Informasaun atu uza hamutuk livru Moris Kristaun no Haklaken
5-11 JUÑU
Keʼe no hetan buat murak husi Bíblia
it-2 p. 444 par. 9
Foho
Reprezenta ukun. Iha Bíblia, foho bele reprezenta reinu ka governu sira. (Daniel 2:35, 44, 45; kompara Isaías [Yesaya] 41:15; Apokalipse 17:9-11, 18.) Porezemplu, Babilónia iha naran nuʼudar “foho neʼebé estraga buat hotu” tanba Babilónia nia tropa sira manán funu no harahun nasaun barak. (Jeremias [Yeremia] 51:24, 25) Bainhira Bíblia kompara Jeová nia atividade ho ema nia funu-naʼin sira, salmu ida dehan katak Jeová nia “naroman nabilan loos” no nia “kmanek liu fali foho sira neʼebé animál siʼak sira hela bá.” (Salmo [Mazmur] 76:4) Karik “foho sira neʼebé animál siʼak sira hela bá” mak reprezenta ukun sira neʼebé siʼak tebes. (Kompara ho Naum [Nahum] 2:11-13.) Kona-ba Jeová, David hatete: “Ita hametin haʼu hanesan foho ida,” karik neʼe signifika katak Jeová halo David nia ukun sai aas no hametin ukun neʼe. (Salmo [Mazmur] 30:7; kompara ho 2 Samuel 5:12.) Tanba foho bele reprezenta ukun, neʼe bele ajuda ita atu komprende signifika husi liafuan sira neʼebé hakerek iha Apokalipse 8:8. Liafuan “buat ruma hanesan foho boot neʼebé lakan ho ahi” fó ideia katak neʼe mak dalan ukun neʼebé iha kbiit atu estraga hanesan ahi.
it-2 p. 882 par. 3
Tasi
Tropa saʼe nadodon. Jeremias kompara lian husi Babilónia nia ataka hanesan “laloran tasi nia lian neʼebé makaʼas”. (Jeremias [Yeremia] 50:42) Tan neʼe, bainhira nia fó sai profesia katak “tasi” sei saʼe atu taka tomak Babilónia, nia koʼalia daudauk kona-ba tropa husi Média no Pérsia neʼebé mai hanesan bee saʼe atu halakon.—Jeremias (Yeremia) 51:42; kompara Daniel 9:26.
12-18 JUÑU
Keʼe no hetan buat murak husi Bíblia
w07 1/6 p. 9 par. 4
Pontu importante husi livru Lamentações
2:17—“Liafuan” neʼebé Jeová kumpre ona kona-ba Jeruzalein mak saida? Afinál liafuan neʼe koʼalia kona-ba buat neʼebé Levítico (Imamat) 26:17 hatete: “Haʼu sei fila oin hodi kontra imi, no imi-nia inimigu sei manán imi; no ema sira neʼebé odi imi sei sama imi, no imi sei halai maski ema ida la duni tuir imi.”
w07 1/6 p. 11 par. 1
Pontu importante husi livru Lamentações
5:7—Jeová hakarak ema atu lori sira-nia beiʼala nia sala ka lae? Lae, Jeová la uza beiʼala sira-nia sala atu fó kastigu ba ema. Tanba Bíblia hatete: “Ita ida-idak sei hatán ba Maromak kona-ba ita-nia hahalok rasik”. (Roma 14:12) Maibé, konsekuénsia husi beiʼala sira-nia sala bele kona nafatin jerasaun sira seluk. Porezemplu, ema Izraél iha tempu uluk deside atu adora estátua oioin, tan neʼe ikusmai halo susar ba sira-nia jerasaun tuirmai neʼebé laran-metin atu laʼo iha dalan neʼebé loos.—Êxodo (Keluaran) 20:5.
19-25 JUÑU
Keʼe no hetan buat murak husi Bíblia
w07 1/7 p. 11 par. 6
Pontu importante husi livru Ezequiel—I
1:4-28—Karreta lalehan nian reprezenta saida? Karreta neʼe reprezenta Jeová nia organizasaun parte lalehan nian neʼebé kriatura laran-metin deʼit mak iha laran. Forsa neʼebé dirije karreta neʼe mak Jeová nia espíritu santu. Ida neʼebé lori karreta neʼe, reprezenta Jeová neʼebé iha glória boot liu hotu. Arkiris neʼebé furak reprezenta ninia dame.
w07 1/7 p. 12 par. 4
Pontu importante husi livru Ezequiel—I
4:1-17—Ezequiel halo tuir duni ezemplu kona-ba inimigu sira haleʼu Jeruzalein ka lae? Ezequiel husu Jeová atu troka materiál sunu nian hodi teʼin no Jeová fó duni buat neʼebé nia husu. Neʼe hatudu katak Ezequiel halo tuir duni sinál sira. Nia latan ho isin sorin karuk ba loron 390 tuir tinan 390 neʼebé Izraél parte norte halo sala husi tinan 997 toʼo Jeruzalein naksobu iha tinan 607 molok Kristu. Tuirmai nia latan ho isin sorin loos ba loron 40 hodi tuir tinan 40 neʼebé Judá halo sala, komesa husi tempu neʼebé Jeremias simu knaar hodi sai profeta iha tinan 647 toʼo tinan 607 molok Kristu. Durante loron 430 nia laran, Ezequiel han no hemu uitoan deʼit, neʼe hodi hatudu katak rai sei hamlaha boot iha tempu neʼebé inimigu ataka Jeruzalein.
26 JUÑU–2JULLU
Keʼe no hetan buat murak husi Bíblia
Maromak prepara ita ba futuru
10 Tanba Maromak Jeová deʼit mak hatene kona-ba ema nia futuru, nia deʼit mak bele ajuda ita atu prepara ba buat neʼebé sei akontese lakleur tan. (Isaías [Yesaya] 46:9, 10) Profesia husi Bíblia hatudu katak “Maromak Jeová nia loron boot besik ona”. (Sofonias [Zefanya] 1:14) Kona-ba loron neʼe, liafuan neʼebé hakerek iha Provérbios 11:4 sei sai loos: “Buat neʼebé folin-boot sei la iha folin iha loron hirus nian, maibé justisa mak sei salva sira husi mate.” Kuandu toʼo ona tempu ba Maromak Jeová atu tesi lia ba Satanás nia mundu neʼe, buat neʼebé importante liu mak atu Maromak simu ita. Osan sei la iha folin iha tempu neʼebá. Tuir loloos, Ezequiel 7:19 hatete: “Sira sei soe sira-nia osan-mutin iha dalan, sira sei hakribi sira rasik nia osan-mean.” Hatene nanis kona-ba buat neʼebé sei akontese, bele ajuda ita atu halo desizaun neʼebé diʼak agora.
Hatudu fiar kuandu mesak
14 Fiar neʼebé loos katak ita fiar Maromak iha duni no katak nia haree buat hotu. Se ita la iha fiar hanesan neʼe, fasil ba ita atu halo hahalok neʼebé sala. Hanoin toʼok kona-ba buat neʼebé akontese ba Maromak nia atan sira iha tempu uluk. Maromak Jeová fó sai ba profeta Ezequiel katak ema Izraél halo buat neʼebé aat subasubar, hodi hatete: “Oh, oan-mane, ó haree ona buat neʼebé katuas sira husi umakain Izraél nian halo iha nakukun laran, iha sira ida-idak nia kuartu laran neʼebé iha estátua neʼebé bahat tiha? Tanba sira hatete: ‘Jeová la haree ita. Jeová husik ona rai neʼe.’” (Ezequiel 8:12) Ita haree oinsá mak problema neʼe mosu? Sira la fiar katak Maromak Jeová haree buat neʼebé sira halo. Ba sira Maromak Jeová hanesan la iha.
JEREMIAS
51 Jeová dehan nuneʼe:
“Haree bá, haʼu sei halo anin-boot huu makaʼas
Toʼo estraga Babilónia no ema sira neʼebé hela iha Leb-Kamai.
2 Haʼu sei haruka ema bá Babilónia,
No sira sei tahek no halo rai neʼe sai mamuk, hanesan ema tahek trigu;
Iha tempu terus boot, sira sei mai ataka rai neʼe husi fatin hotu.
3 Babilónia nia hanadór sira sei la uza sira-nia rama-inan.
No ninia soldadu mós sei la hamriik ho hatais funu nian.
Imi labele hatudu laran-sadiʼa ba ninia mane joven sira.
Oho tiha ninia tropa hotu.
4 No tropa sira-neʼe sei mate duni iha ema Kaldeia nia rai,
Ema sei sona sira iha Babilónia nia dalan sira.
5 Tanba Maromak Jeová, ukun-naʼin ba tropa lalehan nian, la husik Izraél no Judá sai hanesan feto-faluk ida.
Maibé tuir Izraél nia Maromak Santu nia haree, ema Kaldeia nia rai neʼe nakonu ho sala.
6 Imi hotu, halai sai husi Babilónia bá,
No halai bá atu salva imi-nia moris.
Keta mate mohu tanba ninia sala sira.
Tanba neʼe mak tempu ba Jeová atu fó kastigu ba nia.
Maromak sei fó kastigu ba nia tuir buat neʼebé uluk nia halo ona.
7 Uluk Babilónia mak hanesan kopu osan-mean iha Jeová nia liman;
Babilónia halo ona mundu tomak sai lanu.
Nasaun sira hemu ona ninia tua-uvas;
Tan neʼe mak nasaun sira sai bulak.
8 Derrepente deʼit Babilónia monu ona no harahun tiha.
Tanis halerik bá tanba nia!
Foti mina-bálsamu bá atu kose ba ninia moras; karik nia bele sai diʼak fali.”
9 “Ami koko ona atu kura Babilónia, maibé nia la sai diʼak.
Husik nia bá no mai ita ida-idak bá ita-nia rai.
Tanba ninia sala sira sai barak tebes toʼo lalehan;
Ninia sala sira aas tebes toʼo kalohan.
10 Jeová lori ona justisa ba ita.
Mai, mai ita fó sai iha Siaun, buat neʼebé ita-nia Maromak Jeová halo ona.”
11 “Kose imi-nia rama-oan halo nabilan bá; foti imi-nia eskudu bá.
Jeová book ona liurai Média sira-nia laran atu ataka Babilónia,
Tanba nia hakarak halakon rai neʼe.
Neʼe mak kastigu husi Jeová ba Babilónia, kastigu neʼebé nia fó tanba buat neʼebé sira halo ona ba ninia templu.
12 Foti saʼe ai-riin sinál nian ba Babilónia nia moru bá.
Aumenta guarda sira bá, haruka guarda sira hamriik iha sira ida-idak nia fatin.
Prepara ema sira neʼebé atu halo funu hasoru Babilónia.
Tanba Jeová halo ona planu ida,
No nia sei halo tuir buat neʼebé nia promete ona atu ataka povu neʼebé hela iha Babilónia.”
13 “Oh, feto neʼebé hela iha bee barak nia leten,
Ó neʼebé iha rikusoin barak,
Ó-nia rohan toʼo mai ona, tempu neʼebé ó la bele tan aumenta ó-nia rikusoin.
14 Jeová, ukun-naʼin ba tropa lalehan nian, jura ona hodi ninia an rasik, dehan:
‘Haʼu sei halo nakonu ó-nia rai ho soldadu sira neʼebé barak tebes hanesan gafañotu sira,
No sira sei hasaʼe lian haksolok nian tanba sira manán hasoru ó.’
15 Nia mak Kriadór neʼebé halo mundu ho ninia kbiit,
Ida neʼebé hametin rai neʼebé buras ho ninia matenek
No Ida neʼebé nahe lalehan ho ninia kbiit atu komprende.
16 Bainhira nia hasaʼe lian,
Bee iha lalehan sai siʼak,
No nia halo kalohan sira saʼe husi rai nia rohan.
Nia halo rai-lakan ba udan,
No nia lori sai anin husi fatin tau anin nian.
17 Ema hotu hatudu hahalok la ho hanoin no la ho matenek.
Badain-besi hotu sei hetan moe boot tanba estátua neʼebé sira bahat;
Tanba estátua besi nian mak falsu,
No sira-nia iis moris nian la iha.
18 Estátua hotu neʼebé badain halo mak folin-laek no merese ema hatete aat.
Bainhira sira-nia loron atu simu tesi-lia nian toʼo mai, sira sei lakon mohu.
19 Maibé Jacob nia Maromak laʼós hanesan estátua sira-neʼe,
Tanba nia mak Ida neʼebé kria buat hotu-hotu,
Nia mós kria ninia liman-rohan neʼebé folin-boot.
Ninia naran mak Jeová ukun-naʼin ba tropa lalehan nian.”
20 “Ba haʼu, ó mak haʼu-nia marreta, kroʼat neʼebé haʼu uza atu halo funu,
Tanba haʼu sei uza ó atu baku rahun nasaun sira.
Haʼu sei uza ó atu harahun governu sira.
21 Haʼu sei uza ó atu baku mate kuda no ema neʼebé saʼe kuda neʼe.
Haʼu sei uza ó atu baku rahun kuda-karreta funu nian no ema neʼebé lori kuda-karreta neʼe.
22 Haʼu sei uza ó atu baku mate mane no feto sira.
Haʼu sei uza ó atu baku mate katuas no labarik-mane sira.
Haʼu sei uza ó atu baku mate mane no feto foin-saʼe sira.
