Estuda Bíblia bele lori benefísiu barak, maibé dala ruma la fasil atu kontinua estuda Bíblia. Karik Ita hanoin se Ita bele kontinua estuda ka lae. Tanbasá diʼak atu hakaʼas an hodi kontinua estuda Bíblia? No saida mak bele ajuda Ita atu kontinua estuda maski hasoru problema balu?

1. Tanbasá estuda Bíblia mak folin-boot?

“Maromak nia liafuan moris no iha kbiit boot.” (Ebreu 4:12) Bíblia iha folin-boot duni tanba fó sai Maromak nia hanoin no sentimentu ba Ita. Neʼe ajuda Ita atu hetan koñesimentu kona-ba lia-loos no mós fó Ita matenek neʼebé loos no esperansa. Importante liu mak Bíblia bele ajuda Ita sai Jeová nia belun. Bainhira Ita estuda Bíblia, neʼe hanesan Ita husik kbiit husi Maromak nia Liafuan halo Ita-nia moris sai diʼak liu.

2. Tanbasá importante atu haree lia-loos husi Bíblia nuʼudar buat neʼebé folin-boot?

Lia-loos husi Bíblia mak hanesan rikusoin neʼebé folin-boot. Tan neʼe mak Bíblia anima ita atu “sosa lia-loos no keta faʼan fali”. (Provérbios 23:23) Bainhira ita rekoñese katak lia-loos husi Bíblia mak folin-boot, ita sei hakaʼas an atu kontinua estuda Bíblia maski hasoru susar naran deʼit.​—Lee Provérbios 2:4, 5.

3. Oinsá mak Jeová bele ajuda Ita atu kontinua estuda?

Nuʼudar Ita-nia Belun no Kriadór neʼebé Aas Liu Hotu, Jeová hakarak ajuda Ita aprende kona-ba nia. Nia bele fó ba Ita “hakarak no kbiit atu halo buat neʼebé nia hakarak”. (Lee Filipe 2:13.) Nia prontu atu ajuda Ita kuandu Ita presiza motivasaun atu estuda no aplika buat neʼebé Ita aprende. Nia mós bele fó kbiit ba Ita atu tahan hasoru susar ka kuandu ema kontra Ita. Husu beibeik ba Jeová liuhusi orasaun atu ajuda Ita kontinua estuda Bíblia.​—1 Tesalónika 5:17.

KEʼE KLEʼAN

4. Haree estuda Bíblia nuʼudar buat neʼebé importante tebes

Dala ruma Ita sente okupadu demais toʼo la iha tempu atu estuda Bíblia. Saida mak bele ajuda Ita? Lee Filipe 1:10, depois koʼalia hamutuk kona-ba pergunta tuirmai:

• Tuir Ita-nia hanoin, saida mak “buat sira neʼebé importante liu” iha moris?

• Saida mak Ita bele halo atu estuda Bíblia sai buat neʼebé importante tebes?

1. Se Ita enxe rai-henek ba balde ida no koko aumenta fatuk ba laran, fatuk balu sei labele tama

2. Se Ita enxe uluk fatuk ba laran, sei iha fatin atu enxe rai-henek barak. Nuneʼe mós, se Ita tau uluk “buat sira neʼebé importante liu” iha Ita-nia moris, Ita sei kumpre duni ida-neʼe no sei iha tempu atu halo buat seluk tan

Ita presiza tebes atu koñese Maromak no iha relasaun diʼak ho nia. No estuda Bíblia bele ajuda ita atu halo ida-neʼe. Lee Mateus 5:3, depois koʼalia hamutuk kona-ba pergunta tuirmai:

• Benefísiu saida mak ita sei hetan se Ita haree estuda Bíblia nuʼudar buat neʼebé importante tebes?

5. Kontinua estuda maski ema kontra

VÍDEO: Hetan bensaun tanba kontinua estuda (5:22)

• Iha vídeo neʼe, Francesco nia família no kolega sira dehan saida kuandu nia komesa koʼalia kona-ba buat neʼebé nia aprende?

• Bensaun saida deʼit mak nia hetan tanba kontinua estuda?

Lee 2 Timóteo 2:24, 25, depois koʼalia hamutuk kona-ba pergunta tuirmai:

• Ita-nia família no kolega sira sente oinsá kona-ba Ita bainhira Ita aprende Bíblia?

• Tuir eskritura neʼe, saida mak Ita tenke halo kuandu ema ruma la kontente tanba Ita estuda Bíblia? Tanbasá?

6. Sadere ba Jeová nia ajuda

VÍDEO: Jeová ajuda ita halo mudansa (3:56)

• Iha vídeo neʼe, Jim halo mudansa saida deʼit atu halo kontente Jeová?

• Ita gosta saida husi ninia ezemplu?

