Informasaun atu uza hamutuk livru Moris Kristaun no Haklaken
3-9 JULLU
Keʼe no hetan buat murak husi Bíblia
w07 1/7 p. 13 par. 8
Pontu importante husi livru Ezequiel—I
12:26-28. Ba ema sira neʼebé goza kona-ba mensajen neʼebé Ezequiel hatoʼo, Ezequiel mós tenke hatete ba sira: “Haʼu [Jeová] sei la demora atu kumpre haʼu-nia liafuan hotu.” Ita tenkesér hakaʼas an atu ajuda ema seluk tau fiar ba Jeová antes nia halakon mundu aat neʼe.
Aproveita didiʼak hahán espirituál neʼebé Jeová fó
13 Porezemplu, Ezequiel (Yehezkiel) 14:13, 14 hatete katak: “Se nasaun ida halo sala hasoru haʼu hodi la hatudu laran-metin, haʼu sei lolo haʼu-nia liman hasoru rai neʼe no halakon ninia hahán hotu no haʼu sei haruka rai-hamlaha ba rai neʼe no halakon ema no animál husi nia. ‘No se karik mane naʼin-tolu, Noé, Daniel no Job mak iha rai neʼe, sira sei salva deʼit sira-nia an tanba sira-nia hahalok loos,’ neʼe mak Ukun-Naʼin Boot Liu Hotu Jeová hatete.” Se ita mak halo riset liután, ita bele hatene katak Ezequiel hakerek liafuan sira-neʼe iha tinan 612 molok Kristu. Iha tempu neʼebá, Noé no Job mate tiha ba tinan atus hirak ona, maibé Jeová hanoin hela nafatin sira-nia laran-metin. Daniel sei moris hela iha tempu neʼebá, karik nia foin tinan 20 hanesan neʼe no Jeová hatete katak nia mós iha laran-loos hanesan Noé no Job. Ita bele aprende saida husi neʼe? Ita aprende katak Jeová nota no hafolin tebes ninia atan sira-nia laran-metin ba nia, inklui mós joven sira.—Salmo (Mazmur) 148:12-14.
w07 1/7 p. 13 par. 9
Pontu importante husi livru Ezequiel—I
14:12-23. Atu hetan salvasaun mak ema ida-idak nia responsabilidade. Ema seluk la bele fó salvasaun ba ita.—Roma 14:12.
10-16 JULLU
Keʼe no hetan buat murak husi Bíblia
w88 15/9 p. 17 par. 7
Jeová losu ninia surik!
7 Tanba ema iha Judá la hatudu laran-metin, eskritura kompara Judá hanesan uvas kain fuik neʼebé la fó fuan diʼak no ikusmai sunu deʼit. (Ezequiel [Yehezkiel] 15:1-8) Bíblia mós kompara nia hanesan bebé neʼebé Maromak hili husi rai-Ejitu no hakiak nia toʼo sai feto boot ida. Jeová foti nia sai ninia feen, maibé nia fila kotuk adora fali maromak falsu sira, tan neʼe nia sei lakon ninia moris tanba ninia hahalok sala-foʼer espirituál nian. Maski nuneʼe, Maromak sei halo aliansa neʼebé metin ho ema laran-metin sira, neʼe mak aliansa foun neʼebé nia halo ho Izraél espirituál.—Ezequiel (Yehezkiel) 16:1-63; Jeremias (Yeremia) 31:31-34; Galásia 6:16.
w07 1/7 p. 12 par. 6
Pontu importante husi livru Ezequiel—I
17:1-24—Sé mak manu-makikit boot rua, oinsá mak manu neʼe kuʼu ai-dikin husi ai-sedru nia tutun, no sé mak “ai-dikin” neʼebé Jeová sei kuda? Manu-makikit rua reprezenta Babilónia no Ejitu nia ukun-naʼin sira. Manu-makikit primeiru mai toʼo ai-sedru nia tutun, neʼe mak governu nia ukun-naʼin neʼebé mai husi David nia jerasaun. Manu-makikit neʼe kuʼu ai-dikin husi ai-sedru tutun hodi troka Liurai Joakim ho Liurai Zedekias. Maski Zedekias halo juramentu atu laran-metin ba Liurai Nabukodonosor, Zedekias buka ajuda husi manu-makikit ida fali, Ejitu nia ukun-naʼin, maibé neʼe la ajuda. Ema kaer nia ba Babilónia no nia mate iha neʼebá. Jeová mós fokit “ai-dikin” ida, neʼe mak Liurai Mesias. Nia kuda fali Liurai neʼe “iha foho aas neʼebé boot nia leten” ka iha Foho Siaun lalehan nian neʼebé ai-dikin neʼe sei sai “ai-sedru neʼebé boot”. Ai neʼe sei lori bensaun neʼebé loos ba mundu tomak.—Apokalipse 14:1.
17-23 JULLU
Keʼe no hetan buat murak husi Bíblia
Keta sai ‘laran-nakali hasoru Jeová’
9 Ita la hatene buat hotu kona-ba situasaun. Tanba ema Izraél iha Ezequiel nia tempu la hatene buat hotu kona-ba situasaun neʼebé sira hasoru, sira hanoin katak Jeová nia dalan mak la loos. (Eze 18:29) Sira hanoin katak sira iha direitu atu tesi lia ba Maromak no ninia desizaun. Oinsá mak dala ruma ita mós hanoin sala hanesan neʼe? Porezemplu, Bíblia konta istória ruma neʼebé susar atu komprende, ka ita la komprende situasaun ruma neʼebé ita hasoru daudauk. Se hanesan neʼe, karik ita komesa hanoin katak Jeová nia dalan la iha justisa.—Jó 35:2.
w07 1/7 p. 14 par. 3
Pontu importante husi livru Ezequiel—I
20:1, 49—Resposta husi ema Izraél nia katuas sira hatudu katak sira iha duvida kona-ba buat neʼebé Ezequiel hatete. Diʼak ba ita atu la haburas toman kona-ba sente duvida ba Jeová nia avizu sira.
24-30 JULLU
Keʼe no hetan buat murak husi Bíblia
w07 1/7 p. 14 par. 1
Pontu importante husi livru Ezequiel—I
21:3—Surik neʼebé Jeová losu sai husi ninia fatin reprezenta saida? “Surik” neʼebé Jeová uza hodi fó kastigu ba Jeruzalein no Judá mak Liurai Nabukodonosor ho ninia tropa husi Babilónia. Karik inklui mós kriatura espíritu sira husi Maromak nia organizasaun parte lalehan nian.
w07 1/7 p. 14 par. 6
Pontu importante husi livru Ezequiel—I
23:5-49. Tanba nasaun Izraél no Judá halo aliansa polítiku ho nasaun seluk, ikusmai sira mós monu ba adorasaun falsu husi nasaun sira-neʼe. Tan neʼe, ita tenke kuidadu atu la habelun ho mundu tanba neʼe bele halakon ita-nia fiar.—Tiago 4:4.
31 JULLU–6 AGOSTU
Keʼe no hetan buat murak husi Bíblia
w07 1/7 p. 14 par. 2
Pontu importante husi livru Ezequiel—I
24:6-14—Sanan nia ferrujen reprezenta saida? Jeruzalein mak hanesan sanan nia ibun neʼebé boot bainhira inimigu haleʼu nia. Sanan nia ferrujen reprezenta sidade Jeruzalein nia morál neʼebé aat hanesan hahalok foʼer, la iha moe, no fakar ema nia raan. Ninia hahalok sira foʼer tebes toʼo tula sanan mamuk neʼe iha ahi-klaak leten hodi sunu makaʼas mós ferrujen neʼe la monu.
w88 15/9 p. 21 par. 24
Jeová losu ninia surik!
24 Tuirmai, Ezequiel halo buat ida la hanesan baibain. (Lee Ezequiel [Yehezkiel] 24:15-18.) Tanbasá mak profeta neʼe la bele sente triste bainhira ninia feen mate? Ida-neʼe atu hatudu katak ema judeu sira sei hakfodak tebes bainhira inimigu harahun Jeruzalein, ema iha sidade neʼe, no templu. Ezequiel koʼalia dala barak ona kona-ba akontesimentu neʼe no nia sei la fó sai tan Maromak nia mensajen toʼo tempu neʼebé ema fó-hatene ba nia katak Jeruzalein naksobu ona. Hanesan neʼe mós relijiaun kristaun falsu sira sei hakfodak iha tempu neʼebé sira sei lakon ba nafatin. Bainhira tempu “terus boot” nian hahú ona, sira sei rekoñese kona-ba mensajen neʼebé Maromak nia manu-ain sira fó sai nanis kona-ba sira-nia rohan. (Mateus 24:21) Maibé bainhira Maromak nia “surik” tun ba relijiaun kristaun falsu sira, ema neʼebé tuir sira no ema seluk tan ‘sei hatene duni katak nia mak Jeová’.— Ezequiel (Yehezkiel) 24:19-27.
EZEKIEL
11 No forsa ida hiʼit saʼe haʼu no lori haʼu ba portaun husi Jeová nia uma neʼebé hateke ba parte leste. Iha fatin atu tama ba portaun neʼe, haʼu haree mane naʼin-25, no iha sira-nia leet haʼu haree Jazanias, Azur nia oan-mane, no Pelatias, Benaias nia oan-mane. Sira mak ulun-naʼin ba povu neʼe. 2 Tuirmai Nia dehan ba haʼu: “Oan-mane husi ema, mane sira-neʼe mak halo planu aat no fó konsellu aat iha sidade neʼe. 3 Sira husu: ‘Agora mak tempu atu harii uma, loos ka lae? Sidade neʼe mak hanesan sanan boot, no ami mak naʼan.’
4 “Oh oan-mane husi ema, fó sai haʼu-nia liafuan kontra sira.”
5 Tuirmai Maromak Jeová nia espíritu tun ba haʼu, no Maromak dehan: “Koʼalia bá: ‘Jeová dehan nuneʼe: “Oh umakain Izraél, imi-nia liafuan mak loos, no haʼu hatene buat neʼebé imi hanoin daudaun. 6 Imi halo ona ema barak mate iha sidade neʼe, no imi halo nakonu sidade nia dalan sira ho mate-isin.”’” 7 “Tan neʼe, Jeová, Naʼi Ukun-Naʼin Boot Liu, dehan nuneʼe: ‘Mate-isin sira neʼebé imi soe iha sidade neʼe mak nuʼudar naʼan, no sidade mak sanan boot. Maibé haʼu sei hasai tiha imi husi sidade.’”
8 “Jeová, Naʼi Ukun-Naʼin Boot Liu, dehan nuneʼe: ‘Imi taʼuk surik, maibé haʼu sei lori surik atu kontra hasoru imi. 9 Haʼu sei lori imi sai husi sidade no entrega imi ba ema estranjeiru nia liman no sira sei kumpre haʼu-nia tesi lia ba imi. 10 Imi sei mate ho surik. Haʼu sei tesi lia ba imi besik Izraél nia fronteira, no imi sei hatene duni katak haʼu mak Jeová. 11 Sidade neʼe sei la sai tan hanesan sanan boot ba imi, no imi sei la sai tan hanesan naʼan iha sanan neʼe nia laran; haʼu sei tesi lia ba imi besik Izraél nia fronteira, 12 no imi sei hatene duni katak haʼu mak Jeová. Haʼu halo nuneʼe tanba imi la halo tuir haʼu-nia ukun-fuan no la kumpre haʼu-nia desizaun, maibé imi halo tuir fali ukun-fuan husi nasaun sira neʼebé haleʼu imi.’”
13 Bainhira haʼu fó sai tiha liafuan sira-neʼe, Pelatias, Benaias nia oan-mane, mate kedas, no haʼu hakneʼak ho oin ba rai no halerik ho lian makaʼas, hodi dehan: “Oh Jeová, Naʼi Ukun-Naʼin Boot Liu! Ita mós sei halakon hotu Izraél nia ema restu sira ka?”
14 Jeová koʼalia tan ba haʼu, hodi dehan: 15 “Oan-mane husi ema, ema sira iha Jeruzalein fó sai ona ba ó-nia maun-alin sira neʼebé iha direitu atu sosa fali rai, no mós fó sai ba umakain Izraél tomak, hodi dehan: ‘Hadook an husi Jeová. Rai neʼe mak ami-nian; neʼe entrega ona ba ami nuʼudar liman-rohan.’ 16 Tan neʼe koʼalia bá: ‘Jeová, Naʼi Ukun-Naʼin Boot Liu, dehan nuneʼe: “Maski haʼu haruka sira bá dook hodi hela iha nasaun sira-nia leet no halo sira namkari ba rai oioin, maibé ba tempu badak haʼu sei sai nuʼudar fatin santu ba sira iha rai neʼebé sira hela bá.”’
