Haʼu bele hetan esperansa husi neʼebé?

Bíblia nia resposta

Bíblia hatete katak Maromak hakarak fó ita “futuru kapás no esperansa”.a (Jeremias 29:11) Loloos, razaun ida Maromak fó Bíblia mai ita mak atu “fó ita esperansa tanba Eskritura sira-neʼe ajuda ita atu tahan no fó kmaan mai ita”. (Roma 15:4) Bíblia nia matadalan sira bele ajuda ita atu iha hanoin pozitivu kuandu hasoru problema loroloron nian. No Bíblia mós fó sai promesa sira kona-ba futuru neʼebé bele fó ita esperansa.

Iha informasaun neʼe

Oinsá mak Bíblia ajuda ita atu iha hanoin pozitivu?

Bíblia fó ita matadalan kona-ba saida deʼit mak ita bele halo atu ita-nia moris sai diʼak liu no neʼe ajuda ita atu hanoin pozitivu. Hanoin toʼok kona-ba ezemplu balu.

Buka matadalan husi Bíblia. Salmo 119:105 dehan: “Ita-nia liafuan mak ahi-oan neʼebé leno haʼu-nia ain, no naroman ba haʼu-nia dalan.” Ahi-oan neʼebé naroman bele ajuda ita atu haree didiʼak saida mak iha ita-nia oin kedas, no mós bele haree buat neʼebé dook. Bíblia mós hanesan ahi-oan neʼebé naroman. Ninia matadalan sira bele ajuda ita atu tahan hasoru problema neʼebé kona daudauk ita, no neʼe ajuda ita atu iha hanoin pozitivu loroloron. Bíblia nia hanorin sira bele fó forsa mai ita no halo ita-nia “laran haksolok”. (Salmo 19:7, 8) Iha tempu hanesan, Bíblia mós hatudu sai Maromak nia planu furak ba ema hotu no ba mundu neʼe. Esperansa neʼe bele halo ita sente kontente no haksolok ba nafatin.
Simu ema seluk nia ajuda. Kuandu ita sente hanesan lakon esperansa ho ita-nia situasaun, karik neʼe halo ita hakarak hadook an husi família no belun sira. Maibé Bíblia hatete katak la diʼak atu hadook an hanesan neʼe tanba neʼe bele halo ita foti desizaun neʼebé la matenek. (Provérbios 18:1) Ema neʼebé hadomi ita bele ajuda ita atu iha hanoin neʼebé loos. Sira mós bele fó sujestaun ruma kona-ba oinsá mak ita bele hasoru situasaun neʼe ho matenek. (Provérbios 11:14) No maski karik sira labele halo buat ruma atu ajuda ita, maibé sira bele fó kmaan ba ita no ajuda ita sente diʼak, hodi fó forsa ba ita atu bele tahan durante tempu susar.—Provérbios 12:25.
Halo orasaun ba Maromak. Bíblia hatete: “Entrega ó-nia laran-susar ba Jeová, no nia sei apoia ó. Nia sei nunka husik ema laran-loos atu monu.”b (Salmo 55:22) Jeová mak “Maromak neʼebé fó esperansa”. (Roma 15:13) Ita bele halo orasaun ba nia hodi fó sai Ita-nia “laran-susar hotu” no fiar katak nia hanoin duni Ita. (1 Pedro 5:7) Bíblia dehan: “Nia sei hametin imi, nia sei halo imi forte, nia sei halo imi hamriik metin.”—1 Pedro 5:10.
Haree susar sira nuʼudar oportunidade atu hametin Ita-nia esperansa. Bíblia promete ba ita: “Ema neʼebé rona [Maromak] sei moris hakmatek no la sente taʼuk kona-ba susar sira.” (Provérbios 1:33) Feto ida iha Austrália naran Margaret, lakon sasán barak kuandu anin-boot estraga ninia uma. Maibé duké sente neon-susar deʼit, nia aprende lisaun importante husi dezastre neʼe: Sasán sira bele lakon lalais deʼit. Husi tempu neʼebá, nia fokus liután ba buat neʼebé importante liu hanesan ninia família ho belun sira, ninia relasaun ho Maromak, no esperansa husi Bíblia.—Salmo 37:34; Tiago 4:8.