23 Haʼu sei uza ó atu baku mate bibi-atan no ninia bibi-lubun sira.
Haʼu sei uza ó atu baku mate toʼos-naʼin no ninia animál sira.
Haʼu sei uza ó atu baku mate governadór sira no ema-boot sira.
24 No haʼu sei fó kastigu ba Babilónia no ba ema hotu neʼebé hela iha Kaldeia
Tanba buat aat hotu neʼebé sira halo ona iha imi-nia oin iha Siaun, oh ema Judá”, Jeová dehan.
25 Jeová dehan: “Haree bá, haʼu sei fó susar ba ó, oh foho neʼebé estraga buat hotu,
Ó neʼebé estraga mundu tomak.
Haʼu sei foti liman hasoru ó no duir tun ó husi fatuk-boot sira-nia leten
No haʼu sei halo ó sai foho neʼebé ahi han motuk ona.”
26 “Ema sei la foti fatuk-inan ka fatuk ba uma-hun husi ó-nia sidade,
Tanba ó sei sai fatin neʼebé fuik ba nafatin”, Jeová dehan.
27 “Hasaʼe ai-riin sinál nian iha rai neʼe.
Huu dikur iha nasaun sira-nia leet bá.
Hili nasaun sira atu halo funu hasoru nia.
Haruka nasaun sira iha Ararat, Mini no Askenaz atu ataka nia.
Fó knaar ba tropa nia ulun-naʼin ida atu aumenta tan soldadu sira neʼebé sei ataka nia.
Lori sai kuda sira hanesan gafañotu lubun boot.
28 Hili nasaun sira atu halo funu hasoru nia bá,
Hili liurai sira husi rai-Média, ninia governadór sira no ema-boot sira hotu
No rai hotu neʼebé iha sira ida-idak nia ukun okos.
29 No rai sei nakdoko no nakdedar,
Tanba Jeová nia planu ba Babilónia sei sai loos,
Nia sei halo rai-Babilónia sai fatin neʼebé halo ema taʼuk, fatin neʼebé la iha ema ida mak hela.
30 Babilónia nia funu-naʼin sira la halo tan funu.
Sira tuur deʼit iha sira-nia fatin seguru.
Sira-nia kbiit lakon tiha ona.
Sira sai ona hanesan feto.
Uma sira iha Babilónia, ahi han mohu ona.
Ai kalsu portaun nian tohar tiha ona.
31 Manu-ain ida halai atu hasoru manu-ain seluk,
No ema ida halai atu hatoʼo liafuan ba ema seluk,
Atubele lori lia-menon ba liurai Babilónia katak ema manán ona ninia sidade iha fatin hotu,
32 Katak inimigu sira hadau ona mota sira,
No sunu ona bero hotu neʼebé halo ho duʼut-papiru,
No soldadu sira sai taʼuk tebes.”
33 Tanba Jeová, ukun-naʼin ba tropa lalehan nian, Maromak Izraél nian, dehan nuneʼe:
“Oan-feto Babilónia mak hanesan fatin sama trigu nian.
Tempu neʼe mak tempu atu sama nia.
Lakleur tan, ninia tempu koʼa nian sei toʼo mai.”
34 “Nabukodonozor, liurai ba rai-Babilónia, han ona haʼu toʼo mohu;
Nia halo haʼu sabraut.
Nia halo haʼu sai hanesan sanan-rai neʼebé mamuk.
Nia tolan tiha haʼu hanesan samea boot ida;
Nia halo ninia kabun bosu ho haʼu-nia gostu.
Tuirmai nia solur sai haʼu toʼo mohu.
35 Ema neʼebé hela iha Siaun dehan: ‘Husik violénsia neʼebé sira halo ona ba haʼu no ba haʼu-nia isin-lolon kona fali Babilónia bá!’
No Jeruzalein dehan: ‘Husik ema sira neʼebé hela iha Kaldeia mak lori todan ba haʼu-nia raan!’”
36 Tan neʼe, Jeová dehan nuneʼe:
“Haree bá, haʼu sei ajuda ó-nia kazu,
No haʼu sei fó kastigu ba nia atu defende ó.
Haʼu sei hamaran ninia tasi no halo ninia bee-matan sira sai maran.
37 No Babilónia sei sai fatuk butuk boot,
No sai asu-fuik sira-nia hela-fatin,
Ema sei sai taʼuk no hakfuʼik bainhira haree fatin neʼe,
No la iha ema ida mak hela iha neʼebá.
38 Sira hotu sei hasaʼe lian makaʼas hanesan leaun-oan,
Sira sei hasaʼe lian siʼak hanesan leaun kiʼik sira.”
39 “Bainhira sira-nia laran sente manas, haʼu sei halo festa ba sira no halo sira lanu,
Atubele halo sira kontente;
Tuirmai sira sei toba ba nafatin,
No sira sei la hadeer tan”, Jeová dehan.
40 “Haʼu sei lori sira ba mate hanesan lori bibi-malae oan ba fatin oho nian,
Hanesan lori bibi-malae aman hamutuk ho bibi-timur.”
41 “Oh, ema hadau ona Sesak,
Ema foti tiha sidade kmanek neʼebé ema iha mundu tomak fó hahiʼi!
Babilónia sai ona fatin neʼebé halo nasaun sira taʼuk!
42 Tasi saʼe no taka ona Babilónia tomak.
Tasi nia laloran sira halo nia mout.
43 Ninia sidade sira sai fatin neʼebé halo ema taʼuk, rai-fuik, rai neʼebé maran-dekor.
Rai neʼebé sei la iha ema ida mak hela no la iha ema ida mak laʼo liu iha neʼebá.
44 Haʼu sei fó kastigu ba Bel iha Babilónia,
No husi ninia ibun, haʼu sei hasai buat neʼebé nia tolan ona.
Nasaun sira sei la nadodon tan ba nia,
No Babilónia nia moru mós sei monu.
45 Sai husi nia leet, haʼu-nia povu!
Halai sai husi nia atu salva imi-nia moris husi Jeová nia hirus neʼebé lakan makaʼas!
46 Keta sai nakdedar ka taʼuk kona-ba lia-menon neʼebé imi rona iha rai neʼe.
Iha tinan ida nia laran, lia-menon neʼe sei toʼo mai,
No tinan tuirmai, lia-menon ida seluk mós sei toʼo mai,
Lia-menon kona-ba violénsia iha rai neʼe no kona-ba ukun-naʼin ida ataka hasoru ukun-naʼin seluk.
47 Tan neʼe, haree bá! loron sira sei toʼo mai
Bainhira haʼu sei fó kastigu ba Babilónia nia estátua sira neʼebé bahat ona.
Ninia rai tomak sei hetan moe boot,
No ninia ema neʼebé inimigu oho sei mate iha Babilónia.
48 Lalehan no rai no buat sira hotu neʼebé iha fatin neʼe nia laran
Sei haklalak ho haksolok bainhira Babilónia monu,
Tanba ema sira neʼebé atu halakon Babilónia sei mai husi parte norte”, Jeová dehan.
49 “Laʼós ema Izraél deʼit mak Babilónia oho,
Maibé ema sira husi mundu tomak mós mate iha Babilónia.
50 Imi neʼebé halai-sees husi surik, halai nafatin bá, keta para!
Husi fatin dook, hanoin-hetan nafatin Jeová,
No hanoin fali Jeruzalein iha imi-nia laran bá.”
51 “Ami hetan ona moe boot, tanba ami rona liafuan neʼebé hatún ami.
Moe mak taka ami-nia oin,
Tanba ema estranjeiru mai ataka ona fatin santu sira iha Jeová nia uma.”
52 Jeová dehan: “Tan neʼe, haree bá! loron sira sei toʼo mai
Bainhira haʼu sei fó kastigu ba Babilónia nia estátua sira neʼebé bahat ona,
No iha ninia rai tomak, ema sira neʼebé hetan kanek sei halerik.”
53 “Maski se karik Babilónia saʼe ba lalehan,
Ka maski nia hametin ninia uma-aas neʼebé seguru,
Maibé haʼu sei haruka ema bá ataka nia no harahun nia”, Jeová dehan.
54 “Rona bá! Ema hasaʼe lian halerik iha Babilónia,
No lian dezastre boot nian iha ema Kaldeia nia rai,
55 Tanba Jeová sei halakon Babilónia,
No nia sei hamate sira-nia lian neʼebé boot,
No sira-nia inimigu nia lian sei boot hanesan laloran tasi nia lian.
Ema mós bele rona inimigu sira-neʼe nia lian.
56 Tanba inimigu sira sei mai ataka Babilónia;
Sira sei kaer Babilónia nia funu-naʼin sira,
No sei harahun sira-nia rama-inan,
Tanba Jeová mak Maromak neʼebé selu fali ema nia hahalok aat.
Nia sei selu fali duni.
57 Haʼu sei halo ninia ulun-naʼin sira no ninia matenek-naʼin sira lanu,
Nuneʼe mós ho ninia governadór sira no ninia ema-boot sira no ninia funu-naʼin sira.
Sira sei toba ba nafatin,
No sira sei la hadeer tan”, Liurai, neʼebé naran Jeová, ukun-naʼin ba tropa lalehan nian, dehan nuneʼe.
58 Jeová, ukun-naʼin ba tropa lalehan nian, dehan:
“Moru Babilónia nian, maski mahar, maibé sei harahun tiha toʼo uut,
No ninia portaun sira, maski aas, maibé ahi sei han.
Povu serbisu makaʼas, maibé sei sai saugati deʼit;
Nasaun sira hakole sira-nia an, maibé ahi sei han mohu buat hotu.”
59 Neʼe mak liafuan neʼebé profeta Jeremias haruka ba Seraias, Nerias nia oan-mane, Masea nia bei-oan, bainhira Seraias bá Babilónia hamutuk ho Liurai Zedekias iha tempu neʼebé ninia ukun ba rai-Judá tama ba tinan haat; Seraias mak ema neʼebé tau matan ba liurai nia sasán. 60 Tuirmai, Jeremias hakerek ona iha livru ida terus hotu neʼebé sei mosu ba Babilónia, liafuan sira-neʼe hotu neʼebé hakerek ona mak kona-ba Babilónia. 61 Liután neʼe, Jeremias hatete ba Seraias: “Bainhira ó toʼo tiha iha Babilónia no haree ona sidade neʼe, ó tenke lee liafuan sira-neʼe hotu ho lian makaʼas.
62 Tuirmai, ó tenke dehan: ‘Oh Jeová, Ita-Boot dehan ona kona-ba fatin neʼe katak Ita-Boot sei harahun tiha sidade neʼe no sei la iha tan buat ida mak hela iha neʼe, ema no mós animál sira, no katak sidade neʼe sei sai fatin neʼebé fuik ba nafatin.’
63 No bainhira ó lee hotu tiha livru neʼe, ó tenke kesi fatuk ba livru neʼe no soe ba Mota Eufrates laran. 64 Tuirmai ó tenke hatete: ‘Nuneʼe mak Babilónia sei mout no nunka mosu fali tanba susar neʼebé haʼu lori ba nia; no ninia povu sei sai fraku.’”
Liafuan neʼebé Jeremias hatoʼo mak toʼo iha neʼe deʼit.
52 Zedekias tinan 21 bainhira nia sai liurai, no nia ukun iha Jeruzalein ba tinan 11 nia laran. Ninia inan naran Hamutal, Jeremias husi Libna nia oan-feto. 2 Nia kontinua halo buat neʼebé aat iha Jeová nia matan, tuir buat hotu neʼebé Jehoakim halo ona. 3 Buat sira neʼebé akontese iha Jeruzalein no iha Judá halo Jeová hirus toʼo soe sai sira husi nia oin. No Zedekias kontra hasoru liurai Babilónia. 4 Ikusmai, iha tempu neʼebé Zedekias nia ukun tama ba tinan sia, iha loron sanulu fulan-sanulu, Liurai Nabukodonozor husi rai-Babilónia ho ninia tropa hotu mai ataka Jeruzalein. Sira harii tenda no moru haleʼu sidade neʼe. 5 No sira kontinua ataka haleʼu sidade neʼe toʼo Liurai Zedekias nia ukun tama ba tinan 11.
6 Iha loron sia iha fulan-haat, hamlaha boot kona sidade neʼe, no la iha tan ai-han ba povu iha rai neʼe. 7 Ikusmai, tropa Babilónia konsege sobu duni moru balu iha sidade neʼe, no soldadu hotu iha sidade laran halai sai iha kalan bainhira ema Kaldeia nia tropa haleʼu hela sidade neʼe. Sira halai tesik ba portaun neʼebé iha moru rua nia leet besik liurai nia jardín; no sira kontinua halai liuhusi dalan Araba nian. 8 Maibé ema Kaldeia nia tropa sira duni tuir liurai, no sira toman Liurai Zedekias iha rai-tetuk maran Jerikó nian, no ninia soldadu hotu halai namkari husik hela nia. 9 Tuirmai, ema Kaldeia nia tropa sira kaer liurai neʼe no lori nia ba liurai Babilónia iha sidade Ribla iha rai-Hamat, no liurai Babilónia fó sai ninia tesi-lia ba Zedekias. 10 No iha sidade Ribla, liurai Babilónia oho Zedekias nia oan-mane sira iha Zedekias nia oin, no oho mós rai-Judá nia ema-boot sira hotu. 11 Tuirmai, liurai Babilónia halo Zedekias nia matan sai delek, kesi nia ho korrente neʼebé halo ho riti, lori nia ba Babilónia, no hatama nia iha dadur laran toʼo nia mate.
