Koʼalia ho fiar-metin

KUANDU ita koʼalia ho fiar-metin, ema seluk sei haree katak ita fiar duni buat neʼebé ita dehan. Bainhira apóstolu Paulo haklaken, nia hatudu fiar hanesan neʼe. Nia hakerek ba maluk fiar-naʼin iha Tesalónika hodi dehan: “Ami haklaken liafuan diʼak ba imi, ami la halo ida-neʼe ho liafuan deʼit, maibé ho . . . fiar.” (1 Tesalónika 1:5) Paulo nia fiar neʼe hatudu ho klaru liuhusi dalan neʼebé nia koʼalia no dalan neʼebé nia halaʼo ninia moris. Ita mós tenke hatudu fiar-metin liuhusi dalan neʼebé ita haklaken lia-loos husi Bíblia.

Koʼalia ho fiar la dehan katak ita foti-an, koʼalia tuir deʼit ita-nia hanoin, ka obriga ema atu simu deʼit ita-nia hanoin maski la iha prova. Maibé, ita koʼalia iha dalan neʼebé hatudu katak ita fiar-metin duni kona-ba buat neʼebé ita hatoʼo husi Maromak nia Liafuan.—Ebreu 11:1.

Tempu neʼebé ita presiza koʼalia ho fiar. Importante duni atu koʼalia ho fiar-metin kuandu ita haklaken. Maski ema rona ba ita-nia mensajen, maibé sira mós sei haree dalan neʼebé ita koʼalia. Sira bele hatene oinsá ita sente kona-ba buat neʼebé ita hatete. Ita-nia fiar-metin bele iha kbiit neʼebé boot liu fali liafuan deʼit no bele hatudu sai katak ita iha mensajen importante atu fahe ba sira.

Ita mós presiza hatudu fiar-metin kuandu koʼalia ba maluk fiar-naʼin sira. Apóstolu Pedro hakerek ninia karta primeiru ba maluk fiar-naʼin ‘atu fó laran-manas ba sira no atu fó sasin ho loloos katak Maromak hatudu duni ba sira ninia laran-diʼak neʼebé boot’. Tan neʼe, nia haruka sira atu “kaer metin” ba ida-neʼe. (1 Pedro 5:12) Kuandu hakerek karta ba kongregasaun iha Roma, apóstolu Paulo koʼalia ho fiar no neʼe ajuda duni sira. Nia hakerek: “Haʼu fiar duni katak mate ka moris ka anju ka governu sira ka buat neʼebé iha agora ka buat neʼebé atu mai ka kbiit ka aas ka kleʼan ka kriasaun sira seluk sei la bele haketak ita husi Maromak nia domin neʼebé liuhusi ita Naʼi Kristu Jesus.” (Roma 8:38, 39) Paulo mós hakerek kona-ba tansá importante atu haklaken ba ema seluk, no nia rasik mós halo serbisu neʼe ho laran-manas, neʼe hatudu ho klaru katak nia fiar serbisu neʼe mak importante. (Apóstolu 20:18-21; Roma 10:9, 13-15) Katuas kristaun sira ohin loron mós tenke hatudu katak sira fiar-metin kona-ba buat neʼebé sira hanorin husi Bíblia.

Inan-aman tenke koʼalia ho fiar-metin kuandu hanorin sira-nia oan kona-ba Maromak no mós iha tempu seluk. Atu halo ida-neʼe, inan-aman rasik presiza haburas domin ba Maromak no ninia dalan sira iha sira-nia laran. Tuirmai sira bele koʼalia ho fiar-metin ba sira-nia oan, tanba “ema koʼalia sai buat neʼebé rai iha sira-nia laran”. (Lucas 6:45; Deuteronômio [Ulangan] 6:5-7) Hodi iha fiar-metin hanesan neʼe mós sei book inan-aman atu hatudu ezemplu diʼak kona-ba “fiar neʼebé la laran-makerek”.—2 Timóteo 1:5.