Bíblia fó esperansa saida ba ema hotu?

Bíblia promete futuru kapás ba ema no mundu. No lakleur tan ida-neʼe sei akontese. Tuir loloos problema sira neʼebé ita ema hasoru ohin loron hatudu katak ita moris iha mundu neʼe nia “loron ikus sira”. (2 Timóteo 3:1-5) Lakleur tan Maromak sei kontrola mundu nia situasaun, no nia sei halakon terus no buat hotu neʼebé la justisa. Nia sei halo ida-neʼe liuhusi ninia Ukun, ka governu ida iha lalehan neʼebé sei ukun mundu tomak. (Daniel 2:44; Apokalipse 11:15) Jesus koʼalia kona-ba governu neʼe kuandu nia hatoʼo orasaun Ami Aman hodi dehan: “Halo Ita-nia Ukun toʼo mai rai. Halo Ita-nia hakarak sai loos iha rai.”—Mateus 6:9, 10.

Bíblia fó sai ho klaru kona-ba Maromak nia hakarak ba ema hotu. Hanoin toʼok kona-ba problema balu neʼebé Maromak nia Ukun sei halakon:

La iha tan rai-hamlaha. “Rai sei fó ninia fuan.”—Salmo 67:6.
La iha tan moras. “La iha ema ida iha rai mak sei dehan: ‘Haʼu moras.’”—Isaias 33:24.
La iha tan mate. Maromak “sei hamaran [ema nia] matan-been hotu husi sira-nia matan, mate sei la iha tan, no ema sei la triste tan ka tanis ka sente moras. Buat sira neʼebé uluk nian lakon tiha ona”.—Apokalipse 21:3, 4.

a Iha esperansa, neʼe katak hakarak tebes buat ruma no fiar katak ita sei hetan. Esperansa mós refere ba buat neʼebé ita hein namanas.

b Jeová mak Maromak nia naran neʼebé temi iha Bíblia.—Salmo 83:18.

Eskritura sira kona-ba esperansa

Job 5:16: “Ema kiʼik sira bele iha esperansa.”

Signifika: Ema neʼebé sente katak ema seluk la hanoin sira, bele fiar katak Maromak sei tau matan ba sira kuandu sira husu ninia ajuda.

Salmo 27:14: “Tau esperansa ba Jeová; sai aten-brani no sai forte bá. Sin, tau esperansa ba Jeová.”

Signifika: Bainhira ita tau fiar metin ba Maromak Jeová, ita hetan forsa no aten-brani. Nia sei la haluha kona-ba ema neʼebé tau fiar ba nia.

Salmo 62:5: “Haʼu hein deʼit ba Maromak ho pasiénsia tanba haʼu-nia esperansa mai husi nia.”

Signifika: Ema neʼebé sadere ba Maromak nuʼudar sira tahan hasoru problema oioin ho pasiénsia, bele fiar duni katak Maromak sei halakon sira-nia problema iha tempu neʼebé loos.

Provérbios 20:22: “Keta hatete: ‘Haʼu sei selu aat fali!’ Tau esperansa ba Jeová, no nia sei salva ó.”

Signifika: Bainhira ema ruma hakanek ita ka halo ita laran-kraik, ita bele kontra hasoru ita-nia hakarak atu selu aat fali se ita tau esperansa ba Jeová. Nia iha podér no mós hakarak atu salva ita no atu halakon susar hotu neʼebé ita hetan.

Ebreu 6:19: “Ita iha esperansa neʼe hanesan ankor neʼebé loos no metin ba ita-nia moris.”

Signifika: Ankor ida bele halo ró estavel nafatin durante anin-fuik. Hanesan neʼe mós, esperansa neʼebé ita hetan husi Maromak bele ajuda ita atu kalma nafatin, hanoin ho didiʼak no nafatin iha fiar metin. Ita-nia esperansa mós ajuda ita atu tahan hasoru susar neʼebé ita hasoru.