Oinsá mak Jeová organiza kongregasaun Kristaun?

Jeová laʼós Maromak neʼebé runguranga. (1 Korinto 14:33) Tan neʼe ita bele fiar katak Jeová mós organiza ninia povu ho didiʼak. Oinsá mak Jeová halo ida-neʼe ho kongregasaun Kristaun? No oinsá mak ita bele kontribui atu buat hotu bele laʼo ho susesu?

1. Sé mak ulun ba kongregasaun?

“Kristu mak ulun ba kongregasaun.” (Éfeso 5:23) Husi lalehan, nia dirije atividade hotu neʼebé Jeová nia povu halo iha mundu. Jesus hili “atan laran-metin no matenek”, neʼe mak irmaun katuas balu neʼebé iha esperiénsia barak neʼebé bolu nuʼudar Grupu Administradór. (Lee Mateus 24:45-47.) Hanesan apóstolu no katuas sira iha Jeruzalein, ohin loron Grupu Administradór mós fó matadalan ba kongregasaun iha mundu tomak. (Apóstolu 15:2) Maibé neʼe la dehan katak sira mak ulun ba ami-nia organizasaun. Sira sadere ba Jeová no uza ninia Liafuan nuʼudar matadalan, no sira hakruʼuk ba Jesus nuʼudar ulun.

2. Katuas kongregasaun nia knaar mak saida?

Katuas kongregasaun mak mane Kristaun maduru neʼebé hanorin Maromak nia Liafuan no tau matan ba Jeová nia povu hodi ajuda no anima sira. Sira la hetan saláriu ba sira-nia knaar. Sira serbí “ho hakarak rasik iha Maromak nia oin, laʼós tanba hakarak manán buat ruma ho laran-makerek, maibé ho laran tomak”. (1 Pedro 5:1, 2) Katuas sira hetan ajuda husi atan ba kongregasaun neʼebé ikusmai bele kumpre kritériu atu sai katuas kongregasaun.

Grupu Administradór hili katuas balu atu serbí nuʼudar katuas área. Katuas área nia knaar mak atu vizita kongregasaun oioin atu fó matadalan no anima irmaun-irmán sira. Katuas área sira hili katuas no atan ba kongregasaun neʼebé kumpre kritériu husi Maromak nia Liafuan.​—1 Timóteo 3:1-10, 12; Tito 1:5-9.

3. Testemuña ba Jeová ida-idak iha responsabilidade saida?

Ema hotu iha kongregasaun “fó hahiʼi ba Jeová nia naran” hodi partisipa iha reuniaun sira no hola parte iha serbisu haklaken tuir sira ida-idak nia situasaun.​—Lee Salmo 148:12, 13.

KEʼE KLEʼAN

4. Jesus mak ulun-naʼin neʼebé fó kmaan

Jesus fó konvite neʼebé furak mai ita. Lee Mateus 11:28-30, depois koʼalia hamutuk kona-ba pergunta tuirmai:

• Jesus mak ulun-naʼin hanesan saida, no nia hakarak ita atu sente oinsá kona-ba nia?

VÍDEO: Katuas sira ajuda kuandu rai-nakdoko akontese iha Nepál (4:56)

Bíblia hanorin ho klaru kona-ba oinsá mak katuas sira tenke halaʼo sira-nia knaar.

Lee Isaias 32:2 no 1 Pedro 5:1-3, depois koʼalia hamutuk kona-ba pergunta tuirmai:

• Ita sente oinsá bainhira hatene katak katuas sira hakaʼas an atu halo tuir Jesus hodi fó kmaan ba ema seluk?

• Iha dalan saida tan mak katuas sira halo tuir Jesus nia ezemplu?

5. Katuas sira hanorin liuhusi ezemplu

VÍDEO: Katuas kongregasaun sira tenke hatudu ezemplu! (7:39)

Jesus fó-hatene kona-ba saida mak katuas sira bele no labele halo. Lee Mateus 23:8-12, depois koʼalia hamutuk kona-ba pergunta tuirmai:

• Saida mak Bíblia hatete ba katuas kongregasaun sira? Tuir Ita-nia hanoin, ulun-naʼin relijiaun sira halo tuir ida-neʼe ka lae?

1. Katuas sira nafatin hametin sira rasik no sira-nia família nia relasaun ho Jeová

2. Katuas sira tau matan ba ema hotu iha kongregasaun

3. Katuas sira haklaken beibeik

4. Katuas sira hanorin iha kongregasaun. Sira mós ajuda hamoos no halo buat seluk

6. Ita bele apoia katuas sira

Bíblia fó razaun importante ba ita atu apoia katuas sira. Lee Ebreu 13:17, depois koʼalia hamutuk kona-ba pergunta tuirmai:

• Tanbasá mak Bíblia haruka ita atu halo tuir no hakruʼuk ba sira neʼebé dirije ita? Ita sente oinsá kona-ba neʼe?

Lee Lucas 16:10, depois koʼalia hamutuk kona-ba pergunta tuirmai:

• Tanbasá mak ita presiza apoia katuas sira maski iha buat kiʼik?

PONTU IMPORTANTE

Jesus mak ulun ba kongregasaun. Ita kontente atu apoia katuas sira neʼebé hakruʼuk ba nia, tanba sira fó kmaan no hanorin ita liuhusi sira-nia ezemplu.

Rezumu

• Sé mak ulun ba kongregasaun?

• Iha dalan saida deʼit mak katuas sira ajuda ema iha kongregasaun?

• Testemuña ba Jeová ida-idak iha responsabilidade saida?

BUKA-HATENE LIUTÁN

Haree oinsá Grupu Administradór no katuas sira hatudu katak sira hadomi maluk Kristaun sira.

Hametin maluk sira neʼebé governu bandu (4:22)

Haree liután kona-ba katuas área nia knaar mak saida.

Katuas área nia moris iha fatin izoladu (4:51)

Lee kona-ba feto sira-nia knaar iha kongregasaun.

“Testemuña ba Jeová sira fó knaar ba feto sira atu hanorin ka lae?” (Informasaun husi Livru Haklaken)

Buka-hatene oinsá mak katuas sira serbisu makaʼas atu anima maluk fiar-naʼin hotu.

“Katuas kristaun sira ‘serbisu ba ita-nia ksolok’” (Livru Haklaken, 15 Janeiru 2013)