12 Iha loron sanulu iha fulan-lima, katak iha tempu neʼebé Liurai Nabukodonozor nia ukun ba rai-Babilónia tama ba tinan 19, Nebuzaradan, xefe ba guarda sira, neʼebé mós liurai Babilónia nia atan ida, mai toʼo Jeruzalein. 13 Tuirmai, nia sunu Jeová nia templu no liurai nia palásiu, no sunu uma hotu iha Jeruzalein laran; no nia mós sunu uma boot hotu. 14 No ema Kaldeia nia tropa sira neʼebé hamutuk ho xefe ba guarda neʼe, sira hotu harahun moru sira neʼebé haleʼu Jeruzalein.
15 Nebuzaradan, xefe ba guarda sira, kaer mós povu kiʼik balu no ema sira neʼebé sei hela iha sidade Jeruzalein, no lori sira hotu nuʼudar dadur ba Babilónia. Nia mós lori ema badain hotu no ema neʼebé rende an ona ba liurai Babilónia. 16 Maibé Nebuzaradan, xefe ba guarda sira, husik povu balu neʼebé kiak tebes hela iha rai neʼe no obriga sira atu halo serbisu iha toʼos-uvas no mós halo serbisu seluk neʼebé todan.
17 No kona-ba Jeová nia templu nia besi-riin sira neʼebé halo ho riti, no karrosa-riti sira no basia-riti iha Jeová nia templu, ema Kaldeia sira harahun ona buat sira-neʼe no sira lori riti hotu ba Babilónia. 18 Sira mós lori balde atu tau ahi-kadesan, no kanuru boot, no buat neʼebé uza atu hamate ahi, manko, kopu no sasán seluk hotu neʼebé halo ho riti, sasán sira neʼebé uza ba adorasaun iha templu laran. 19 Xefe ba guarda neʼe mós lori basia, no ahi-anar fatin, manko, balde atu tau ahi-kadesan, ahi-oan fatin, kopu, no manko sira neʼebé halo ho osan-mean no osan-mutin neʼebé moos. 20 Maibé kona-ba besi-riin rua neʼebé halo ho riti, basia-riti, karau-aman riti 12 neʼebé iha basia-riti nia okos, no karrosa-riti sira neʼebé Liurai Salomão halo ona ba Jeová nia templu, riti sira-neʼe todan demais toʼo tetu mós la bele.
21 Kona-ba besi-riin sira, ida-idak aas metru 8, no bainhira sukat haleʼu riin neʼe ho tali, tali neʼe nia naruk toʼo metru 5; riin neʼe nia laran mamuk maibé ninia riti mahar maizumenus sentímetru 7. 22 Buat neʼebé enfeita besi-riin nia ulun mós halo ho riti; nia aas metru 2; rede no romaun-fuan sira neʼebé haleʼu besi-riin neʼe nia ulun mós halo ho riti. Nuneʼe mós ho besi-riin segundu no ninia romaun-fuan sira neʼebé haleʼu. 23 Iha romaun-fuan 96 neʼebé haleʼu besi-riin nia ulun; maibé loloos iha romaun-fuan hamutuk 100 mak haleʼu rede neʼe.
24 Tuirmai, xefe ba guarda neʼe mós kaer Seraias, amlulik boot, Sofonias amlulik segundu, no guarda naʼin-tolu neʼebé hein portaun. 25 No husi sidade laran, nia mós kaer ema-boot ida neʼebé serbí iha palásiu, neʼebé sai ulun-naʼin ba soldadu sira, no mós liurai nia konsellu-naʼin naʼin-hitu neʼebé nia hetan iha sidade laran. Nia mós kaer xefe tropa nia sekretáriu neʼebé halibur povu, no ho mane baibain naʼin-60 neʼebé nia hasoru iha sidade laran. 26 Nebuzaradan, xefe ba guarda neʼe, kaer ema sira-neʼe no lori sira ba liurai Babilónia iha sidade Ribla. 27 No liurai Babilónia oho ema sira-neʼe iha sidade Ribla iha rai-Hamat. Nuneʼe mak ema lori povu Judá sai husi sira-nia rai nuʼudar dadur.
28 Tuirmai neʼe mak ema neʼebé Liurai Nabukodonozor lori ona nuʼudar dadur: iha tempu neʼebé ninia ukun tama ba tinan hitu, ema judeu naʼin-3.023.
29 Iha tempu neʼebé Nabukodonozor nia ukun tama ba tinan 18, ema lori povu naʼin-832 husi Jeruzalein nuʼudar dadur.
30 Iha tempu neʼebé Nabukodonozor nia ukun tama ba tinan 23, Nebuzaradan, xefe ba guarda sira, lori ema judeu hamutuk naʼin-745 nuʼudar dadur.
Ema sira-neʼe hotu sura hamutuk naʼin-4.600 mak sai dadur bá Babilónia.
31 Ikusmai, iha tempu neʼebé Liurai Jehoakin husi rai-Judá nia moris nuʼudar dadur tama ba tinan 37, iha loron 25 fulan-12, Liurai Evil-Merodak, neʼebé mak sai liurai ba rai-Babilónia iha tinan neʼe, nia halo Liurai Jehoakin husi rai-Judá sai livre hodi hasai nia husi komarka laran. 32 Liurai Evil-Merodak koʼalia ho laran-diʼak ba Jehoakin, no fó ba nia kadunan neʼebé aas liu fali liurai seluk neʼebé hamutuk ho nia iha Babilónia. 33 Nuneʼe, Jehoakin kolu ninia roupa dadur nian, no iha ninia moris tomak, nia han hela deʼit iha liurai nia meza. 34 Iha ninia moris tomak, loron ba loron, Jehoakin simu ai-han husi liurai Babilónia, toʼo loron neʼebé nia mate.
LAMENTASAUN
א [Alef]
1 Oh, sidade neʼebé uluk nakonu ho ema, agora nia tuur mesak deʼit ona!
Sidade neʼebé uluk importante iha nasaun sira-nia leet, agora sai ona hanesan feto-faluk ida!
Uluk nia hanesan liurai nia oan-feto iha distritu sira-nia leet, agora nia sai ona atan ida!
ב [Bet]
2 Nia tanis makaʼas durante kalan, no ninia matan-been taka ninia hasan.
Ninia doben ida mós la fó kmaan ba nia.
Ninia belun hotu fila kotuk ona ba nia; sira sai ona ninia inimigu.
ג [Gimel]
3 Judá sai ona dadur, hetan terus no serbisu makaʼas hanesan atan.
Nia tenke hela iha nasaun sira-nia leet; nia la hetan fatin atu deskansa.
Ema hotu neʼebé haterus nia, manán ona nia iha ninia tempu susar.
ד [Dalet]
4 Dalan sira ba Siaun sai triste, tanba la iha ema ida mak mai atu tuir festa.
Siaun nia portaun hotu aat ona; ninia amlulik sira halerik.
Ninia feto virjen sira tanis, no nia laran-triste tebes.
ה [Hei]
5 Ninia inimigu sira sai ona ninia naʼi; sira la hanoin barak tan.
Tanba Jeová lori ona triste ba nia tan ninia sala neʼebé barak.
Inimigu kaer ona ninia oan no lori nuʼudar dadur.
ו [Vau]
6 Buat kmanek hotu dook ona husi Siaun nia oan-feto.
Ninia ulun-naʼin sira mak hanesan bibi-rusa aman neʼebé la hetan rai neʼebé iha duʼut matak,
No sira laʼo ho kole tanba sira halai husi ema neʼebé duni tuir sira.
ז [Zain]
7 Iha tempu neʼebé Jeruzalein hetan terus no la iha uma, nia hanoin-hetan
Buat folin-boot hotu neʼebé nia hetan iha tempu uluk.
Bainhira ninia povu monu ba inimigu nia liman no la iha ema ida atu ajuda nia,
Inimigu sira haree nia no hamnasa tanba nia lakon.
ח [Hete]
8 Jeruzalein halo ona sala boot.
Tan neʼe mak nia sai ona buat neʼebé ema hakribi.
Ema hotu neʼebé uluk respeitu nia haree nia hanesan buat foʼer, tanba sira haree ona ninia isin-molik.
Nia rasik halerik no fila kotuk tanba moe.
ט [Tet]
9 Ninia hahalok foʼer mak belit iha ninia roupa.
Nia la hanoin kona-ba ninia futuru.
Nia monu halo ema hakfodak; la iha ema ida mak fó kmaan ba nia.
Oh Jeová, haree haʼu-nia terus, tanba inimigu gaba an ona.
י [Iod]
10 Inimigu lolo ona liman hodi hadau ninia rikusoin hotu.
Tanba nia haree ona nasaun sira tama ba ninia fatin santu,
Sira mak ema neʼebé Ita bandu atu labele tama ba Ita-nia kongregasaun.
כ [Kaf]
11 Siaun nia povu hotu halerik; sira buka hahán.
Sira fó sira-nia sasán folin-boot atu sosa ai-han ruma atu han, hodi bele kontinua moris.
Haree bá, oh Jeová, haree bá katak haʼu sai ona hanesan feto neʼebé folin-laek.
ל [Lamed]
12 Imi hotu neʼebé laʼo liu, imi la hanoin haʼu ka?
Haree toʼok bá!
Sé mak sente moras hanesan haʼu sente?
Jeová kastigu haʼu iha loron neʼebé nia hirus makaʼas.
מ [Mem]
13 Husi lalehan mak nia haruka ahi ba haʼu-nia ruin sira, no nia sunu haʼu-nia ruin ida-idak.
Nia nahe rede ba haʼu-nia ain; nia obriga haʼu atu hakiduk fali.
Nia halo haʼu sai hanesan feto neʼebé mesamesak.
Haʼu sente moras loron tomak.
נ [Nun]
14 Haʼu-nia sala sira hanesan naha todan neʼebé kesi ba haʼu-nia kabaas.
Nia kesi naha sira-neʼe ho ninia liman rasik, no haʼu lakon haʼu-nia forsa.
Jeová entrega ona haʼu ba ema sira neʼebé haʼu la bele kontra.
ס [Samek]
15 Jeová soe tiha haʼu-nia mane asuwaʼin hotu husi haʼu.
Nia bolu ona grupu boot ida hodi kontra haʼu atu halakon haʼu-nia mane joven sira.
Jeová sama tun ona Judá nia oan-feto virjen iha fatin sama uvas nian.
ע [Ain]
16 Haʼu lelir tanba buat sira-neʼe; haʼu-nia matan-been suli.
Tanba ema neʼebé bele fó kmaan ba haʼu dook husi haʼu.
Haʼu-nia oan-mane sira lakon, tanba inimigu manán ona.
פ [Pei]
17 Siaun loke nia liman; la iha ema ida mak fó kmaan ba nia.
Jeová fó ona mandamentu ida ba Jacob nia inimigu hotu atu kontra Jacob.
Jeruzalein sai ona buat neʼebé sira hakribi.
צ [Sade]
18 Jeová nia hahalok mak loos, tanba haʼu kontra ona ninia mandamentu sira.
Rona bá, oh povu hotu, haree ba haʼu-nia terus.
Haʼu-nia feto virjen no mane joven sira sai ona dadur.
ק [Kof]
19 Haʼu bolu ona haʼu-nia doben sira, maibé sira fila kotuk ba haʼu.
Iha sidade laran haʼu-nia amlulik no katuas sira mate,
Bainhira sira buka hela hahán atu han hodi bele kontinua moris.
ר [Reix]
20 Oh Jeová, haree bá, tanba haʼu iha susar boot nia laran.
Haʼu-nia laran la hakmatek.
Haʼu-nia fuan rahun, tanba haʼu kontra ona Ita.
Surik oho haʼu-nia povu iha uma liʼur; iha uma laran sente hanesan mate.
ש [Xin]
21 Ema rona ona haʼu-nia halerik; la iha ema ida mak fó kmaan ba haʼu.
Haʼu-nia inimigu hotu rona ona haʼu-nia terus.
Sira haksolok, tanba Ita lori terus neʼe ba haʼu.
Maibé loron sei toʼo mai bainhira Ita halo ba sira hanesan Ita promete ona, no sira sei sai hanesan haʼu.
ת [Tau]
22 Haʼu hein katak Ita sei haree sira-nia hahalok aat hotu, no fó kastigu makaʼas ba sira,
Hanesan Ita kastigu haʼu makaʼas tanba haʼu-nia sala hotu.
Tanba haʼu halerik beibeik, no haʼu-nia laran moras.
א [Alef]
2 Ho hirus, Jeová taka Siaun nia oan-feto ho kalohan metan!
Nia soe ona Izraél nia kmanek husi lalehan ba rai.
Iha ninia loron hirus, nia la hanoin-hetan fatin atu tau ninia ain.
ב [Bet]
2 Jeová la hatudu laran-sadiʼa, no nia tolan ona Jacob nia hela fatin hotu.
Ho laran-nakali nia harahun Judá nia fatin sira neʼebé seguru.
Nia halo rahun toʼo rai no hamoe ukun neʼe no ninia ulun-naʼin sira.