Lee Ebreu 11:6, depois koʼalia hamutuk kona-ba pergunta tuirmai:

• Saida mak Jeová sei halo ba ema neʼebé “buka nia ho laran” ka hakaʼas an atu koñese no halo tuir nia?

• Tuir eskritura neʼe, Jeová sente oinsá bainhira Ita hakaʼas an atu estuda Bíblia?

PONTU IMPORTANTE

Maski dala ruma la fasil, maibé estuda Bíblia bele ajuda Ita moris haksolok ba nafatin. Kontinua sadere ba Jeová, no nia sei ajuda Ita.

Rezumu

• Tanbasá mak lia-loos sira husi Bíblia iha folin-boot ba Ita?

• Saida mak Ita bele halo atu tau uluk “buat sira neʼebé importante liu”?

• Tanbasá diʼak atu husu Jeová nia ajuda atu bele kontinua estuda Bíblia?

BUKA-HATENE LIUTÁN

Haree toʼok dalan haat neʼebé ajuda ona ema barak atu uza sira-nia tempu ho matenek.

“Oinsá atu uza ita-nia tempu ho matenek” (Matan-moris bá!, Abríl 2014)

Laʼen ida la komprende tanbasá ninia feen hakarak halo kontente Maromak. Haree oinsá Jeová ajuda feen neʼe.

Jeová sei hametin no fó kmaan mai ita (5:05)

Haree oinsá mane ida hetan benefísiu tanba ninia feen kontinua estuda Bíblia.

Haʼu buka-hetan lia-loos (6:30)

Dala ruma ema duun katak Testemuña ba Jeová sobu ema nia família. Maibé neʼe loos ka lae?

“Testemuña ba Jeová sobu família ka hametin moris família nian?” (Informasaun iha jw.org/tdt)

Ita hotu presiza halo desizaun oioin. Desizaun barak neʼebé ita halo bele fó impaktu ba ita-nia an no ita-nia relasaun ho Jeová. Porezemplu, karik ita presiza deside kona-ba hela-fatin, oinsá atu buka moris, ka kona-ba kaben. Bainhira ita halo desizaun neʼebé diʼak, ita bele moris kontente no halo Jeová kontente.

1. Oinsá Bíblia bele ajuda ita atu halo desizaun diʼak?

Antes atu halo desizaun, husu Jeová nia ajuda liuhusi orasaun, no buka-hatene ninia hanoin liuhusi Bíblia. (Lee Provérbios 2:3-6.) Iha situasaun balu, Jeová fó ona mandamentu neʼebé klaru. Se nuneʼe, desizaun diʼak liu mak atu halo tuir mandamentu neʼe.

Maibé oinsá se Bíblia la fó sai ukun-fuan ka mandamentu klaru kona-ba buat neʼebé ita presiza halo? Jeová nafatin dirije ita ‘iha dalan neʼebé ita tenke laʼo bá’. (Isaias 48:17) Oinsá? Bíblia fó sai prinsípiu sira neʼebé sai nuʼudar matadalan ba ita. Bíblia nia prinsípiu sira mak lia-loos báziku neʼebé hatudu sai Maromak nia hanoin no sentimentu. Bainhira ita lee istória sira husi Bíblia, ita bele hatene oinsá Maromak sente kona-ba ema nia hahalok ruma. Kuandu ita komprende Jeová nia sentimentu, ita bele halo desizaun neʼebé halo nia kontente.

2. Antes halo desizaun, Ita presiza hanoin didiʼak kona-ba saida?

Bíblia hatete: “Ema neʼebé matenek hanoin didiʼak kona-ba ninia hakat ida-idak.” (Provérbios 14:15) Neʼe katak, antes halo desizaun ruma, ita presiza uza tempu atu hanoin didiʼak kona-ba opsaun neʼebé ita bele hili. Bainhira tetu opsaun ida-idak, husu ba Ita-nia an: ‘Bíblia nia prinsípiu saida deʼit mak kona haʼu-nia situasaun? Opsaun ida-neʼebé mak halo haʼu laran-hakmatek? Oinsá mak haʼu-nia desizaun kona ema seluk? Importante liu mak, haʼu-nia desizaun neʼe halo Jeová kontente ka lae?’​—Deuteronómio 32:29.

Jeová iha direitu atu deside mai ita kona-ba buat neʼebé diʼak no aat. Kuandu ita hatene didiʼak ninia ukun-fuan no prinsípiu sira no hakaʼas an atu halo tuir, ita bele treinu ita-nia konxiénsia. Konxiénsia mak ita-nia sentimentu neʼebé tesi-lia kona-ba buat neʼebé loos no sala. (Roma 2:14, 15) Konxiénsia neʼebé hetan ona treinu sei ajuda ita atu halo desizaun neʼebé diʼak.

KEʼE KLEʼAN

3. Halo tuir Bíblia nia matadalan

VÍDEO: Husik Bíblia nia prinsípiu mak dirije Ita (5:54)

• Prezente furak saida mak Jeová fó mai ita?

