KAPÍTULU 1
Bele ka lae, halaʼo moris neʼebé kontente nuʼudar família?
1. Tanbasá mak importante atu iha família neʼebé metin?
FAMÍLIA mak arranju neʼebé tuan liu iha mundu neʼe, no arranju família nian mak importante tebes ba ema hotu. Iha ema nia istória, atu iha povu neʼebé metin presiza mós família neʼebé metin. Família mak arranju neʼebé diʼak liu atu haboot oan atu sira bele halo desizaun neʼebé matenek kuandu sira sai boot.
2-5. (a) Iha família neʼebé kontente, oan sente oinsá kona-ba inan-aman? (b) Família balu hasoru problema saida deʼit?
2 Ema sente seguru kuandu sira iha família neʼebé kontente. Hanoin toʼok kona-ba família neʼebé perfeitu. Ema ida-idak iha família laran sempre koʼalia ba malu ho laran-diʼak. Oan sira ho laran-kontente konta ba sira-nia inan-aman kona-ba buat neʼebé akontese iha eskola. Tempu diʼak sira hanesan neʼe fó kmaan ba ema ida-idak iha família laran no halo sira prontu atu komesa loron aban nian.
3 Iha família neʼebé kontente, oan hatene katak ninia aman ka inan sei tau matan ba nia kuandu moras, no katak sira sei troka malu atu hein durante kalan tomak. Oan hatene katak nia bele koʼalia ho inan ka aman kona-ba ninia problema maski kiʼik ka boot. Sin, oan sente seguru, maski mundu neʼe nakonu ho problema.
4 Kuandu oan sira sai boot ona, baibain sira kaben no iha oan. Lia-dadolin husi rai-Japaun hatete: “Ema foin hafolin ninia inan-aman nia serbisu kuandu nia rasik iha oan.” Oan neʼebé boot ona hakaʼas an atu halo nia rasik nia família kontente. Oan neʼe mós agradese no hadomi ninia inan-aman hodi tau matan ba sira kuandu sira sai ferik no katuas. Nuneʼe iha família hanesan neʼe avó, oan no bei-oan hotu sente kontente.
5 Karik toʼo iha neʼe Ita hanoin: ‘Neʼe diʼak, haʼu mós hadomi haʼu-nia família, maibé haʼu-nia família la perfeitu. Haʼu no haʼu-nia kaben serbisu iha tempu neʼebé la hanesan no ami ladún hasoru malu. Dala barak ami koʼalia deʼit kona-ba problema osan.’ Ka karik Ita hatete: ‘Haʼu-nia oan no bei-oan hela dook husi haʼu, no kleur ona ami la hasoru malu.’ Sin, tanba razaun oioin neʼebé ita la bele kontrola, la iha família neʼebé perfeitu. Maski nuneʼe, família barak moris kontente. Oinsá? Bele ka lae, halaʼo moris neʼebé kontente nuʼudar família? Sin, bele duni. Maibé, antes ita koʼalia kona-ba ida-neʼe, mai ita koʼalia kona-ba pergunta ida tan neʼebé importante.
SAIDA MAK FAMÍLIA?
6. Baibain, família mak saida?
6 Baibain família mak aman, inan, no oan sira. Kuandu livru neʼe temi liafuan família, dala barak koʼalia kona-ba família hanesan neʼe. Maibé, iha mós família la hanesan neʼe. Porezemplu, família neʼebé iha inan ka aman deʼit, família ho inan-kiʼik ka aman-kiʼik, no família neʼebé inan ka aman hela dook malu tan serbisu ka razaun seluk.
7. Família neʼebé boot liu mak hanesan saida?
7 Iha mós família barak neʼebé boot liu. Sira iha avó, tiu no tia, no parente seluk neʼebé hela hamutuk iha uma ida. Iha família hanesan neʼe, baibain oan tau matan ba inan-aman neʼebé ferik-katuas. Laʼós neʼe deʼit, dala ruma parenti neʼebé la hela hamutuk ajuda atu hakiak labarik, ka selu labarik nia eskola, no buat seluk tan. Livru neʼe esplika matadalan neʼebé diʼak mós ba família hanesan neʼe.
