Hakaʼas an atu book ema nia laran

KUANDU ita haklaken Maromak nia liafuan, ita presiza hakaʼas an atu book ema nia laran. Bíblia esplika katak ema nia laran la hanesan ho hahalok neʼebé ema bele haree husi liʼur. Ita-nia laran reprezenta sentimentu, hanoin hotu, no husi laran mak ita haburas hahalok ruma neʼebé ema bele haree. Tan neʼe, ita hakarak atu kuda lia-loos iha ema nia laran. (Mateus 13:19) Ema nia hakarak atu halo tuir Maromak tenke mai husi laran.—Provérbios (Amsal) 3:1; Roma 6:17.

Atu hanorin iha dalan neʼebé book ema nia laran, ita presiza hanoin kona-ba buat tolu tuirmai neʼe: (1) Saida mak book ona rona-naʼin nia laran? (2) Oinsá mak ita bele ajuda ema haburas hahalok diʼak, hanesan domin no respeitu ba Maromak? (3) Oinsá atu ajuda ema hodi hanoin kona-ba sira-nia hakarak iha laran, hodi nuneʼe bele halo Jeová kontente?

Uza matenek. Ema seidauk simu lia-loos tanba razaun oioin. Entaun, bainhira ita estuda ho ema, karik ita presiza uza matenek atu hadiʼa sira-nia hanoin neʼebé sala, ka karik ita presiza uza tempu atu hatudu prova barak liután. Tan neʼe, husu ita-nia an: ‘Ema neʼe hatene katak nia presiza iha relasaun diʼak ho Maromak ka lae? Ninia fiar metin ona ka lae? Saida mak nia la fiar? Tanbasá mak nia iha hanoin hanesan neʼe? Nia presiza ajuda atu hadiʼa hanoin sala ruma neʼebé hanetik nia atu simu lia-loos ka lae?’

Dala ruma susar atu hatene tansá ema fiar buat ruma. Provérbios (Amsal) 20:5 hatete: “Ema nia hanoin sira iha laran hanesan bee-posu neʼebé kleʼan, maibé ema neʼebé matenek mak ida neʼebé dada sai hanoin sira-neʼe.” Ita tenke uza matenek atu komprende ema nia hanoin. Atu halo ida-neʼe, ita presiza haree didiʼak no hatudu katak ita hanoin ema.

Ita bele hatene ema nia hanoin maski sira la fó sai ida-neʼe. Husi estudante nia oin no lian ita bele hatene se tópiku ruma kona nia laran. Se ita mak inan-aman, ita hatene ona katak kuandu ita-nia oan nia hahalok troka, ida-neʼe tanba buat ruma mosu iha ninia moris. Keta husik liu deʼit buat sira-neʼe tanba loloos sira hatudu sai buat neʼebé iha sira-nia laran.

Kuandu ita hili didiʼak pergunta sira, ida-neʼe bele ajuda ita atu dada sai saida mak iha ema nia laran. Karik ita bele husu: “Oinsá mak Ita sente kona-ba . . . ?” “Saida mak halo Ita fiar katak . . . ?” “Saida mak Ita sei halo se . . . ?” Maibé, ita presiza kuidadu atu la husu pergunta barak demais. Karik ita bele hatudu respeitu hodi fó sai uluk liafuan sira hanesan, “Haʼu bele husu pergunta ruma ba Ita kona-ba . . . ?” Tuir loloos, ita presiza duni tempu atu bele hatene saida mak iha ema nia laran. Dala barak, ita presiza uza tempu kleur atu ema neʼe tau fiar ba ita antes nia prontu atu fó sai ninia sentimentu. Maski nuneʼe, ita presiza kuidadu nafatin hodi nuneʼe ema neʼe la sente katak ita husu nia kona-ba buat neʼebé ita la merese atu hatene.—1 Pedro 4:15.

