“Hadomi imi-nia inimigu” katak sá?
Bíblia nia resposta
Iha Jesus nia diskursu ida neʼebé famozu, nia hatete: “Hadomi nafatin imi-nia inimigu.” (Mateus 5:44; Lucas 6:27, 35) Liafuan neʼe katak ita tenke hatudu domin ba ema neʼebé odi ita ka trata ita iha dalan neʼebé la justisa.
Jesus hatudu domin ba ninia inimigu sira hodi fó perdua ba sira neʼebé fó-terus ba nia. (Lucas 23:33, 34) Nia hanorin kona-ba hadomi ita-nia inimigu hodi tuir buat neʼebé temi iha Eskritura Lian Ebraiku, neʼebé baibain hanaran Testamentu Tuan ka Antigu Testamentu.—Éxodo 23:4, 5; Provérbios 24:17; 25:21.
“Hadomi nafatin imi-nia inimigu no harohan ba ema neʼebé haterus imi.”—Mateus 5:43, 44.
Iha informasaun neʼe
Tanbasá hadomi Ita-nia inimigu?
Maromak hatudu ezemplu. Maromak “hatudu laran-diʼak ba ema neʼebé la fó agradese no ema aat”. (Lucas 6:35) Nia “halo loro-matan saʼe ba ema aat”.—Mateus 5:45.
Domin bele book inimigu troka ninia hahalok. Bíblia hatete katak ita tenke trata ita-nia inimigu ho diʼak, hodi halo nuneʼe, ita “tau ahi-klaak iha ninia ulun leten”. (Provérbios 25:22) Ilustrasaun neʼe kona-ba prosesu atu hamanas mineiru atu halo nabeen no hasai besi neʼebé folin-boot. Hanesan neʼe mós se ita hatudu laran-diʼak ba ema neʼebé odi ita, ita bele halo nabeen ninia hirus no hasai fali hahalok diʼak iha ninia laran.
Ita bele hatudu domin ba Ita-nia inimigu iha dalan saida deʼit?
“Halo diʼak ba ema neʼebé odi imi.” (Lucas 6:27) Bíblia hatete: “Se ó-nia inimigu hamlaha, fó-han ba nia; se nia hamrook, fó buat ruma ba nia atu hemu.” (Roma 12:20) Ita mós bele hetan dalan seluk tan atu hatudu domin ba inimigu hodi aplika Ukun-Fuan Osan-Mean neʼebé hatete: “Buat neʼebé imi hakarak ema halo ba imi, halo mós nuneʼe ba sira.”—Lucas 6:31.
“Haraik bensaun ba sira neʼebé fó-malisan ba imi.” (Lucas 6:28) Ita fó bensaun ba ita-nia inimigu hodi koʼalia ho laran-diʼak no hanoin sira maski sira koʼalia la diʼak ba ita. Bíblia hatete: “Keta selu . . . liafuan kroʼat ho liafuan kroʼat. Maibé, koʼalia ho laran-diʼak bá.” (1 Pedro 3:9) Konsellu neʼe bele ajuda ita atu hapara siklu odi malu.
“Harohan ba sira neʼebé koʼalia aat imi.” (Lucas 6:28) Se ema ida koʼalia aat Ita, “keta selu aat ho aat”. (Roma 12:17) Diʼak liu husu Maromak atu perdua ema neʼe. (Lucas 23:34; Apóstolu 7:59, 60) Duké selu fali aat, husik ida-neʼe ba Maromak atu tesi-lia tuir Ninia justisa neʼebé perfeitu.—Levítico 19:18; Roma 12:19.
“Hadomi nafatin imi-nia inimigu, no halo diʼak ba ema neʼebé odi imi, husu Maromak atu haraik bensaun ba sira neʼebé fó-malisan ba imi, no harohan ba sira neʼebé koʼalia aat imi.”—Lucas 6:27, 28.
Hatudu “pasiénsia no laran-diʼak”. (1 Korinto 13:4) Bainhira apóstolu Paulo esplika kona-ba domin, nia uza liafuan Gregu (a·gaʹpe) neʼebé hanesan ho liafuan neʼebé hakerek iha Mateus 5:44 no Lucas 6:27, 35. Ita hatudu domin Kristaun hanesan neʼe ba ema hotu inklui ita-nia inimigu hodi hatudu pasiénsia no laran-diʼak duké sai laran-moras, foti an, ka la respeitu.
“Domin mak pasiénsia no laran-diʼak. Domin la laran-moras, la gaba an, la foti an. Domin la hatudu hahalok la respeitu, la buka diʼak ba ninia an rasik, la sai hirus lalais. Domin la hanoin fali buat aat neʼebé nia simu. Domin la haksolok ho hahalok la loos, maibé haksolok ho lia-loos. Domin lori todan hotu, fiar buat hotu, tau esperansa ba buat hotu, no tahan buat hotu. Domin nunka lakon.”—1 Korinto 13:4-8.
Ita presiza bá funu hasoru Ita-nia inimigu ka lae?
Lae, Jesus hanorin ninia dixípulu sira katak sira labele halo funu hasoru sira-nia inimigu. Porezemplu, bainhira Jesus fó avizu ba sira kona-ba ema sei ataka Jeruzalein, nia la haruka sira atu kontinua hela iha sidade laran no kontra hasoru, maibé haruka sira atu halai. (Lucas 21:20, 21) Jesus mós hatete ba apóstolu Pedro: “Hatama fali ó-nia surik ba ninia fatin, tanba ema hotu neʼebé kaer surik sei mate ho surik.” (Mateus 26:52) Bíblia no istória fó sai katak Jesus nia dixípulu iha tempu neʼebá la funu hasoru sira-nia inimigu.a—2 Timóteo 2:24.
Hanoin neʼebé sala kona-ba hadomi Ita-nia inimigu
Hanoin neʼebé sala: Maromak nia Ukun-Fuan haruka ema Izraél atu odi sira-nia inimigu.
Faktu: Ukun-Fuan la fó mandamentu hanesan neʼe maibé haruka ema Izraél atu hadomi sira-nia maluk. (Levítico 19:18) Liafuan “maluk” neʼe katak ema seluk, maibé ema Judeu balu hanorin katak liafuan neʼe refere deʼit ba sira-nia maluk Judeu, no sira fiar katak ema neʼebé laʼós Judeu mak inimigu neʼebé sira tenke odi. (Mateus 5:43, 44) Jesus korrije sira-nia hanoin neʼebé sala hodi konta ai-knanoik kona-ba ema Samaria neʼebé laran-diʼak.—Lucas 10:29-37.
Hanoin neʼebé sala: Hadomi Ita-nia inimigu, neʼe katak simu deʼit sira-nia hahalok aat.
Faktu: Bíblia hatudu katak ita bele hadomi ema seluk maski la simu ninia hahalok aat. Porezemplu, Jesus bandu violénsia maibé nia halo orasaun ba ema neʼebé fó-terus ba nia. (Lucas 23:34) Nia odi hahalok neʼebé la halo tuir ukun-fuan, ka sala, maibé nia fó ninia moris ba ema sala-naʼin sira.—João 3:16; Roma 6:23.
a Livru The Rise of Christianity husi E. W. Barnes hatete: “Informasaun hotu neʼebé matenek-naʼin sira hetan fó sai katak toʼo Marcus Aurelius [Imperadór Roma husi tinan 161 toʼo 180 EC] nia tempu, la iha ema Kristaun ida mak sai soldadu; no bainhira soldadu ida sai tiha Kristaun, nia para halo serbisu militár.”