FAMÍLIA HASORU SUSAR OIOIN
8, 9. Buat barak troka daudauk iha família laran. Tan neʼe, problema saida deʼit mak mosu?
8 Ohin loron buat barak troka iha família laran, no neʼe la fó moris neʼebé diʼak liu ba família. Porezemplu iha rai-Índia, sira-nia lisan mak feen-laʼen hela hamutuk ho laʼen nia família, no banin mak fó knaar ba feen kona-ba serbisu iha uma laran. Maibé agora, feen barak halo serbisu iha liʼur atu buka osan. Maski nuneʼe, feen sira-neʼe tenke halaʼo nafatin sira-nia knaar iha uma laran hanesan baibain. Laʼós Índia deʼit, maibé iha rai barak ema husu pergunta hanesan: Feto neʼebé serbisu tenke halaʼo ninia knaar hotu iha uma laran? Ka, família seluk tenke ajuda nia?
9 Iha rai balu fali, sira-nia lisan mak avó, tiu no tia no parente seluk hela hamutuk iha uma ida. Maibé, tanba tuir deʼit lisan modernu hanesan buka uluk ema ida-idak nia hakarak, ka tanba problema ekonomia, ema iha família boot sira-neʼe ladún halaʼo sira-nia knaar. Porezemplu, sira barak haree knaar atu tau matan ba inan-aman neʼebé ferik-katuas nuʼudar buat neʼebé todan liu, no lakohi simu. Sira balu mós haterus sira-nia inan-aman. Tuir loloos, problema sira-neʼe mosu daudauk iha rai barak.
10, 11. Saida tan mak hatudu katak buat barak troka daudauk iha família laran?
10 Problema ida tan neʼebé mosu daudauk mak soe-malu, ka divórsiu. Iha tempu uluk kaben-naʼin moris hamutuk toʼo mate. Maibé agora daudauk, ema barak kaben, hela hamutuk ba tempu uitoan, no depois soe malu no kaben fali ho ema seluk. Iha rai balu, mane barak hola feto rua ka tolu, maski la soe malu ho sira-nia feen primeiru. Problema kona-ba família neʼebé oan la iha inan ka aman mós aumenta ba beibeik.
11 Ema barak hanoin katak kaben ladún importante. Balu iha oan maski seidauk kaben tuir lei estadu nian. Ema barak hili atu moris hamutuk deʼit maibé lakohi simu responsabilidade nuʼudar kaben-naʼin. Problema hanesan neʼe mosu daudauk iha rai barak iha mundu tomak.
12. Oinsá mak labarik hetan susar tanba buat barak troka daudauk iha família laran?
12 Oinsá ho labarik sira? Iha rai barak, labarik neʼebé moris husi inan neʼebé seidauk kaben aumenta ba beibeik. Feto-klosan barak iha oan balu husi aman neʼebé la hanesan. Relatóriu husi rai barak hatudu katak iha labarik rihun ba rihun neʼebé la iha uma no moris deʼit iha estrada. Sira barak halai husi família neʼebé fó-terus ba sira, ka duni sai sira tan la iha kbiit atu tau matan ba sira.
13. Problema saida deʼit mak halo família barak la kontente?
13 Sin, família hasoru susar oioin. Liután problema neʼebé foin temi, iha mós problema neʼebé mosu beibeik hanesan joven neʼebé kontra beibeik inan-aman, ema neʼebé halo buat seksuál ba labarik, violénsia doméstika, lanu-teen, no problema seluk tan neʼebé halo família barak la kontente. Ho problema sira-neʼe, ema boot no labarik barak la sente seguru iha família laran.
14. (a) Tuir ema nia hanoin, saida mak hun husi susar oioin neʼebé mosu iha família laran? (b) Besik tinan rihun rua liubá, saida mak apóstolu Paulo fó-hatene nanis kona-ba mundu agora? Tanba liafuan neʼe sai loos ona, oinsá mak ida-neʼe kona moris família nian?