ג [Gimel]
3 Ho hirus makaʼas mak nia hakotu ona Izraél nia forsa tomak.
Nia dada fali ona ninia liman-loos bainhira inimigu hakbesik mai,
Ninia hirus ba Jacob mak hanesan ahi neʼebé lakan nafatin toʼo han buat hotu neʼebé haleʼu.
ד [Dalet]
4 Nia dada ona ninia rama hanesan inimigu ida; nia liman-loos prontu atu ataka hanesan inimigu ida;
Nia kontinua oho ema hotu neʼebé ita hafolin.
No nia fakar sai ninia hirus hanesan fakar ahi ba Siaun nia tenda.
ה [Hei]
5 Jeová sai ona hanesan inimigu ida;
Nia tolan ona Izraél.
Nia tolan ona Izraél nia uma aas hotu;
Nia halakon ona Izraél nia fatin hotu neʼebé seguru.
No nia halo ema tanis no lelir beibeik iha Judá.
ו [Vau]
6 Nia sobu ninia barraka, hanesan barraka ida neʼebé iha jardín laran.
Nia hapara ninia festa.
Jeová halo ema haluha kona-ba festa no loron Sábadu iha Siaun,
No ho laran-nakali makaʼas nia la hafolin liurai no amlulik.
ז [Zain]
7 Jeová la simu ona ninia altár;
Nia la simu ona ninia fatin santu.
Nia entrega ona Siaun nia moru sira neʼebé metin ba inimigu nia liman.
Sira hakilar ho lian makaʼas iha Jeová nia uma, hanesan iha loron festa nian.
ח [Hete]
8 Jeová deside ona atu harahun Siaun nia moru.
Nia dada loos ona tali sukat nian.
Nia la hanetik ninia liman atu harahun buat barak.
No nia halo moru sira tanis.
Nia halo sira hotu sai fraku.
ט [Tet]
9 Siaun nia portaun sira mout ona iha rai.
Nia harahun no estraga Siaun nia besi sira neʼebé xave portaun.
Siaun nia liurai no ulun-naʼin sira hela ona iha nasaun seluk nia leet.
La iha ukun-fuan; ninia profeta sira mós la simu vizaun husi Jeová.
י [Iod]
10 Siaun nia katuas sira tuur iha rai nonook deʼit.
Sira tau rai-rahun iha sira-nia ulun no hatais hena karón.
Jeruzalein nia feto virjen sira hakruʼuk ho oin ba rai.
כ [Kaf]
11 Haʼu-nia matan kole ona tanba hasai matan-been barak.
Haʼu-nia laran la hakmatek.
Haʼu-nia laran rahun tanba haʼu-nia povu monu,
Tanba labarik no bebé sira dezmaia iha sidade nia fatin públiku.
ל [Lamed]
12 Bainhira sira atu dezmaia hanesan ema neʼebé kanek todan iha fatin públiku,
No sai fraku neineik-neineik iha sira-nia inan nia liman laran,
Sira husu beibeik sira-nia inan: “Ai-han no tua-uvas iha neʼebé?”
מ [Mem]
13 Oh Jeruzalein nia oan-feto, prova saida mak haʼu bele hatudu ba ó?
Haʼu bele kompara ó ho saida?
Oh Siaun nia oan-feto virjen, haʼu bele kompara ó ho saida atu bele fó kmaan ba ó?
Tanba ó-nia kanek mak boot hanesan tasi. Sé mak bele kura ó?
נ [Nun]
14 Vizaun sira neʼebé ó-nia profeta sira haree kona-ba ó mak la loos no folin-laek.
Sira la hatudu sai ó-nia sala atu bele hasees ó husi dadur,
Maibé sira kontinua fó sai vizaun neʼebé la loos hodi bosok ó.
ס [Samek]
15 Ema hotu neʼebé laʼo liu iha dalan basa-liman hodi goza ó.
Sira hakfuʼik atu goza no doko ulun ba Jeruzalein, hodi dehan:
“Neʼe mak sidade neʼebé uluk ema dehan: ‘Sidade neʼe kmanek loos, no halo ema iha rai tomak haksolok’, loos ka lae?”
פ [Pei]
16 Ó-nia inimigu hotu loke ibun ba ó.
Sira hakfuʼik no ruun nehan no dehan: “Ita tolan ona nia.
Neʼe mak loron neʼebé ita hein! Loron neʼe mai ona, no ita haree ona!”
ע [Ain]
17 Jeová halo ona buat neʼebé nia hakarak; nia kumpre ona ninia liafuan,
Mandamentu neʼebé nia fó sai ona iha tempu uluk.
Nia harahun ona ó no la hatudu laran-sadiʼa.
Nia husik ó-nia inimigu sira sai kontente tanba manán ó; nia aumenta sira-nia kbiit.
צ [Sade]
18 Oh Siaun nia moru, povu bolu Jeová ho laran.
Husik ó-nia matan-been suli hanesan mota ida durante loron no kalan.
Ó labele deskansa, la bele husik ó-nia matan deskansa.
ק [Kof]
19 Hamriik bá! Tanis makaʼas durante kalan tomak.
Fakar sai ó-nia laran iha Jeová nia oin hanesan fakar bee.
Foti ó-nia liman hodi harohan ba nia atu salva ó-nia oan sira-nia moris,
Oan sira neʼebé dezmaia iha dalan sikun hotu tanba hamlaha.
ר [Reix]
20 Oh Jeová, haree bá povu sira neʼebé Ita fó kastigu makaʼas.
Feto sira tenke kontinua han sira-nia oan rasik neʼebé sira partu ka?
Ema tenke oho amlulik no profeta sira iha Jeová nia fatin santu ka?
ש [Xin]
21 Labarik-mane no katuas sira mate no latan hela iha dalan sira.
Haʼu-nia feto virjen no mane joven sira mate ho surik.
Iha Ita-nia loron hirus, Ita oho sira no la hatudu laran-sadiʼa.
ת [Tau]
22 Ita bolu buat neʼebé hataʼuk haʼu husi fatin hotu, hanesan bolu ema iha loron festa nian.
Iha Jeová nia loron hirus, la iha ema ida mak halai sees ka hetan salvasaun;
Inimigu halakon ona sira neʼebé haʼu partu no haboot.
א [Alef]
3 Haʼu mak mane neʼebé haree ona terus tanba Maromak nia ai-tonka hirus nian.
2 Nia duni sai ona haʼu no halo haʼu laʼo iha nakukun laran, laʼós iha naroman.
3 Tuir loloos, nia foti liman hodi kontra beibeik haʼu loron tomak.
ב [Bet]
4 Nia halo ona haʼu-nia isin sai fraku no haʼu-nia kulit sai namkurut;
Nia halo tohar haʼu-nia ruin sira.
5 Nia haleʼu ona haʼu atu ataka; nia tau venenu moruk no susar haleʼu haʼu.
6 Nia obriga haʼu tuur iha nakukun laran, hanesan ema sira neʼebé mate kleʼur ona.
ג [Gimel]
7 Nia halo ona moru haleʼu haʼu, atu nuneʼe haʼu la bele halai sai;
Nia kesi metin ona haʼu ho korrente husi riti neʼebé todan.
8 Bainhira haʼu halerik ho laran atu husu ajuda, nia la simu haʼu-nia orasaun.
9 Nia taka netik haʼu-nia dalan ho fatuk boot sira;
Nia halo kleʼuk haʼu-nia dalan sira.
ד [Dalet]
10 Nia subar atu ataka haʼu hanesan ursu ida, hanesan leaun ida neʼebé subar hela.
11 Nia obriga haʼu laʼo sai husi dalan no lees haʼu ba pedasuk;
Nia halo ona haʼu hetan terus boot.
12 Nia dada ona ninia rama, no nia atu hana rama-oan ba haʼu.
ה [Hei]
13 Nia sona ona haʼu-nia rins ho rama-oan husi ninia rama-fatin.
14 Ema hotu hamnasa haʼu; durante loron tomak sira kanta kona-ba haʼu.
15 Nia halo haʼu bosu ho buat neʼebé moruk no halo haʼu hemu ai-tahan moruk nia been.
ו [Vau]
16 Nia halo rahun haʼu-nia nehan ho fatuk kiʼik sira;
Nia dudu tun haʼu ba ahi-kadesan laran.
17 Ita la husik haʼu hetan dame; haʼu haluha ona buat neʼebé diʼak.
18 Tan neʼe haʼu dehan: “Haʼu-nia glória lakon ona, no mós haʼu lakon ona esperansa ba Jeová.”
ז [Zain]
19 Hanoin-hetan katak haʼu hetan terus no la iha uma, haʼu han ai-tahan moruk no venenu moruk.
20 Ita sei hanoin-hetan duni no hakruʼuk an hodi ajuda haʼu.
21 Haʼu hanoin fali ida-neʼe iha haʼu-nia laran; tan neʼe mak haʼu sei hein ho pasiénsia.
ח [Hete]
22 Tanba Jeová nia domin neʼebé laran-metin mak ita la lakon mohu,
Tanba ninia laran-sadiʼa la iha rohan.
23 Dadeer-dadeer nia hatudu sai ninia laran-sadiʼa; Ita-nia laran-metin mak barak.
24 Haʼu dehan: “Jeová mak haʼu-nia parte, tan neʼe mak haʼu sei hein nia ho pasiénsia.”
ט [Tet]
25 Jeová laran-diʼak ba ema neʼebé tau esperansa ba nia, ema neʼebé kontinua buka nia.
26 Diʼak ba ema neʼebé hein ho pasiénsia atu Jeová salva nia.
27 Diʼak ba mane neʼebé lori naha todan durante ninia tempu joven.
י [Iod]
28 Husik nia tuur mesak no tuur nonook deʼit bainhira Maromak tau naha neʼe ba nia leten.
29 Husik nia tau nia ibun iha rai; karik sei iha esperansa.
30 Husik nia see nia hasan ba ema neʼebé baku nia; husik nia sai bosu ho liafuan tarata.
כ [Kaf]
31 Tanba Jeová sei la soe hela ita ba nafatin.
32 Maski nia mak halo ema triste, maibé nia sei hatudu laran-sadiʼa tanba nia nakonu ho domin neʼebé laran-metin.
33 Tanba ninia laran la gosta atu fó terus ka lori triste ba ema nia oan-mane sira.
ל [Lamed]
34 Atu sama rahun ema dadur hotu iha rai,
35 Atu hanetik justisa ba ema iha Maromak Aas Liu Hotu nia oin,
36 Atu hamatak ema iha kazu ruma,
Hahalok sira-neʼe Jeová la simu.
מ [Mem]
37 Se Jeová la fó mandamentu, sé mak bele fó sai liafuan ruma no kumpre ida-neʼe?
38 Buat aat no buat diʼak la sai hamutuk
Husi Maromak Aas Liu Hotu nia ibun.
39 Tansá mak ema muramura kona-ba rezultadu husi sira-nia sala rasik?
נ [Nun]
40 Mai ita haree didiʼak no hanoin kleʼan kona-ba ita-nia hahalok sira, no mai ita fila fali ba Jeová.
41 Mai ita hiʼit saʼe ita-nia liman ho laran tomak ba Maromak iha lalehan, hodi dehan:
42 “Ami halo sala ona no kontra Ita, no Ita seidauk perdua ami.
ס [Samek]
43 Ho hirus mak Ita hanetik ona ami hakbesik ba Ita;
Ita duni ami no oho ami la ho laran-sadiʼa.
44 Ho kalohan mak Ita hanetik ami hakbesik ba Ita, atu nuneʼe ami-nia orasaun la bele toʼo ba Ita.
45 Ita halo ami sai hanesan buat foʼer no folin-laek iha nasaun sira-nia leet.”
פ [Pei]
46 Ami-nia inimigu hotu loke sira-nia ibun kontra ami.
47 Ami-nia moris nakonu ho taʼuk, lasu, terus, no kanek.
48 Haʼu-nia matan-been suli hanesan mota tanba haʼu-nia povu nia kanek.
ע [Ain]
49 Haʼu-nia matan-been suli nafatin, haʼu tanis la para,
50 Toʼo Jeová hateke tun no haree husi lalehan.
51 Haʼu sente triste bainhira haʼu-nia matan haree buat neʼebé akontese ba oan-feto hotu husi haʼu-nia sidade.
צ [Sade]
52 Haʼu-nia inimigu sira kasa haʼu la ho razaun hanesan kasa manu.
53 Sira koko atu halakon haʼu-nia moris iha rai-kuak laran; sira kontinua tuda fatuk ba haʼu.
54 Bee saʼe liu ona haʼu-nia ulun, no haʼu dehan: “Haʼu mate ona!”
ק [Kof]
55 Oh Jeová, haʼu bolu Ita-nia naran husi rai-kuak kleʼan.
56 Favór ida, rona haʼu-nia lian; keta taka tilun ba haʼu-nia halerik atu husu ajuda, atu husu kmaan.
57 Ita hakbesik ba haʼu iha loron neʼebé haʼu bolu Ita. Ita dehan: “Keta taʼuk.”
ר [Reix]
58 Oh Jeová, Ita defende ona haʼu-nia kazu, Ita salva ona haʼu-nia moris.
59 Oh Jeová, Ita haree ona sala neʼebé ema halo ba haʼu; favór ida, hatudu justisa ba haʼu.
60 Ita haree ona sira-nia hakarak atu halo aat ba haʼu, sira-nia planu aat hotu kontra haʼu.
ש [Xin]
61 Oh Jeová, Ita rona ona sira-nia liafuan sadik, sira-nia planu aat hotu kontra haʼu,
62 Inimigu sira-nia ibun no sira-nia lian bisubisu kontra haʼu loron tomak.
63 Haree toʼok ba sira; maski sira tuur ka hamriik, sira goza haʼu ho sira-nia knananuk!
ת [Tau]
64 Oh Jeová, Ita sei selu fali ba sira tuir sira-nia hahalok.
65 Ita sei halo sira la iha moe, nuʼudar malisan ba sira.
66 Oh Jeová, Ita sei duni tuir sira ho hirus no halakon sira husi lalehan okos.
א [Alef]
4 Osan-mean neʼebé diʼak no nabilan, agora la nabilan tan!
Fatuk santu sira monu lekar iha dalan sikun hotu!
