Hatudu katak ita laʼo ba oin

KUANDU ita hahú aprende atu halo tuir Bíblia nia matadalan sira, ita-nia hanoin, koʼalia, no hahalok neineik-neineik sei troka. Karik ita halo ona mudansa boot sira-neʼe antes ita tama Eskola Serbisu Kristaun nian. Agora, karik ita laʼo ba oin ona hodi dedika ita-nia moris ba Jeová. Neʼe katak ita bele para atu laʼo ba oin ka lae? Lae duni. Ita-nia batizmu mak hanesan hakat primeiru deʼit.

Dixípulu Timóteo serbí ona nuʼudar katuas kristaun kuandu Paulo haruka nia atu “hanoin didiʼak” kona-ba konsellu neʼebé nia simu no mós kona-ba knaar neʼebé nia iha. Timóteo tenke ‘fó nia an tomak ba buat sira-neʼe’ hodi nuneʼe ‘ema hotu bele haree ho momoos oinsá nia laʼo ba oin’. (1 Timóteo 4:12-15) Maski ita foin komesa atu laʼo iha dalan lia-loos nian ka ita iha ona esperiénsia barak nuʼudar ema kristaun, ita hotu tenke hanoin kona-ba oinsá mak ita laʼo ba oin.

Matenek no hafoun ita-nia an

Iha Éfeso 3:14-19, ita lee katak apóstolu Paulo halo orasaun hodi ninia maluk fiar-naʼin sira “komprende didiʼak kona-ba luan, naruk, aas no kleʼan” husi lia-loos. Tan razaun neʼe mak Jesus fó ema nuʼudar prezente hodi hanorin, hadiʼa, no harii kongregasaun. Hodi hanoin kleʼan kona-ba Maromak nia Liafuan, no mós hanoin kona-ba hanorin husi mestre sira neʼebé iha esperiénsia ona, ida-neʼe bele ajuda ita atu “sai boot” iha dalan espirituál.—Éfeso 4:11-15.

Sai boot iha dalan espirituál inklui mós “hafoun imi-nia dalan atu hanoin”. Neʼe katak halo ita-nia hanoin tuir Maromak no Kristu nian. Atu halo ida-neʼe, ita presiza kontinua loke ita-nia an hodi simu sira-nia hanoin, hodi nuneʼe ita bele ‘tau hahalok foun nuʼudar ita-nia hatais’. (Éfeso 4:23, 24) Kuandu ita estuda Evanjellu sira, ita haree istória sira kona-ba Jesus nia moris nuʼudar ezemplu ba ita atu halo tuir ka lae? Ita hanoin kona-ba hahalok neʼebé Jesus hatudu no ita hakaʼas an atu halo tuir neʼe iha ita-nia moris ka lae?—1 Pedro 2:21.

Buat naran deʼit neʼebé ita koʼalia bele hatudu toʼo neʼebé mak ita laʼo ba oin ona. Sira neʼebé tau fali hahalok foun la koʼalia bosok, la siʼak, la koʼalia liafuan aat, ka hatún ema. Duké halo ida-neʼe, sira ‘koʼalia deʼit buat neʼebé presiza atu hametin ema seluk, hodi nuneʼe sira-nia liafuan bele fó buat neʼebé diʼak ba sira neʼebé rona’. (Éfeso 4:25, 26, 29, 31; 5:3, 4; Judas 16) Sira-nia koʼalia kuandu mesak no iha kongregasaun hatudu katak lia-loos troka duni sira-nia moris.

Ita mós bele hatudu katak ita laʼo ba oin hodi la sai hanesan “ró iha tasi laran neʼebé anin no laloran baku bá baku mai”. (Éfeso 4:14) Porezemplu, saida mak ita sei halo se mundu neʼe haburas hanoin foun barak, no matadalan foun, ka atividade halimar nian neʼebé foun? Ita sei hamenus ita-nia tempu atu serbí Maromak hodi buka fali buat sira-neʼe ka lae? Se ita halo nuneʼe, ida-neʼe sei hanetik ita atu laʼo ba oin. Buat neʼebé diʼak liu mak uza didiʼak ita-nia tempu atu halo Maromak nia hakarak.—Éfeso 5:15, 16.

