Saida mak Ukun-Fuan Osan-Mean?

Bíblia nia resposta

Fraze “Ukun-fuan Osan-Mean” la mosu iha Bíblia laran. Maibé, ema barak uza fraze neʼe atu refere ba ukun-fuan neʼebé Jesus hanorin kona-ba hahalok diʼak. Durante diskursu koñesidu neʼebé Jesus hatoʼo iha foho leten, nia hatete: “Buat hotu neʼebé imi hakarak ema halo ba imi, imi mós tenke halo ba sira.” (Mateus 7:12; Lucas 6:31) Ema mós temi Ukun-Fuan Osan-Mean hanesan tuirmai neʼe: “Halo ba ema seluk buat neʼebé ita hakarak sira halo ba ita.”—Encyclopedia of Philosophy.

• Ukun-Fuan Osan-Mean signifika saida?

• Oinsá mak Ukun-Fuan Osan-Mean bele ajuda ita?

• Ita halo tuir Ukun-Fuan Osan-Mean tan deʼit hakarak atu hetan buat diʼak husi ema seluk ka lae?

• Oinsá mak Ita bele aplika Ukun-Fuan Osan-Mean?

Ukun-Fuan Osan-Mean signifika saida?

Ukun-Fuan Osan-Mean anima ita atu halo ba ema seluk buat neʼebé ita hakarak sira halo ba ita. Porezemplu, ita barak gosta kuandu ema seluk hatudu respeitu, laran-diʼak no domin ba ita. Entaun, ita tenke “halo mós nuneʼe ba sira.”—Lucas 6:31.

Oinsá mak Ukun-Fuan Osan-Mean bele ajuda ita?

Ita bele aplika Ukun-Fuan Osan-Mean iha situasaun barak. Porezemplu, ukun-fuan neʼe bele . . .

• Hametin moris kaben nian.—Éfeso 5:28, 33.

• Ajuda inan-aman atu haboot sira-nia oan.—Éfeso 6:4.

• Haburas relasaun diʼak ho kolega sira no viziñu.—Provérbios 3:27, 28; Koloso 3:13.

Ukun-Fuan Osan-Mean hanorin prinsípiu importante husi Testamentu Tuan. Ukun-fuan neʼe neʼebé Jesus hatete “mak buat neʼebé importante husi Ukun-Fuan [katak livru lima primeiru iha Bíblia] no Profeta sira-nia liafuan.” (Mateus 7:12) Entaun, Ukun-Fuan Osan-Mean hatudu sai prinsípiu neʼebé importante husi Testamentu Tuan, neʼe mak hadomi malu.—Roma 13:8-10.

Ita halo tuir Ukun-Fuan Osan-Mean tan deʼit hakarak atu hetan buat diʼak husi ema seluk ka lae?

Lae. Ukun-Fuan Osan-Mean liuliu koʼalia kona-ba buat neʼebé ita fó ba ema seluk. Bainhira Jesus fó Ukun-Fuan Osan-Mean, nia koʼalia kona-ba hahalok neʼebé ita hatudu ba ema seluk no mós ba ita-nia inimigu. (Lucas 6:27-31, 35) Ukun-Fuan Osan-Mean anima ita atu hatudu hahalok diʼak ba ema hotu.

Oinsá mak Ita bele aplika Ukun-Fuan Osan-Mean?

1. 1. Matan-moris. Tau atensaun ba ema seluk. Porezemplu, karik Ita haree ema lori hela sasán todan, rona katak Ita-nia viziñu baixa iha ospitál, ka haree kolega serbisu sente triste. Kuandu Ita “buka . . . ema seluk nia diʼak”, Ita bele hetan oportunidade atu hatete ka halo buat ruma neʼebé ajuda sira.—Filipe 2:4.

2. 2. Komprende ema nia sentimentu. Tau Ita-nia an iha ema seluk nia situasaun. Ita sente oinsá se hasoru situasaun hanesan sira? (Roma 12:15) Kuandu Ita koko komprende ema nia sentimentu, neʼe bele book Ita atu ajuda sira.

3. 3. Troka tuir situasaun. Keta haluha katak ema hotu la hanesan. Buat neʼebé ema hakarak Ita halo ba sira karik la hanesan ho buat neʼebé Ita hakarak ema halo ba Ita. Entaun, maski iha buat barak neʼebé Ita bele halo, koko atu halo deʼit buat neʼebé sira sei hafolin liu.—1 Korinto 10:24.