Ita mós presiza uza matenek kona-ba oinsá atu hatán ba buat neʼebé ema fó sai. Hanoin-hetan katak ita-nia objetivu mak atu komprende ema hodi nuneʼe ita bele buka informasaun husi Bíblia neʼebé bele book sira-nia laran. Hakaʼas an atu la dehan katak ema nia hanoin mak sala. Duké halo ida-neʼe, koko atu komprende saida mak book ema atu koʼalia liafuan sira-neʼe. Depois neʼe ita bele hatene oinsá atu hatán; no karik ita-nia estudante sei hanoin didiʼak kona-ba saida mak ita koʼalia tanba ita komprende nia.—Provérbios (Amsal) 16:23.

No mós, maski ita koʼalia ba ema-lubun, maibé ita mós bele duni atu book sira ida-idak nia laran. Se ita hateke beibeik ba rona-naʼin no haree sinál iha ema nia oin, no mós husu pergunta neʼebé book ema atu hanoin, ida-neʼe sei ajuda ita hatene oinsá rona-naʼin sente kona-ba buat neʼebé ita fó sai. Se ita hatene didiʼak rona-naʼin, ita hatudu katak ita hanoin sira-nia situasaun. Uza buat neʼebé ita hatene ona kona-ba kongregasaun nuʼudar ita hanorin sira husi Bíblia.—Galásia 6:18.

Book ema nia laran. Kuandu ita hatene saida mak ema fiar ka la fiar, no tansá nia fiar neʼe, karik ita bele uza ida-neʼe kuandu hanorin. Depois Jesus moris-hiʼas, nia book dixípulu sira-nia laran hodi “esplika eskritura” no liga ida-neʼe ho buat neʼebé foin mosu daudaun. (Lucas 24:32) Ita mós tenke hakaʼas an atu kompara ema nia situasaun ho buat neʼebé nia hakarak atu hetan, no mós ho buat neʼebé nia haree iha Bíblia laran. Estudante nia laran sei book duni nia kuandu nia hatene katak: “Neʼe mak LIA-LOOS!”

Kuandu ita dada ema nia atensaun ba Jeová nia laran-diʼak, domin, no ninia dalan neʼebé loos, ita sei ajuda duni ema atu haburas domin ba Maromak. Kuandu ita hatudu ba ema kona-ba hahalok diʼak neʼebé Maromak haree iha sira, ida-neʼe sei ajuda sira atu fiar katak sira bele iha relasaun diʼak ho Maromak. Ita bele halo ida-neʼe hodi uza eskritura sira hanesan Salmo (Mazmur) 139:1-3, Lucas 21:1-4, no João 6:44. No mós, ajuda rona-naʼin atu haree oinsá Jeová hatudu domin boot ba ninia atan sira neʼebé laran-metin ba nia. (Roma 8:38, 39) Esplika katak Jeová la haree deʼit ba ita-nia sala, maibé haree ita-nia moris tomak, ita-nia laran-manas ba adorasaun loos, no ita-nia domin ba nia naran. (2 Crônicas [Tawarikh] 19:2, 3; Ebreu 6:10) Nia hanoin-hetan buat hotu kona-ba ita ida-idak maski neʼe mak buat kiʼik deʼit, no nia sei fó moris-hiʼas ba “ema hotu neʼebé iha rate laran”. (João 5:28, 29; Lucas 12:6, 7) Tanba Maromak kria ita tuir nia ilas, entaun kuandu ita koʼalia kona-ba Maromak nia hahalok sira, baibain ida-neʼe sei book ema nia laran atu hadomi nia.—Gênesis (Kejadian) 1:27.

Kuandu ema aprende atu haree ema seluk hanesan Jeová haree, ida-neʼe sei book sira-nia laran. Klaru katak se Maromak hatudu laran-diʼak ba ita, entaun nia mós hatudu laran-diʼak ba ema hotu hodi la haree ba sira-nia situasaun, rasa, no nasaun. (Apóstolu 10:34, 35) Kuandu ema komprende kona-ba neʼe, ida-neʼe ajuda nia atu halakon odi husi ninia laran hodi tuir Bíblia nia matadalan. Ida-neʼe sei ajuda nia atu iha dame ho ema seluk nuʼudar nia aprende atu halo tuir Maromak nia hakarak.