17 “Tan neʼe, koʼalia bá: ‘Jeová, Naʼi Ukun-Naʼin Boot Liu, dehan nuneʼe: “Haʼu mós sei halibur fali sira husi povu seluk nia leet no halibur sira husi rai oioin neʼebé sira namkari bá, no haʼu sei fó Izraél nia rai ba sira. 18 No sira sei fila fali ba neʼebá no hasai buat hotu neʼebé haʼu hakribi no halakon hahalok foʼer sira.
19 No haʼu sei halo sira iha neon ida deʼit, no haʼu sei tau hanoin foun iha sira; no haʼu sei hasai tiha laran neʼebé toos hanesan fatuk no fó fali laran neʼebé mamar ba sira,
20 atu nuneʼe sira bele halo tuir haʼu-nia ukun-fuan sira no kumpre haʼu-nia desizaun sira. Tuirmai sira sei sai haʼu-nia povu, no haʼu sei sai sira-nia Maromak.”’
21 “‘Jeová, Naʼi Ukun-Naʼin Boot Liu, dehan nuneʼe: “Kona-ba sira neʼebé kaer metin ba buat neʼebé haʼu hakribi no kontinua hatudu hahalok neʼebé foʼer, haʼu sei halo sira lori todan tanba sira-nia hahalok rasik.”’”
22 Tuirmai kerubín hiʼit saʼe sira-nia liras, no roda sira mós besik sira, no Izraél nia Maromak nia glória iha sira-nia leten. 23 Depois neʼe, Jeová nia glória saʼe husi sidade neʼe no para iha foho leten iha sidade nia parte leste. 24 No iha vizaun liuhusi Maromak nia espíritu, forsa ida hiʼit saʼe haʼu no lori haʼu ba povu neʼebé dadur iha Kaldeia. Tuirmai vizaun neʼebé uluk haʼu haree lakon husi haʼu. 25 Haʼu komesa konta ba povu neʼebé dadur kona-ba buat hotu neʼebé Jeová hatudu ona ba haʼu.
12 Jeová koʼalia tan ba haʼu, hodi dehan: 2 “Oan-mane husi ema, ó hela iha umakain neʼebé kontradór nia leet. Sira iha matan, maibé la bele haree, no sira iha tilun, maibé la bele rona, tanba sira mak umakain neʼebé kontradór. 3 Oan-mane husi ema, prepara pasta ida hanesan ó atu ba dadur. Durante loron bainhira sira haree hela, ó tenke laʼo ba fatin dadur nian. Ó tenke sai husi ó-nia uma hodi laʼo fali ba fatin seluk hanesan atu bá dadur bainhira sira haree hela. Karik sira sei haree ó, maski sira mak umakain neʼebé kontradór. 4 Durante loron bainhira sira haree hela, ó tenke lori sai ó-nia pasta neʼebé haloot ona, no durante kalan bainhira sira haree hela, ó tenke laʼo sai hanesan ema neʼebé inimigu lori ba dadur.
5 “Ó tenke halo kuak iha didin bainhira sira haree hela, no lori sai ó-nia sasán liuhusi kuak neʼe. 6 Ó tenke tau ó-nia sasán sira iha ó-nia kabaas no lori sai iha nakukun laran bainhira sira haree hela. Ó tenke taka ó-nia oin atu nuneʼe ó labele haree rai, tanba haʼu halo ó sai nuʼudar sinál ba umakain Izraél.”
7 Haʼu halo tuir duni Maromak nia mandamentu neʼe. Durante loron haʼu lori sai haʼu-nia pasta hanesan haʼu atu ba dadur, no durante kalan haʼu halo kuak didin ho haʼu-nia liman. No bainhira nakukun ona, haʼu foti haʼu-nia sasán sira, no tau iha haʼu-nia kabaas no lori sai iha sira-nia oin.
8 Iha dadeer Jeová koʼalia tan ba haʼu, hodi dehan: 9 “Oan-mane husi ema, umakain Izraél neʼebé kontradór husu ó ka lae, ‘Saida mak ó halo?’ 10 Dehan ba sira: ‘Jeová, Naʼi Ukun-Naʼin Boot Liu, dehan nuneʼe: “Neʼe mak avizu ba ulun-naʼin iha Jeruzalein no ba ema hotu husi umakain Izraél neʼebé iha sidade laran.”’
11 “Ó tenke hatete: ‘Haʼu mak sai sinál ba imi. Buat neʼebé sei akontese ba sira sei tuir buat neʼebé haʼu halo ona. Sira sei sai dadur. 12 Kona-ba ulun-naʼin neʼebé iha sira-nia leet, nia sei lori ninia sasán iha ninia kabaas no laʼo sai iha nakukun laran. Nia sei halo kuak iha didin no lori sai ninia sasán liuhusi kuak neʼe. Nia sei taka ninia oin atu nuneʼe nia labele haree rai.’ 13 Haʼu sei soe haʼu-nia rede ba nia, no nia sei tama iha rede laran. Tuirmai haʼu sei lori nia ba Babilónia, ema Kaldeia nia rai, maibé nia sei la haree rai neʼe; iha neʼebá mak nia sei mate. 14 No haʼu sei halo namkari ninia ajuda-naʼin no ninia tropa hotu neʼebé haleʼu nia; haʼu sei losu surik hodi duni tuir sira. 15 Bainhira haʼu halo sira namkari iha nasaun sira-nia leet no iha rai oioin, sira sei hatene duni katak haʼu mak Jeová. 16 Maibé haʼu sei salva sira balu husi surik, hamlaha, no moras, atu nuneʼe sira bele konta fali sira-nia hahalok foʼer hotu iha nasaun sira-nia leet neʼebé sira hela bá; nuneʼe sira sei hatene duni katak haʼu mak Jeová.”
17 Jeová koʼalia tan ba haʼu, hodi dehan: 18 “Oan-mane husi ema, ó tenke han paun ho nakdedar no hemu bee ho taʼuk no neon-susar. 19 Koʼalia ba povu iha rai neʼe: ‘Jeová, Naʼi Ukun-Naʼin Boot Liu, dehan nuneʼe kona-ba ema neʼebé hela iha Jeruzalein iha rai-Izraél: “Sira sei han paun ho neon-susar no hemu bee ho taʼuk, tanba sira-nia rai sei sai rahun hotu no mamuk tanba ema hotu halo violénsia iha sidade laran. 20 Sidade sira sei lakon, no rai neʼe sei sai rai-fuik; nuneʼe imi sei hatene duni katak haʼu mak Jeová.”’”
21 Jeová koʼalia tan ba haʼu, hodi dehan: 22 “Oan-mane husi ema, tansá mak imi iha lia-dadolin iha rai-Izraél neʼebé dehan: ‘Loron sira liu ona, no vizaun hotu la sai loos’? 23 Entaun dehan ba sira: ‘Jeová, Naʼi Ukun-Naʼin Boot Liu, dehan nuneʼe: “Haʼu sei halakon lia-dadolin neʼe, no sira sei la temi tan lia-dadolin neʼe iha rai-Izraél.”’ No dehan ba sira: ‘Loron neʼe besik ona, no vizaun hotu sei sai loos.’ 24 Tanba ema sei la haree tan vizaun neʼebé la loos ka la siʼik tan futuru neʼebé bosok iha umakain Izraél nia leet. 25 ‘Jeová, Naʼi Ukun-Naʼin Boot Liu, dehan: “Tanba haʼu, Jeová, mak sei koʼalia. Liafuan hotu neʼebé haʼu fó sai sei sai loos no la demora tan. Oh umakain neʼebé kontradór, iha imi-nia tempu, haʼu sei fó sai liafuan no kumpre neʼe.”’”
26 Jeová koʼalia tan ba haʼu, hodi dehan: 27 “Oan-mane husi ema, povu Izraél dehan nuneʼe: ‘Vizaun neʼebé nia haree sei la akontese agora, no nia fó-hatene liafuan kona-ba futuru neʼebé sei akontese iha tempu kleur.’ 28 Tan neʼe, hatete ba sira: ‘Jeová, Naʼi Ukun-Naʼin Boot Liu, dehan nuneʼe: “‘Haʼu sei la demora atu kumpre haʼu-nia liafuan hotu; haʼu sei kumpre buat hotu neʼebé haʼu fó sai’, Jeová, Naʼi Ukun-Naʼin Boot Liu dehan.”’”
13 Jeová koʼalia tan ba haʼu, hodi dehan: 2 “Oan-mane husi ema, fó sai haʼu-nia liafuan kontra profeta sira iha rai-Izraél, no koʼalia ba profeta sira neʼebé inventa sira-nia liafuan rasik: ‘Rona ba Jeová nia liafuan. 3 Jeová, Naʼi Ukun-Naʼin Boot Liu, dehan nuneʼe: “Susar ba profeta beik sira neʼebé koʼalia tuir deʼit sira-nia hanoin, maibé sira la haree vizaun ida! 4 Oh ema Izraél, imi-nia profeta sira sai ona hanesan asu-fuik iha fatin neʼebé rahun. 5 Imi sei la bá atu hadiʼa umakain Izraél nia moru fatuk nian neʼebé rahun ona, atu bele proteje Izraél iha Jeová nia loron funu nian.” 6 “Sira haree ona vizaun neʼebé la loos no fó sai lia-bosok, sira dehan: ‘Jeová nia liafuan mak neʼe’, maibé Jeová rasik la haruka sira, no sira hein katak sira-nia liafuan sei sai loos. 7 Imi haree ona vizaun neʼebé la loos no fó sai lia-bosok kona-ba futuru bainhira imi dehan: ‘Jeová nia liafuan mak neʼe’, maibé haʼu la fó sai buat ida ba imi.”’
8 “‘Tan neʼe, Jeová, Naʼi Ukun-Naʼin Boot Liu, dehan: “‘Haʼu sei kontra imi tanba imi fó sai ona lia-bosok no haree ona vizaun neʼebé la loos’, Jeová, Naʼi Ukun-Naʼin Boot Liu, dehan.” 9 Haʼu-nia liman sei kontra profeta sira neʼebé haree vizaun la loos no fó sai lia-bosok. Sira sei la sai parte tan ba povu neʼebé haʼu hadomi; no sira-nia naran sei la hakerek tan iha lista hamutuk ho umakain Izraél; no mós sira sei la fila fali ba rai-Izraél; nuneʼe imi sei hatene duni katak haʼu mak Jeová, Naʼi Ukun-Naʼin Boot Liu. 10 Buat hotu neʼe akontese tanba sira lori haʼu-nia povu laʼo sala dalan, hodi dehan: “Iha dame!” maski la iha dame. No bainhira ema harii didin neʼebé la metin, sira reboka ida-neʼe.’
11 “Fó-hatene ba sira neʼebé reboka didin katak didin neʼe sei monu. Udan boot sei tun, udan jelu sei tun, no anin boot sei harahun didin neʼe. 12 Bainhira didin monu, ema sei husu imi: ‘Buat neʼebé imi reboka iha neʼebé?’
13 “Tan neʼe, Jeová, Naʼi Ukun-Naʼin Boot Liu, dehan: ‘Ho haʼu-nia hirus haʼu sei hamosu anin boot, ho laran-nakali haʼu hamosu udan boot, no ho hirus makaʼas haʼu hamosu udan jelu. 14 Haʼu sei harahun didin neʼebé imi reboka ona no halo neʼe uut toʼo rai, no hela deʼit didin hun. Bainhira sidade neʼe monu, imi sei mate iha sidade laran; nuneʼe imi sei hatene duni katak haʼu mak Jeová.’
15 “‘Bainhira haʼu hasai hotu haʼu-nia hirus ba didin neʼe no ba sira neʼebé reboka didin neʼe, haʼu sei dehan ba imi: “Didin la iha tan, no sira neʼebé reboka didin la iha tan. 16 Izraél nia profeta sira la iha tan. Sira mak profeta neʼebé fó sai nanis liafuan kona-ba Jeruzalein no haree vizaun kona-ba dame iha sidade neʼe, maski la iha dame,”’ Jeová, Naʼi Ukun-Naʼin Boot Liu, dehan.
17 “Oh oan-mane husi ema, ó tenke fó sai haʼu-nia liafuan kontra ó-nia povu nia oan-feto sira neʼebé koʼalia nuʼudar profeta hodi inventa sira-nia liafuan rasik. 18 Koʼalia ba sira: “Jeová, Naʼi Ukun-Naʼin Boot Liu, dehan nuneʼe: “Susar ba feto sira neʼebé suku fita hamutuk atu ema kesi iha sira-nia liman no halo hena medida oioin atu ema taka sira-nia ulun hodi lasu ema seluk! Imi kasa haʼu-nia povu nia moris no imi hanoin katak imi bele salva imi-nia moris ka? 19 Imi hamoe haʼu iha haʼu-nia povu nia leet tan deʼit sevada uitoan no paun rahun. Imi oho ema neʼebé la merese mate no husik moris ema neʼebé la merese moris, imi halo neʼe hodi bosok haʼu-nia povu neʼebé rona ba imi-nia lia-bosok.”’
