Maromak promete paraízu ida

DEZEÑU ida-neʼe mak karik hanesan ho paraízu neʼebé Maromak hatudu ba ninia profeta Isaías. Lakleur depois tempu Jonas, Isaías moris.

Paraízu katak “jardín”. Ida-neʼe fó-hanoin mai ita buat ruma neʼebé ita haree tiha ona iha livru neʼe, loos ka lae? Neʼe atu hanesan ho jardín kapás neʼebé Maromak Jeová halo ba Adão no Eva, loos ka lae? Maibé, mundu tomak sei sai duni paraízu ka lae?

Jeová haruka ninia profeta Isaías atu hakerek ba Maromak nia povu kona-ba paraízu foun neʼebé atu mai. Nia hatete: ‘Asu-fuik no bibi-malae sei hela hamutuk ho dame. Karau-oan no leaun-oan sei han hamutuk, no labarik kiʼik sei tau matan ba sira. Toʼo bebé ida mós sei la hetan kanek maski halimar besik samea neʼebé iha venenu.’

Ema barak sei hatete: ‘Buat neʼe sei nunka akontese. Iha mundu, sempre iha problema toʼo agora, no sei iha nafatin.’ Maibé hanoin toʼok: Fatin hanesan saida mak uluk Maromak fó ba Adão no Eva?

Maromak tau Adão no Eva iha paraízu. Tanba la halo tuir Maromak mak sira halo lakon sira-nia hela-fatin neʼebé kapás, sai ferik-katuas no mate. Maromak promete ba ema neʼebé hadomi nia katak nia sei fó duni buat neʼebé Adão no Eva halo lakon tiha ona.

Iha paraízu foun neʼebé besik atu mai, sei la iha buat ida neʼebé hakanek ka estraga buat seluk. Sei iha dame neʼebé loos. Ema hotu sei iha isin-diʼak no moris kontente. Ida-neʼe mak Maromak nia hakarak husi tempu uluk kedas. Maibé, ita sei aprende oinsá mak Maromak sei halo buat hirak-neʼe mosu.