14 Tanbasá mak família hasoru susar oioin? Ema balu dehan katak problema nia hun mak feto sira-neʼebé bá serbisu atu buka osan. Ema seluk hatete katak problema nia hun mak ema nia morál neʼebé sai aat daudauk. No ema seluk fali koʼalia kona-ba buat seluk tan nuʼudar problema nia hun. Besik tinan rihun rua liubá, apóstolu Paulo fó-hatene nanis katak família sira sei hasoru susar no problema oioin. Nia hakerek: “Iha loron ikus sira, susar barak sei mosu mai. Ema sei hanoin deʼit sira an hodi buka osan; loko-an, no foti-an; abuzadór; sira sei refila sira-nia aman-inan sira, la hatene fó-agradese, la hatene Maromak; la hatene sadiʼa maluk no laran-nakali, konta ema nia vida, la tuir ukun-fuan, fuik no buat diʼak hotu nia funu-balun, traidór, bulak tan loko-an, hodi hakarak deʼit buka sira rasik nia ksolok liu fali hadomi Maromak.” (2 Timoteo 3:1-4) Sé mak bele nega katak liafuan neʼe la akontese ohin loron? Iha mundu neʼebé nakonu ho ema neʼebé hatudu hahalok aat hanesan neʼe, ita la hakfodak katak família hasoru susar oioin, loos ka lae?
HALAʼO MORIS NEʼEBÉ KONTENTE NUʼUDAR FAMÍLIA
15-17. Saida mak matadalan neʼebé diʼak liu atubele halaʼo moris neʼebé kontente nuʼudar família?
15 Kuandu família sira hasoru problema, ema barak buka konsellu husi livru neʼebé ema matenek sira hakerek, husi ema ferik ka katuas iha família laran, ka husi matan-dook sira. Maibé ida-neʼe mós hamosu problema ida tan, tanba dala ruma ema ida nia konsellu kontra ema seluk nian, no konsellu neʼebé ohin loron ema haree mak diʼak, aban-bainrua sira hanoin katak konsellu neʼe la diʼak ona.
16 Nuneʼe, ita bele hetan konsellu diʼak ba família iha neʼebé loos? Ita hakarak buka konsellu neʼe iha livru ida neʼebé hakerek maizumenus tinan 1.900 liubá ka lae? Ka, karik Ita hanoin katak livru tuan hanesan neʼe la iha folin ona ba tempu modernu? Maibé tuir loloos, ita bele hetan matadalan hodi bele halaʼo moris neʼebé kontente nuʼudar família iha livru hanesan neʼe.
17 Livru neʼe mak Bíblia. Iha duni buat barak neʼebé hatudu katak liafuan neʼebé ema hakerek iha livru neʼe mai husi Maromak rasik. Iha Bíblia laran ita bele hetan liafuan tuirmai neʼe: “Maromak leno Eskritura hotu; nia diʼak atu hanorin, atu halakon hanorin neʼebé la loos, atu sai matadalan ba ema nia moris, no atu hanorin sira sai santu.” (2 Timoteo 3:16) Ami hein katak Ita sei uza livru ida-neʼe atu hanoin kona-ba oinsá mak Bíblia bele ‘sai matadalan ba Ita-nia moris’ kuandu Ita-nia família hasoru problema no susar oioin.
18. Tanbasá mak matenek atu simu Bíblia nia matadalan kona-ba moris kaben nian?
18 Se Ita duvida katak Bíblia la bele ajuda família atu sai kontente, hanoin toʼok kona-ba buat tuirmai neʼe: Maromak neʼebé haleno Bíblia, nia mak hahú arranju kaben nian. (Gênesis 2:18-25) Bíblia hatete katak nia naran mak Jeová. (Salmo 83:18; Apokalipse 19:1) Nia mak Kriadór no ‘Aman’, no ‘husi nia, família ida-ida simu nia naran’. (Efeso 3:14, 15) Maromak Jeová haree buat hotu neʼebé akontese ba família ida-idak horiuluk kedas toʼo agora. Nia hatene loos kona-ba problema neʼebé bele mosu no liuhusi Bíblia nia fó konsellu atu rezolve problema sira-neʼe. Durante ema nia istória iha mundu neʼe, ema neʼebé hakaʼas an atu halo tuir Bíblia nia matadalan iha família laran hetan moris neʼebé haksolok liután.
