Jeová hafolin ita-nia liafuan “Amen”

JEOVÁ hafolin ita-nia adorasaun ba nia. Nia “see tilun didiʼak no rona” ba ninia atan sira, no nia hafolin buat hotu neʼebé ita halo hodi fó hahiʼi ba nia maski neʼe buat kiʼik. (Mal 3:16) Porezemplu, hanoin toʼok liafuan “amen” neʼebé karik ita temi dala barak ona. Jeová hafolin liafuan simples neʼe ka lae? Sin, nia hafolin duni! Atu hatene tanbasá, mai ita haree liafuan neʼe nia signifikadu no oinsá mak Bíblia uza liafuan neʼe.

“POVU HOTU TENKE HATÁN: ‘AMEN!’”

Liafuan “amen” signifika “sai nuneʼe bá”, ka “loos duni”. Liafuan neʼe mai husi liafuan Ebraiku neʼebé signifika “laran-metin”, “bele tau fiar”. Dala ruma ema uza liafuan neʼe iha kazu ruma. Bainhira ema halo tiha juramentu no dehan “amen”, nia konfirma katak ninia liafuan mak loos no nia sei simu konsekuénsia hotu husi ninia juramentu neʼe. (Núm 5:22) Bainhira nia dehan “amen” iha ema barak nia oin, nia iha razaun liután atu kumpre ninia promesa.—Neem 5:13.

Ezemplu diʼak kona-ba uza liafuan “amen” mak hakerek iha Deuteronómio kapítulu 27. Bainhira ema Izraél tama ona ba Rai neʼebé Maromak Promete, sira halibur hamutuk iha Foho Ebal no Foho Gerizim nia leet atu rona Ukun-Fuan no mós fó sai katak sira simu Ukun-Fuan neʼe. Sira halo nuneʼe hodi dehan: “Amen!” bainhira ema lee tiha rezultadu neʼebé sira sei hetan se sira kontra. (Deut 27:15-26) Imajina toʼok lian husi ema rihun ba rihun, mane, feto, no labarik sira neʼebé hatán ho lian makaʼas! (Jos 8:30-35) Klaru katak sira sei nunka haluha liafuan neʼebé sira fó sai iha loron neʼebá. No ema Izraél sira-neʼe kumpre sira-nia liafuan, tanba Bíblia dehan: “Ema Izraél kontinua serbí Jeová durante Josué nia moris tomak no durante katuas sira-nia tempu. Katuas sira-neʼe moris naruk liu fali Josué no hatene buat hotu neʼebé Jeová halo ba ema Izraél.”—Jos 24:31.

Jesus mós uza liafuan “amen” atu konfirma katak ninia liafuan mak loos, no nia halo nuneʼe iha dalan neʼebé espesiál. Duké uza liafuan “amen” atu hatán depois ema fó sai liafuan ruma, nia uza “amen” (neʼebé tradús iha lian Tetun nuʼudar “loloos”) antes fó sai lia-loos ruma. Dala ruma, nia repete liafuan neʼe, dehan “amen, amen”. (Mt 5:18; João 1:51) Ho ida-neʼe nia ajuda rona-naʼin atu fiar katak ninia liafuan mak loos. Jesus bele koʼalia ho fiar metin hanesan neʼe tanba Maromak fó ona podér ba nia atu halo Maromak nia promesa hotu sai loos.—2 Kor 1:20; Apok 3:14.

“POVU HOTU DEHAN: ‘AMEN!’ NO SIRA FÓ HAHIʼI BA JEOVÁ”

Ema Izraél mós uza liafuan “amen” bainhira fó hahiʼi no hatoʼo orasaun ba Jeová. (Neem 8:6; Sal 41:13) Bainhira ema neʼebé rona ba orasaun dehan “amen”, sira hatudu katak sira konkorda ho buat neʼebé hatoʼo ona. Ho ida-neʼe, ema hotu bele hola parte no haksolok hodi adora Jeová hamutuk. Neʼe mak buat neʼebé akontese bainhira Liurai David lori Jeová nia Arka ba Jeruzalein. Sira halaʼo festa no David hatoʼo orasaun ida ho laran liuhusi knananuk neʼebé hakerek iha 1 Krónikas 16:8-36. Ninia liafuan book tebes ema hotu neʼebé tuir festa neʼe toʼo “povu hotu dehan: ‘Amen!’ no sira fó hahiʼi ba Jeová”. Sira kontente atu adora Jeová hamutuk.

Ema Kristaun iha apóstolu sira-nia tempu mós uza liafuan “amen” bainhira sira hahiʼi Jeová. Dala barak ema sira neʼebé hakerek Bíblia uza liafuan neʼe iha sira-nia karta. (Rom 1:25; 16:27; 1 Ped 4:11) Livru Apokalipse mós fó sai katak kriatura espíritu sira iha lalehan fó glória ba Jeová hodi dehan: “Amen! Fó hahiʼi ba Jah!” (Apok 19:1, 4) Baibain ema Kristaun iha apóstolu sira-nia tempu dehan “amen” depois orasaun neʼebé hatoʼo iha sira-nia reuniaun. (1 Kor 14:16) Maibé, neʼe laʼós deʼit liafuan neʼebé sira repete fali la ho neon.