Ita-nia hahalok ba ema seluk bele mós hatudu katak ita laʼo ba oin. Ita aprende ona atu hatudu hahalok “hanoin malu” no “perdua malu ho laran” ba ita-nia maluk kristaun sira ka lae?—Éfeso 4:32.

Ema iha kongregasaun no iha uma tenke haree katak ita laʼo ba oin hodi halo buat hotu tuir Jeová nia dalan sira. Nuneʼe mós ho ema iha eskola, fatin públiku, no iha serbisu-fatin. (Éfeso 5:21–6:9) Sin, se iha situasaun hotu neʼe ita hatudu hahalok hanesan Maromak nian, ema sei haree duni katak ita laʼo ba oin.

Uza ita-nia prezente

Jeová fó ona ba ita hotu kbiit no matenek oioin. Nia hakarak ita atu uza neʼe atu ajuda ema, hodi nuneʼe liuhusi ita, Maromak bele hatudu ba sira ninia laran-diʼak boot. Kona-ba neʼe apóstolu Pedro dehan: “Hodi tuir prezente neʼebé ema ida-idak simu, uza ida-neʼe atu serbí malu nuʼudar atan diʼak neʼebé simu ona Maromak nia laran-diʼak neʼebé boot.” (1 Pedro 4:10) Entaun, oinsá mak ita halaʼo ita-nia knaar nuʼudar atan?

Pedro kontinua dehan: “Se ema ruma koʼalia, nia tenke halo ida-neʼe nuʼudar ema neʼebé koʼalia lia-menon husi Maromak.” (1 Pedro 4:11) Versíkulu neʼe hatudu katak ema iha responsabilidade atu koʼalia tuir Maromak nia Liafuan, hodi nuneʼe Maromak bele simu glória. Dalan neʼebé sira koʼalia mós tenke fó hahiʼi ba Maromak. Tuir loloos, treinu neʼebé ita hetan iha Eskola Serbisu Kristaun nian bele ajuda ita atu uza ita-nia prezente neʼe hodi lori hahiʼi ba Maromak liuhusi dalan neʼebé ita ajuda ema seluk. Hodi tuir objetivu neʼe, oinsá mak ita hatene katak ita laʼo ba oin ona iha eskola neʼe?

Duké hanoin deʼit kona-ba pontu konsellu hira mak ita halo tiha ona ka knaar saida mak ita hatoʼo tiha ona, diʼak atu hanoin kona-ba treinu neʼebé ita simu no oinsá ida-neʼe ajuda ita aumenta ita-nia matenek atu hasaʼe sakrifísiu hahiʼi nian. Eskola neʼe prepara ita atu hetan susesu iha serbisu haklaken. Entaun husu ba ita-nia an: ‘Haʼu prepara nanis kona-ba saida mak haʼu sei koʼalia iha serbisu haklaken ka lae? Haʼu aprende ona atu hatudu interese ba ema neʼebé haʼu fó sasin ka lae? Haʼu husik hela pergunta ruma ba uma-naʼin hodi bele halo vizita fali ka lae? Se haʼu estuda Bíblia ho ema ida, haʼu hakaʼas an atu hanorin iha dalan neʼebé book ema nia laran ka lae?’

Keta hanoin katak simu knaar espesiál barak mak hatudu katak ita laʼo ba oin ona. Tuir loloos, laʼós knaar sira neʼebé ita simu mak hatudu katak ita laʼo ba oin, maibé buat neʼebé importante mak oinsá ita halaʼo knaar sira-neʼe. Se ita simu knaar atu hanorin iha kongregasaun, husu ba ita-nia an: ‘Haʼu hanorin ho didiʼak ka lae? Haʼu hatoʼo informasaun iha dalan neʼebé book rona-naʼin nia laran ka lae?’

