Roma 12:2—“Troka imi-nia an hodi hafoun imi-nia hanoin”

“Keta halo tuir mundu ohin neʼe, maibé troka imi-nia an hodi hafoun imi-nia hanoin, atu nuneʼe imi bele hatene loloos kona-ba Maromak nia hakarak neʼebé diʼak no perfeitu no halo Maromak kontente.”—Roma 12:2, Tradusaun Mundu Foun.

“Keta halo tuir mundu ohin neʼe nian maibe nakfila an hodi hafoun imi nia hanoin, atu imi bele hatene lo-los buat nebe Maromak hakarak, buat nebe diak, bele simu no los.”—Roma 12:2, Liafuan diak ba imi, segunda edisaun.

Signifikadu husi Roma 12:2

Ema neʼebé hakarak halo Maromak kontente presiza hasees an husi influénsia neʼebé la diʼak, maibé sira mós presiza troka sira-nia hahalok. Maromak la obriga sira atu troka; sira rasik mak halo ida-neʼe tanba hadomi Maromak no hatene katak buat neʼebé Nia husu ho laran-diʼak sempre lori benefísiu ba sira.—Isaias 48:17.

“Keta halo tuir mundu ohin neʼe.” “Mundu ohin neʼe” refere ba ema iha mundu neʼebé sira-nia hahalok no dalan moris nian la tuir Maromak nia hakarak. (1 João 2:15-17) Mundu neʼe sempre fó influénsia ba ema atu iha hahalok no atitude hanesan ho ema seluk nian. Atu adora Maromak iha dalan neʼebé nia simu, ema ida tenke luta hasoru mundu nia influénsia, se lae, nia sei haburas hahalok neʼebé lori rezultadu aat ba ninia an no halo Maromak la kontente.—Éfeso 2:1-3; 4:17-19.

“Troka imi-nia an hodi hafoun imi-nia hanoin.” Ita mós tenke hakaʼas an atu troka Ita-nia hanoin no sentimentu. Mudansa neʼe tenkesér kompletu tanba liafuan Gregu neʼebé tradús nuʼudar “troka imi-nia an” fó ideia kona-ba mudansa husi lakataru toʼo sai borboleta. Ema neʼebé adora Maromak presiza tau “hahalok foun”.—Éfeso 4:23, 24; Koloso 3:9, 10.

“Hatene loloos kona-ba Maromak nia hakarak neʼebé diʼak no perfeitu no halo Maromak kontente.” Maromak hakarak ninia atan sira fiar metin ba buat neʼebé sira aprende. Tan neʼe, ita presiza estuda Maromak nia Liafuan, aplika buat neʼebé ita aprende, no haree rasik oinsá moris tuir Maromak nia hakarak lori benefísiu mai ita. Hodi halo nuneʼe, ita hatene ho loloos katak halo tuir Maromak mak diʼak liu.—Salmo 34:8.

Kontestu husi Roma 12:2

Roma kapítulu 12 esplika kona-ba adorasaun neʼebé Maromak simu. Adorasaun neʼebé loos envolve ita-nia moris tomak. Ita presiza uza ita-nia “kbiit atu hanoin” duké halo tuir deʼit ita-nia emosaun ka fiar neʼebé la iha hun. (Roma 12:1, 3) Kapítulu neʼe fó sai konsellu diʼak kona-ba oinsá atu hatudu hahalok neʼebé halo Maromak kontente, oinsá atu trata ema seluk, no saida mak ita bele halo bainhira ema seluk trata aat ita.—Roma 12:9-21.