ב [Bet]
2 Siaun nia oan-mane sira neʼebé uluk folin-boot hanesan osan-mean neʼebé halo moos ona,
Agora ema haree sira hanesan sanan-rai deʼit
Neʼebé badain rai-mean mak halo!
ג [Gimel]
3 Asu-fuik sira mós fó susu ba sira-nia oan,
Maibé haʼu-nia povu nia oan-feto sai laran-aat hanesan manu-avestrús iha rai-fuik.
ד [Dalet]
4 Bebé sira neʼebé sei susu hela, sira-nia nanál belit metin ba ibun laran tanba hamrook.
Labarik sira husu paun, maibé ema ida mós la fó ba sira.
ה [Hei]
5 Sira neʼebé uluk toman han hahán diʼak, toba hamlaha iha dalan ninin sira.
Sira neʼebé toman atu hatais hena kór-mean, toba deʼit iha rai-rahun.
ו [Vau]
6 Kastigu ba haʼu-nia povu nia oan-feto mak boot liu fali kastigu ba Sodoma nia sala,
Neʼebé lakon dala ida deʼit, no la iha ema ida mak ajuda nia.
ז [Zain]
7 Uluk Siaun nia ema nazireu mak moos liu fali jelu-rahun, no mutin liu fali susubeen.
Sira mean liu fali ahu-ruin; sira hanesan fatuk-safira neʼebé halo nabilan ona.
ח [Hete]
8 Agora sira sai metan liu fali ahi-anar;
Ema la koñese sira iha dalan.
Sira-nia kulit namkurut toʼo belit ba ruin; neʼe sai ona hanesan ai-maran.
ט [Tet]
9 Ema neʼebé mate ho surik mak diʼak liu ema neʼebé mate hamlaha,
Tanba sira lakon forsa neineik-neineik, no la iha hahán ba sira iha toʼos. Neʼe hanesan surik sona borus sira.
י [Iod]
10 Feto neʼebé laran-sadi’a daan sira-nia oan rasik.
Oan sira-neʼe sai nuʼudar ai-han ba sira durante tempu neʼebé haʼu-nia povu hasoru situasaun susar.
כ [Kaf]
11 Jeová hatudu sai ona ninia laran-nakali;
Nia fakar sai ona ninia hirus neʼebé lakan makaʼas.
Nia komesa halo lakan ahi iha Siaun hodi sunu tiha sidade neʼe nia hun.
ל [Lamed]
12 Liurai sira no ema hotu iha rai la fiar
Katak inimigu sei tama ba Jeruzalein nia portaun sira.
מ [Mem]
13 Neʼe akontese tanba profeta sira-nia sala, no amlulik sira-nia sala.
Sira fakar ema laran-loos nia raan iha sidade neʼe nia leet.
נ [Nun]
14 Sira laʼo bá-mai iha dalan hanesan matan-delek.
Sira sai foʼer ho raan,
Toʼo ema ida mós la bele kona sira-nia unuk.
ס [Samek]
15 Ema hakilar ba sira: “Sees tiha! Imi neʼebé la moos! Sees tiha! Sees tiha! Keta kona ami!”
Tanba sira la iha ona uma no laʼo bá-mai deʼit.
Ema husi nasaun sira dehan: “Sira la bele hela tan iha neʼe hamutuk ho ita.
פ [Pei]
16 Jeová rasik mak halo sira namkari;
Nia sei la simu tan sira.
Ema sei la hatudu tan respeitu ba amlulik no katuas sira.”
ע [Ain]
17 Agora ami-nia matan sai kole tanba hateke atu hetan ajuda maibé saugati deʼit.
Ami hateke beibeik atu husu ajuda ba nasaun ida neʼebé la bele salva ami.
צ [Sade]
18 Ami-nia inimigu kasa ami toʼo ami la bele laʼo tan iha ami-nia fatin públiku sira.
Ami besik ona atu mate; ami-nia loron sira remata ona, tanba ami-nia rohan mai ona.
ק [Kof]
19 Inimigu neʼebé duni tuir ami mak lalais liu fali manu-makikit iha lalehan.
Sira duni ami iha foho leten; sira hein iha rai-fuik atu ataka ami derrepente deʼit.
ר [Reix]
20 Sira kaer ona ida neʼebé Jeová hili, hodi hatama iha rai-kuak. Nia mak ami-nia iis moris nian.
Ami koʼalia kona-ba nia, hodi dehan: “Ami sei hela iha nasaun sira-nia leet iha ninia mahon okos.”
ש [Xin]
21 Oh Edom nia oan-feto, neʼebé hela iha rai-Uz, haksolok no kontente bá.
Maibé kopu neʼe mós sei toʼo ba ó, no ó sei sai lanu hodi hatudu sai ó-nia isin-tanan.
ת [Tau]
22 Oh Siaun nia oan-feto, kastigu ba ó-nia sala remata ona.
Nia sei la lori tan ó bá dadur.
Maibé, oh Edom nia oan-feto, nia sei haree fali ba ó-nia sala.
Nia sei hatudu sai ó-nia sala sira.
5 Oh Jeová, hanoin-hetan buat neʼebé akontese ona ba ami.
Hateke no haree ba ami-nia situasaun neʼebé iha moe laran.
2 Ema husi rai seluk mak hadau ona ami-nia liman-rohan no ema neʼebé ami la koñese mak hadau ona ami-nia uma.
3 Ami sai ona oan-kiak neʼebé la iha aman; ami-nia inan hanesan feto-faluk.
4 Ami-nia bee rasik ami tenke sosa atu bele hemu, no ami-nia ai rasik ami tenke sosa.
5 Inimigu duni tuir ami no sira besik loos atu kaer ami;
Ami sai kole ona, maibé sira la husik ami deskansa.
6 Ami tane liman ba rai-Ejitu no rai-Asíria hodi hetan paun atu han.
7 Ami-nia beiʼala sira neʼebé halo sala, sira mate ona, maibé ami mak tenke lori sira-nia sala.
8 Agora atan sira mak ukun ami; la iha ema ida mak bele salva ami husi sira-nia liman.
9 Ami tau ami-nia moris iha perigu laran hodi hetan paun; neʼe tanba ema neʼebé kaer surik iha rai-fuik.
10 Ami-nia kulit sai manas loos hanesan fornu; neʼe tanba ami hamlaha tebes.
11 Sira hamoe ona ami-nia feen iha Siaun, no hamoe ona ami-nia feto virjen iha Judá nia sidade sira.
12 Sira tara ami-nia ulun-naʼin, no la hatudu respeitu ba ami-nia katuas sira.
13 Mane joven sira lori fatuk deʼut nian, no labarik-mane sira monu tanba hiʼit ai neʼebé todan.
14 Katuas sira la tuur ona iha sidade nia portaun; mane joven la toka tan sira-nia múzika.
15 Ksolok lakon ona husi ami-nia laran; ami-nia dansa agora troka fali ho laran-triste.
16 Koroa monu ona husi ami-nia ulun. Susar ba ami, tanba ami halo ona sala!
17 Tan neʼe mak ami-nia fuan-moras,
No tan buat sira-neʼe mak ami-nia matan sai kole ona,
18 Tanba Foho Siaun sai fuik ona; agora asu-fuik sira mak laʼo bá-mai iha foho neʼe.
19 Kona-ba Ita, oh Jeová, Ita tuur nuʼudar liurai ba nafatin.
Ita-nia kadunan mak iha husi jerasaun ba jerasaun.
20 Tansá mak Ita haluha ami ba nafatin? Tansá mak Ita husik hela ami ba tempu kleur?
21 Oh Jeová, lori ami fila fali ba Ita, no ami sei prontu atu fila fali ba Ita.
Favór ida, halo buat hotu sai hanesan tempu uluk.
22 Maibé, Ita la simu ona ami.
Ita nafatin hirus makaʼas hasoru ami.
EZEKIEL
1 Iha loron lima, fulan-haat, tinan 30, bainhira haʼu sei iha ema dadur nia leet besik mota Kebar, lalehan nakloke no haʼu komesa haree vizaun husi Maromak. 2 Iha loron lima husi fulan neʼe, katak iha tinan lima neʼebé Liurai Joaquim sai dadur, 3 Jeová fó sai ninia liafuan ba Ezekiel besik mota Kebar iha ema Kaldeia nia rai. Iha neʼebá mak Jeová tau liman ba Ezekiel, amlulik Buzi nia oan-mane.
4 Bainhira haʼu hateke daudaun, haʼu haree anin boot loos mai husi parte norte, no iha kalohan boot ida no iha ahi lakan neʼebé naroman mak haleʼu, no iha ahi nia klaran haʼu haree buat ida neʼebé hanesan besi neʼebé nabilan. 5 Iha ahi nia klaran haʼu haree kriatura moris naʼin-haat, no sira-nia isin haree hanesan ema nian. 6 Sira ida-idak iha oin haat no liras haat. 7 Sira-nia ain loos deʼit, no sira-nia ain okos mak hanesan karau-oan nia ain, no sira-nia ain nabilan loos hanesan riti neʼebé halo nabilan ona. 8 Haʼu haree liman hanesan ema nian iha sira-nia liras haat ida-idak nia okos, no kriatura naʼin-haat neʼe iha oin no liras sira. 9 Sira-nia liras kona malu. Bainhira sira bá, sira la presiza fila ba sorin; sira ida-idak bá loos deʼit oin.
10 Sira-nia oin mak hanesan tuirmai neʼe: Kriatura naʼin-haat neʼe ida-idak iha oin hanesan ema nian, no iha sorin loos iha oin hanesan leaun nian, iha sorin karuk iha oin hanesan karau nian, no sira ida-idak mós iha oin hanesan manu-makikit nian. 11 Neʼe mak sira-nia oin. Sira ida-idak nia liras rua loke saʼe ba leten, no liras rua neʼe kona malu; liras rua seluk falun sira-nia isin.
12 Sira ida-idak bá loos deʼit oin, sira bá fatin naran deʼit neʼebé espíritu hakarak sira atu bá. Bainhira sira bá, sira la presiza fila ba sorin. 13 No kriatura moris sira-neʼe nia isin mak hanesan ahi-klaak lakan, no buat ruma hanesan ahi-oan sira neʼebé nabilan semo bá-mai entre kriatura sira-neʼe, no rai-lakan sai husi ahi. 14 Kriatura moris sira-neʼe haree hanesan rai-lakan bainhira sira bá no fila fali.
15 Bainhira haʼu hateke daudaun ba kriatura moris sira-neʼe, haʼu haree roda iha rai besik kriatura moris ida-idak neʼebé iha oin haat. 16 Roda sira-neʼe tomak nabilan hanesan fatuk-krisólitu, no roda haat neʼe haree hanesan deʼit. Roda sira-neʼe nia modelu hanesan roda ida iha roda seluk nia laran. 17 Bainhira sira muda, sira bele muda bá diresaun haat, maibé la presiza dulas fila ba sorin. 18 Roda sira-neʼe aas tebetebes toʼo halo haʼu hakfodak, no roda haat neʼe nia ninin hotu haleʼu ho matan sira. 19 Bainhira kriatura moris sira-neʼe muda, roda sira mós muda hamutuk ho sira, no bainhira kriatura moris sira hiʼit an saʼe husi rai, roda sira mós saʼe tuir sira.
20 Sira bá fatin naran deʼit neʼebé espíritu hakarak sira atu bá, sin, fatin naran deʼit neʼebé espíritu bá. Roda sira hiʼit an saʼe hamutuk ho kriatura moris sira, tanba espíritu neʼebé book kriatura moris sira-neʼe, book mós roda sira.
21 Bainhira kriatura sira-neʼe muda, roda sira mós muda; bainhira sira hamriik metin, roda sira mós hamriik metin; no bainhira sira hiʼit an saʼe husi rai, roda sira mós hiʼit an saʼe hamutuk ho sira, tanba espíritu neʼebé book kriatura moris sira-neʼe, book mós roda sira.
22 Iha kriatura moris sira-neʼe nia ulun leten haʼu haree buat ida hanesan palku neʼebé nabilan hanesan jelu. 23 Iha palku okos, sira-nia liras sira kona malu. Sira ida-idak iha liras rua atu falun sira-nia isin sorin ida, no liras rua seluk atu falun sira-nia isin sorin seluk. 24 Bainhira haʼu rona lian husi sira-nia liras, neʼe rona hanesan lian husi bee barak neʼebé suli makaʼas, hanesan Maromak Kbiit Boot Liu Hotu nia lian. Bainhira sira muda, haʼu rona hanesan tropa sira-nia lian. Bainhira sira hamriik metin, sira hatún sira-nia liras.