20 “Tan neʼe, Jeová, Naʼi Ukun-Naʼin Boot Liu, dehan: ‘Oh feto sira, haʼu sei kontra imi-nia fita sira neʼebé imi uza atu kasa povu hanesan sira mak manu, no haʼu sei dada kotu tiha fita husi imi-nia liman no halo livre ema neʼebé imi kasa hanesan manu. 21 Haʼu sei lees hena neʼebé taka imi-nia ulun no salva haʼu-nia povu husi imi-nia liman, no sira sei la sai tan buat neʼebé imi koko atu lasu; nuneʼe imi sei hatene duni katak haʼu mak Jeová. 22 Imi halo ema laran-loos sai triste tanba imi-nia lia-bosok maski haʼu lakohi halo sira neon-susar, no imi fó kbiit ba ema aat, atu nuneʼe sira la bele hasees an husi sira-nia sala hodi bele kontinua moris. 23 Tan neʼe, imi feto sira sei la haree tan vizaun neʼebé la loos no la siʼik tan futuru; no haʼu sei salva haʼu-nia povu husi imi-nia liman, nuneʼe imi sei hatene duni katak haʼu mak Jeová.’”
14 Izraél nia katuas balu mai no tuur iha haʼu-nia oin. 2 Tuirmai Jeová koʼalia ba haʼu, hodi dehan: 3 “Oan-mane husi ema, mane sira-neʼe deside ona atu halo tuir sira-nia estátua neʼebé haʼu hakribi, no sira tau ona fatuk sidi nian hodi lori povu atu halo sala. Entaun haʼu tenke rona ba sira ka? 4 Agora koʼalia ho sira no hatete ba sira: ‘Jeová, Naʼi Ukun-Naʼin Boot Liu, dehan nuneʼe: “Se ema Izraél ida deside ona atu halo tuir estátua sira neʼebé haʼu hakribi no tau ona fatuk sidi nian hodi lori povu atu halo sala no nia mai atu husu matadalan husi profeta ida, haʼu, Jeová, sei fó kastigu ba nia tanba ninia estátua barak neʼebé haʼu hakribi. 5 Haʼu sei halo umakain Izraél sente taʼuk iha laran tanba sira hotu hasees an ona husi haʼu no halo tuir fali estátua sira neʼebé haʼu hakribi.”’
6 “Entaun koʼalia ba umakain Izraél: ‘Jeová, Naʼi Ukun-Naʼin Boot Liu, dehan nuneʼe: “Fila fali mai no hasees an husi imi-nia estátua neʼebé haʼu hakribi no husik imi-nia hahalok foʼer hotu. 7 Tanba se ema Izraél ida ka ema estranjeiru neʼebé hela iha rai-Izraél nia leet fila kotuk ba haʼu no deside ona atu halo tuir estátua neʼebé haʼu hakribi no tau fatuk sidi nian hodi lori povu atu halo sala no nia mai atu husu matadalan husi haʼu-nia profeta ida, haʼu, Jeová, haʼu rasik sei hatán ba nia. 8 Haʼu sei kontra nia no halo nia sai nuʼudar avizu no lia-dadolin ida, no haʼu sei halakon nia husi haʼu-nia povu nia leet; no imi sei hatene duni katak haʼu mak Jeová.”’
9 “‘Maibé se profeta hatán ba povu neʼe ho liafuan bosok, haʼu sei lolo liman kontra nia no halakon nia husi haʼu-nia povu Izraél nia leet. Profeta neʼe koʼalia bosok tanba haʼu, Jeová, mak lohi profeta neʼe. 10 Sira sei lori todan ba sira-nia sala rasik. Ema neʼebé husu matadalan ba profeta sei hetan sala neʼebé hanesan ho profeta neʼe. 11 Nuneʼe umakain Izraél sei la fila kotuk tan ba haʼu no la hafoʼer tan sira-nia an ho sira-nia hahalok sala hotu. No sira sei sai haʼu-nia povu, no haʼu sei sai sira-nia Maromak,’ Jeová, Naʼi Ukun-Naʼin Boot Liu, dehan.”
12 Jeová koʼalia tan ba haʼu, hodi dehan:
13 “Oan-mane husi ema, se nasaun ida halo sala hasoru haʼu hodi la hatudu laran-metin, haʼu sei lolo liman kontra nasaun neʼe no halakon ninia ai-han, no haʼu sei hamosu rai-hamlaha iha rai neʼe no halakon tiha ema no animál sira iha laran.” 14 “Jeová, Naʼi Ukun-Naʼin Boot Liu, dehan: ‘Se karik Noé, Daniel, no Job hela iha rai neʼe, sira naʼin-tolu sei salva deʼit sira-nia an rasik tanba sira-nia hahalok loos.’”
15 “‘Ka se karik haʼu haruka animál fuik laʼo liu rai neʼe, haʼu sei husik sira oho ema no halo rai neʼe sai fuik toʼo la iha tan ema neʼebé liu tanba animál fuik sira-neʼe, 16 haʼu jura hodi haʼu-nia moris rasik, maski mane naʼin-tolu neʼe hela iha rai neʼe, sira mós sei la salva sira-nia oan-mane ka oan-feto; sira sei salva deʼit sira-nia an rasik, no rai neʼe sei sai mamuk,’ Jeová, Naʼi Ukun-Naʼin Boot Liu, dehan.”
17 “‘Ka se karik haʼu lori surik kontra rai neʼe no dehan: “Husik surik ida liu rai neʼe,” no halakon ema ho animál, 18 haʼu jura hodi haʼu-nia moris rasik, maski mane naʼin-tolu neʼe hela iha rai neʼe, sira mós sei la salva sira-nia oan-mane no oan-feto; sira sei salva deʼit sira-nia an rasik,’ Jeová, Naʼi Ukun-Naʼin Boot Liu, dehan.”
19 “‘Ka se karik haʼu hamosu moras iha rai neʼe no fakar sai haʼu-nia hirus ba rai neʼe hodi oho ema no animál, 20 haʼu jura hodi haʼu-nia moris rasik, maski Noé, Daniel, no Job hela iha rai neʼe, sira mós sei la salva sira-nia oan-mane no oan-feto; sira sei salva deʼit sira-nia an rasik tanba sira-nia hahalok loos,’ Jeová, Naʼi Ukun-Naʼin Boot Liu, dehan.”
21 “Jeová, Naʼi Ukun-Naʼin Boot Liu, dehan nuneʼe: ‘Buat hotu neʼe sei akontese bainhira haʼu lori surik, rai-hamlaha, animál fuik neʼebé siʼak, no moras hodi fakar sai haʼu-nia kastigu haat neʼe ba Jeruzalein atu halakon ema no animál husi sidade neʼe. 22 Maibé haʼu sei salva no lori sai oan-mane no oan-feto balu. Sira sei laʼo ba imi, no bainhira imi haree sira-nia hahalok sira, imi sei sente kmaan fali maski imi sente triste tanba haʼu lori susar ba Jeruzalein no tanba haʼu halo buat oioin ba sidade neʼe.’”
23 “Jeová, Naʼi Ukun-Naʼin Boot Liu, dehan: ‘Sira sei fó kmaan ba imi bainhira imi haree sira-nia hahalok sira, no imi sei hatene duni katak haʼu iha razaun neʼebé loos atu halo buat neʼebé haʼu halo ona ba sidade neʼe.’”
15 Jeová koʼalia tan ba haʼu, hodi dehan: 2 “Oan-mane husi ema, oinsá mak uvas kain la hanesan ho ai-sanak sira seluk husi ai-hun iha ai-laran? 3 Ema bele uza uvas kain atu halo serbisu ruma ka lae? Ema bele uza uvas kain atu halo pregu hodi tara sasán sira ka lae? 4 Haree bá! Ema soe uvas kain ba ahi hodi sunu, no ahi han ninia rohan rua no halo mutuk ninia klaran. Se nuneʼe ema bele uza atu halo serbisu ruma ka lae? 5 Maski uvas kain neʼe mak tomak hela, maibé ema la bele uza neʼe ba buat ida. Satán se ahi han no halo mutuk ona, ema sei la uza ba buat ida!”
6 “Tan neʼe, Jeová, Naʼi Ukun-Naʼin Boot Liu, dehan nuneʼe: ‘Hanesan uvas kain iha ai sira seluk nia leet iha ai-laran, neʼebé haʼu fó ba ema atu sunu iha ahi, nuneʼe mós haʼu sei halo ba ema iha Jeruzalein. 7 Haʼu kontra ona sira. Maski sira halai sees husi ahi, maibé ahi sei han sira. No imi sei hatene duni katak haʼu mak Jeová bainhira haʼu kontra sira.’”
8 “Jeová, Naʼi Ukun-Naʼin Boot Liu, dehan: ‘Haʼu sei halo rai neʼe sai mamuk no fuik tanba sira la laran-metin ba haʼu.’”
16 Jeová koʼalia tan ba haʼu, hodi dehan: 2 “Oan-mane husi ema, fó sai ba Jeruzalein kona-ba ninia hahalok foʼer sira. 3 Ó tenke dehan: ‘Jeová, Naʼi Ukun-Naʼin Boot Liu, dehan nuneʼe ba Jeruzalein: “Ó-nia beiʼala no ó moris iha ema Kanán nia rai. Ó-nia aman mak ema Amoreu, no ó-nia inan mak ema Hetes. 4 Iha loron neʼebé ó moris mai, ó-nia husar-talin seidauk koʼa, ema ida seidauk fó-hariis ó, ema seidauk kose masin ba ó, no seidauk falun ó ho hena. 5 La iha ema ida mak hanoin ó hodi halo buat sira-neʼe. La iha ema ida mak hatudu laran-sadiʼa ba ó. Maibé, ema soe ó ba rai-luan tanba sira odi ó husi loron neʼebé ó moris mai.
6 “‘“Bainhira haʼu laʼo liu, haʼu haree ó tebe an hela iha raan laran, no nuʼudar ó latan iha ó-nia raan laran, haʼu dehan: ‘Kontinua moris bá!’ Sin, haʼu dehan ba ó neʼebé latan iha raan laran: ‘Kontinua moris bá!’ 7 Haʼu halo ó sai ema barak hanesan ai-horis neʼebé buras iha toʼos. Ó sai boot no aas, no komesa hafurak an ho sasán murak sira neʼebé diʼak liu. Ó-nia susun moris ona, no ó-nia fuuk sai mahar; maibé ó sei isin-tanan nafatin no molik.”’
8 “Jeová, Naʼi Ukun-Naʼin Boot Liu, dehan: ‘Bainhira haʼu laʼo liu no haʼu haree katak ó-nia idade toʼo ona atu hatudu domin. Entaun haʼu taka haʼu-nia hena ba ó no taka ó-nia isin-tanan. Haʼu jura no halo aliansa ho ó. Nuneʼe ó sai haʼu-nian. 9 Liután neʼe, haʼu fó-hariis ó no hamoos ó-nia raan no kose mina ba ó. 10 Tuirmai haʼu fó hatais ó ho hena neʼebé borda ho didiʼak no fó sandálias diʼak husi animál kulit no falun ó ho hena-liñu neʼebé diʼak, no haʼu taka ó ho hena sira neʼebé karun. 11 Haʼu hafurak ó ho sasán murak oioin no tau kelu iha ó-nia liman no tara korrente iha ó-nia kakorok. 12 Haʼu mós tau brinkus iha ó-nia inus no tilun, no tau koroa furak iha ó-nia ulun. 13 Ó kontinua hafurak ó-nia an ho osan-mean no osan-mutin. Ó-nia roupa sira halo husi hena-liñu neʼebé diʼak, hena neʼebé karun, no hena neʼebé borda ho didiʼak. Ó-nia ai-han mak trigu diʼak, bani-been, no mina. Ó sai bonita tebes, no haʼu haree katak ó merese ona atu sai liurai-feto.’”
14 “Jeová, Naʼi Ukun-Naʼin Boot, dehan: ‘Nasaun sira komesa hatene ó-nia naran-boot tanba ó-nia bonita, neʼe tanba haʼu tau haʼu-nia glória ba ó.’”
15 “‘Maibé ó komesa tau fiar ba ó-nia bonita, no ó sai feto-aat tanba ó-nia naran-boot. Ó halo sala foʼer ho mane hotu neʼebé laʼo liu, no ó entrega ó-nia bonita ba sira. 16 Ó foti ó-nia hena balu no enfeita ó-nia fatin aas sira neʼebé ó halo sala foʼer. Tuir loloos, hahalok sira hanesan neʼe la bele akontese, no ó labele halo hahalok sira-neʼe. 17 Ó mós foti sasán murak neʼebé uluk haʼu fó ba ó, neʼebé halo husi osan-mean no osan-mutin, no ó uza buat sira-neʼe hodi halo estátua sira hanesan mane no ó halo sala foʼer ho sira. 18 Ó foti hena neʼebé borda ho didiʼak hodi tau ba estátua sira-neʼe, no ó uza haʼu-nia mina no insensu hodi hasaʼe sakrifísiu ba sira. 19 Paun neʼebé haʼu fó ona ba ó atu han, neʼebé halo husi trigu diʼak, mina, no bani-been, ó mós hasaʼe neʼe nuʼudar sakrifísiu morin hodi halo sira-nia laran kontente. Neʼe mak buat neʼebé ó halo ona’, Jeová, Naʼi Ukun-Naʼin Boot Liu, dehan.”