Ita mós tenke ajuda ema atu haburas taʼuk ba Maromak. (Salmo [Mazmur] 111:10; Apokalipse 14:6, 7) Kuandu ema hatudu taʼuk ka respeitu ba Maromak, ida-neʼe bele book nia atu kumpre buat neʼebé nia la bele halo ho ninia kbiit rasik. Hodi koʼalia kona-ba buat furak neʼebé Jeová halo no ninia laran-diʼak neʼebé boot, ita bele ajuda ema seluk atu haburas taʼuk atu la halo Maromak laran-kanek.—Salmo (Mazmur) 66:5; Jeremias (Yeremia) 32:40.

Hakaʼas an atu ajuda ema hatene katak sira-nia hahalok mak importante ba Jeová. Nia iha sentimentu, entaun dalan neʼebé ita simu ninia matadalan sira bele halo nia laran-kontente ka laran-triste. (Salmo [Mazmur] 78:40-42) Esplika katak hahalok neʼebé ema ida-idak hatudu bele hatán ba lia-bosok neʼebé Satanás hasaʼe kona-ba Maromak.—Provérbios (Amsal) 27:11.

Ajuda ema atu haree katak halo tuir Maromak nia matadalan lori buat diʼak ba sira. (Isaías [Yesaya] 48:17) Dalan ida atu halo ida-neʼe mak hodi esplika kona-ba rezultadu aat neʼebé bele mosu se la halo tuir Maromak nia matenek, maski neʼe ba tempu uitoan deʼit. Esplika katak hahalok sala hadook ema husi Maromak, hanetik ema atu aprende lia-loos, no lori aat ba ema. (1 Tesalónika 4:6) Ajuda ema atu hafolin bensaun neʼebé sira simu ona tanba sira halo tuir Maromak nia ukun-fuan. Ajuda sira atu haree katak hodi laʼo iha Jeová nia dalan neʼebé loos bele hasees sira husi susar oioin. Kuandu ema fiar katak Maromak nia dalan mak matenek, nia sei lakohi laʼo tuir dalan neʼebé Maromak odi. (Salmo [Mazmur] 119:104) Nia sei hatene katak halo tuir Maromak laʼós buat neʼebé todan, maibé nuʼudar dalan atu hatudu domin no laran-metin ba Jeová.

Ajuda ema atu hanoin kleʼan. Atu ema bele kontinua hametin sira-nia relasaun ho Maromak, sira presiza hatene no hadiʼa lalais saida mak iha sira-nia laran. Esplika ba sira kona-ba oinsá mak Bíblia bele ajuda sira atu halo ida-neʼe.

Ajuda ema atu hatene katak Bíblia laʼós deʼit livru neʼebé hakerek kona-ba ukun-fuan, konsellu, istória, ka liafuan profeta nian. Maibé, Bíblia mós hatudu sai Maromak nia hanoin. Tiago 1:22-25 kompara Maromak nia Liafuan ho espellu. Entaun, dalan neʼebé ita hanoin kona-ba mensajen iha Bíblia laran no kona-ba dalan neʼebé Jeová kumpre ninia hakarak, bele hatudu sai saida mak iha ita-nia laran. Nuneʼe Bíblia bele hatudu sai oinsá Maromak, “ida neʼebé buka-hatene ema nia laran” hanoin kona-ba ita. (Provérbios [Amsal] 17:3) Ajuda ema atu hanoin-hetan kona-ba neʼe. Ajuda sira atu hanoin kleʼan kona-ba buat neʼebé Maromak hakerek iha Bíblia laran no saida mak sira presiza hadiʼa hodi bele halo Maromak kontente liu. Ajuda mós sira atu sente katak lee Bíblia mak dalan atu hatene Jeová nia haree kona-ba sira-nia “hanoin no hakarak iha laran”, hodi nuneʼe sira bele hadiʼa sira-nia hahalok tuir Maromak nia hakarak.—Ebreu 4:12; Roma 15:4.

