Família ida hateke ba uma sira neʼebé rahun tanba dezastre naturais

Saida mak Bíblia nia hanorin kona-ba dezastre naturais?

Bíblia nia resposta

Maromak la hamosu dezastre naturais neʼebé akontese ohin loron, maibé Maromak hanoin ema sira neʼebé sai vítima tanba dezastre naturais. Maromak nia Ukun sei halakon buat hotu neʼebé halo ema terus, inklui dezastre naturais. Agora daudaun, Maromak fó kmaan ba sira neʼebé sai vítima tanba dezastre naturais.—2 Korinto 1:3.

Tanbasá ita bele fiar katak dezastre naturais laʼós kastigu husi Maromak?

Dezastre naturais la hanesan duni ho forsa natureza neʼebé Jeová uza no hakerek iha Bíblia.

Dezastre naturais oho no hakanek ema oioin. Maibé Maromak nia kastigu neʼebé hakerek iha Bíblia kona deʼit ema aat. Porezemplu, bainhira Maromak halakon sidade Sodoma no Gomorra iha tempu uluk, Maromak salva mane diʼak ida naran Lot hamutuk ho ninia oan-feto rua. (Génesis 19:29, 30) Maromak bele haree ema ida-idak nia laran, no nia halakon deʼit ema aat sira.—Génesis 18:23-32; 1 Samuel 16:7.
Baibain dezastre naturais akontese derrepente deʼit. Antes Maromak uza forsa natureza atu fó kastigu ba ema, nia fó avizu uluk ba sira. Ema neʼebé rona no troka sira-nia hahalok bele sees husi kastigu.—Génesis 7:1-5; Mateus 24:38, 39.
Loloos, ema mós hola parte atu hamosu dezastre naturais. Oinsá? Hodi estraga ambiente no harii buat oioin iha área neʼebé kona rai-nakdoko, rai-nabeen, temperatura makaʼas. (Apokalipse 11:18) Tan neʼe, bainhira ema terus tanba sira-nia desizaun rasik, sira labele fó sala ba Maromak.—Provérbios 19:3.

Dezastre naturais mak sinál katak loron ikus besik ona ka lae?

Sin, profesia sira iha Bíblia fó sai katak sei mosu dezastre oioin durante “mundu neʼe nia rohan” ka “loron ikus sira”. (Mateus 24:3; 2 Timóteo 3:1) Porezemplu, kona-ba ita-nia tempu, Jesus hatete: “Rai-hamlaha no rai-nakdoko sei mosu iha fatin oioin.” (Mateus 24:7) Lakleur tan, Maromak sei halakon buat hotu neʼebé hamosu terus oioin, inklui dezastre naturais.—Apokalipse 21:3, 4.

Iha dalan oinsá mak Maromak ajuda vítima husi dezastre naturais?

Maromak fó kmaan ba vítima sira liuhusi ninia Liafuan Bíblia. Bíblia hatete katak Maromak hanoin ita no nia sente triste bainhira ita hetan terus. (Isaias 63:9; 1 Pedro 5:6, 7) Bíblia mós fó sai Maromak nia promesa kona-ba tempu neʼebé dezastre naturais sei nunka akontese tan.—Haree “Eskritura sira atu fó kmaan ba vítima husi dezastre naturais”.
Maromak ajuda vítima sira hodi uza ninia povu. Maromak uza ninia povu iha mundu atu banati-tuir Jesus nia ezemplu. Bíblia fó sai nanis ona katak Jesus sei fó kmaan ba “ema neʼebé laran-kanek” no “ema hotu neʼebé triste”. (Isaias 61:1, 2) Maromak nia povu hakaʼas an atu halo buat neʼebé hanesan.—João 13:15.

Maromak mós uza ninia povu atu fó ajuda iha dalan fíziku ba vítima dezastre naturais.—Apóstolu 11:28-30; Galásia 6:10.

Testemuña ba Jeová hadiʼa uma ida iha Porturriku — Testemuña ba Jeová fó ajuda ba vítima sira husi anin boot iha Porturriku

Bíblia bele ajuda ita atu prepara an antes dezastre naturais mosu ka lae?

Sin bele. Maski Bíblia laʼós livru kona-ba dezastre naturais, maibé Bíblia nia matadalan bele ajuda duni ita. Porezemplu:

Halo planu kona-ba buat neʼebé ita sei halo bainhira dezastre akontese. Bíblia hatete: “Ema neʼebé matenek haree perigu no subar nia an.” (Provérbios 22:3) Matenek atu halo planu antes dezastre mosu. Karik planu neʼe inklui prepara pasta emerjénsia no mós halo treinu kona-ba hasoru malu iha neʼebé bainhira dezastre akontese.
Hafolin liu moris duké rikusoin. Bíblia hatete: “Ita la lori buat ida mai mundu neʼe, no ita mós labele lori sai buat ida husi mundu neʼe.” (1 Timóteo 6:7, 8) Ita presiza prontu atu husik ita-nia uma no sasán bainhira salva ita-nia an husi dezastre. Ita presiza hanoin-hetan katak ita-nia moris mak importante liu fali sasán no rikusoin.—Mateus 6:25.

Eskritura sira atu fó kmaan ba vítima husi dezastre naturais

Génesis 18:25: “Haʼu hatene [Maromak] sei nunka halo hanesan neʼe hodi halo mate ema laran-loos hamutuk ho ema aat. . . . Juís ba mundu tomak sei la halo buat neʼebé loos ka?”

Signifika: Maromak sempre halo buat neʼebé loos. Ita labele fó sala Maromak bainhira dezastre akontese no oho ema barak.

Salmo 46:1, 2: “Maromak mak ita-nia fatin protesaun no ita-nia kbiit, ita sempre hetan ajuda husi nia iha tempu susar. Tan neʼe mak ita sei la sai taʼuk, maski rai neʼe nakdoko.”

Signifika: Maski buat aat akontese haleʼu ita, ita bele sadere ba Maromak atu bele hetan forsa.

Isaias 63:9: “Durante sira-nia susar hotu, nia mós sente neon-susar.”

Signifika: Maromak hanoin ita, nia sente susar kuandu ita hasoru susar.

João 5:28, 29: “Oras sei toʼo mai kuandu ema hotu neʼebé iha rate laran sei rona [Jesus] nia lian no sai husi rate.”

Signifika: Ita bele iha esperansa atu hasoru malu fali ho ita-nia família no belun neʼebé mate ona tanba Maromak sei fó kbiit ba Jesus atu fó moris-hiʼas ba ema neʼebé mate.

1 Pedro 5:6, 7: “Haraik an bá iha Maromak nia liman okos, . . . iha tempu hanesan, entrega imi-nia laran-susar hotu ba nia, tanba nia hanoin imi.”

Signifika: Maromak hanoin tebes ita no nia hakarak ita atu halo orasaun ba nia kona-ba ita-nia laran-susar.

Apokalipse 21:4: “[Maromak] sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras. Buat sira neʼebé uluk nian lakon tiha ona.”

Signifika: Maromak sei halakon buat hotu neʼebé hamosu terus, inklui dezastre naturais.