Loron neʼebé ita sei mate mak tuir ida-idak nia destinu ka lae?
Bíblia nia resposta
Lae, Maromak la deside nanis tempu neʼebé ita sei mate. Tuir loloos, Bíblia la apoia ideia kona-ba destinu, maibé fó sai katak dala barak ema mate tanba “situasaun neʼebé mosu derrepente deʼit”.—Eclesiastes 9:11.
Bíblia dehan katak iha “tempu atu mate”, loos ka lae?
Sin, Eclesiastes 3:2 dehan katak iha “tempu atu moris mai no tempu atu mate; tempu atu kuda no tempu atu fokit sai buat neʼebé kuda tiha ona”. Maibé, kontestu hatudu katak versíkulu sira-neʼe hatete kona-ba buat oioin neʼebé akontese iha ema hotu nia moris. (Eclesiastes 3:1-8) Maromak la planu nanis tempu neʼebé ema ida-idak sei mate, hanesan Nia mós la obriga toʼos-naʼin ida-idak atu kuda fini iha tempu neʼebé deside nanis. Maibé, versíkulu sira-neʼe hanorin katak ita labele sai okupadu demais ho atividade baibain toʼo haluha ita-nia Kriadór.—Eclesiastes 3:11; 12:1, 13.
Ita bele hanaruk ita-nia moris
Maski iha akontesimentu neʼebé mosu derrepente deʼit, ita bele moris naruk se ita halo desizaun ho matenek. Bíblia hatete: “Ema matenek nia hanorin lori ba moris no hasees ema husi lasu mate nian.” (Provérbios 13:14) Moisés mós fó-hatene ema Izraél katak sira bele “moris naruk” se sira halo tuir Maromak nia ukun-fuan. (Deuteronómio 6:2) Maibé, se ita foti desizaun neʼebé beik, neʼe bele habadak ita-nia moris.—Eclesiastes 7:17.
Tuir loloos, maski ita matenek ka kuidadu tebes, ita hotu sei mate. (Roma 5:12) Maibé, situasaun neʼe sei troka, tanba Bíblia promete katak iha futuru “mate sei la iha tan”.—Apokalipse 21:4.