mak ita bele halo atu Salaun ba Asembleia neʼe sai fatin neʼebé diʼak liu ba irmaun-irmán sira atu aprende?

Ami deside atu rezolve problema neʼe iha dalan neʼebé sei la estraga ambiente. Ami monta ventuiña neʼebé hetan enerjia husi anin, no mós tau materiál neʼebé xupa manas. Materiál neʼe redús manas neʼebé tama ba salaun laran, no ventuiña halo fresku salaun laran. Ventuiña neʼe la presiza eletrisidade, maibé uza anin fresku atu hasai anin manas neʼebé iha salaun laran. Ventuiña ida maizumenus folin $50.a

Solusaun neʼe halo anin iha salaun laran sai fresku liu tanba anin huu bá-mai ho estavel, no kulapur la mosu lalais hanesan tempu uluk. Neʼe hamenus dióksidu-karbonu, no aumenta oksijéniu iha salaun laran. Rezultadu mak ema neʼebé tuir reuniaun bele fokus no sente diʼak. Irmaun neʼebé temi ohin hatete: “Agora, ami la presiza ansi sai ba liʼur bainhira programa remata. Ami nafatin iha salaun laran durante tempu deskansa no ransu ho maluk sira. Ho uma-kakuluk neʼebé foun, tuur iha salaun laran halo ami sente fresku hanesan tuur iha ai-hun boot nia okos!”

Hetan enerjia neʼebé la estraga ambiente

Iha ami-nia fasilidade barak neʼebé uza atu adora Jeová, ami monta solar panel atu troka forsa husi loro-matan sai fali eletrisidade. Rezultadu mak ami la presiza sadere ba eletrisidade neʼebé halo husi buat neʼebé bele estraga ambiente. Prosesu neʼe bele hamenus poluisaun no ajuda ami atu la estraga osan kontribuisaun.

Iha tinan 2023, ami monta sistema solar panel iha sukursál Eslovénia. No neʼe taka porsentu 30 ba fatin neʼe nia presiza enerjia nian. Se dala ruma sistema neʼe halo eletrisidade liu fali buat neʼebé ami presiza, restu husi neʼe bele hatama fali ba komunidade lokál nia enerjia neʼebé sira uza. Sistema neʼe nia folin mak $360.000. Maibé tanba sukursál agora la presiza selu makaʼas ba eletrisidade, tan neʼe iha tinan haat nia laran osan neʼebé ami bele rai mak barak liu fali osan neʼebé ami uza atu hola sistema neʼe.

Iha tinan 2024 iha sukursál Sri Lanka, ami monta fali sistema solar panel no ninia bateria boot liu. Projetu neʼe gasta osan maizumenus $3 millaun, no sistema neʼe taka porsentu 70 husi sukursál nia presiza eletrisidade nian. Osan neʼebé ami bele rai husi sistema neʼe sei selu tomak ba solar panel sira iha tinan 3 nia laran. Tinan neʼebé hanesan, ami mós monta sistema solar panel neʼe iha Sukursál Olanda. Projetu neʼe gasta osan $1,1 millaun no taka porsentu 35 ba presiza neʼebé sukursál neʼe uza. Tanba ami bele rai osan barak tanba uza sistema neʼe ami bele selu tomak iha tinan sia nia laran.

Ami mós monta sistema solar panel iha eskritóriu tradusaun (RTO) oioin iha rai-Méxiku. Porezemplu: iha RTO Tarahumara (Sentrál) iha Chihuahua. Iha tempu malirin, temperatura bele sai malirin liu toʼo 0°C ba kraik. No iha tempu bailoro, temperatura manas toʼo 40°C liu! Maibé tanba eletrisidade mak karun, irmaun sira lakohi loke mákina atu halo manas ka malirin. Irmaun ida naran Jonathan neʼebé serbisu iha RTO hatete: “Iha tempu malirin, ami uza manta no roupa mahar no iha tempu manas ami loke janela.”

Iha 2024, ami monta sistema solar panel iha RTO. Projetu neʼe gasta osan $21.480, maibé osan neʼebé ami rai husi projetu neʼe bele taka tomak solar panel sira-neʼe nia folin iha tinan lima nia laran. Tan neʼe, irmaun sira bele uza mákina atu halo manas no malirin beibeik. Jonathan hatete: “Agora ami kontente liután iha ami-nia knaar no halo serbisu barak liután. No mós ami sente kontente hodi hatene katak ita-nia organizasaun la presiza estraga osan no mós la estraga ambiente.”

Aproveita udan-been

Iha Áfrika, Reuniaun-Fatin balu labele asesu ba bee. Rezultadu mak irmaun balu presiza kuru bee hodi laʼo ba kilómetru balu toʼo sira-nia Reuniaun-Fatin. Iha Reuniaun-Fatin seluk, irmaun sira sosa bee neʼebé karreta boot lori mai, maibé neʼe karun no la diʼak ba ambiente.

Atu irmaun-irmán sira bele asesu ba bee, ami halo bee dalan kiʼik sira iha uma kakuluk leten no tau tanke boot iha okos iha Reuniaun-Fatin barak iha Áfrika. Antes monta sasán neʼe, irmaun sira buka-hatene didiʼak kona-ba klima sira atu bele halo prosesu hodi hetan bee diʼak liu. Hodi tau sasán neʼe iha Reuniaun-Fatin gasta osan entre $600 no $3.000. Maibé sasán neʼe hamenus osan neʼebé Reuniaun-Fatin presiza gasta, tanba irmaun sira la presiza sosa tan bee.

Prosesu atu aproveita udan-been sira neʼe ajuda duni ita-nia irmaun-irmán sira. Irmán ida naran Noemia husi Mosambike hatete: “Uluk ami laʼo dook hodi hetan bee, ami toʼo iha Reuniaun-Fatin kole tebes. No tanba bee mak uitoan deʼit susar atu mantein moos. Maibé agora ema hotu bele fase liman. Ami bele toʼo Reuniaun-Fatin la kole tan no sente haksolok iha reuniaun. Obrigadu barak!”

Oinsá mak ita taka osan ba prosesu sira-neʼe neʼebé la estraga ambiente? Liuhusi kontribuisaun ba serbisu iha mundu tomak, neʼebé ema bele fó liuhusi donate.jw.org. Obrigadu barak ba imi-nia kontribuisaun neʼebé imi fó ho laran-luak!