Karta husi Grupu Administradór

Maluk Testemuña ba Jeová:

Ita mak povu neʼebé simu knaar furak tebes, tanba ita lori Ukun-Naʼin Aas Liu, Jeová, nia naran! Naran neʼe mak aas liu no sei iha ba nafatin. Maromak Jeová rasik mak fó ita knaar atu lori nia naran, no liuliu husi tinan 1931, ema koñese ita nuʼudar ema neʼebé fó sasin kona-ba naran neʼe. (Isa 43:10) Ita gaba an tanba iha naran Testemuña ba Jeová.

Diabu hakaʼas an atu ema hotu la hatene Maromak nia naran. Nasaun sira neʼebé Diabu ukun la simu naran neʼe. Babilónia Boot, relijiaun falsu hotu iha mundu neʼe, odi Maromak nia naran no hasai naran neʼe husi Bíblia barak neʼebé sira tradús. Iha parte seluk, Jesus hafolin nia Aman nia naran. Bainhira hanorin dixípulu sira kona-ba orasaun, nia harohan ulukliu kona-ba naran neʼe. Nia dehan: “Neʼe duni, harohan nuneʼe bá: ‘Ami Aman iha lalehan, halo Ita naran sai santu.’” (Mt 6:9) Iha tempu seluk, nia rasik harohan ho laran hodi hatete: “Haʼu haklaken tiha Ita naran ba ema sira neʼebé Ita haraik mai haʼu husi mundu.” (Joao 17:6) Hodi halo tuir Jesus nia ezemplu diʼak neʼe, ita hakarak duni atu kontinua haklaken Maromak Jeová nia naran iha mundu tomak.

Eskritura ba tinan 2009, “Fó sasin ho didiʼak kona-ba lia-foun diʼak”, fó-hanoin mai ita atu sai badinas hodi halaʼo ita-nia serbisu haklaken. (Apos 20:24, MF) Klaru tebes katak Maromak Jeová fó bensaun ba ita-nia hakaʼas-an durante tinan kotuk. Ita habelar sasin toʼo mundu tomak no ida-neʼe fó glória ba Maromak Jeová nia naran. Tinan kotuk haklaken-naʼin barak liután, hamutuk 7.313.173, mak serbisu hamutuk atu hanorin ema neʼebé ho laran-moos buka ba solusaun ba problema sira neʼebé sira hasoru loron ba loron. No mós, tinan kotuk ema naʼin-18.168.323 asiste Memoriál ba Kristu nia mate. Nuneʼe, karik ema rihun ba rihun liután sei bolu Naʼi Jeová nia naran antes mundu aat neʼe sei ramata.

Toʼo Maromak Jeová nia loron boot mosu, ita sei kontinua atu haklaken lia-foun diʼak Reinu nian ho laran-manas, hodi buka oportunidade ida-ida atu koʼalia ba ema hotu iha ita-nia haklaken-fatin. (Mt 24:14; Mc 13:10) Ita nafatin fó sasin Maromak Jeová nia naran no nia hakarak hodi haklaken husi uma ba uma, iha dalan sira, liuhusi hakerek karta ka uza telefone, no iha dalan la formál. Hanesan neʼe, ita hakaʼas an atu koʼalia ba ema barak liután.

Ita fiar metin duni katak lakleur tan Maromak Jeová sei halo ninia naran sai santu. (Eze 36:23) Lakleur tan ema hotu neʼebé hafoʼer Maromak nia naran sei nonook tan moe. Ba ita hotu neʼebé laran-metin ba Naʼi Jeová, neʼebé fó sai tiha Maromak Jeová nia naran, loron neʼe sei sai kapás loos!

Maromak Jeová mós hatudu nia domin liuhusi reuniaun boot ba loron tolu ho tema: “Matan-moris bá!” Reuniaun boot neʼe, neʼebé halaʼo iha tinan 2009, balu mak internasionál. Kuandu konta kona-ba Testemuña sira-nia istória, ema sei hanoin-hetan reuniaun boot sira-neʼe nuʼudar reuniaun importante, neʼebé ajuda ita atu sai matan-moris ba Maromak Jeová nia loron boot.—Mc 13:37; 1 Tes 5:1, 2, 4.

Loos duni, Maromak Jeová laran-diʼak; nia halo ita-nia laran nakonu ho haksolok. Nia hanesan bibi-atan neʼebé lori nia bibi sira ba duʼut matak no ba fatin mahon ho bee barak.—Sal 23:1, 2; 100:2, 5.

Fiar metin bá katak Aman Jeová sei kontinua haraik bensaun ba imi nuʼudar imi nafatin hakaʼas an iha serbisu Reinu nian!

Ho domin kristaun ba maluk doben sira iha mundu tomak,

Imi-nia irmaun sira,

Grupu Administradór husi Testemuña ba Jeová