25 Sin, bainhira sira hamriik metin, sira hatún sira-nia liras. No haʼu rona lian husi ida neʼebé iha palku leten, katak palku neʼebé iha sira-nia leten.
26 Iha palku leten, haʼu haree buat ida hanesan kadunan neʼebé halo husi fatuk-safira. Ida neʼebé tuur daudaun iha kadunan neʼe haree hanesan ema ida. 27 Husi ninia knotak ba leten, haʼu haree buat ida hanesan besi neʼebé nabilan no hanesan ahi nia naroman; no husi ninia knotak ba kraik, haʼu haree buat ida hanesan ahi. Nabilan mak haleʼu nia 28 hanesan arkiris neʼebé mosu iha kalohan durante udan. Neʼe mak naroman nabilan neʼebé haleʼu nia. Neʼe haree hanesan Jeová nia glória. Bainhira haʼu haree ida-neʼe, haʼu hakneʼak hodi hakruʼuk ho oin ba rai no komesa rona lian husi ida neʼebé koʼalia ba haʼu.
2 Tuirmai nia dehan ba haʼu: “Oan-mane husi ema, hamriik bá, atu nuneʼe haʼu bele koʼalia ba ó.” 2 Bainhira nia koʼalia ho haʼu, haʼu sai nakonu ho espíritu no haʼu hamriik atu bele rona Ida neʼebé koʼalia ba haʼu.
3 Nia koʼalia tan ba haʼu: “Oan-mane husi ema, haʼu sei haruka ó ba povu Izraél, ba nasaun sira neʼebé kontra ona hasoru haʼu. Sira no sira-nia beiʼala halo sala hasoru haʼu toʼo ohin loron. 4 Haʼu sei haruka ó ba oan-mane sira neʼebé lakohi rona no laran-toos, no ó tenke dehan ba sira: ‘Jeová, Naʼi Ukun-Na’in Boot Liu, dehan nuneʼe.’ 5 Kona-ba sira, maski sira rona ka lakohi rona, tanba sira mak umakain neʼebé kontradór, maibé sira sei hatene duni katak profeta ida iha sira-nia leet.
6 “Oh oan-mane husi ema, kona-ba ó, keta taʼuk ba sira, no keta taʼuk ba sira-nia liafuan, maski buat neʼebé haleʼu ó mak ai-tarak no ó hela iha sakunar sira-nia leet. Keta taʼuk ba sira-nia liafuan, no keta nakdedar tan sira-nia oin, tanba sira mak umakain neʼebé kontradór. 7 Ó tenke fó sai haʼu-nia liafuan ba sira, maski sira rona ka lakohi rona, tanba sira mak povu neʼebé kontradór.
8 “Oh oan-mane husi ema, kona-ba ó, rona ba buat neʼebé haʼu fó sai ba ó. Keta sai kontradór hanesan umakain kontradór neʼe. Loke ó-nia ibun no han buat neʼebé haʼu atu fó ba ó.”
9 Bainhira haʼu hateke, haʼu haree liman ida lolo ba haʼu, no iha nia liman haʼu haree surat-tahan lulun ida neʼebé iha liafuan sira. 10 Bainhira nia loke surat-tahan neʼe iha haʼu-nia oin, haʼu haree knananuk triste nian, liafuan tanis no halerik mak hakerek iha surat-tahan neʼe nia oin no kotuk.
3 Tuirmai nia dehan ba haʼu: “Oan-mane husi ema, han buat neʼebé iha ó-nia oin. Han surat-tahan lulun neʼe no bá koʼalia ho umakain Izraél.”
2 Entaun haʼu loke haʼu-nia ibun, no nia fó surat-tahan lulun neʼe ba haʼu atu han.
3 Nia hatutan tan: “Oan-mane husi ema, han surat-tahan lulun neʼe neʼebé haʼu fó ba ó, no halo ó-nia kabun bosu.” Nuneʼe haʼu komesa han, no neʼe midar hanesan bani-been iha haʼu-nia ibun.
4 Nia dehan ba haʼu: “Oan-mane husi ema, bá hasoru umakain Izraél no fó sai haʼu-nia liafuan ba sira. 5 Tanba haʼu haruka ó ba umakain Izraél, laʼós ba nasaun ida neʼebé ninia língua mak susar no ninia liafuan susar atu komprende. 6 Haʼu la haruka ó ba nasaun sira neʼebé ninia língua mak susar no ninia liafuan susar ba ó atu komprende. Se karik haʼu haruka ó ba sira, sira sei rona ba ó. 7 Maibé umakain Izraél sei la rona ba ó, tanba sira lakohi rona ba haʼu. Ema hotu iha umakain Izraél mak ulun-toos no laran-toos. 8 Haree bá! Haʼu halo ona ó-nia oin-toos hanesan sira-nia oin no ó-nia reen-toos sai toos hanesan sira-nian. 9 Haʼu halo ona ó-nia reen-toos hanesan fatuk murak ida, toos liu fali fatuk neʼebé toos. Keta taʼuk ba sira ka nakdedar tanba sira-nia oin, sira mak umakain neʼebé kontradór.”
10 Nia dehan tan ba haʼu: “Oan-mane husi ema, rona didiʼak ba haʼu-nia liafuan hotu neʼebé haʼu koʼalia ba ó no rai ida-neʼe iha ó-nia laran. 11 Laʼo ba hasoru ó-nia povu neʼebé dadur no koʼalia ba sira. Maski sira rona ka lakohi rona, ó tenke hatete ba sira: ‘Jeová, Naʼi Ukun-Naʼin Boot Liu, dehan nuneʼe.’”
12 Tuirmai espíritu ida lori haʼu no haʼu rona lian boot husi kotuk neʼebé dehan: “Fó hahiʼi ba Jeová nia glória husi ninia fatin.” 13 Haʼu rona lian husi kriatura moris sira-nia liras neʼebé kona malu, no haʼu rona lian husi roda sira neʼebé besik sira, no rona tarutu boot. 14 No espíritu neʼe foti haʼu no lori haʼu. Haʼu bá ho laran-triste no laran-nakali, no haʼu sente Jeová nia espíritu book an makaʼas iha haʼu. 15 Entaun haʼu bá hasoru povu neʼebé dadur iha Tel-Abib, neʼebé hela besik mota Kebar, no haʼu hela iha neʼebá ho sira; no haʼu hela iha sira-nia leet ba loron hitu. Durante loron sira-neʼe haʼu tuur hodi hanoin.
16 Liutiha loron hitu, Jeová koʼalia ba haʼu:
17 “Oan-mane husi ema, haʼu hili ó nuʼudar guarda ba umakain Izraél; no bainhira ó rona liafuan husi haʼu-nia ibun, ó tenke fó sai haʼu-nia avizu ba sira. 18 Bainhira haʼu dehan ba ema aat: ‘Ó sei mate duni’, maibé ó la fó avizu ba ema aat neʼe, no ó la koʼalia hodi fó avizu ba nia atu sees husi ninia hahalok aat hodi bele kontinua moris, ema aat neʼe sei mate duni tanba ninia sala, maibé haʼu sei kastigu ó tanba ninia raan. 19 Maibé se ó fó avizu ba ema aat no nia la sees husi ninia hahalok aat, ema neʼe sei mate tanba ninia sala, maibé ó sei salva duni ó-nia moris rasik. 20 Bainhira ema laran-loos ida husik ninia hahalok loos no halo fali sala, haʼu sei tau fatuk sidi nian iha ninia oin no nia sei mate. Se ó la fó avizu ba nia, nia sei mate tanba ninia sala no haʼu sei la hanoin-hetan ninia hahalok loos, maibé haʼu sei kastigu ó tanba ninia raan. 21 Maibé se ó fó avizu ona ba ema laran-loos atu la halo sala, no nia la halo sala, nia sei kontinua moris duni tanba ó fó ona avizu ba nia, no ó mós sei salva ó-nia moris rasik.”
22 Iha neʼebá haʼu sente Jeová nia espíritu book an iha haʼu, no nia dehan: “Hamriik, laʼo bá rai-tetuk, no iha neʼebá mak haʼu sei koʼalia ho ó.” 23 Entaun haʼu hamriik no laʼo ba rai-tetuk, no haʼu haree Jeová nia glória iha neʼebá, hanesan glória neʼebé haʼu haree ona besik mota Kebar, no haʼu hakneʼak ho oin ba rai. 24 Tuirmai haʼu sai nakonu ho espíritu no haʼu bele hamriik, no nia koʼalia ba haʼu, hodi dehan:
“Bá, xave metin ó-nia an iha ó-nia uma laran. 25 Oh oan-mane husi ema, kona-ba ó, sira sei kesi ó ho tali, atu nuneʼe ó la bele laʼo iha sira-nia leet. 26 Haʼu sei halo ó-nia nanál belit ba ibun laran, no ó sei sai monok, hodi nuneʼe ó la bele korrije sira, tanba sira mak umakain neʼebé kontradór. 27 Maibé bainhira haʼu koʼalia ho ó, haʼu sei loke ó-nia ibun, no ó tenke dehan ba sira: ‘Jeová, Naʼi Ukun-Naʼin Boot Liu, dehan nuneʼe.’ Husik ema neʼebé rona, rona bá, no ema neʼebé lakohi rona, lalika rona, tanba sira mak umakain neʼebé kontradór.
4 “Oh oan-mane husi ema, ó tenke foti bloku ida no tau neʼe iha ó-nia oin. Bahat sidade Jeruzalein iha bloku neʼe. 2 Ó tenke ataka sidade neʼe. Harii moru no ateru rai atu ataka sidade neʼe, no harii soldadu nia hela-fatin, no tau armas haleʼu atu harahun sidade neʼe. 3 Foti besi belar ida no tau neʼe nuʼudar moru besi nian entre ó no sidade neʼe. Tuirmai hateke metin ba sidade neʼe, ho ida-neʼe mak ó hatudu oinsá ema sei ataka sidade neʼe. Neʼe mak sinál ba umakain Izraél.
4 “Tuirmai ó tenke toba ho sorin karuk deʼit no ó rasik mak lori umakain Izraél nia sala. Ó sei lori sira-nia sala durante loron sira neʼebé ó toba ho sorin karuk. 5 No haʼu sei haruka ó atu toba hanesan neʼe ba loron 390, tuir tinan neʼebé sira halo sala, no ó sei lori umakain Izraél nia sala. 6 Ó tenke halo nuneʼe toʼo loron sira-neʼe remata.
“Tuirmai, ba dala segundu, ó sei toba ho sorin loos deʼit, no ó sei lori umakain Judá nia sala ba loron 40. Loron ida ba tinan ida, sin, loron ida ba tinan ida, neʼe mak haʼu haruka ó atu halo. 7 No ho liman mamuk, ó tenke hateke metin ba Jeruzalein bainhira ó ataka sidade neʼe, no ó tenke fó sai nanis liafuan kontra Jeruzalein.
8 “Haree bá! Haʼu sei kesi ó ho tali atu nuneʼe ó la bele fila ó-nia an husi sorin ida ba sorin seluk toʼo loron sira neʼebé ó ataka sidade neʼe remata.
9 “No ó tenke foti trigu oioin, sevada, no koto oin rua, no tau buat sira-neʼe iha fatin ida no halo paun ba ó-nia an. Ó sei han ida-neʼe durante loron sira neʼebé ó toba ho sorin karuk deʼit, katak loron 390. 10 Ó sei tetu ó-nia hahán, loron ida ó sei han deʼit hahán grama 230. Ó tenke han tuir tempu neʼebé hili ona.
11 “Ó tenke sukat bee neʼebé ó hemu, loron ida ó tenke hemu deʼit litru 0,6. Ó tenke hemu tuir tempu neʼebé hili ona.
12 “Ó sei han paun neʼe hanesan ó han paun kabuar neʼebé halo husi sevada; ó tenke tunu neʼe iha sira-nia oin, no sunu ema nia tee maran hodi tunu paun neʼe.” 13 Jeová hatutan tan: “Iha dalan neʼe mak ema Izraél sei han sira-nia paun neʼebé la moos bainhira haʼu halo sira namkari iha nasaun sira-nia leet.”
14 Tuirmai haʼu dehan: “Labele, oh Jeová, Naʼi Ukun-Naʼin Boot Liu! Husi haʼu-nia tempu joven toʼo agora, haʼu seidauk hafoʼer haʼu-nia an hodi han naʼan husi animál neʼebé mate mesak deʼit ka animál neʼebé animál seluk tata lees tiha, no haʼu seidauk han naʼan neʼebé la moos.”
15 Entaun nia dehan ba haʼu: “Haʼu sei husik ó uza karau nia tee duké ema nia tee, no ó tenke tunu paun hodi uza karau nia tee.” 16 Tuirmai nia dehan ba haʼu: “Oan-mane husi ema, haʼu sei hamenus ai-han iha Jeruzalein, no sira sei tetu sira-nia paun atu han ho laran-susar, no sira sei sukat sira-nia bee atu hemu ho taʼuk. 17 Ida-neʼe sei akontese atu sidade neʼe nia ai-han no bee sai menus, hodi nuneʼe sira sei hateke ba malu ho hakfodak no mate tanba sira-nia sala.