Tuir loloos, importante atu koʼalia ho fiar-metin kuandu ema husu pergunta kona-ba ita-nia fiar. Porezemplu, kolega eskola, mestre, ka kolega serbisu karik hakfodak tanba ita la tuir selebrasaun ruma. Se ita koʼalia ho fiar-metin no fó resposta neʼebé diʼak, ida-neʼe bele ajuda sira atu respeitu ita-nia desizaun neʼebé tuir Bíblia. Oinsá se ema tenta ita atu halo hahalok sala hanesan bosok, uza droga, ka halo sala-foʼer? Importante atu esplika ho klaru katak ita sei la hola parte iha hahalok sira hanesan neʼe, no maski sira obriga ita, neʼe sei la troka ita-nia hanoin. Entaun, ita tenke koʼalia ho fiar-metin hodi la simu sira-nia hanoin. Kuandu Potifar nia feen hakarak atu halo sala-foʼer ho José, ho fiar-metin José dehan: “Oinsá mak haʼu bele halo hahalok aat tebes neʼe hodi halo sala kontra fali Maromak?” Kuandu feto neʼe obriga beibeik, José halai husi uma neʼe.—Gênesis (Kejadian) 39:9, 12.

Oinsá atu hatudu fiar-metin. Liafuan neʼebé ita uza bele hatudu katak ita iha fiar-metin. Antes koʼalia liafuan importante ruma, dala barak Jesus hahú ho liafuan hanesan: “Tebes haʼu hatete loloos ba ó.” (João 3:3, 5, 11; 5:19, 24, 25) Paulo hatudu sai ninia fiar-metin ho liafuan sira hanesan “haʼu fiar duni”, “haʼu hatene no haʼu fiar duni iha Naʼi Jesus”, no “haʼu koʼalia lia-loos, haʼu la bosok”. (Roma 8:38; 14:14; 1 Timóteo 2:7) Dala ruma, Jeová leno profeta sira atu koʼalia kona-ba ninia liafuan sira hodi dehan: “Nia sei sai loos duni.” (Habacuque [Habakuk] 2:3) Kuandu ita koʼalia kona-ba buat neʼebé Maromak fó-hatene nanis, ita mós bele uza liafuan neʼebé hanesan. Sin, se ita la fiar an maibé tau fiar ba Maromak Jeová no koʼalia ba ema ho respeitu, ita-nia liafuan sira sei hatudu ho klaru katak ita iha fiar neʼebé metin.

Ita mós bele hatudu fiar-metin hodi koʼalia ho laran-manas no iha dalan neʼebé moris. Ita-nia oin, sinál ho liman no isin, buat sira-neʼe bele hatudu katak ita fiar-metin. Maibé klaru katak ema ida-idak hatudu neʼe iha dalan neʼebé la hanesan. Maski ita moedór ka iha lian neʼebé kiʼik, maibé se ita fiar katak buat neʼebé ita dehan mak loos no ema seluk presiza rona, ema sei haree ho klaru katak ita fiar-metin duni.

Klaru katak ita la bele finje kuandu ita koʼalia ho fiar-metin. Se ema hatene katak ita finje deʼit no la koʼalia husi laran, sira sei sente katak ita-nia mensajen ladún importante. Tan neʼe, hakaʼas an atu sai ita-nia an rasik. Se ita koʼalia ba ema barak, karik ita presiza aumenta volume lian nian no koʼalia iha dalan neʼebé moris liu. Maibé, ita-nia objetivu mak atu fó sai ita-nia informasaun ho laran-moos no koʼalia husi laran.

Dalan atu koʼalia ho fiar-metin. Koʼalia ho fiar-metin envolve oinsá ita sente kona-ba ita-nia informasaun, entaun importante atu prepara ho didiʼak. La toʼo atu foti deʼit informasaun husi ita-nia livru sira no lee sai deʼit liafuan hotu. Ita presiza komprende informasaun ho didiʼak hodi bele fó sai fali ida-neʼe ho ita-nia liafuan rasik. Ita presiza fiar-metin katak ida-neʼe mak loos no katak buat neʼebé ita fó sai mak iha folin-boot ba rona-naʼin. Neʼe katak kuandu ita prepara informasaun, ita presiza hanoin kona-ba sira-nia situasaun no mós hanoin kona-ba saida mak sira hatene ona ka oinsá sira sei sente kona-ba neʼe.

Ema seluk sei haree katak ita iha fiar-metin se ita hatoʼo diskursu hodi la sidi. Tan neʼe, ita tenke prepara informasaun neʼebé diʼak, no hakaʼas an atu treinu hodi hatoʼo ida-neʼe. Tau atensaun didiʼak ba informasaun neʼebé ita presiza hatoʼo ho fiar-metin hodi nuneʼe ita la hateke deʼit ba ita-nia nota. Keta haluha atu halo orasaun ba Jeová atu husu ninia bensaun ba ita-nia hakaʼas-an. Ho ida-neʼe ita sei ‘sai aten-brani liuhusi ita-nia Maromak’ hodi koʼalia ho fiar-metin katak ita-nia mensajen mak loos no importante.—1 Tesalónika 2:2.