• Tanbasá mak Jeová fó ita liberdade atu halo desizaun rasik?

• Atu ajuda ita halo desizaun diʼak, Jeová fó saida mai ita?

Atu haree ezemplu ida kona-ba Bíblia nia prinsípiu, lee Éfeso 5:15, 16. Depois koʼalia hamutuk kona-ba oinsá mak Ita bele ‘uza didiʼak ita-nia tempu’ atu . . .

• lee Bíblia beibeik.

• hadiʼa liután ita-nia hahalok nuʼudar laʼen, feen, inan-aman ka oan.

• tuir reuniaun beibeik.

4. Treinu Ita-nia konxiénsia atu bele halo desizaun diʼak

VÍDEO: “Kontinua iha konxiénsia neʼebé diʼak” (5:13)

• Irmán iha vídeo neʼe halo hakat saida deʼit atu treinu ninia konxiénsia no foti desizaun neʼebé halo Jeová kontente?

Tanbasá mak ita labele husu ema seluk atu halo desizaun ba ita-nia an rasik? Lee Ebreu 5:14, depois koʼalia hamutuk kona-ba pergunta tuirmai:

• Maski haree hanesan fasil liu atu husu ema seluk halo desizaun mai ita, maibé ita rasik presiza hatene kona-ba saida?

• Saida deʼit mak bele ajuda Ita atu treinu Ita-nia konxiénsia no halo desizaun diʼak?

5. Respeitu ema seluk nia konxiénsia

Ema ida-idak halo desizaun neʼebé la hanesan. Oinsá mak ita bele hatudu respeitu ba ema seluk nia konxiénsia? Hanoin toʼok situasaun rua tuirmai:

Situasaun 1: Irmán ida neʼebé gosta pinta fuuk muda ba kongregasaun neʼebé irmán barak sente la diʼak kona-ba pinta fuuk.

Lee Roma 15:1 no 1 Korinto 10:23, 24, depois koʼalia hamutuk kona-ba pergunta tuirmai:

• Tuir eskritura sira-neʼe, karik irmán neʼe bele deside saida? Saida mak Ita sei halo se Ita hamutuk ho ema neʼebé sente la diʼak kona-ba buat neʼebé tuir Ita-nia konxiénsia la sala?

Situasaun 2: Irmaun ida hatene katak tuir Bíblia la sala atu hemu tua, maibé nia deside ona atu la hemu tua. Nia simu konvite atu ransu ho maluk Kristaun, no nia haree irmaun sira hemu tua.

Lee Eclesiastes 7:16 no Roma 14:1, 10, depois koʼalia hamutuk kona-ba pergunta tuirmai:

• Tuir eskritura sira-neʼe, karik irmaun neʼe bele deside saida? Saida mak Ita sei halo kuandu Ita haree ema seluk halo buat neʼebé la diʼak tuir Ita-nia konxiénsia?

Hakat sira atu halo desizaun neʼebé diʼak

1. Husu Jeová atu ajuda Ita halo desizaun neʼebé diʼak.​—Tiago 1:5.

2. Buka informasaun husi Bíblia no publikasaun sira neʼebé bazeia ba Bíblia atu hetan prinsípiu sira neʼebé kona Ita-nia situasaun. Bele mós koʼalia ho maluk Kristaun neʼebé iha ona esperiénsia.

3. Hanoin kona-ba rezultadu husi Ita-nia desizaun, neʼe sei fó impaktu saida ba Ita rasik no ema seluk nia konxiénsia.

PONTU IMPORTANTE

Ita bele halo desizaun diʼak kuandu Ita buka-hatene oinsá Jeová sente kona-ba situasaun ruma, no oinsá Ita-nia desizaun sei fó impaktu ba ema seluk.

Rezumu

• Oinsá mak Ita bele halo desizaun neʼebé halo Jeová kontente?

• Oinsá mak Ita bele treinu Ita-nia konxiénsia?

• Oinsá mak Ita bele hatudu respeitu ba ema seluk nia konxiénsia?

BUKA-HATENE LIUTÁN

Oinsá mak Ita bele halo desizaun neʼebé ajuda Ita hakbesik liután ba Maromak?

“Halo desizaun neʼebé lori hahiʼi ba Maromak” (Livru Haklaken, 15 Abríl 2011)

Aprende liután kona-ba oinsá mak Jeová fó matadalan mai ita.

Jeová dirije ninia povu (9:50)

Haree toʼok saida deʼit mak ajuda mane ida atu halo desizaun neʼebé susar.

Jeová fó garantia neʼebé diʼak liu hotu (5:46)

Aprende liután oinsá atu halo Jeová kontente bainhira nia la fó mandamentu espesífiku kona-ba situasaun ruma.

“Ita sempre presiza ukun-fuan husi Bíblia ka lae?” (Livru Haklaken, 1 Dezembru 2003)