“Kontente nuʼudar Família”
1. Tan Satanás nia mundu nia hahalok aat, ita hakarak halo saida?
1 Klaru katak iha mundu tomak família sira hetan ona problema boot. Satanás nia mundu nakonu ho hahalok la morál no lia-bosok. (1 Joao 5:19) Tan neʼe, ita hotu hakarak “hatudu laran loos iha buat hotu-hotu” inklui iha família laran, no hanorin ema seluk atu halo hanesan.—Prov 24:3, 27.
2. Saida mak rezultadu kuandu tuir Bíblia nia matadalan?
2 Tuir Bíblia nia matadalan: Atu halaʼo moris família nian neʼebé kontente, ita tenke halo tuir Bíblia nia matadalan sira. Matadalan sira-neʼe mak diʼak ba ema ida-ida iha família laran no kona atividade hotu neʼebé família halaʼo. Família neʼebé halo tuir Bíblia nia matadalan sira sei haksolok no hetan dame husi Maromak.—Kompara ho Isaías 32:17, 18.
3. Kapítulu ida-ida ramata ho saida?
3 Livru Halaʼo Moris neʼebé Kontente nuʼudar Família esplika didiʼak Bíblia nia matadalan ba família. Kapítulu ida-ida ramata ho kaixa neʼebé hanorin matadalan ba ema ida-ida iha família laran. Kaixa sira-neʼe barak komesa ho pergunta: “Oinsá mak Bíblia nia matadalan ajuda . . . ?” Ida-neʼe hatudu Maromak nia hanoin kona-ba informasaun neʼebé hatoʼo iha kapítulu ida-ida.—Isa 48:17.
4. Livru neʼe koʼalia kona-ba hasoru situasaun saida deʼit?
4 Lee didiʼak livru neʼe: Buka parte neʼebé esplika kona-ba rezolve problema sira neʼebé mosu beibeik. Porezemplu, livru neʼe koʼalia kona-ba hasoru situasaun hanesan: buka kaben (kapítulu 2), xave ba moris kaben nian neʼebé kontente (kapítulu 3), oinsá inan-aman bele ajuda sira-nia oan joven atu sai ema neʼebé bele kaer responsabilidade no taʼuk ba Maromak (kapítulu 6), oinsá atu proteje família husi buat aat iha mundu neʼe (kapítulu 8), matadalan sira-neʼebé bele ajuda família neʼebé inan ka aman la iha (kapítulu 9), oinsá atu hasoru problema ema lanu-teen ka ema halo violénsia iha família laran (kapítulu 12), saida mak Ita bele halo kuandu moris kaben nian besik atu naksobu (kapítulu 13), oinsá atu respeitu inan-aman neʼebé idade ona (kapítulu 15), no oinsá atu ajuda Ita-nia família atu iha futuru neʼebé diʼak (kapítulu 16).
5. Oinsá mak ita bele uza didiʼak livru neʼe?
5 Uza didiʼak livru neʼe: Se Ita seidauk estuda livru Kontente nuʼudar Família hamutuk ho Ita-nia família, diʼak atu komesa agora! No mós, kuandu Ita-nia família hasoru problema ruma, uza livru neʼe bá. Buka informasaun husi Bíblia neʼebé bele ajuda Ita-nia família oinsá atu hasoru situasaun neʼe, no halo orasaun hamutuk hodi husu ajuda atu halo tuir matadalan sira-neʼe. Komesa iha fulan-Marsu ita sei estuda livru Kontente nuʼudar Família iha reuniaun Estudu Bíblia iha Kongregasaun. Entaun diʼak mós atu prepara didiʼak ba reuniaun sira-neʼe.
6. Tanbasá mak ita agradese ba Maromak?
6 Família sira-neʼebé hametin liután sira-nia espíritu no fiar sei sai metin liután atu hasoru família nia inimigu boot, Satanás. (1 Tim 4:7, 8; 1 Ped 5:8, 9) Ita agradese ba matenek neʼebé ita simu husi Ida neʼebé Hahú arranju família nian.