Mateus 11:28-30—“Mai besik haʼu, . . . Haʼu sei fó kmaan ba imi”

“Mai besik haʼu, imi hotu neʼebé kole tanba serbisu makaʼas no lori naha todan. Haʼu sei fó kmaan ba imi. Lori haʼu-nia ai-leba no aprende husi haʼu, tanba haʼu laran-maus no haraik an, no imi sei sente kmaan. Tanba haʼu-nia ai-leba fasil atu lori, no haʼu-nia naha kmaan.”—Mateus 11:28-30, Tradusaun Mundu Foun.

“Mai besik Haʼu, imi hotu nebe kole no terus; Haʼu sei fo kmaan ba imi. Simu Haʼu nia ukun ba hodi banati tuir Haʼu, tan Haʼu laran kmaus no haraik an; no imi sei hetan hakmatek ba imi nia klamar. Basa Haʼu nia ukun mamar, Haʼu nia naha kmaan.”—Mateus 11:28-30, Liafuan diak ba imi, segunda edisaun.

Signifikadu husi Mateus 11:28-30

Jesus ho laran-diʼak konvida ema atu hakbesik ba nia. Nia fó garantia katak ema neʼebé aprende husi nia sei sente fresku no kmaan.

“Mai besik haʼu, imi hotu neʼebé kole tanba serbisu makaʼas no lori naha todan.” Jesus fó konvite neʼe ba ema neʼebé “lori naha todan” tanba ulun-naʼin relijiaun sira obriga sira atu halo tuir mandamentu no tradisaun neʼebé ema mak inventa. (Mateus 23:4; Marcos 7:7) Iha tempu neʼebá ema barak sente laran-susar no kole tanba serbisu makaʼas ba oras barak atu bele hetan ai-han uitoan ba sira-nia família.

“Haʼu sei fó kmaan ba imi.” Jesus promete atu fó kmaan ba sira neʼebé simu ninia konvite. Jesus halo nuneʼe hodi ajuda sira atu komprende ho loloos saida mak Maromak hakarak sira atu halo. (Mateus 7:24, 25) Koñesimentu neʼe halo sira sai livre husi ideia falsu no ema nia tradisaun oioin neʼebé hanehan sira. (João 8:31, 32) Maski sira presiza hakaʼas an atu aprende no aplika Jesus nia hanorin, maibé loloos neʼe halo sira sente fresku.

“Lori haʼu-nia ai-leba no aprende husi haʼu.” Iha tempu Bíblia, serbisu-naʼin sira uza beibeik ai-leba atu lori buat neʼebé todan. Tan neʼe, liafuan “ai-leba” fó ideia katak hakruʼuk ba ema seluk nia autoridade no halo tuir ninia matadalan. (Levítico 26:13; Isaias 14:25; Jeremias 28:4) Fraze “aprende husi haʼu” bele mós tradús nuʼudar “sai haʼu-nia dixípulu”. Entaun Jesus anima ema neʼebé rona ba nia atu sai ninia dixípulu hodi halo tuir ninia hanorin no ezemplu.—João 13:13-15; 1 Pedro 2:21.

“Imi sei sente kmaan.” Jesus la promete ba ema neʼebé rona atu halakon kedas sira-nia problema hotu. Maibé nia ajuda sira atu sente kmaan no hetan esperansa. (Mateus 6:25-32; 10:29-31) Ema neʼebé sai Jesus nia dixípulu no halo tuir ninia hanorin sei sente katak serbí Maromak mak laʼós buat neʼebé todan ba sira, maibé halo sira hetan kontente neʼebé loos.—1 João 5:3.

“Tanba haʼu-nia ai-leba fasil atu lori, no haʼu-nia naha kmaan.” La hanesan ho ulun-naʼin relijiaun sira, Jesus mak ema haraik an no laran-maus. (João 7:47-49) Nia nunka trata aat ka ameasa ema, maibé nia sempre laran-diʼak no ema seluk sente fasil atu hakbesik ba nia. Nia komprende dixípulu sira-nia limitasaun no la husu buat neʼebé liu fali sira-nia kbiit. (Mateus 7:12; Marcos 6:34; Lucas 9:11) Jesus mós hatudu ba sira oinsá sira bele hetan benefísiu husi Maromak nia laran-diʼak no sente haksolok tanba iha konxiénsia neʼebé moos. (Mateus 5:23, 24; 6:14) Jesus nia hahalok furak sira book ema atu hakbesik ba nia, no mós atu simu Jesus nia ai-leba no sai ninia dixípulu.

Kontestu husi Mateus 11:28-30

Jesus koʼalia liafuan iha Mateus 11:28-30 bainhira nia haklaken iha Galileia iha tinan 31 EC. Husi Evanjellu haat, apóstolu Mateus deʼit mak hakerek Jesus nia liafuan neʼe. Tanba Mateus mak ema Judeu no uluk serbisu nuʼudar kobradór impostu, nia hatene didiʼak ema baibain nia moris. Sira-nia moris susar laʼós deʼit tanba presiza selu impostu ba Roma, maibé mós tanba iha korrupsaun barak ho sistema relijiaun Judeu nian. Entaun klaru katak Mateus sente kontente bainhira nia haree Jesus uza kbiit husi ninia Aman Jeováa hodi konvida ema neʼebé haraik an no moris susar atu hakbesik ba nia.—Mateus 11:25-27.

Evanjellu Mateus fó sai kona-ba hahalok oioin neʼebé Jesus hatudu nuʼudar Mesias neʼebé promete nanis ona no mós nuʼudar liurai iha Maromak nia Ukun.—Mateus 1:20-23; Isaias 11:1-5.

Haree vídeo badak neʼe hodi komprende kona-ba livru Mateus.