20 “‘Ó mós foti ó-nia oan-mane no oan-feto sira neʼebé moris ba haʼu, no ó hasaʼe sira nuʼudar sakrifísiu ba estátua sira-neʼe. Ó-nia hahalok sala foʼer sira seidauk toʼo ka? 21 Ó oho haʼu-nia oan-mane sira, no ó hasaʼe sira nuʼudar sakrifísiu ba estátua sira-neʼe hodi sunu iha ahi. 22 Bainhira ó halo daudaun ó-nia hahalok foʼer sira no halo sala foʼer, ó la hanoin-hetan tempu neʼebé ó sei kiʼik bainhira ó isin-tanan no molik, no tebe an hela iha raan laran. 23 Susar sei kona ó tanba ó halo ona sala hotu neʼe’, Jeová, Naʼi Ukun-Naʼin Boot Liu, dehan. 24 ‘Ó harii fatin aas atu adora maromak falsu sira iha fatin públiku hotu. 25 Ó halo fatin aas sira iha fatin importante iha dalan hotu, no ó halo ona ó-nia bonita sai buat neʼebé haʼu hakribi tanba ó entrega ó-nia an ba mane hotu neʼebé laʼo liu, no ó aumenta liután ó-nia hahalok sala foʼer. 26 Ó faʼan an ba ema Ejitu nia oan-mane sira, sira mak ó-nia viziñu neʼebé kaan loos ó, no ó hakanek haʼu-nia laran ho ó-nia hahalok sala foʼer neʼebé barak loos. 27 Haʼu sei lolo liman kontra ó no hamenus ó-nia ai-han. Haʼu sei entrega ó ba feto sira neʼebé odi ó, atu nuneʼe sira halo ba ó tuir sira-nia hakarak. Feto sira-neʼe mak ema Filístia nia oan-feto sira, neʼebé hakfodak tanba ó-nia hahalok foʼer.
28 “‘Tanba ó nunka baruk, entaun ó faʼan an ba ema Asíria nia oan-mane sira, maibé bainhira ó halo tiha sala-foʼer ho sira, ó kontinua la sai baruk. 29 Nuneʼe ó kontinua aumenta tan ó-nia hahalok sala-foʼer ho ema Kaldeia sira no mós halo sala-foʼer iha negósiu-naʼin nia rai, maibé bainhira ó halo tiha ida-neʼe, ó la sai baruk nafatin.’ 30 Jeová, Naʼi Ukun-Naʼin Boot Liu, dehan: ‘Ó-nia laran aat tebes. Bainhira ó halo buat hotu neʼe, ó hatudu an hanesan feto-aat neʼebé la iha moe! 31 Maibé bainhira ó harii fatin aas atu adora maromak falsu iha fatin importante iha dalan hotu no iha fatin públiku hotu, ó la hanesan feto-aat seluk, tanba ó lakohi simu kolen. 32 Ó mak hanesan feen neʼebé halo relasaun ho ema seluk duké ho ninia laʼen rasik! 33 Baibain ema fó prezente ba feto-aat hotu, maibé ó deʼit mak feto neʼebé fó fali prezente ba mane hotu neʼebé kaan loos ó, no ó selu sira atu mai husi fatin oioin atu halo sala foʼer ho ó. 34 Ó la hanesan ho feto sira seluk neʼebé sai feto-aat. La iha ema ida mak halo sala foʼer hanesan ó halo! Ó mak selu ema, no sira la selu ó. Ó-nia hahalok la hanesan feto-aat sira seluk.’
35 “Tan neʼe, oh feto-aat, rona ba Jeová nia liafuan. 36 Jeová, Naʼi Ukun-Naʼin Boot Liu, dehan nuneʼe: ‘Tanba ó kaan loos ó-nia doben sira hotu, no hatudu ó-nia isin-tanan ba sira durante ó halo relasaun ho sira, no halo sala foʼer ho estátua foʼer hotu neʼebé haʼu hakribi, no ó mós hasaʼe tan ó-nia oan-mane sira-nia raan nuʼudar sakrifísiu ba estátua sira-neʼe, 37 entaun haʼu sei halibur ó-nia doben hotu neʼebé uluk ó fó ksolok. Haʼu sei halibur ema hotu neʼebé ó hadomi hamutuk ho ema neʼebé ó odi. Haʼu sei halibur sira hamutuk husi fatin hotu atu ataka ó no hatudu sai ó-nia isin-tanan hodi sira haree ó-nia isin-molik.
38 “‘No haʼu sei fó kastigu ó hanesan kastigu ba feen neʼebé halo sala foʼer no kastigu ba feto neʼebé oho ema, no haʼu sei oho ó ho hirus no laran-moras. 39 Haʼu sei entrega ó ba sira-nia liman, no sira sei sobu ó-nia fatin aas atu adora maromak falsu, no harahun ó-nia fatin aas sira; sira sei kolu ó-nia roupa no hasai tiha ó-nia sasán murak no husik ó isin-tanan no molik. 40 Sira sei lori ema-lubun atu kontra ó, sira sei tuda ó, no sira sei oho ó ho sira-nia surik. 41 Sira sei sunu ó-nia uma, no kumpre haʼu-nia desizaun ba ó iha feto barak nia oin; no haʼu sei hapara ó-nia hahalok nuʼudar feto-aat, no ó sei para atu selu ema. 42 Depois neʼe, haʼu sei la hirus tan, no haʼu sei la laran-nakali tan ba ó. Haʼu sei sai kalma no la sente laran-moras tan.’
43 “Jeová, Naʼi Ukun-Naʼin Boot Liu, dehan: ‘Tanba ó la hanoin-hetan tempu neʼebé ó sei kiʼik no ó halo haʼu sai hirus ho ó-nia hahalok sira-neʼe hotu, entaun haʼu sei halo ó lori todan ba ó-nia sala rasik, no ó sei la halo tan ó-nia hahalok aat no hahalok foʼer hotu.
44 “‘Haree bá! Ema hotu neʼebé uza lia-dadolin, sira sei temi lia-dadolin kona-ba ó, hodi dehan: “Inan no oan-feto hanesan deʼit!” 45 Ó hanesan deʼit ó-nia inan neʼebé hakribi ninia laʼen no ninia oan sira. Ó hanesan deʼit ó-nia biin no alin neʼebé hakribi sira-nia laʼen no sira-nia oan. Ó-nia inan mak ema Hetes, no ó-nia aman mak ema Amoreu.’”
46 “‘Ó-nia biin mak Samaria, neʼebé hela ho ninia oan-feto sira iha ó-nia parte norte, no ó-nia alin mak Sodoma, neʼebé hela ho ninia oan-feto sira iha ó-nia parte súl. 47 Ó laʼo tuir sira-nia dalan no halo tuir sira-nia hahalok foʼer sira, liután neʼe, iha tempu badak deʼit ó halo aat liu fali buat neʼebé sira halo.’ 48 Jeová, Naʼi Ukun-Naʼin Boot Liu, dehan: ‘Haʼu jura hodi haʼu-nia moris rasik, ó-nia alin Sodoma no ninia oan-feto sira la halo hahalok neʼebé ó no ó-nia oan-feto sira halo. 49 Haree bá! Ó-nia alin Sodoma nia sala mak tuirmai neʼe: Nia no ninia oan-feto sira halo an no sira iha ai-han barak no sira mós moris ho hakmatek hodi la hanoin barak; maibé sira la apoia ema neʼebé hetan terus no kiak. 50 Sira kontinua foti-an no halo hahalok foʼer sira iha haʼu-nia oin, tan neʼe haʼu tenke halakon sira.
51 “‘Nuneʼe mós ho Samaria, ninia sala la barak hanesan ó-nian. Ó kontinua aumenta tan ó-nia hahalok foʼer liu fali sira, toʼo ó-nia biin no alin haree hanesan fali ema loos tanba ó-nia hahalok foʼer sira hotu. 52 Ó tenke lori moe tanba ó apoia ó-nia biin no alin nia hahalok. Tanba ó-nia sala mak aat liu fali sira-nian, entaun sira mak ema loos liu fali ó. Tan neʼe agora, sai moe bá no lori ó-nia moe tanba ó halo sira sai ema loos liu fali ó.’
53 “‘Haʼu sei halibur fali Sodoma no ninia oan-feto sira neʼebé sai dadur, no halibur fali Samaria no ninia oan-feto sira neʼebé sai dadur; no hamutuk ho sira, haʼu mós sei halibur fali ó-nia ema dadur sira, 54 atu nuneʼe ó bele lori ó-nia moe; no ó sei sente moe tanba buat neʼebé ó halo ona atu fó kmaan ba sira. 55 Ó-nia alin Sodoma ho ninia oan-feto sira sei fila fali ba sira-nia moris uluk nian, no ó-nia biin Samaria ho ninia oan-feto sira sei fila fali ba sira-nia moris uluk nian, no ó ho ó-nia oan-feto sira sei fila fali ba ó-nia moris uluk nian. 56 Ó la temi kona-ba ó-nia alin Sodoma iha loron neʼebé ó sai foti an. 57 Iha tempu neʼebá haʼu seidauk hatudu sai ó-nia hahalok aat rasik. Agora Síria nia oan-feto no ninia viziñu sira hamoe ó, no Filístia nia oan-feto sira, katak sira hotu neʼebé haleʼu ó, fakar sai liafuan goza ba ó. 58 Ó sei lori todan ba ó-nia hahalok aat no hahalok foʼer sira’, Jeová dehan.”
59 “Jeová, Naʼi Ukun-Naʼin Boot Liu, dehan nuneʼe: ‘Haʼu sei halo ba ó tuir buat neʼebé ó halo ona, tanba ó hakribi ó-nia juramentu hodi kontra haʼu-nia aliansa.
60 Maibé haʼu rasik sei hanoin-hetan aliansa neʼebé haʼu halo ho ó iha tempu neʼebé ó sei joven, no haʼu sei halo aliansa neʼebé metin ho ó.
61 Ó sei hanoin-hetan ó-nia hahalok no sente moe bainhira ó simu ó-nia biin no alin, sira neʼebé boot liu ó no sira neʼebé kiʼik liu ó, no haʼu sei entrega sira ba ó nuʼudar ó-nia oan-feto, maibé neʼe laʼós tanba aliansa ho ó.’
62 “‘Haʼu rasik sei halo aliansa ho ó; no ó sei hatene duni katak haʼu mak Jeová. 63 Tuirmai bainhira haʼu halo dame ho ó maski ó halo ona sala hotu neʼe, ó sei hanoin-hetan neʼe no sente moe loos toʼo la bele loke ibun tanba ó-nia moe neʼe”, Jeová, Naʼi Ukun-Naʼin Boot Liu, dehan.”
17 Jeová koʼalia tan ba haʼu, hodi dehan: 2 “Oan-mane husi ema, konta ai-sasiʼik no fó sai ai-knanoik kona-ba umakain Izraél. 3 Ó tenke hatete: ‘Jeová, Naʼi Ukun-Naʼin Boot Liu, dehan nuneʼe: “Manu-makikit boot neʼebé iha liras boot no naruk, fulun mahar no kór oioin, mai toʼo Líbanu no kuʼu ai-dikin husi ai-sedru nia tutun. 4 Nia kuʼu ai-dikin husi ai-sedru tutun no lori ba negósiu-naʼin nia rai no kuda iha negósiu-naʼin nia sidade.
5 Tuirmai nia foti fini balu iha rai neʼe no kuda iha rai neʼebé bokur. Nia kuda neʼe besik bee hanesan ema kuda ai-salgueiru. 6 Fini neʼe moris no sai uvas neʼebé ninia tahan nani besik rai, no ninia abut sira moris iha okos. Nuneʼe nia sai uvas-hun neʼebé iha dikin no iha sanak sira.
7 “‘“No iha tan manu-makikit boot ida mai, nia iha liras boot no liras fulun mahar. Tuirmai uvas-hun neʼe lolo ninia abut ba manu neʼe, abut sira-neʼe nani dook husi fatin neʼebé nia moris bá, no uvas-hun neʼe lolo mós nia tahan ba manu neʼe atu manu neʼe bele rega uvas neʼe.
8 Tuir loloos, uvas-hun neʼe moris ona iha rai neʼebé bokur besik bee barak, atu nuneʼe bele iha dikin, fuan, no sai uvas-hun neʼebé boot.”’