Estudante Bíblia balu hakarak atu halo tuir buat neʼebé sira aprende, maibé karik sira taʼuk kona-ba saida mak ema seluk hanoin. Karik sira luta makaʼas hodi kontra hakarak aat isin nian ruma. Ka sira hanoin katak sira bele serbí Maromak no iha tempu hanesan kontinua kaer metin ba mundu nia toman sira. Entaun, ita presiza hatudu sai katak hanoin hanesan neʼe mak perigu tebes. (1 Reis [Raja-Raja] 18:21) Fó laran-manas ba sira atu halo orasaun ba Maromak hodi buka-hatene sira-nia laran no hadiʼa ida-neʼe.—Salmo (Mazmur) 26:2; 139:23, 24.

Hatudu ba sira katak Jeová hatene sira-nia susar no Bíblia koʼalia kona-ba susar neʼe. (Roma 7:22, 23) Ajuda sira atu matan-moris hodi hakarak sala nian iha sira-nia laran la domina sira.—Provérbios (Amsal) 3:5, 6; 28:26; Jeremias (Yeremia) 17:9, 10.

Fó laran-manas ba ema atu hanoin tansá sira hakarak atu halo buat ruma. Hanorin sira atu husu ba sira-nia an: ‘Tansá mak haʼu hakarak halo ida-neʼe? Ida-neʼe hatudu ba Jeová katak haʼu hafolin duni buat hotu neʼebé nia halo ba haʼu ka lae?’ Koko atu ajuda sira fiar katak buat neʼebé folin-boot liu mak iha relasaun diʼak ho Jeová.

Ajuda rona-naʼin atu komprende tansá mak importante atu serbí Jeová ho “laran tomak”. (Lucas 10:27) Neʼe katak sira-nia sentimentu no hakarak tomak tenke tuir Jeová nia dalan sira. Entaun, hanorin rona-naʼin atu hanoin laʼós deʼit kona-ba buat neʼebé sira halo maibé mós buat neʼebé sira sente kona-ba Maromak nia matadalan sira no mós tansá sira hakarak atu serbí Maromak. (Salmo [Mazmur] 37:4) Kuandu ita-nia estudante hatene ona buat neʼebé nia presiza hadiʼa, diʼak atu fó laran-manas ba nia hodi halo orasaun ba Jeová hodi dehan: “Halo haʼu-nia laran sai metin atu hamtaʼuk Ita-nia naran.”—Salmo (Mazmur) 86:11.

Kuandu ita-nia estudante haburas ona ninia relasaun ho Jeová, nia sei halo tuir Maromak tanba nia iha fiar, laʼós deʼit tanba ita obriga nia. Tuirmai, nia rasik sei “kontinua atu buka-hatene kona-ba buat neʼebé halo Naʼi kontente”. (Éfeso 5:10; Filipe 2:12) Sin, Jeová sei kontente se ema halo tuir nia husi laran.—Provérbios (Amsal) 23:15.

Hanoin-hetan katak Jeová mak ida neʼebé haree ema nia laran no nia mak dada ema hodi bele iha relasaun diʼak ho nia. (Provérbios [Amsal] 21:2; João 6:44) Ita-nia knaar mak atu apoia nia. (1 Korinto 3:9) Ida-neʼe hanesan “Maromak bolu ema liuhusi ita”. (2 Korinto 5:20; Apóstolu 16:14) Jeová la obriga ema atu simu lia-loos, maibé nuʼudar ita uza Eskritura, nia bele book ema atu hatene katak buat neʼebé sira rona daudaun mak resposta ba sira-nia pergunta ka orasaun. Kontinua hanoin kona-ba neʼe kuandu ita iha oportunidade atu hanorin ema seluk, no husu Jeová ho laran tomak atu hetan ninia matadalan no ajuda.—1 Crônicas (Tawarikh) 29:18, 19; Éfeso 1:16-18.