ITA-NIA “AMEN” MAK IMPORTANTE

Depois aprende tiha oinsá Jeová nia atan uza liafuan neʼe, ita bele komprende tanbasá importante atu dehan “amen” bainhira remata orasaun. Kuandu ita dehan “amen” depois ita-nia orasaun, ita hatudu katak buat neʼebé ita koʼalia mak husi laran. Se ita hatán “amen” maski iha laran deʼit kuandu rona ba orasaun neʼebé ema hatoʼo, ita hatudu katak ita konkorda ho liafuan neʼebé fó sai ona. Mai haree razaun seluk tan tanbasá ita-nia liafuan “amen” importante.

Neʼe katak Ita tau fokus ba adorasaun. Ita adora Jeová liuhusi ita-nia liafuan no hahalok durante orasaun. Tanba ita hakarak atu dehan “amen” husi laran, neʼe sei ajuda ita atu iha hahalok loos no tau atensaun ba orasaun.

Neʼe halo ita adora Maromak ho unidade. Orasaun neʼebé hatoʼo iha ema nia oin sei halo ema hotu iha kongregasaun rona no tau fokus ba mensajen neʼebé hanesan. (Após 1:14; 12:5) Bainhira ita ho irmaun-irmán sira hatán ho lian ida deʼit, ita sai unidade liután. Maski ita dehan “amen” iha laran ka ho lian, liafuan neʼe sei book Jeová atu kumpre buat neʼebé ita husu hamutuk.

Irmán ida hakruʼuk hodi rona ba orasaun neʼebé hatoʼo iha reuniaun liuhusi telefone — Kuandu ita dehan “amen”, ita mós hola parte atu fó hahiʼi ba Jeová

Ita hahiʼi Jeová. Jeová haree buat hotu neʼebé ita halo hodi adora nia, maski neʼe kiʼik. (Lc 21:2, 3) Nia haree ita-nia motivu no saida mak iha ita-nia laran. Maski ita rona reuniaun liuhusi telefone deʼit, maibé ita bele fiar katak Jeová sei haree bainhira ita dehan “amen”. Hodi halo nuneʼe, ita mós hola parte atu fó hahiʼi ba Jeová.

Karik ita hanoin ita-nia liafuan “amen” la iha folin, maibé neʼe iha folin duni. Livru ida kona-ba Bíblia dehan katak Maromak nia atan sira hatudu sai sira-nia “konfiansa, apoia, no esperansa neʼebé iha laran hodi uza liafuan neʼe”. Ita hein katak liafuan “amen” neʼebé ita fó sai sei halo Jeová kontente.—Sal 19:14.

ITA PRESIZA DEHAN “AMEN” IHA SITUASAUN HOTU KA LAE?

“Amen” mak liafuan importante. Maibé, oinsá se ema neʼebé hatoʼo orasaun fó sai liafuan neʼebé sala? Ita la presiza dehan “amen” ka lae? Karik lae. Jeová rekoñese katak ita hotu halo sala ho ita-nia liafuan, no nia la hateke deʼit ba sala sira-neʼe. Entaun se ita tau atensaun ba ideia neʼebé ema hatoʼo iha orasaun laʼós ba liafuan ida-idak, ita bele dehan “amen”.

Maibé, ita sei la dehan “amen” ho lian ka iha laran bainhira ema neʼebé fiar la hanesan mak halo orasaun. Maibé oinsá se ita iha ema sira-neʼe nia leet bainhira sira halo orasaun? Porezemplu, karik ita tuir festa ruma no iha ema ida halo orasaun. Ka karik ita-nia família fiar la hanesan no ulun ba família neʼebé fiar la hanesan deside atu halo orasaun ba família. Saida mak ita tenke halo?

Se ita hasoru situasaun sira-neʼe, ita bele nonook deʼit no hatudu respeitu. Ita sei la dehan “amen”, ka la kaer liman durante orasaun neʼe, tanba neʼe hatudu katak ita apoia sira-nia orasaun. Karik ita mós bele deside atu halo ita-nia orasaun iha laran, maibé ita sei la dehan “amen” ho lian, atu nuneʼe ema seluk la hanoin katak ita hola parte iha sira-nia orasaun. Se ema hotu hamriik, ita rasik mak bele deside atu hamriik ka lae. Hamriik ka hakruʼuk mak laʼós parte ba adorasaun. Tan neʼe ema Kristaun ida-idak tenke deside saida mak diʼak liu atu halo iha situasaun neʼe, no ema seluk labele kritika ninia desizaun.

Situasaun iha leten hatudu mós tanbasá liafuan “amen” importante tebes ba Jeová.