9 “Ó tenke hatete: ‘Jeová, Naʼi Ukun-Naʼin Boot Liu, dehan nuneʼe: “Uvas-hun neʼe sei buras ka lae? Ema sei fokit sai nia no halo ninia fuan sira sai dodok no halo ninia dikin sai namlaek, loos ka lae? Uvas-hun neʼe sei sai maran loos, tan neʼe la presiza ema neʼebé forte ka ema-lubun atu fokit sai nia abut. 10 Maski kuda fali uvas-hun neʼe, maibé nia sei buras ka lae? Lae. Nia sei sai maran hotu bainhira anin huu husi parte leste. Nia sei sai maran iha fatin neʼebé nia moris bá.”’”
11 Jeová koʼalia tan ba haʼu, hodi dehan: 12 “Favór ida, koʼalia ba umakain neʼebé kontradór: ‘Imi la komprende buat sira-neʼe ka?’ Koʼalia ba sira: ‘Haree bá! Liurai Babilónia bá Jeruzalein no lori liurai iha sidade neʼe hamutuk ho ulun-naʼin sira fila ba Babilónia. 13 Liután neʼe, Liurai Babilónia hili liurai nia oan-mane ida no halo aliansa ho nia no haruka nia jura. Tuirmai nia lori sai mane naran-boot sira husi rai neʼe, 14 atu nuneʼe ukun neʼe sai folin-laek no la bele hamriik fali. Povu tenke halo tuir aliansa neʼe hodi ukun neʼe bele iha nafatin.
15 Maibé ikusmai liurai kontra hasoru nia hodi haruka ninia ema bá rai-Ejitu atu husu kuda no tropa barak husi ema Ejitu. Liurai neʼe sei hetan susesu ka lae? Ema neʼebé halo buat sira-neʼe bele halai husi kastigu ka lae? Se nia kontra ona aliansa neʼe, nia bele halai sees husi kastigu ka lae?’
16 “‘Jeová, Naʼi Ukun-Naʼin Boot Liu, dehan: “Haʼu jura hodi haʼu-nia moris rasik, nia sei mate iha Babilónia, fatin neʼebé liurai Babilónia halo nia sai nuʼudar liurai. Nia kontra ona ninia juramentu no la halo tuir ninia aliansa ho liurai Babilónia. 17 Bainhira inimigu ateru rai no harii moru atu ataka hodi halakon ema barak nia moris, Faraó nia tropa barak sei la ajuda nia iha funu.
18 Nia la kumpre juramentu no la halo tuir aliansa neʼe. Maski nia promete ona, maibé nia kontra hodi halo buat sira-neʼe. Nia sei la bele halai husi kastigu.”’
19 “‘Tan neʼe, Jeová, Naʼi Ukun-Naʼin Boot Liu, dehan nuneʼe: “Haʼu jura hodi haʼu-nia moris rasik, haʼu sei halo nia lori todan ba ninia sala tanba nia kontra haʼu-nia juramentu no la halo tuir haʼu-nia aliansa.
20 Haʼu sei soe haʼu-nia rede ba nia no nia sei tama iha rede laran. Haʼu sei lori nia ba Babilónia no tesi lia ba nia iha neʼebá tanba nia la hatudu laran-metin ba haʼu. 21 Ninia tropa hotu neʼebé halai sei mate ho surik, no sira neʼebé hela sei namkari ba fatin oioin. Tuirmai imi sei hatene duni katak haʼu, Jeová, mak fó sai liafuan sira-neʼe.”’
22 “‘Jeová, Naʼi Ukun-Naʼin Boot Liu, dehan nuneʼe: “Haʼu sei foti ai-dikin husi ai-sedru boot nia tutun no kuda. Sin, haʼu sei kuʼu ai-dikin husi ai-sedru nia tutun, no haʼu rasik sei kuda ida-neʼe iha foho aas neʼebé boot nia leten. 23 Haʼu sei kuda neʼe iha foho aas ida iha Izraél; ninia sanak sira sei moris, nia sei fó fuan no sai ai-sedru neʼebé boot. No manu oioin sei hela iha ninia okos no ai neʼe nia tahan sei fó mahon ba manu sira.
24 No ai-hun hotu iha rai-luan sei hatene duni katak haʼu, Jeová, mak tesi tiha ai-hun neʼebé aas no halo boot ai-hun neʼebé badak; haʼu halo maran ai-hun neʼebé matak no halo ai-hun neʼebé maran fó funan. Haʼu, Jeová, mak fó sai no haʼu sei kumpre ida-neʼe.”’”
18 Jeová koʼalia tan ba haʼu, hodi dehan: 2 “Imi-nia lia-dadolin neʼebé imi temi iha rai-Izraél katak sá? Imi dehan: ‘Aman mak han uvas-fuan neʼebé siin, maibé oan-mane sira-nia nia nehan mak sente siin.’
3 “Jeová, Naʼi Ukun-Naʼin Boot Liu, dehan: ‘Haʼu jura hodi haʼu-nia moris rasik, imi sei la kontinua tan atu temi lia-dadolin neʼe iha rai-Izraél. 4 Haree bá! Ema hotu nia moris mak haʼu-nian. Aman nia moris no mós oan nia moris mak haʼu-nian. Ema neʼebé halo sala, ema neʼe mak sei mate.
5 “‘Se mane ida laran-loos no halo buat neʼebé loos no tuir justisa; 6 nia la han ai-han neʼebé hasaʼe nuʼudar sakrifísiu ba maromak falsu sira iha foho leten; nia la hateke ba umakain Izraél nia estátua neʼebé haʼu hakribi; nia la halo sala foʼer ho ninia maluk nia feen ka la halo relasaun ho feto neʼebé menstruasaun hela; 7 nia la halo aat ba ema ida, maibé nia fó fali sasán neʼebé ema fó ba nia nuʼudar garantia atu debe osan; nia la naʼok husi ema ida, maibé nia fó ai-han ba ema neʼebé hamlaha no fó roupa ba ema neʼebé isin-tanan; 8 nia la husu osan-funan bainhira fó debe ka nia la buka atu manán osan-funan barak, maibé nia hanetik nia an atu la halo buat neʼebé la tuir justisa; nia tesi lia ho justisa entre ema ida ho ema seluk; 9 no nia kontinua halo tuir haʼu-nia ukun-fuan no kumpre haʼu-nia desizaun sira hodi hatudu laran-metin. Ema hanesan neʼe mak ema laran-loos no nia sei kontinua moris’, Jeová, Naʼi Ukun-Naʼin Boot Liu, dehan.
10 “‘Se ema neʼe iha oan-mane neʼebé naʼok ka oho ema ka halo buat tuirmai neʼe: 11 nia han ai-han neʼebé hasaʼe nuʼudar sakrifísiu ba maromak falsu sira iha foho leten, halo sala foʼer ho ninia maluk nia feen, maski ninia aman la halo buat sira-neʼe; 12 nia halo aat ba ema kiʼik no ema kiak, naʼok ema nia sasán, nia la fó fali sasán neʼebé ema fó ba nia nuʼudar garantia atu debe osan, nia hateke ba estátua sira neʼebé haʼu hakribi, nia halo hahalok foʼer, 13 nia husu osan-funan bainhira fó debe no buka atu manán osan-funan barak, entaun oan neʼe sei mate. Tanba nia halo hahalok aat sira-neʼe hotu neʼebé haʼu hakribi, entaun nia sei mate duni. Nia rasik tenke lori todan ba ninia sala.
14 “‘Se aman ida iha oan-mane neʼebé haree sala hotu neʼebé ninia aman halo, maibé nia la halo tuir ninia aman nia hahalok; 15 nia la han ai-han neʼebé hasaʼe nuʼudar sakrifísiu ba maromak falsu sira iha foho leten; nia la hateke ba umakain Izraél nia estátua neʼebé haʼu hakribi; nia la halo sala foʼer ho ninia maluk nia feen; 16 nia la halo aat ba ema ida; nia la hadau sasán neʼebé ema fó ba nia nuʼudar garantia atu debe osan; nia la naʼok ema nia sasán, maibé nia fó ai-han ba ema neʼebé hamlaha no fó roupa ba ema neʼebé isin-tanan; 17 nia la halo aat ba ema kiak; nia la husu osan-funan bainhira fó debe no la buka atu manán osan-funan barak; no nia halo tuir haʼu-nia ukun-fuan no kumpre haʼu-nia desizaun sira. Ema hanesan neʼe sei la mate tanba ninia aman nia sala. Ema neʼe sei kontinua moris. 18 Maibé nia aman tenke mate tanba nia halo sala hodi hamatak ema, naʼok husi ninia maluk, no halo hahalok aat iha ninia povu nia leet.
19 “‘Maibé imi sei husu: “Tansá mak oan neʼe la lori todan tanba ninia aman nia sala?” Oan neʼe sei kontinua moris tanba nia halo buat neʼebé loos no tuir justisa, no halo tuir haʼu-nia ukun-fuan hotu. 20 Ema neʼebé halo sala, ema neʼe mak sei mate. Oan ida sei la lori todan tanba ninia aman nia sala, no aman ida sei la lori todan tanba ninia oan nia sala. Ema laran-loos sei hetan kolen tanba ninia hahalok loos, no ema laran-aat sei hetan kastigu tanba ninia hahalok aat.
21 “‘Se ema aat ida husik tiha ninia hahalok aat hotu no halo tuir fali haʼu-nia ukun-fuan no halo buat neʼebé loos no tuir justisa, nia sei kontinua moris. Nia sei la mate. 22 Nia sei la simu kastigu ba ninia sala hotu neʼebé nia halo ona. Nia sei kontinua moris tanba nia halo buat neʼebé loos.’
23 “Jeová, Naʼi Ukun-Naʼin Boot Liu, dehan: ‘Haʼu la kontente bainhira ema aat ida mate. Haʼu-nia hakarak mak nia husik tiha ninia hahalok aat no kontinua moris.’
24 “‘Maibé se ema laran-loos ida husik tiha ninia hahalok loos no halo fali sala, no halo buat aat hotu neʼebé haʼu hakribi hodi tuir ema aat nia hahalok, entaun nia sei mate. Haʼu sei haluha ninia hahalok loos hotu neʼebé nia halo ona. Nia sei mate tanba nia la laran-metin no halo sala.
25 “‘Maibé imi sei dehan: “Jeová nia hahalok mak la tuir justisa.” Oh umakain Izraél, favór ida rona lai! Haʼu-nia hahalok sira tuir justisa. Imi-nia hahalok sira mak la tuir justisa.
26 “‘Se ema laran-loos ida husik tiha ninia hahalok loos no halo fali sala, no mate tanba ninia hahalok neʼe, entaun nia mate tanba ninia sala rasik.
27 “‘Se ema aat ida husik tiha ninia hahalok aat no komesa halo fali buat neʼebé loos no tuir justisa, nia sei salva nia moris rasik. 28 Bainhira nia hatene ona ninia sala no husik tiha sala hotu, nia sei kontinua moris. Nia sei la mate.
29 “‘Maibé umakain Izraél sei dehan: “Jeová nia hahalok mak la tuir justisa.” Oh umakain Izraél, haʼu-nia hahalok sira la tuir justisa ka? Imi-nia hahalok sira mak la tuir justisa, loos ka lae?’
30 “Jeová, Naʼi Ukun-Naʼin Boot Liu, dehan: ‘Oh umakain Izraél, haʼu sei tesi lia ba imi tuir imi ida-idak nia hahalok. Tan neʼe, arrepende an bá, no husik tiha imi-nia hahalok aat hotu, atu nuneʼe hahalok aat sira-neʼe la sai nuʼudar fatuk sidi nian neʼebé lori sala ba imi. 31 Oh umakain Izraél, husik tiha sala hotu neʼebé imi halo ona, no troka imi-nia laran no troka dalan neʼebé imi hanoin, tansá mak imi tenke mate?’
32 “Jeová, Naʼi Ukun-Naʼin Boot Liu, dehan: ‘Haʼu la kontente bainhira ema ida mate. Tan neʼe, arrepende an bá no kontinua moris.’”
19 “Ó tenke kanta knananuk triste nian ida kona-ba Izraél nia xefe sira, 2 hodi dehan:
‘Ó-nia inan mak saida? Leaun-inan iha leaun sira-nia leet.
Nia toba iha leaun forte sira-nia leet no haboot ninia oan sira.
3 Ninia oan ida sai boot, no sai leaun-aman neʼebé forte.
Nia aprende atu lees animál ba pedasuk,
Nia mós han ema.
4 Nasaun sira rona kona-ba nia no kaer nia iha rai-kuak neʼebé sira keʼe,
No sira tau kail ba nia inus hodi lori nia ba rai-Ejitu.
5 Leaun-inan neʼe hein no ikusmai hatene katak ninia oan la fila ona.
Entaun nia foti ninia oan seluk no halo ninia oan neʼe sai nuʼudar leaun-aman neʼebé forte.
