LISAUN 28
Hatudu agradese ba buat neʼebé Jeová no Jesus halo ona ba Ita
Saida mak Ita sente bainhira Ita-nia belun ida fó prezente furak ba Ita? Neʼe sei halo Ita kontente tebes no Ita hakarak hatudu ba belun neʼe katak Ita hafolin tebes prezente neʼe. Jeová no Jesus fó prezente neʼebé folin-boot mai ita, neʼe mak Jesus nia sakrifísiu. Oinsá mak ita bele hatudu katak ita hafolin ida-neʼe?
1. Saida mak dalan ida atu hatudu agradese ba buat neʼebé Maromak no Jesus halo ona mai ita?
Bíblia promete katak ‘ema hotu neʼebé hatudu fiar ba Jesus’ bele moris ba nafatin. (João 3:16) Hatudu fiar katak sá? Neʼe katak laʼós fiar deʼit ba Jesus, maibé ita mós presiza hatudu ita-nia fiar liuhusi ita-nia desizaun sira no buat neʼebé ita halo. (Tiago 2:17) Bainhira ita hatudu fiar liuhusi ita-nia liafuan no hahalok, ita hametin ita-nia relasaun ho Jesus no ninia Aman Jeová.—Lee João 14:21.
2. Komemorasaun saida mak ita bele halo atu hatudu agradese ba buat neʼebé Jeová no Jesus halo ona?
Iha kalan antes Jesus mate, Jesus fó-hatene ninia dixípulu sira dalan ida tan atu hatudu agradese ba ninia sakrifísiu. Nia husu sira atu halibur hamutuk iha kalan espesiál neʼe, neʼebé Bíblia bolu nuʼudar “Naʼi nia Han-Kalan”, no mós bele bolu nuʼudar Memoriál kona-ba Kristu nia mate. (1 Korinto 11:20) Jesus halo ida-neʼe atu apóstolu sira no ema Kristaun loos hotu bele hanoin hetan nafatin katak nia fó ninia moris tanba ita. Kona-ba komemorasaun neʼe Jesus dehan: “Kontinua halo ida-neʼe hodi hanoin haʼu.” (Lucas 22:19) Bainhira Ita tuir Memoriál, Ita hatudu katak Ita agradese tebes ba domin neʼebé Jeová no Jesus hatudu ona mai ita.
KEʼE KLEʼAN
Aprende liután kona-ba oinsá Ita bele hatudu agradese ba domin boot neʼebé Jeová no Jesus hatudu mai ita. No haree tanbasá importante atu komemora Jesus nia mate.
3. Agradese book ita atu halo buat ruma
Imajina katak Ita atu mout maibé ema ida salva Ita-nia moris. Ita sei haluha buat neʼebé ema neʼe halo ona ba Ita ka lae? Ka Ita sei hakaʼas an halo buat balu atu hatudu agradese ba buat neʼebé nia halo ona?
Jeová loke dalan mai ita atu bele moris ba nafatin. Lee 1 João 4:8-10, depois koʼalia hamutuk kona-ba pergunta tuirmai:
Tanbasá Jesus nia sakrifísiu mak prezente neʼebé folin-boot?
Ita sente oinsá kona-ba buat neʼebé Jeová no Jesus halo ona ba Ita?
Oinsá mak ita bele hatudu agradese ba buat neʼebé Jeová no Jesus halo ona? Lee 2 Korinto 5:15 no 1 João 4:11; 5:3. Depois lee tiha eskritura ida-idak, koʼalia hamutuk kona-ba pergunta tuirmai:
Tuir eskritura neʼe, saida mak ita bele halo atu hatudu agradese?
4. Halo tuir Jesus nia ezemplu
Dalan ida atu hatudu agradese mak hodi halo tuir Jesus nia ezemplu. Lee 1 Pedro 2:21, depois koʼalia hamutuk kona-ba pergunta tuirmai:
Oinsá mak Ita bele laʼo tuir Jesus nia ain-fatin ho didiʼak?
Jesus hadomi Maromak nia Liafuan, haklaken kona-ba liafuan diʼak, no ajuda ema seluk
5. Tuir Memoriál atu komemora Kristu nia mate
Atu hatene saida mak akontese durante Naʼi nia Han-Kalan primeiru, lee Lucas 22:14, 19, 20. Depois koʼalia hamutuk kona-ba pergunta tuirmai:
Saida mak akontese durante Naʼi nia Han-Kalan?
Paun no tua reprezenta saida?—Haree versíkulu 19 no 20.
Jesus hakarak ninia dixípulu sira atu komemora Naʼi nia Han-Kalan tinan ida dala ida. Tan neʼe, tinan-tinan Testemuña ba Jeová halibur hamutuk atu komemora Kristu nia mate tuir dalan neʼebé nia hatudu tiha ona. Atu hatene liután kona-ba reuniaun importante neʼe, loke VÍDEO. Depois koʼalia hamutuk kona-ba pergunta tuirmai.
Oinsá atu halaʼo Memoriál ba Jesus nia mate?
Paun reprezenta Jesus nia isin perfeitu neʼebé nia fó nuʼudar sakrifísiu atu salva ita. Tua reprezenta ninia raan
EMA BALU DEHAN: “Atu hetan salvasaun importante mak fiar deʼit ba Jesus.”
Oinsá mak Ita bele uza João 3:16 no Tiago 2:17 atu hatudu katak fiar deʼit la toʼo?
PONTU IMPORTANTE
Ita hatudu agradese ba buat neʼebé Jesus halo ona mai ita hodi hatudu fiar ba nia no tuir Memoriál hodi komemora ninia mate.
Rezumu
Hatudu fiar ba Jesus katak sá?
Iha dalan saida mak Ita hakarak hatudu agradese ba buat neʼebé Jeová no Jesus halo ona ba Ita?
Tanbasá importante tebes atu tuir Memoriál ba Kristu nia mate?
BUKA-HATENE LIUTÁN
Kristu nia mate motiva Ita atu halo saida?
Aprende liután kona-ba fiar no oinsá ita bele hatudu ida-neʼe.
“Hatudu fiar ba Jeová nia promesa sira” (Livru Haklaken, Outubru 2016)
Lee istória “Haʼu sente moos, kompletu, no haʼu-nia moris iha folin duni” no haree oinsá feto ida troka ninia moris kuandu nia komprende kona-ba Kristu nia sakrifísiu.
“Bíblia troka ema nia moris” (Livru Haklaken, 1 Outubru 2011)
Haree tanbasá ema balu deʼit mak han paun no hemu tua iha Memoriál.