Pergunta husi lee-naʼin
David nia liafuan iha Salmo (Mazmur) 37:25 no mós Jesus nia liafuan iha Mateus 6:33 hatudu katak Jeová sei nunka husik ema kristaun atu kuran hahán ka lae?
David dehan katak nia “seidauk haree ema ida neʼebé loos la hetan ajuda, ka ninia oan sira buka paun”. Ho liafuan sira-neʼe, nia koʼalia kona-ba ninia esperiénsia rasik. Nia hatene didiʼak katak Maromak kontinua tau matan ba nia. (Salmo [Mazmur] 37:25) Maibé, David nia liafuan neʼe la dehan katak la iha Maromak nia atan ida neʼebé sei kuran buat neʼebé sira presiza.
Tuir loloos, iha duni tempu neʼebé David rasik hasoru situasaun neʼebé susar. Tempu ida mak kuandu nia halai husi Saul. David nia hahán sai menus, no nia husu ai-han ba nia no ba sira neʼebé laʼo hamutuk ho nia. (1 Samuel 21:1-6) Entaun, iha tempu neʼe, David “buka paun”. Maski nia hasoru situasaun susar neʼe, nia hatene katak Jeová sei nunka husik nia. Tuir loloos, Bíblia nunka fó sai katak David tenke tane-liman hodi hetan ai-han atu bele kontinua moris.
Iha Mateus 6:33, Jesus fó laran-manas ba ninia dixípulu sira katak Maromak sei fó buat neʼebé sira presiza kuandu sira tau uluk Maromak nia Ukun iha sira-nia moris. Jesus dehan: “Kontinua buka uluknanain Maromak nia Ukun no ninia hakarak, no buat sira seluk [inklui ai-han, hemu, no roupa] nia sei fó mós ba imi.” Maibé, Jesus mós esplika katak tanba susar husi ema seluk, ninia “alin kiʼik sira” sei sai hamlaha. (Mateus 25:35, 37, 40) Ida-neʼe akontese ba apóstolu Paulo. Dala ruma nia sente hamlaha no hamrook.—2 Korinto 11:27.
Jeová fó-hatene ba ita katak ita sei hetan terus iha dalan oioin. Karik nia fó lisensa atu ita hetan susar boot hodi bele apoia atu hatán ba lia neʼebé Satanás hasaʼe. (Jó [Ayub] 2:3-5) Porezemplu, ita-nia maluk kristaun balu neʼebé tama komarka iha tempu Nazi nian, sira sente katak sira moris iha perigu laran tanba ema fó-terus. Sira laiha hahán no ida-neʼe mak dalan ida neʼebé Satanás uza atu halakon Testemuña sira-neʼe nia laran-metin. No ikusmai sira neʼebé kontinua laran-metin ba Jeová, nia nunka husik sira. Entaun, maski nia fó lisensa atu sira hetan koko, hanesan nia mós fó lisensa atu ema kristaun hotu hetan koko iha dalan oioin, maibé ita la dúvida katak Jeová apoia ema hotu neʼebé hetan terus tanba ninia naran. (1 Korinto 10:13) Ita bele hanoin-hetan liafuan iha Filipe 1:29 neʼebé dehan: “Basá imi hetan ona knaar espesiál iha Kristu, laʼós deʼit atu tau imi-nia fiar ba nia, maibé mós atu terus tanba nia.”
Jeová promete katak nia sei hamutuk nafatin ho ninia atan sira. Porezemplu, Isaías (Yesaya) 54:17 hatete: “Kroʼat naran deʼit neʼebé ema halo atu hasoru ó sei la manán.” Promete neʼe no mós promete sira seluk halo ita fiar katak Maromak sei proteje ninia atan sira nuʼudar grupu. Maibé nuʼudar ema kristaun ida-idak, karik ita bele hasoru koko oioin, no balu toʼo mate.