5 “Oh oan-mane husi ema, ó tenke foti surik kroʼat ida atu uza hanesan lámina. Koir ó-nia fuuk no hasan-rahun, tuirmai foti dasin hodi tetu ó-nia fuuk no hasan-rahun, no fahe ba parte tolu. 2 Ó tenke sunu parte ida ho ahi iha sidade laran bainhira loron sira neʼebé ó ataka sidade neʼe remata ona. Tuirmai foti parte ida seluk no ataka neʼe ho surik haleʼu sidade laran, no parte ida ikus ó tenke soe namkari ba anin, no haʼu sei losu surik ida hodi duni tuir sira.
3 “Ó mós tenke foti fuuk no hasan-rahun lahan balu no falun neʼe iha ó-nia unuk. 4 No ó tenke foti balu tan no soe neʼe ba ahi no sunu tiha. Husi neʼe mak ahi sei habelar ba Izraél nia umakain tomak.
5 “Jeová, Naʼi Ukun-Naʼin Boot Liu, dehan nuneʼe: ‘Neʼe mak Jeruzalein. Haʼu tau ona sidade neʼe iha nasaun sira-nia leet, no rai oioin mak haleʼu nia. 6 Maibé nia kontra ona hasoru haʼu-nia ukun-fuan no lei sira, nia halo hahalok aat liu fali nasaun no rai hotu neʼebé haleʼu nia. Povu neʼe la simu ona haʼu-nia ukun-fuan sira, no la halo tuir haʼu-nia lei sira.’
7 “Tan neʼe, Jeová, Naʼi Ukun-Naʼin Boot Liu, dehan: ‘Imi halo hahalok aat liu fali nasaun hotu neʼebé haleʼu imi no la halo tuir haʼu-nia lei no la kumpre haʼu-nia ukun-fuan, maibé imi halo tuir fali ukun-fuan husi nasaun hotu neʼebé haleʼu imi. 8 Entaun, Jeová, Naʼi Ukun-Naʼin Boot Liu, dehan nuneʼe: “Oh sidade, haʼu sei kontra ó, no haʼu rasik sei tesi lia ba ó iha nasaun sira-nia oin. 9 Haʼu sei halo ba ó buat neʼebé haʼu nunka halo uluk no haʼu sei la halo fali, tanba hahalok foʼer hotu neʼebé ó halo ona.
10 “‘“Entaun aman sira iha ó-nia leet sei han sira-nia oan, no oan sira sei han sira-nia aman, no haʼu sei tesi lia iha ó-nia leet no halo namkari ema restu iha ó-nia leet ba fatin hotu.”’
11 “Jeová, Naʼi Ukun-Naʼin Boot Liu, dehan: ‘Haʼu jura hodi haʼu-nia moris rasik katak haʼu sei la simu ó, tanba ó hafoʼer haʼu-nia fatin santu ho ó-nia estátua hotu neʼebé haʼu hakribi no ho ó-nia hahalok foʼer hotu. Haʼu sei la hanoin ó, no haʼu sei la hatudu laran-sadiʼa. 12 Haʼu sei fahe ó-nia ema ba grupu tolu. Grupu ida sei mate tanba moras ka mate tanba hamlaha iha ó-nia leet. Grupu seluk sei mate iha ó-nia sorin-sorin tanba surik. No haʼu sei halo namkari grupu ikus ba fatin hotu, no haʼu sei losu surik ida hodi duni tuir sira. 13 Tuirmai haʼu sei la hirus tan, no haʼu-nia hirus hasoru sira sei la iha tan, no haʼu sei sente kontente. Bainhira haʼu hasai hotu ona haʼu-nia hirus hasoru sira, sira sei hatene duni katak haʼu, Jeová, haʼu koʼalia nuneʼe tanba haʼu hakarak ema atu adora haʼu mesak deʼit.
14 “‘Haʼu sei halo ó sai fatin neʼebé rahun, no nasaun hotu haleʼu ó no ema hotu neʼebé laʼo liu sei hatún ó. 15 Bainhira haʼu tesi lia ba ó no kastigu ó ho haʼu-nia hirus no laran-nakali, ó sei sai buat neʼebé ema hakribi no goza, no sei sai nuʼudar ezemplu neʼebé fó avizu no halo taʼuk nasaun sira neʼebé haleʼu ó. Haʼu, Jeová, mak fó sai ida-neʼe.
16 “‘Haʼu sei haruka rai-hamlaha neʼebé sei oho imi hanesan rama-oan. Haʼu sei halo rai-hamlaha neʼe sai aat liu hodi hamenus imi-nia ai-han. 17 Haʼu sei haruka rai-hamlaha no animál fuik ba imi, no sira sei halo mate imi-nia oan. Moras no oho malu sei haleʼu imi, no haʼu sei lori surik kontra imi. Haʼu, Jeová, mak fó sai ida-neʼe.’”
6 Jeová koʼalia tan ba haʼu, hodi dehan: 2 “Oan-mane husi ema, fila oin hodi hateke ba Izraél nia foho sira no fó sai nanis liafuan kontra sira. 3 Ó tenke dehan: ‘Oh Izraél nia foho sira, rona ba liafuan husi Jeová, Naʼi Ukun-Naʼin Boot Liu: Jeová, Naʼi Ukun-Naʼin Boot Liu, dehan nuneʼe ba foho sira, foho oan sira, mota sira, no ba foho-leet sira: “Haree bá! Haʼu sei lori surik kontra imi, no haʼu sei halakon imi-nia fatin aas sira. 4 Haʼu sei harahun imi-nia altár, halo aat imi-nia fatin insensu nian, no haʼu sei oho imi, no soe imi-nia mate-isin iha imi-nia estátua sira neʼebé haʼu hakribi nia oin. 5 Haʼu sei soe povu Izraél nia mate-isin iha sira-nia estátua sira neʼebé haʼu hakribi nia oin, no haʼu sei halo namkari imi-nia ruin sira haleʼu imi-nia altár sira. 6 Iha fatin hotu neʼebé imi hela bá, haʼu sei harahun imi-nia sidade sira. Haʼu sei harahun imi-nia fatin aas sira no husik rahun deʼit. Imi-nia altár sira sei sai rahun no uut, imi-nia estátua neʼebé haʼu hakribi sei lakon mohu, imi-nia fatin insensu sei tohar, no haʼu sei halakon hotu buat sira neʼebé imi halo. 7 No sira neʼebé ema oho sei monu iha imi-nia leet, nuneʼe imi sei hatene duni katak haʼu mak Jeová.
8 “‘“Maibé haʼu sei husik ema balu moris, tanba ema balu iha imi-nia leet sei la mate ho surik bainhira haʼu halo imi namkari iha nasaun sira-nia leet. 9 No sira neʼebé la mate sei hanoin-hetan haʼu iha nasaun sira-nia leet, iha fatin neʼebé sira sai dadur. Sira sei hatene katak sira halo haʼu laran-kanek tanba sira la laran-metin hodi fila kotuk ba haʼu no tanba sira-nia matan kaan estátua neʼebé haʼu hakribi. Sira sei sai moe no hakribi hahalok aat no buat foʼer hotu neʼebé sira halo ona. 10 Sira sei hatene duni katak haʼu mak Jeová no haʼu-nia avizu atu lori susar ba sira laʼós bosok deʼit.”’
11 “Jeová, Naʼi Ukun-Naʼin Boot Liu, dehan nuneʼe: ‘Basa-liman no doko ain ho laran-triste no halerik kona-ba hahalok aat no buat foʼer hotu neʼebé umakain Izraél halo, tanba sira sei mate ho surik, hamlaha, no moras. 12 Sira neʼebé hela dook sei mate ho moras, sira neʼebé besik sei mate ho surik, no sira seluk sei mate ho hamlaha; no haʼu sei hasai hotu haʼu-nia hirus hasoru sira. 13 Sira sei hatene duni katak haʼu mak Jeová, bainhira sira-nia ema nia mate-isin latan entre sira-nia estátua neʼebé haʼu hakribi, latan haleʼu sira-nia altár, latan iha foho-oan hotu neʼebé aas, iha foho-tutun hotu, iha ai buras hotu nia okos, no iha ai-hun boot nia sanak okos neʼebé uluk sira hasaʼe sakrifísiu neʼebé morin hodi halo kontente sira-nia estátua hotu neʼebé haʼu hakribi. 14 Haʼu sei lolo liman kontra sira no halo sira-nia rai sai fuik, no halo sira-nia hela-fatin hotu sai mamuk liu fali rai-fuik besik Dibla. Nuneʼe sira sei hatene duni katak haʼu mak Jeová.’”
7 Jeová koʼalia tan ba haʼu, hodi dehan: 2 “Oh oan-mane husi ema, Jeová, Naʼi Ukun-Naʼin Boot Liu, dehan nuneʼe ba rai-Izraél: ‘Ó-nia rohan toʼo ona! Rai tomak neʼe nia rohan toʼo mai ona. 3 Agora ó-nia rohan toʼo ona ba ó, no haʼu sei hasai haʼu-nia hirus hasoru ó, no haʼu sei tesi lia ba ó tuir ó-nia hahalok sira no kastigu ó tanba ó-nia hahalok foʼer hotu. 4 Haʼu sei la hanoin ó; no haʼu sei la sente laran-sadiʼa, tanba haʼu sei selu fali ó tuir ó-nia hahalok sira, no ó sei lori todan ba ó-nia hahalok foʼer sira. Nuneʼe ó sei hatene duni katak haʼu mak Jeová.’
5 “Jeová, Naʼi Ukun-Naʼin Boot Liu, dehan nuneʼe: ‘Haree bá! Susar boot, susar neʼebé la hanesan baibain, mai daudaun. 6 Ó-nia rohan mai daudaun; rohan sei mai; ó-nia rohan sei toʼo mai derrepente hodi kontra ó. Haree bá! Ó-nia rohan mai daudaun. 7 Ó neʼebé hela iha rai neʼe, ó-nia rohan mai ona. Tempu mai daudaun, loron neʼe besik ona. Foho sira runguranga no la iha haklalak haksolok nian iha neʼebá.
8 “‘Lakleur tan haʼu sei fakar sai haʼu-nia hirus ba ó, no haʼu sei hasai hotu haʼu-nia hirus kontra ó, no haʼu sei tesi lia ba ó tuir ó-nia hahalok sira no kastigu ó tanba ó-nia hahalok foʼer hotu. 9 Haʼu sei la hanoin ó; no haʼu sei la sente laran-sadiʼa. Haʼu sei selu fali ó tuir ó-nia hahalok sira, no ó sei lori todan ba ó-nia hahalok foʼer sira. Nuneʼe ó sei hatene duni katak haʼu, Jeová, mak kastigu ó.
10 “‘Haree bá, loron neʼe mai daudaun! Ó-nia rohan mai ona; ai-tonka buras ona no hahalok foti-an sai buras ona. 11 Violénsia sai ona ai-tonka tanba hahalok aat. Sira no sira-nia rikusoin, sira-nia ema-lubun, no sira-nia naran-boot sei lakon mohu. 12 Tempu sei mai, no loron neʼe sei toʼo mai. Husik ema neʼebé sosa labele haksolok, no ema neʼebé faʼan labele sai triste, tanba Maromak nia hirus lakan hasoru sira-nia ema-lubun hotu. 13 Maski ema neʼebé faʼan la mate, maibé nia la bele fila fali ba buat neʼebé nia faʼan, tanba vizaun neʼe kontra ema hotu. La iha ema ida mak sei fila fali, no la iha ema ida mak sei moris tanba ninia sala.
14 “‘Sira huu ona trombeta, no ema hotu prontu, maibé la iha ema ida mak sai atu halo funu, tanba haʼu-nia hirus kontra ema hotu. 15 Surik iha sidade liʼur; moras no hamlaha mak iha sidade laran. Ema neʼebé iha toʼos sei mate ho surik, no ema neʼebé iha sidade laran sei mate ho hamlaha no moras. 16 Ema neʼebé la mate no halai sai, sei halai ba foho sira, no sira ida-idak sei tanis tanba sira-nia sala, hanesan manu-pombu iha foho-leet sira. 17 Sira hotu nia liman sei sai fraku, no sira hotu nia ain-tuur sei turuk ho bee. 18 Sira hatais ona hena karón, no sira sai nakdedar. Sira hotu sei sai moe, no sira hotu nia ulun sei koir molik.
19 “‘Sira sei soe sira-nia osan-mutin iha dalan, no sira-nia osan-mean sei sai nuʼudar buat neʼebé sira hakribi. Sira-nia osan-mutin no osan-mean sei la salva sira iha Jeová nia loron hirus nian. Sira sei la sai bosu, sira sei la halo nakonu sira-nia kabun, tanba buat sira-neʼe sai ona fatuk sidi nian neʼebé lori sira ba sala.
20 Sira gaba an tanba glória husi sira-nia sasán murak, no ho buat sira-neʼe mak sira halo estátua foʼer neʼebé haʼu hakribi. Tan neʼe mak haʼu sei halo sasán sira-neʼe sai buat neʼebé sira hakribi. 21 Haʼu sei entrega buat sira-neʼe ba ema estranjeiru nia liman atu sira foti no entrega ba ema aat sira iha mundu atu hadau, no sira sei hafoʼer buat sira-neʼe.
22 “‘Haʼu sei fila kotuk ba sira, no sira sei hafoʼer fatin neʼebé haʼu hafolin, no naʼok-teen sira sei tama no hafoʼer fatin neʼe.