Ita presiza haburas hakarak atu bele uza prezente neʼebé ita simu. Entaun, ita husu ema seluk atu haklaken ho ita ka lae? Ita buka oportunidade atu ajuda ema foun, joven, ka ema neʼebé moras ka lae? Ita prontu atu ajuda hodi hamoos Reuniaun-Fatin ka ajuda iha reuniaun boot sira ka lae? Ita uza ita-nia tempu atu serbí nuʼudar pioneiru estra ka lae? Ita bele serbí nuʼudar pioneiru regulár ka ajuda kongregasaun neʼebé presiza haklaken-naʼin ka lae? Se ita mak irmaun ida, ita hakaʼas an atu kumpre kritériu husi Bíblia atu sai atan ba kongregasaun no katuas ka lae? Se ita prontu atu fó ajuda no mós simu knaar sira, neʼe mak sinál neʼebé hatudu katak ita laʼo ba oin.—Salmo (Mazmur) 110:3.

Esperiénsia mak importante

Se ita sente katak ita ladún iha esperiénsia kona-ba dalan kristaun nian, keta sai laran-tun demais. Maromak nia Liafuan bele halo “ema neʼebé la iha esperiénsia sai matenek”. (Salmo [Mazmur] 19:7; 119:130; Provérbios [Amsal] 1:1-4) Halo tuir Bíblia nia konsellu bele ajuda ita atu hetan buat diʼak husi Jeová nia matenek, ida-neʼe folin-boot liu fali matenek neʼebé ita hetan liuhusi esperiénsia deʼit. Maibé nuʼudar ita kontinua laʼo ba oin iha Jeová nia serbisu, ita mós sei hetan duni esperiénsia neʼebé folin-boot. Entaun, oinsá mak ita bele uza didiʼak ita-nia esperiénsia sira-neʼe?

Kuandu ema tahan hasoru situasaun oioin iha sira-nia moris, karik sira bele hanoin: ‘Haʼu hasoru ona ida-neʼe iha tempu uluk. Haʼu hatene saida mak haʼu sei halo.’ Maibé, neʼe mak dalan neʼebé matenek ka lae? Provérbios (Amsal) 3:7 dehan: “Keta sai matenek iha imi-nia matan rasik.” Ita-nia esperiénsia sira neʼebé ita hetan bele duni ajuda ita atu sura uluk antes halo desizaun ruma iha ita-nia moris. Maibé, se ita laʼo ba oin iha lia-loos, ita-nia esperiénsia mós sei book ita-nia hanoin no laran hodi komprende katak ita presiza Jeová nia bensaun atu bele hetan susesu. Entaun, ita laʼo ba oin laʼós tanba ita hasoru situasaun ruma ho fiar an, maibé tanba ita sadere deʼit ba Jeová no husu ninia matadalan ba ita-nia moris. Ita bele hatudu ida-neʼe hodi fiar katak la iha buat ida bele mosu se nia la fó lisensa. No ita mós bele hatudu neʼe hodi kontinua tau fiar no iha relasaun diʼak ho ita-nia Aman iha lalehan.

“Hakaʼas an atu hetan buat neʼebé iha oin”

Maski apóstolu Paulo mak ema neʼebé laʼo ba oin no hetan kose mina ho espíritu santu, maibé nia sente katak nia presiza kontinua “hakaʼas an atu hetan buat neʼebé iha oin”, katak moris rohan-laek. (Filipe 3:13-16) Ita mós iha hanoin hanesan neʼe ka lae?

Ita laʼo ba oin ona toʼo iha neʼebé? Ita bele koko ita-nia an se ita laʼo ba oin ona ka lae hodi haree oinsá ita tau fali ema foun, oinsá ita hakruʼuk an ba Jeová nia ukun, no oinsá ita badinas hodi uza ita-nia kbiit atu hahiʼi Jeová. Nuʼudar ita hetan buat diʼak husi Eskola Serbisu Kristaun nian, ita mós presiza hatudu hahalok sira husi Maromak nia Liafuan iha ita-nia koʼalia no hanorin. Hanoin kona-ba hahalok sira-neʼe nuʼudar ita kontinua laʼo ba oin. Sin, haksolok iha hahalok sira-neʼe, no ikusmai ema hotu sei haree ho momoos katak ita laʼo ba oin ona.