Roma 12:12—“Haksolok iha esperansa, tahan iha terus laran; la kole atu harohan”

“Haksolok tanba imi-nia esperansa. Tahan terus. Keta kole atu halo orasaun.”—Roma 12:12, Tradusaun Mundu Foun.

“Haksolok iha esperansa, tahan iha terus laran; la kole atu harohan.”—Roma 12:12, Liafuan diak ba imi, segunda edisaun.

Signifikadu husi Roma 12:12

Iha eskritura neʼe, apóstolu Paulo anima ema Kristaun iha Roma atu halo buat tolu neʼebé sei ajuda sira atu kontinua fiar metin maski hasoru susar oioin no mós ema kontra sira.

“Haksolok tanba imi-nia esperansa.” Ema Kristaun iha esperansa kapás atu moris ba nafatin, balu iha lalehan, no barak liu mak iha mundu paraízu. (Salmo 37:29; João 3:16; Apokalipse 14:1-4; 21:3, 4) Esperansa neʼe inklui haree oinsá Maromak nia Ukuna rezolve problema hotu neʼebé lori susar ba ema. (Daniel 2:44; Mateus 6:10) Ema neʼebé adora Maromak bele haksolok maski hasoru susar oioin, tanba sira fiar metin katak sira-nia esperansa sei sai realidade no Maromak kontente ho sira se sira tahan.—Mateus 5:11, 12; Roma 5:3-5.

“Tahan terus.” Iha Bíblia, liafuan Gregu neʼebé tradús nuʼudar “tahan” dala barak refere ba “hela metin duké halai sai; hatudu pasiénsia; hamriik metin”. Ema neʼebé moris tuir Kristu “laʼós parte husi mundu neʼe”,b tan neʼe sira hatene katak ema sei kontra sira no sira presiza tahan. (João 15:18-20; 2 Timóteo 3:12) Bainhira ema Kristaun ida serbí Maromak ho laran-metin no tahan susar oioin, neʼe hametin ninia fiar katak Maromak sei fó kolen ba nia. (Mateus 24:13) No fiar metin neʼe sei fó forsa ba nia atu tahan susar oioin ho pasiénsia no haksolok.—Koloso 1:11.

“Keta kole atu halo orasaun.” Atu kontinua fiar metin ba Maromak, ema Kristaun tenkesér kontinua halo orasaun. (Lucas 11:9; 18:1) Sira buka beibeik Maromak nia matadalan no sadere ba nia iha buat hotu neʼebé sira halo. (Koloso 4:2; 1 Tesalónika 5:17) Sira fiar metin katak Maromak sei hatán ba sira-nia orasaun tanba sira halo tuir ninia mandamentu no hakaʼas an tebes atu halo nia kontente. (1 João 3:22; 5:14) Sira mós hatene katak se sira la rende an atu halo orasaun, Maromak sei fó sira kbiit neʼebé sira presiza atu kontinua fiar metin maski hasoru susar naran deʼit.—Filipe 4:13.

Kontestu husi Roma 12:12

Paulo hakerek ninia karta ba ema Kristaun iha Roma maizumenus tinan 56 EC. Iha kapítulu 12 husi karta neʼe, nia fó sai konsellu diʼak kona-ba oinsá mak bele hatudu hahalok Kristaun, oinsá atu trata maluk fiar-naʼin no ema seluk, no oinsá atu buka dame kuandu ema fó-terus. (Roma 12:9-21) Ema Kristaun iha Roma simu konsellu neʼe iha tempu neʼebé loos, tanba lakleur deʼit, ema haterus sira ho violénsia.

Liutiha tinan balu, iha tinan 64 EC, ahi han parte barak iha sidade Roma. Ema barak rona lia-anin neʼebé dehan katak César Nero mak halo ida-neʼe akontese. Tuir matenek-naʼin ida kona-ba istória naran Tácito, Nero koko atu defende nia an hodi duun ema Kristaun. Rezultadu mak ema fó-terus makaʼas ba ema Kristaun sira. Paulo nia konsellu kona-ba oinsá atu tahan terus ajuda sira atu hasoru tempu susar neʼe ho fiar metin no mantein dignidade. (1 Tesalónika 5:15; 1 Pedro 3:9) Ohin loron, ema neʼebé adora Maromak bele aprende buat barak husi sira-nia ezemplu.

Haree vídeo badak neʼe hodi komprende kona-ba livru Roma.