6 Leaun-aman neʼe mós laʼo bá-mai iha leaun sira-nia leet. Sin, nia sai leaun-aman neʼebé forte.
Nia aprende oinsá atu lees animál ba pedasuk, no nia mós han ema.
7 Nia laʼo bá-mai besik ema nia uma aas sira neʼebé metin no harahun sidade sira,
Nuneʼe, rai neʼebé mamuk sai nakonu ho ninia lian.
8 Ema husi nasaun sira neʼebé haleʼu nia mai hodi soe sira-nia rede ba nia,
No sira kaer nia iha rai-kuak neʼebé sira keʼe.
9 Sira tau kail iha nia inus no hatama nia iha rede laran no sira lori nia ba liurai Babilónia.
Sira sulan nia, atu ema la bele rona tan ninia lian iha foho sira iha Izraél.
10 Ó-nia inan mak hanesan uvas-hun ida neʼebé kuda besik bee.
Uvas neʼe fó fuan no iha sanak barak tanba kuda besik bee barak.
11 Uvas-hun neʼe nia sanak sira mak toos, no bele uza atu halo liurai nia ai-tonka.
Uvas neʼe sai boot no aas liu ai-hun sira seluk,
No ema bele haree uvas-hun neʼe husi dook tanba aas loos no iha tahan barak.
12 Maibé Maromak fokit sai uvas-hun neʼe ho hirus no soe ba rai,
No anin husi parte leste halo maran ninia fuan sira.
Ninia sanak sira neʼebé toos tesi sai tiha no sai maran, no ahi han sanak sira-neʼe.
13 Agora uvas-hun neʼe kuda fali iha rai-fuik
Neʼebé la iha bee no maran-dekor.
14 Ahi lakan iha ninia sanak sira no han tiha ninia dikin no fuan sira,
No la iha tan ai-sanak toos neʼebé bele uza atu halo liurai nia ai-tonka.
“‘Neʼe mak knananuk triste nian, no ema sei kanta knananuk triste neʼe.’”
20 Iha loron sanulu, fulan-lima, tinan hitu, Izraél nia katuas balu mai no tuur iha haʼu-nia oin hodi husu matadalan husi Jeová. 2 Tuirmai Jeová koʼalia ba haʼu, hodi dehan: 3 “Oan-mane husi ema, fó-hatene ba Izraél nia katuas sira: ‘Jeová, Naʼi Ukun-Naʼin Boot Liu, dehan nuneʼe: “Imi mai atu husu matadalan husi haʼu ka? ‘Haʼu jura hodi haʼu-nia moris rasik, haʼu sei la hatán ba imi’, Jeová, Naʼi Ukun-Naʼin Boot Liu dehan.”’
4 “Oh oan-mane husi ema, ó prontu atu tesi lia ba sira ka lae? Ó tenke tesi lia ba sira. Fó sai ba sira kona-ba hahalok foʼer neʼebé sira-nia beiʼala halo ona. 5 Fó sai ba sira: ‘Jeová, Naʼi Ukun-Naʼin Boot Liu, dehan nuneʼe: “Iha loron neʼebé haʼu hili Izraél, haʼu mós jura ba umakain Jacob nia bei-oan sira, no haʼu fó-hatene haʼu-nia an ba sira iha rai-Ejitu. Sin, haʼu jura ba sira no dehan: ‘Haʼu mak Jeová, imi-nia Maromak.’ 6 Iha loron neʼebá haʼu jura katak haʼu sei lori sira sai husi rai-Ejitu hodi bá rai neʼebé haʼu buka ona atu fó ba sira, rai neʼebé iha susubeen no bani-been barak. Rai neʼe mak furak liu rai sira seluk hotu. 7 Tuirmai haʼu dehan ba sira: ‘Imi ida-idak tenke soe tiha buat sira neʼebé haʼu hakribi neʼebé iha imi-nia oin; keta hafoʼer imi-nia an ho estátua sira husi rai-Ejitu neʼebé haʼu hakribi. Haʼu mak Jeová, imi-nia Maromak.’
8 “‘“Maibé sira kontra haʼu no lakohi rona ba haʼu. Sira la soe estátua sira neʼebé haʼu hakribi neʼebé iha sira-nia oin, no sira lakohi husik buat foʼer sira husi rai-Ejitu. Entaun haʼu promete atu fakar sai haʼu-nia laran-nakali ba sira no hasai hotu haʼu-nia hirus hasoru sira iha rai-Ejitu. 9 Maibé haʼu la halakon sira tanba haʼu-nia naran, atu nuneʼe ema labele hafoʼer haʼu-nia naran iha nasaun sira neʼebé sira hela bá. Tanba haʼu fó-hatene ona haʼu-nia an ba sira iha nasaun sira-neʼe nia oin bainhira haʼu lori sira sai husi rai-Ejitu. 10 Nuneʼe haʼu lori sira sai husi rai-Ejitu, no dirije sira hodi laʼo ba rai-fuik.
11 “‘“Tuirmai haʼu fó haʼu-nia ukun-fuan no haʼu-nia lei ba sira, atu nuneʼe ema neʼebé halo tuir bele moris liuhusi buat sira-neʼe. 12 Haʼu mós haruka sira selebra haʼu-nia loron Sábadu nuʼudar sinál entre haʼu ho sira, atu nuneʼe sira bele hatene katak haʼu, Jeová, mak halo santu sira.
13 “‘“Maibé umakain Izraél kontra haʼu iha rai-fuik. Sira la halo tuir haʼu-nia ukun-fuan no lei sira, neʼebé bele lori moris bainhira sira halo tuir buat sira-neʼe. Sira hafoʼer haʼu-nia loron Sábadu. Entaun haʼu promete katak haʼu sei fakar sai haʼu-nia laran-nakali ba sira iha rai-fuik hodi halakon sira. 14 Maibé haʼu la halakon sira tanba haʼu-nia naran, atu nuneʼe ema labele hafoʼer haʼu-nia naran iha nasaun sira-nia leet, katak nasaun sira neʼebé haree haʼu lori sai sira. 15 Haʼu mós jura ba sira iha rai-fuik katak haʼu sei la lori sira bá rai neʼebé haʼu atu fó ba sira, neʼebé iha susubeen no bani-been barak, rai neʼebé furak liu rai sira seluk hotu. 16 Haʼu halo nuneʼe tanba sira la halo tuir haʼu-nia ukun-fuan no lei sira, no sira hafoʼer haʼu-nia loron Sábadu, tanba sira adora estátua sira neʼebé haʼu hakribi.
17 “‘“Maibé haʼu sente hanoin ba sira, no haʼu la oho sira; haʼu la halakon sira iha rai-fuik. 18 Haʼu koʼalia ba sira-nia oan-mane sira iha rai-fuik, hodi dehan: ‘Keta halo tuir imi-nia beiʼala nia lei, keta kumpre sira-nia desizaun no keta hafoʼer imi-nia an ho sira-nia estátua neʼebé haʼu hakribi. 19 Haʼu mak Jeová, imi-nia Maromak. Imi tenke halo tuir haʼu-nia ukun-fuan no lei sira, no kumpre buat sira-neʼe. 20 No imi tenke selebra haʼu-nia loron Sábadu, no neʼe sei sai nuʼudar sinál entre haʼu ho imi atu imi bele hatene katak haʼu mak Jeová, imi-nia Maromak.’
21 “‘“Maibé oan-mane sira-neʼe komesa kontra haʼu. Sira la halo tuir haʼu-nia ukun-fuan no lei sira, neʼebé bele lori moris bainhira sira halo tuir buat sira-neʼe. Sira hafoʼer haʼu-nia loron Sábadu. Entaun haʼu promete katak haʼu sei fakar sai haʼu-nia laran-nakali no hasai hotu haʼu-nia hirus hasoru sira iha rai-fuik. 22 Maibé haʼu kontrola an no haʼu la halakon sira tanba haʼu-nia naran, atu nuneʼe ema labele hafoʼer haʼu-nia naran iha nasaun sira-nia leet, katak nasaun sira neʼebé haree haʼu lori sai sira. 23 Haʼu mós jura ba sira iha rai-fuik katak haʼu sei halo sira namkari iha nasaun sira-nia leet no iha rai oioin, 24 tanba sira la halo tuir haʼu-nia ukun-fuan no lei sira, no sira hafoʼer haʼu-nia loron Sábadu, no sira adora sira-nia beiʼala nia estátua sira neʼebé haʼu hakribi. 25 Haʼu mós husik sira halo tuir ukun-fuan neʼebé la diʼak no lei neʼebé la lori sira ba moris. 26 Haʼu husik sira sai foʼer tanba sakrifísiu neʼebé sira hasaʼe hodi sunu sira-nia oan primeiru. Tanba sira-nia hahalok aat mak haʼu fó kastigu ba sira hodi sira bele hatene katak haʼu mak Jeová.”’
27 “Tan neʼe, oh oan-mane husi ema, koʼalia ba umakain Izraél no fó sai ba sira: ‘Jeová, Naʼi Ukun-Naʼin Boot Liu, dehan nuneʼe: “Iha dalan hanesan neʼe mós, imi-nia beiʼala sira koʼalia aat haʼu bainhira sira kontra haʼu hodi la hatudu laran-metin. 28 Haʼu lori sira bá rai neʼebé haʼu jura ona atu fó ba sira. Bainhira sira haree foho-oan sira no ai-hun buras sira, sira komesa hasaʼe sakrifísiu neʼebé halo haʼu-nia laran-kanek. Sira sunu sira-nia sakrifísiu hodi halo suar morin atu halo sira-nia maromak kontente no fakar sira-nia sakrifísiu hemu nian iha neʼebá. 29 Entaun haʼu husu ba sira: ‘Imi bá beibeik fatin aas atu halo saida? (Imi hanaran fatin neʼe nuʼudar Fatin Aas toʼo ohin loron.)’”’
30 “Agora koʼalia ba umakain Izraél, hodi dehan: ‘Jeová, Naʼi Ukun-Naʼin Boot Liu, dehan nuneʼe: “Imi hafoʼer imi-nia an hanesan imi-nia beiʼala sira halo ka? Imi la laran-metin ba haʼu hodi adora imi-nia beiʼala nia estátua sira neʼebé haʼu hakribi. 31 No imi sei kontinua hafoʼer imi-nia an toʼo ohin loron ka? Imi sunu imi-nia oan hodi hasaʼe sakrifísiu ba estátua hotu neʼebé haʼu hakribi. Entaun, oh umakain Izraél, haʼu mós tenke hatán ba imi iha tempu hanesan neʼe ka?”’
“Jeová, Naʼi Ukun-Naʼin Boot Liu, dehan: ‘Haʼu jura hodi haʼu-nia moris rasik, haʼu sei la hatán bainhira imi husu matadalan ba haʼu. 32 No imi hanoin, hodi dehan: “Mai ita halo hanesan nasaun sira seluk, hanesan família sira iha rai seluk, neʼebé adora fatuk no ai.” Imi-nia hanoin neʼe sei nunka akontese.’”
33 “Jeová, Naʼi Ukun-Naʼin Boot Liu, dehan: ‘Haʼu jura hodi haʼu-nia moris rasik, haʼu sei ukun nuʼudar imi-nia liurai ho kbiit no ho liman neʼebé forte, no ho laran-nakali. 34 Haʼu sei lori imi sai husi nasaun sira-nia leet no halibur imi hamutuk husi rai sira neʼebé imi namkari bá. Haʼu sei halo neʼe ho kbiit, no ho liman neʼebé forte, no ho laran-nakali. 35 Haʼu sei lori imi ba nasaun sira-nia rai-fuik no iha neʼebá haʼu sei tesi lia ba imi oin ba oin.
36 “Jeová, Naʼi Ukun-Naʼin Boot Liu, dehan: ‘Hanesan haʼu tesi lia ba imi-nia beiʼala sira iha rai-fuik iha rai-Ejitu, nuneʼe mós haʼu sei tesi lia ba imi. 37 Haʼu sei haruka imi laʼo iha bibi-atan nia ai-tonka okos no kesi imi ba aliansa ida. 38 Maibé haʼu sei halakon tiha ema sira neʼebé halo sala hasoru haʼu no kontradór husi imi-nia leet. Tanba haʼu sei lori sira sai husi rai neʼebé sira hela nuʼudar ema estranjeiru, maibé sira sei la tama ba rai-Izraél; nuneʼe imi sei hatene duni katak haʼu mak Jeová.’
39 “Oh umakain Izraél, Jeová, Naʼi Ukun-Naʼin Boot Liu, dehan nuneʼe: ‘Imi ida-idak bá hodi adora estátua sira neʼebé haʼu hakribi. Maibé depois neʼe se imi la rona ba haʼu, imi sei lori todan ba imi-nia sala. Tuirmai imi sei la hafoʼer tan haʼu-nia naran neʼebé santu liuhusi imi-nia sakrifísiu sira no estátua sira neʼebé haʼu hakribi.’
