Mateus 6:34—“Keta hanoin resin kona-ba loron aban”

“Tan neʼe, keta hanoin resin kona-ba loron aban, tanba loron aban iha ninia susar rasik. Loron ida-idak iha ninia problema rasik.”—Mateus 6:34, Tradusaun Mundu Foun.

“Lalika preokupa kona ba loron aban, tanba loron aban nee preokupasaun ketak fali.”—Mateus 6:34, Tetun Dili Alkitab.

Signifikadu husi Mateus 6:34

Jesus nia liafuan neʼe fó-hanoin ninia dixípulu sira atu la hanoin resin kona-ba problema neʼebé seidauk akontese. Diʼak liu atu sira hanoin deʼit problema neʼebé mosu iha loron ida-idak nian.

Jesus la dehan katak ita labele hanoin kona-ba loron aban ka halo planu. (Provérbios 21:5) Maibé Jesus fó-hanoin ita atu lalika hanoin resin ka hanoin barak demais kona-ba buat neʼebé karik sei akontese iha loron aban. Se ita hanoin barak demais, neʼe bele halakon ita-nia ksolok no halo ita la fokus ba responsabilidade neʼebé agora ita iha. Hodi hanoin resin kona-ba problema ida, neʼe la ajuda ita atu rezolve ida-neʼe. No loloos, buat neʼebé ita hanoin karik sei nunka akontese, no se ida-neʼe akontese, karik la aat hanesan buat neʼebé ita imajina.

Kontestu husi Mateus 6:34

Jesus nia liafuan sira-neʼe mak parte husi ninia diskursu neʼebé nia hatoʼo iha foho, neʼebé hakerek iha Mateus kapítulu 5-7. Iha ninia diskursu neʼe, Jesus esplika katak hanoin barak labele halo ita moris naruk liu ka halo ita kontente liu. (Mateus 6:27) Nia mós dehan katak kuandu ita tau uluk Maromak iha ita-nia moris, ita la presiza hanoin barak kona-ba loron aban. Tanba se Maromak tau matan ba ai-horis no animál sira, nia mós tau matan ba ema sira neʼebé serbí Nia.—Mateus 6:25, 26, 28-33.