23 “‘Halo korrente bá, tanba rai neʼe nakonu ona ho tesi-lia neʼebé la loos hodi oho ema no tanba sidade neʼe nakonu ho violénsia. 24 Haʼu sei lori mai nasaun neʼebé aat loos, no nasaun neʼe sei hadau sira-nia uma, no haʼu sei hapara asuwaʼin sira-nia hahalok foti-an, no sira-nia fatin santu sei sai foʼer. 25 Bainhira sira-nia terus mosu mai, sira sei buka dame, maibé sei la iha dame. 26 Susar sei mosu tuituir malu, no sira sei rona lia-menon tuituir malu, no ema sei buka vizaun husi profeta ida, maibé la iha tan ukun-fuan husi amlulik ida no la iha tan konsellu husi katuas sira. 27 Liurai sei sai triste, no xefe sei sai neon-susar tebes, no povu iha rai neʼe nia liman sei nakdedar tanba taʼuk. Haʼu sei halo ba sira tuir sira-nia hahalok, no haʼu sei tesi lia ba sira hanesan sira mós tesi lia ba ema seluk. Nuneʼe sira sei hatene duni katak haʼu mak Jeová.’”
8 Iha loron lima, fulan-neen, tinan neen, bainhira haʼu tuur daudaun iha haʼu-nia uma no Judá nia katuas sira mós tuur daudaun iha haʼu-nia oin, Jeová, Naʼi Ukun-Naʼin Boot Liu, nia kbiit tun ba haʼu. 2 Nuʼudar haʼu hateke, haʼu haree ema ida neʼebé haree hanesan ahi; husi ninia knotak ba kraik, haʼu haree buat ida hanesan ahi, no husi ninia knotak ba leten, haʼu haree nabilan hanesan besi neʼebé nabilan. 3 Tuirmai nia lolo liman hodi kaer haʼu-nia fuuk, no espíritu hiʼit saʼe haʼu entre rai no lalehan no lori haʼu ba Jeruzalein liuhusi vizaun ida husi Maromak, hodi toʼo iha portaun ba pátiu kiʼik neʼebé hateke ba norte. Iha neʼebá iha estátua neʼebé halo Maromak sai laran-moras. 4 No haree bá! Izraél nia Maromak nia glória iha neʼebá, hanesan glória neʼebé haʼu haree ona iha rai-tetuk.
5 Tuirmai nia dehan ba haʼu: “Oan-mane husi ema, favór ida, foti matan hodi hateke ba parte norte.” Entaun haʼu foti matan hateke ba parte norte, no iha altár nia parte norte besik portaun neʼe, haʼu haree estátua neʼebé halo Maromak sai laran-moras. 6 No nia dehan ba haʼu: “Oan-mane husi ema, haree ba buat neʼebé umakain Izraél halo iha haʼu-nia templu. Sira halo buat neʼebé aat tebes no foʼer, no buat sira-neʼe halo haʼu dook husi fatin neʼe. Maibé ó sei haree buat foʼer sira neʼebé aat liután.”
7 Tuirmai nia lori haʼu ba portaun pátiu nian, no bainhira haʼu hateke, haʼu haree kuak ida iha didin. 8 Nia dehan ba haʼu: “Oan-mane husi ema, favór ida, halo kuak borus didin neʼe.” Entaun haʼu halo kuak didin neʼe, no haʼu haree odamatan ida. 9 Nia dehan ba haʼu: “Tama bá hodi haree hahalok aat no buat foʼer neʼebé sira halo iha neʼe.” 10 Entaun haʼu tama hodi haree. Haʼu haree estátua oioin neʼebé reprezenta animál neʼebé dolar, animál neʼebé foʼer, no haree mós umakain Izraél nia estátua hotu neʼebé Maromak hakribi; sira bahat estátua sira-neʼe haleʼu didin hotu. 11 No umakain Izraél nia katuas naʼin-70 hamriik daudaun iha estátua sira-neʼe nia oin, no Jazanias, Safan nia oan-mane, mós hamriik iha sira-nia leet. Sira ida-idak kaer hela insensu fatin, no insensu nia suar morin saʼe ba leten.
12 Nia dehan ba haʼu: “Oan-mane husi ema, ó haree ona buat neʼebé umakain Izraél nia katuas sira halo daudaun iha nakukun laran ka lae? Ó haree ona sira ida-idak nia hahalok iha sira-nia kuartu laran neʼebé tau sira-nia estátua sira ka lae? Tanba sira dehan: ‘Jeová la haree ita. Jeová husik ona rai neʼe.’”
13 Nia hatutan tan ba haʼu: “Ó sei haree sira halo buat foʼer sira neʼebé aat liután.” 14 Entaun nia lori haʼu ba portaun norte husi Jeová nia uma, no iha portaun nia oin, haʼu haree feto sira tuur hela no tanis ba maromak Tamuz.
15 No nia hatutan tan ba haʼu: “Oh oan-mane husi ema, ó haree ona ida-neʼe ka? Ó sei haree buat foʼer sira neʼebé aat liu fali buat sira-neʼe.” 16 Entaun nia lori haʼu ba pátiu kiʼik husi Jeová nia uma. Haʼu haree mane maizumenus naʼin-25 iha fatin tama ba Jeová nia templu, entre varanda no altár, sira hamriik hodi fila kotuk ba Jeová nia templu no sira-nia oin hateke ba parte leste; sira hakruʼuk an ba loro-matan iha parte leste.
17 Nia dehan ba haʼu: “Oan-mane husi ema, ó haree ona ida-neʼe ka? Umakain Judá hatudu hahalok foʼer sira-neʼe, no halo nakonu rai neʼe ho violénsia, no kontinua hakanek haʼu-nia laran, neʼe mak buat baibain deʼit ka lae? Sira see buat neʼebé haʼu hakribi ba haʼu-nia inus. 18 Tan neʼe, haʼu sei hatudu haʼu-nia laran-nakali. Haʼu sei la hanoin sira; no mós la sente laran-sadiʼa. Maski sira hakilar makaʼas iha haʼu-nia tilun, haʼu sei la rona ba sira.”
9 Tuirmai haʼu rona lian makaʼas ida koʼalia ba haʼu, hodi dehan: “Bolu sira neʼebé atu lori kastigu ba sidade neʼe, sira ida-idak kaer hela armas atu harahun sidade!”
2 Haʼu haree mane naʼin-neen mai daudaun husi portaun leten nian neʼebé hateke ba norte, sira ida-idak kaer hela sira-nia armas atu harahun sidade; no iha sira-nia leet iha mane ida neʼebé hatais hena-liñu, sekretáriu nia tinta-fatin mak iha ninia knotak. Sira mai no hamriik besik altár husi riti.
3 Tuirmai Maromak Izraél nia glória hiʼit an saʼe husi ninia fatin iha kerubín leten no muda ba templu nia odamatan, no Maromak komesa bolu ba mane neʼebé hatais hena-liñu, neʼebé tara hela sekretáriu nia tinta-fatin iha nia knotak. 4 Jeová dehan ba nia: “Laʼo haleʼu sidade Jeruzalein, no tau marka ba ema nia reen-toos, katak ema sira neʼebé triste no halerik tanba buat foʼer hotu neʼebé ema halo iha sidade neʼe.”
5 No haʼu rona nia dehan ba sira seluk: “Laʼo tuir nia hodi haleʼu sidade no harahun ema. Keta hanoin sira no keta sente laran-sadiʼa. 6 Imi tenke oho hotu katuas, mane joven, feto virjen, labarik, no feto sira. Maibé imi keta hakbesik ba ema neʼebé iha marka. Imi tenke halo neʼe komesa husi haʼu-nia fatin santu.” Entaun sira hahú oho katuas sira neʼebé hamriik iha templu nia oin. 7 Tuirmai nia dehan ba sira: “Halo foʼer templu no halo nakonu ninia pátiu sira ho mate-isin. Bá ona!” Entaun sira bá no oho ema iha sidade neʼe.
8 Bainhira sira oho ema, haʼu mesak deʼit mak moris, no haʼu hakneʼak ho oin ba rai no halerik: “Oh Jeová, Naʼi Ukun-Naʼin Boot Liu! Ita mós sei harahun hotu Izraél nia ema restu sira bainhira Ita fakar sai Ita-nia hirus ba Jeruzalein ka lae?”
9 Entaun nia dehan ba haʼu: “Umakain Izraél no Judá nia sala mak boot tebetebes. Rai neʼe nakonu ho ema nia raan, no sidade neʼe nakonu ho hahalok aat. Tanba sira dehan: ‘Jeová husik ona rai neʼe, no Jeová la haree.’ 10 Kona-ba haʼu, haʼu sei la hanoin sira; no haʼu mós sei la hatudu laran-sadiʼa. Haʼu sei lori kastigu ba sira-nia hahalok sira.”
11 Tuirmai haʼu haree mane neʼebé hatais hena-liñu, neʼebé tara hela tinta-fatin iha nia knotak, nia mai fali, hodi dehan: “Haʼu halo tuir ona Ita-nia liafuan neʼebé Ita haruka haʼu atu halo.”
10 Bainhira haʼu hateke ba palku iha kerubín sira-nia leten, haʼu haree buat ida hanesan kadunan neʼebé halo husi fatuk-safira. 2 Tuirmai nia dehan ba mane neʼebé hatais hena-liñu: “Tama ba roda sira neʼebé nakdulas nia leet, no hamriik iha kerubín okos. Halo nakonu ó-nia liman ho ahi-klaak lakan husi kerubín sira-nia leet no soe namkari ba sidade.” Haʼu haree hela bainhira nia tama.
3 Kerubín sira hamriik hela iha templu nia sorin loos bainhira mane neʼe tama, no pátiu laran sai nakonu ho kalohan. 4 No Jeová nia glória hiʼit an saʼe husi kerubín sira-nia leten hodi muda ba templu nia odamatan, no neineik-neineik templu sai nakonu ho kalohan, no templu nia pátiu nabilan ho Jeová nia glória. 5 Husi pátiu boot bele rona lian husi kerubín nia liras, lian neʼe rona hanesan Maromak Kbiit Boot Liu Hotu nia lian bainhira nia koʼalia.
6 Tuirmai nia haruka mane neʼebé hatais hena-liñu, hodi dehan: “Foti ahi husi roda sira neʼebé nakdulas nia leet, husi kerubín sira-nia leet”, entaun nia tama no hamriik besik roda. 7 Tuirmai kerubín ida lolo liman ba ahi neʼebé iha kerubín sira-nia leet. Nia foti ahi balu no tau neʼe iha mane neʼebé hatais hena-liñu nia liman, no mane neʼe lori ahi neʼe sai. 8 Kerubín sira-neʼe iha liman hanesan ema nian iha sira-nia liras okos.
9 Bainhira haʼu hateke, haʼu haree roda haat iha kerubín sira-nia sorin. Roda ida iha kerubín ida nia sorin, no roda sira-neʼe nabilan hanesan fatuk-krisólitu. 10 Roda haat neʼe haree hanesan deʼit. Roda sira-neʼe nia modelu hanesan roda ida iha roda seluk nia laran. 11 Bainhira sira muda, sira muda ba diresaun haat, maibé la presiza dulas fila ba sorin. Sira tuir deʼit ba fatin neʼebé kerubín nia ulun hateke bá, no la presiza dulas fila ba sorin. 12 Matan mak nakonu iha kerubín sira-nia isin tomak, sira-nia kotuk, liman, no liras. Roda haat neʼebé iha sira-nia sorin mós haleʼu ho matan. 13 Kona-ba roda sira-neʼe, haʼu rona lian neʼebé bolu sira, hodi dehan: “Oh roda sira neʼebé nakdulas!”
14 Sira ida-idak iha oin haat. Sira-nia oin primeiru mak kerubín nia oin, segundu mak ema nia oin, terseiru mak leaun nia oin, no ida ikus mak manu-makikit nia oin.
15 Kerubín sira-neʼe mak hanesan ho kriatura moris neʼebé haʼu haree ona besik mota Kebar. Bainhira kerubín sira-neʼe hiʼit an saʼe, 16 no bainhira kerubín sira-neʼe muda, roda sira mós muda hamutuk ho sira; no bainhira kerubín sira hiʼit sira-nia liras atu saʼe aas liu rai, roda sira mós la fila ka la muda husi sira-nia sorin. 17 Bainhira kerubín sira-neʼe hamriik metin, roda sira mós hamriik metin; no bainhira sira hiʼit an saʼe, roda sira mós hiʼit an saʼe, tanba espíritu neʼebé book kriatura moris sira-neʼe, book mós roda sira.
18 Tuirmai Jeová nia glória muda husi templu nia odamatan no para iha kerubín sira-nia leten. 19 Haʼu haree kerubín sira hiʼit sira-nia liras no saʼe husi rai. Bainhira sira muda, roda sira mós muda hamutuk ho sira. Sira para iha portaun leste nia oin husi Jeová nia templu, no Izraél nia Maromak nia glória iha sira-nia leten.
20 Sira mak kriatura moris neʼebé haʼu haree ona iha Maromak Izraél nia kadunan okos besik mota Kebar, tan neʼe mak haʼu hatene katak sira mak kerubín. 21 Sira naʼin-haat hotu iha oin haat, liras haat, no liman hanesan ema nian iha sira-nia liras okos. 22 No kerubín sira-neʼe nia oin hanesan deʼit ho kriatura moris nia oin neʼebé haʼu haree ona besik mota Kebar. Sira ida-idak bá loos deʼit oin.