40 “Jeová, Naʼi Ukun-Naʼin Boot Liu dehan: ‘Tanba umakain Izraél tomak sei serbí haʼu iha haʼu-nia foho santu, iha foho aas ida iha rai-Izraél. Haʼu sei sente kontente ho sira iha neʼebá, no haʼu sei husu imi fó kontribuisaun no hasaʼe sakrifísiu neʼebé diʼak liu, katak imi-nia parte santu hotu. 41 Tanba imi-nia sakrifísiu morin neʼebé halo haʼu-nia laran kontente, mak haʼu sei sente haksolok bainhira haʼu lori imi sai husi nasaun sira-nia leet no halibur imi hamutuk husi rai sira neʼebé imi namkari bá; no haʼu sei hatudu hahalok santu iha imi-nia leet iha nasaun sira-nia oin.’
42 “‘Imi sei hatene duni katak haʼu mak Jeová bainhira haʼu lori imi ba rai-Izraél, rai neʼebé haʼu jura ona atu fó ba imi-nia beiʼala sira. 43 Iha neʼebá imi sei hanoin-hetan imi-nia moris no hahalok hotu neʼebé hafoʼer imi, no imi sei hakribi imi-nia an tanba hahalok aat hotu neʼebé imi halo ona. 44 Depois neʼe, imi sei hatene duni katak haʼu mak Jeová bainhira haʼu salva imi tanba haʼu-nia naran. Oh umakain Izraél, haʼu sei la halo ba imi tuir imi-nia hahalok aat ka tuir imi-nia hahalok foʼer’, Jeová, Naʼi Ukun-Naʼin Boot Liu, dehan.”
45 Jeová koʼalia tan ba haʼu, hodi dehan: 46 “Oan-mane husi ema, fila oin ba parte súl no fó avizu ba parte súl, no fó sai haʼu-nia liafuan kontra ai-laran iha área parte súl. 47 Hatete ba ai-laran iha parte súl: ‘Rona ba Jeová nia liafuan. Jeová, Naʼi Ukun-Naʼin Boot Liu, dehan nuneʼe: “Haʼu halo lakan daudaun ahi atu sunu ó, no ahi neʼe sei han hotu ai matak no ai maran sira neʼebé iha ó. Ahi lakan neʼe sei la bele hamate, no ema hotu nia oin sei mutuk tanba ahi neʼe, husi súl toʼo norte. 48 No ema hotu sei haree katak haʼu, Jeová, mak sunu ai-laran neʼe, no ahi neʼe sei la bele hamate.”’”
49 No haʼu dehan: “Oh Jeová, Naʼi Ukun-Naʼin Boot Liu, susar bá haʼu! Sira koʼalia kona-ba haʼu, hodi dehan: ‘Nia sempre konta deʼit lia-dadolin, loos ka lae?’”
21 Jeová koʼalia tan ba haʼu, hodi dehan: 2 “Oan-mane husi ema, fila oin hodi hateke ba Jeruzalein, no fó avizu kontra fatin santu sira, no fó sai haʼu-nia liafuan kontra rai-Izraél.
3 Hatete ba rai-Izraél: ‘Jeová dehan nuneʼe: “Haʼu sei kontra ó. Haʼu sei losu sai haʼu-nia surik husi ninia fatin no oho tiha ema laran-loos no ema aat.
4 Haʼu sei losu haʼu-nia surik husi ninia fatin hodi kontra hasoru ema hotu, husi súl toʼo norte. Haʼu sei oho tiha ema laran-loos no ema aat. 5 Ema hotu sei hatene duni katak haʼu, Jeová, haʼu mak losu sai surik husi ninia fatin. Haʼu sei la hatama fali surik neʼe.”’
6 “Oan-mane husi ema, sai triste bá ho nakdedar, sin, halerik bá iha sira-nia oin. 7 No se sira husu ó: ‘Tansá mak ó halerik?’ Ó tenke dehan: ‘Tanba lia-menon ida.’ Lia-menon neʼe sei sai loos duni, no ema hotu nia laran sei sai taʼuk no sira-nia liman sei sai fraku no ema hotu sei neon-susar no sira hotu nia ain-tuur sei turuk ho bee. ‘Haree bá! Susar neʼe sei akontese duni’, Jeová, Naʼi Ukun-Naʼin Boot Liu, dehan.”
8 Jeová koʼalia tan ba haʼu, hodi dehan: 9 “Oan-mane husi ema, fó sai haʼu-nia liafuan, no dehan: ‘Jeová dehan nuneʼe: “Haree surik ida! Surik ida kadi kroʼat ona, no halo nabilan ona. 10 Surik neʼe kadi kroʼat atu oho ema barak; neʼe halo nabilan ona hanesan rai-lakan.”’”
Povu husu: “Ita sei haksolok ka lae?”
Maibé Maromak hatán: “‘Surik neʼe sei kontra haʼu-nia oan-mane nia ai-tonka liurai nian, hanesan nia kontra ai-hun sira hotu ka?
11 “‘Surik neʼe fó ona ba ema atu halo nabilan no atu bele uza. Surik neʼe kadi kroʼat no halo nabilan ona, atu entrega ba ema neʼebé iha direitu atu oho.
12 “‘Oan-mane husi ema, tanis no lelir bá, tanba surik neʼe mai ona atu kontra haʼu-nia povu; neʼe kontra Izraél nia xefe hotu. Sira hamutuk ho haʼu-nia povu sei sai vítima ba surik neʼe. Entaun baku ó-nia kelen ho triste. 13 Tanba ema koko tiha ona surik neʼe, entaun saida mak sei akontese se surik neʼe kontra ai-tonka liurai nian? Ai-tonka neʼe sei la iha tan’, Jeová, Naʼi Ukun-Naʼin Boot Liu, dehan.
14 “Oan-mane husi ema, fó sai haʼu-nia liafuan no basa-liman no koʼalia dala tolu, hodi dehan: ‘Iha surik ida!’ Neʼe mak surik neʼebé halo ema mate, surik neʼebé oho ema barak, neʼebé haleʼu sira. 15 Sira-nia laran sei sai taʼuk no ema barak sei mate iha sira-nia sidade nia portaun; haʼu sei oho sira ho surik. Sin, surik neʼe halo nabilan ona hanesan rai-lakan atu oho ema! 16 Oh surik, tesi iha ó-nia sorin loos! Tesi iha ó-nia sorin karuk! Tesi iha fatin naran deʼit neʼebé ó-nia naʼin dirije ó! 17 Haʼu mós sei basa-liman ho hirus no depois neʼe haʼu sei la hirus tan. Haʼu, Jeová, haʼu mak fó sai liafuan sira-neʼe.”
18 Jeová koʼalia tan ba haʼu, hodi dehan: 19 “Oan-mane husi ema, tau marka ba dalan rua atu liurai Babilónia nia surik bele liu. Dalan rua neʼe komesa husi rai ida deʼit, no ó tenke tau sinál iha dalan neʼebé fahe ba rua hodi bá sidade rua. 20 Ó tenke tau marka iha dalan ida atu surik bele liu hodi kontra hasoru sidade Raba iha ema Ammon nia rai, no tau marka iha dalan seluk atu surik bele liu hodi kontra hasoru sidade Jeruzalein neʼebé seguru iha rai-Judá. 21 Tanba liurai Babilónia sei para iha dalan klaran hodi koko sorte, iha fatin neʼebé dalan fahe rua. Nia doko rama-oan sira. Nia husu matadalan ba ninia estátua sira; nia haree animál nia aten. 22 Rezultadu iha ninia liman-loos hatudu ba Jeruzalein. Entaun nia sei bá tau armas haleʼu Jeruzalein, nia sei haruka ninia tropa sira atu oho ema, atu hakilar lian funu nian, atu ataka portaun sira, atu ateru rai no harii moru hodi ataka sidade. 23 Maibé sira neʼebé jura ona ba ema sira-neʼe sei haree rezultadu husi koko sorte neʼe nuʼudar buat neʼebé bosok. Maski nuneʼe, liurai Babilónia sei hanoin-hetan sira-nia sala no sei kaer sira.
24 “Tan neʼe, Jeová, Naʼi Ukun-Naʼin Boot Liu, dehan nuneʼe: ‘Imi halo nia hanoin-hetan imi-nia sala tanba imi hatudu sai imi-nia hahalok kontra no hahalok sala hotu. Agora nia hanoin-hetan ona imi, tan neʼe nia sei lori imi bá ho forsa.’
25 “Oh Izraél nia xefe neʼebé aat no hetan kanek todan, ó-nia loron toʼo ona, tempu toʼo ona ba ó atu simu kastigu ikus.
26 Jeová, Naʼi Ukun-Naʼin Boot Liu, dehan nuneʼe: ‘Hasai tiha xapeu husi ó-nia ulun, no hasai ó-nia koroa. Buat sira-neʼe sei la hanesan ona uluk. Foti aas ema neʼebé kiʼik, no hatún ema neʼebé iha pozisaun aas.
27 Haʼu sei halo rahun ó-nia koroa, halo rahun, sin, halo rahun koroa neʼe. No koroa neʼe sei la sai ema ida nian toʼo ida neʼebé iha direitu tuir lei toʼo mai, no haʼu sei fó neʼe ba nia.’
28 “Oan-mane husi ema, fó sai haʼu-nia liafuan no dehan: ‘Jeová, Naʼi Ukun-Naʼin Boot Liu, dehan nuneʼe kona-ba ema Ammon no kona-ba sira-nia liafuan sadik’, hatete ba sira: ‘Surik ida losu sai ona! Sin, surik neʼe losu sai ona atu oho imi; surik neʼe halo nabilan ona atu tolan imi no lakan hanesan rai-lakan. 29 Maski ema haree vizaun la loos no siʼik futuru neʼebé bosok kona-ba ó, maibé ó-nia ema sira neʼebé mate iha sidade laran sei butuk hamutuk ho ema aat sira neʼebé mate ona, sira-nia loron toʼo ona, tempu toʼo ona ba sira atu simu kastigu ikus. 30 Hatama fali surik ba ninia fatin. Haʼu sei tesi lia ba ó iha fatin neʼebé ó moris, iha ó-nia rai rasik. 31 Haʼu sei fakar sai haʼu-nia laran-nakali ba ó. Haʼu sei huu ahi husi haʼu-nia hirus ba ó, no haʼu sei entrega ó ba ema sira neʼebé aat loos, neʼebé matenek atu oho ema. 32 Ahi sei han ó; ó-nia raan sei suli iha rai neʼe, no ema sei la hanoin-hetan tan kona-ba ó, tanba haʼu, Jeová, haʼu mak fó sai liafuan sira-neʼe.’”
22 Jeová koʼalia tan ba haʼu, hodi dehan: 2 “Oan-mane husi ema, sidade neʼe fakar ema nia raan barak. Entaun ó prontu ona atu fó sai haʼu-nia desizaun ba sidade neʼe no halo nia hatene kona-ba ninia hahalok aat hotu ka lae? 3 Ó tenke hatete: ‘Jeová, Naʼi Ukun-Naʼin Boot Liu, dehan nuneʼe: “Oh sidade neʼebé fakar ema nia raan, sidade neʼebé halo estátua sira neʼebé haʼu hakribi hodi hafoʼer ninia an, ó-nia rohan besik mai ona, 4 ó hetan sala tanba ó oho ema, no ó sai la moos tanba ó-nia estátua sira neʼebé haʼu hakribi. Ó halo ó-nia rohan toʼo mai lalais, no ó-nia rohan toʼo mai ona. Tan neʼe mak haʼu sei halo ó sai buat neʼebé nasaun sira hakribi no rai hotu sei goza ó. 5 Rai sira neʼebé besik no rai sira neʼebé dook husi ó sei goza ó. Ó mak sidade neʼebé naran foʼer ona no nakonu ho problema. 6 Haree bá! Izraél nia xefe ida-idak iha ó-nia leet uza sira-nia pozisaun atu oho ema. 7 Sira halo aat ba sira-nia inan-aman, sira hamatak ema estranjeiru no halo aat ba oan-kiak no feto faluk sira iha ó-nia leet.”’”
8 “‘Ó hakribi haʼu-nia fatin santu, no hafoʼer haʼu-nia loron Sábadu. 9 Bosok-teen sira iha ó-nia leet hakarak deʼit atu oho ema. Iha foho leten sira han ai-han neʼebé hasaʼe nuʼudar sakrifísiu no halo hahalok aat tebes iha ó-nia leet. 10 Sira la respeitu sira-nia aman nia kama, no sira halo relasaun ho feto neʼebé la moos tanba hetan menstruasaun hela iha ó-nia leet. 11 Mane sira iha ó-nia leet halo hahalok foʼer ho ninia maluk nia feen, no mane seluk halo hahalok aat tebes hodi hafoʼer ninia feto-foun rasik, no mane seluk tan halo relasaun ho nia feton, ninia aman nia oan-feto rasik. 12 Sira simu osan hodi oho ema iha ó-nia leet. Ó fó empresta hodi husu osan-funan ka atu manán osan barak tan, no ó obriga beibeik ó-nia maluk atu fó osan. Sin, ó haluha ona haʼu’, Jeová, Naʼi Ukun-Naʼin Boot Liu, dehan.