19-21. Ohin loron esperiénsia saida deʼit mak hatudu katak Bíblia nia konsellu iha kbiit atu rezolve problema kaben nian?
19 Porezemplu, inan ida husi rai-Indonézia sempre joga osan. Ba tinan barak, nia ladún tau matan ba nia oan naʼin-tolu, no nia sempre istori malu ho nia laʼen. Tuirmai, nia komesa estuda Bíblia. Neineik-neineik inan ida-neʼe tau fiar ba buat neʼebé Bíblia hatete. Bainhira nia halo tuir Bíblia nia konsellu, nia para joga osan no sai feen neʼebé diʼak liu. Tanba nia hakaʼas an atu halo tuir Bíblia nia matadalan, nia no ninia família tomak sai kontente liu.
20 Inan ida husi rai-España hatete: “Kuandu ami foin kaben ba tinan ida deʼit, ami komesa iha problema boot.” Nia no ninia laʼen iha hanoin neʼebé la hanesan kona-ba buat barak, no kuandu sira koʼalia ba malu baibain sira istori malu deʼit. Maski sira-nia oan-feto sei kiʼik, sira deside atu haketak malu tuir lei estadu nian. Maibé antes sira halo ida-neʼe, ema konvida sira atu estuda Bíblia. Sira aprende Bíblia nia konsellu kona-ba laʼen no feen no sira komesa atu halo tuir. Lakleur, sira bele koʼalia didiʼak ba malu, no sira-nia família kiʼik neʼe moris iha dame laran.
21 Bíblia mós bele ajuda ema neʼebé kaben ba tempu kleur ona. Porezemplu, hanoin toʼok kona-ba kaben-naʼin husi rai-Japaun. Laʼen sai hirus lalais no dala ruma halo violénsia. Loron ida, kaben-naʼin neʼe nia oan-feto sira komesa estuda Bíblia, maski inan-aman kontra hasoru sira. Tuirmai, sira-nia aman mós estuda Bíblia hamutuk ho sira, maibé inan kontra nafatin. Maibé, ba tinan barak, inan neʼe haree katak Bíblia nia matadalan ajuda ninia família. Ninia oan-feto sira tau matan didiʼak ba nia, no nia laʼen ladún sai hirus hanesan uluk. Buat sira-neʼe book nia atu estuda Bíblia maski nia idade boot, no Bíblia nia konsellu mós ajuda nia. Ferik neʼe hatete beibeik: “Agora ami sai kaben-naʼin neʼebé kontente.”
22, 23. Oinsá mak Bíblia ajuda ema husi nasaun hotu no kultura oioin atu hetan ksolok iha família laran?
22 Esperiénsia sira neʼebé foin temi, no esperiénsia barak tan husi mundu tomak, hatudu katak família barak hatene ona oinsá atu halaʼo moris neʼebé kontente nuʼudar família. Sira simu no halo tuir Bíblia nia konsellu. Sin, hanesan ema hotu, sira mós moris iha tempu neʼebé nakonu ho violénsia, hahalok lamoos, no problema ekonomia. Liután neʼe, sira ema sala-naʼin. Maibé sira hetan ksolok hodi hakaʼas an atu halo tuir Ida neʼebé hahú arranju família nian. Hanesan Bíblia hatete, Maromak Jeová mak “Ida neʼebé hanorin ó atu ó bele hetan buat neʼebé diʼak, Ida neʼebé halo ó laʼo iha dalan neʼebé ó tenke laʼo”.—Isaías 48:17.
23 Maski ema hakerek hotu Bíblia besik tinan rihun rua liubá, maibé Bíblia nia konsellu sei diʼak ba ita-nia tempu. Liután neʼe, Maromak fó ninia Liafuan ba ema hotu. Nuneʼe, Bíblia laʼós livru ba ema Portugál ka ema Europa deʼit. Bíblia hatete kona-ba Maromak, “husi ema ida deʼit, Nia halo ema tomak”. (Apostolu 17:25) Maromak Jeová hatene ema hotu nia laran, no Bíblia nia matadalan diʼak ba ema hotu. Se Ita halo tuir matadalan sira-neʼe, Ita mós bele hatene oinsá atu halaʼo moris neʼebé kontente nuʼudar família.