13 “‘Haree bá! Haʼu basa-liman hodi hatudu katak haʼu hakribi ó tanba ó manán buat ruma ho laran-makerek no tanba ó oho ema iha ó-nia leet. 14 Iha loron neʼebé haʼu kastigu ó, ó sei nafatin aten-brani no ó-nia liman sei forte nafatin ka lae? Haʼu, Jeová, haʼu koʼalia ona, no haʼu sei kastigu duni ó. 15 Haʼu sei halo ó namkari iha nasaun no rai sira-nia leet, no haʼu sei hapara ó-nia hahalok foʼer sira. 16 No ó sei lakon ó-nia dignidade iha nasaun sira-nia oin, nuneʼe ó sei hatene duni katak haʼu mak Jeová.’”
17 Jeová koʼalia tan ba haʼu, hodi dehan: 18 “Oan-mane husi ema, ba haʼu, umakain Izraél sai ona hanesan foʼer neʼebé folin-laek. Sira hotu mak hanesan riti, kaleen, besi, no besi todan iha ahi-matan. Sira sai ona hanesan osan-mutin nia teen.
19 “Tan neʼe, Jeová, Naʼi Ukun-Naʼin Boot Liu, dehan nuneʼe: ‘Haʼu halibur imi hamutuk iha Jeruzalein tanba imi hotu sai ona hanesan buat foʼer neʼebé folin-laek. 20 Hanesan ema halibur osan-mutin, riti, besi, besi todan, kaleen hodi tau iha ahi-matan no nia huu ahi hodi lakan makaʼas atu bele halo sira nabeen, nuneʼe mós haʼu sei halibur imi hamutuk ho haʼu-nia hirus no laran-nakali, no haʼu sei huu imi hodi halo imi nabeen. 21 Haʼu sei halibur imi hamutuk no huu ahi lakan ba imi ho haʼu-nia laran-nakali, no imi sei nabeen iha sidade laran. 22 Hanesan osan-mutin sai nabeen iha ahi-matan, nuneʼe mós imi sei sai nabeen iha sidade laran; no imi sei hatene duni katak haʼu, Jeová, mak fakar sai haʼu-nia hirus ba imi.’”
23 Jeová koʼalia tan ba haʼu, hodi dehan: 24 “Oan-mane husi ema, hatete ba sidade neʼe: ‘Ó mak rai neʼebé sei la hamoos no udan sei la tun ba ó iha loron hirus nian. 25 Sidade neʼe nia profeta sira halo planu aat hamutuk, sira mak hanesan leaun siʼak neʼebé lees animál. Sira tolan povu. Sira hadau rikusoin no sasán neʼebé folin-boot. Sira halo feto barak sai faluk iha sidade laran. 26 Amlulik sira iha sidade neʼe kontra ona haʼu-nia ukun-fuan, no sira kontinua hafoʼer haʼu-nia fatin santu. Sira la haketak buat neʼebé santu husi buat baibain, no sira la hanorin kona-ba buat neʼebé moos no buat neʼebé la moos, sira lakohi selebra haʼu-nia loron Sábadu, no sira hafoʼer haʼu-nia naran iha sira-nia leet. 27 Ulun-naʼin sira iha sidade neʼe mak hanesan asu-fuik neʼebé lees animál; sira fakar ema nia raan no oho ema atu hetan rikusoin ho laran-makerek. 28 Maibé profeta sira iha sidade neʼe taka ulun-naʼin sira-nia hahalok aat hanesan reboka didin. Sira haree vizaun la loos no siʼik futuru neʼebé bosok, no sira dehan: “Jeová, Naʼi Ukun-Naʼin Boot Liu, dehan nuneʼe”, maski Jeová rasik la koʼalia buat ida ba sira. 29 Ema sira iha rai neʼe bosok no naʼok, sira halo aat ba ema kiʼik no kiak, sira hamatak no la hatudu justisa ba ema estranjeiru iha sira-nia leet.’
30 “‘Uluk haʼu buka mane ida iha sira-nia leet hodi bele hadiʼa fali moru fatuk nian ka hamriik iha moru nia parte neʼebé rahun ona hodi proteje rai neʼe, atu nuneʼe rai neʼe la bele lakon, maibé haʼu la hetan ema ida. 31 Tan neʼe, haʼu sei fakar sai haʼu-nia laran-nakali ba sira no halakon sira ho ahi husi haʼu-nia hirus. Haʼu sei halo sira lori todan tanba sira-nia hahalok rasik’, Jeová, Naʼi Ukun-Naʼin Boot Liu, dehan.”
23 Jeová koʼalia tan ba haʼu, hodi dehan: 2 “Oan-mane husi ema, iha feto naʼin-rua neʼebé inan ida deʼit. 3 Sira sai feto-aat iha rai-Ejitu husi sira-nia tempu joven kedas. Iha neʼebá mak ema buti sira-nia susun, no kaer sira-nia hirus-matan neʼebé virjen. 4 Feto neʼebé boot naran Ohola, no ninia alin-feto naran Oholiba. Sira sai haʼu-nian no sira tuur-ahi ba oan-mane no oan-feto sira. Ohola mak Samaria, no Oholiba mak Jeruzalein.
5 “Ohola komesa sai feto-aat bainhira haʼu sai hela naʼin ba nia. Nia kaan ninia doben sira, katak ninia viziñu ema Asíria, neʼebé hadomi nia. 6 Ema sira-neʼe mak governadór sira neʼebé hatais hena kór-azul no ema-boot sira. Sira hotu mak mane joven neʼebé isin kapás no saʼe kuda. 7 Nia kontinua halo an nuʼudar feto-aat ba ema Asíria nia oan-mane hotu neʼebé importante liu, nia kaan ema sira-neʼe no hafoʼer ninia an ho sira-nia estátua neʼebé haʼu hakribi. 8 Nia la husik ninia hahalok nuʼudar feto-aat neʼebé nia halo iha rai-Ejitu, tanba husi ninia tempu joven kedas sira toba ona ho nia. Sira kaer ninia hirus-matan neʼebé virjen no sira kaan tebes nia, no halo relasaun ho nia. 9 Tan neʼe, haʼu entrega nia ba ninia doben sira-nia liman, katak ema Asíria nia oan-mane sira neʼebé nia kaan loos. 10 Sira halo nia sai isin-tanan no kaer ninia oan-mane ho oan-feto sira, no sira oho nia ho surik. Ninia naran sai foʼer iha feto hotu nia leet, no sira fó kastigu ba nia.
11 “Bainhira ninia alin-feto Oholiba haree ida-neʼe, Oholiba kaan mane liu fali ninia biin, no Oholiba nia hahalok nuʼudar feto-aat mak aat liu fali ninia biin. 12 Nia kaan ema Asíria nia oan-mane sira neʼebé nuʼudar ninia viziñu, nia kaan governadór no ema-boot sira neʼebé hatais hena furak no saʼe kuda. Ema sira-neʼe hotu mak mane joven neʼebé isin kapás. 13 Bainhira nia hafoʼer ona ninia an, haʼu haree katak sira naʼin-rua halo hahalok neʼebé hanesan deʼit. 14 Maibé Oholiba kontinua aumenta ninia hahalok nuʼudar feto-aat. Nia haree dezeñu mane neʼebé ema bahat ona iha didin, dezeñu kona-ba ema Kaldeia neʼebé pinta ho kór-mean, 15 neʼebé kesi sintu iha sira-nia knotak, kesi hena naruk iha ulun, no isin hanesan asuwaʼin sira, dezeñu hotu neʼe mak kona-ba ema Babilónia, neʼebé moris iha ema Kaldeia nia rai. 16 Bainhira nia haree dezeñu sira-neʼe, nia komesa kaan sira, no nia haruka ema lori mensajen ba sira iha rai-Kaldeia. 17 Entaun ema Babilónia nia oan-mane sira kontinua mai halo relasaun ho nia iha ninia kama. Sira kaan tebes nia no hafoʼer nia. Bainhira sira hafoʼer ona nia, nia hakribi sira no laʼo sees husi sira.
18 “Bainhira Oholiba kontinua hatudu hahalok nuʼudar feto-aat la ho moe no hatudu sai ninia isin-tanan, haʼu hakribi nia no sees husi nia, hanesan haʼu hakribi ninia biin no sees husi ninia biin. 19 No nia kontinua aumenta tan ninia hahalok nuʼudar feto-aat, nia hanoin-hetan ninia tempu joven bainhira nia sai feto-aat iha rai-Ejitu. 20 Nia kaan mane sira-neʼe hanesan feen-kiʼik neʼebé kaan loos ninia laʼen neʼebé ninia oin-lulik hanesan ho kuda-burru aman nian no kuda aman nian. 21 Ó hakarak tebes halo hahalok aat neʼebé ó halo ona iha rai-Ejitu husi ó-nia tempu joven bainhira sira kaer ó-nia hirus-matan, no buti ó-nia susun.
22 “Tan neʼe, oh Oholiba, Jeová, Naʼi Ukun-Naʼin Boot Liu, dehan nuneʼe: ‘Haʼu sei book ó-nia doben sira neʼebé ó hakribi no hasees an ona, no haʼu sei lori sira atu kontra ó husi ó-nia sorin-sorin. 23 Haʼu sei lori ema Babilónia nia oan-mane sira no ema Kaldeia hotu, hamutuk ho mane sira husi Pekode, Soa no Koa, no mós ema Asíria nia oan-mane hotu. Ema sira-neʼe hotu mak mane joven neʼebé isin kapás, governadór no ema-boot sira, asuwaʼin no ema importante, sira hotu saʼe kuda. 24 Sira sei ataka ó ho kuda-karreta barak no ho tropa neʼebé barak tebes, neʼebé kaer eskudu boot, eskudu kiʼik, no taka kapasete. Sira sei forma haleʼu ó, no haʼu sei fó lisensa ba sira atu tesi lia, no sira sei tesi lia ba ó tuir sira-nia hakarak. 25 Haʼu sei hatudu sai haʼu-nia laran-nakali hasoru ó, no sira sei halo aat ba ó ho hirus. Sira sei tesi ó-nia inus no tilun, no ó-nia ema restu sira sei mate ho surik. Sira sei lori tiha ó-nia oan-mane no oan-feto sira, no sunu ó-nia ema restu. 26 Sira sei kolu tiha ó-nia roupa no hadau ó-nia sasán murak sira. 27 Haʼu sei hapara ó-nia hahalok nuʼudar feto-aat, neʼebé ó komesa halo iha rai-Ejitu. Ó sei la hateke tan ba sira, no la hanoin-hetan tan rai-Ejitu.’
28 “Tanba Jeová, Naʼi Ukun-Naʼin Boot Liu, dehan nuneʼe: ‘Agora haʼu atu entrega ó ba ema sira neʼebé ó odi, sira neʼebé ó hakribi no laʼo sees ona. 29 Sira sei odi ó no halo aat ba ó no foti tiha buat hotu neʼebé ó hetan ho serbisu makaʼas no husik ó isin-tanan no molik. Ema hotu sei haree ó-nia isin-tanan, sira sei haree buat aat hotu neʼebé ó halo nuʼudar feto-aat. 30 Buat sira-neʼe sei akontese ba ó tanba ó duni tuir ema husi nasaun sira hanesan feto-aat, tanba ó hafoʼer ó-nia an ho sira-nia estátua neʼebé haʼu hakribi. 31 Ó halo tuir ó-nia biin nia hahalok, no haʼu sei entrega ninia kopu ba ó-nia liman.’
32 “Jeová, Naʼi Ukun-Naʼin Boot Liu, dehan nuneʼe:
‘Ó sei hemu tua husi ó-nia biin nia kopu neʼebé boot no naruk,
No kopu neʼe nakonu ho liafuan goza, entaun ema sei hamnasa no goza ó.
33 Ó sei lanu todan loos no triste tebes,
Tanba ó hemu husi ó-nia biin Samaria nia kopu,
Kopu neʼe lori taʼuk no harahun.
34 Ó tenke hemu husi kopu neʼe neʼebé halo husi rai-mean, toʼo sai mamuk; kopu neʼe sei rahun no ó sei nata kopu neʼe nia rohan,
Tuirmai ó sei lees sai tiha ó-nia susun.
“Tanba haʼu rasik mak fó sai liafuan sira-neʼe”, Jeová, Naʼi Ukun-Naʼin Boot Liu, dehan.’
35 “Jeová, Naʼi Ukun-Naʼin Boot Liu, dehan nuneʼe: ‘Tanba ó haluha ona haʼu no la hatudu respeitu ba haʼu, ó sei lori todan ba ó-nia hahalok aat nuʼudar feto-aat.’”
36 Tuirmai Jeová dehan ba haʼu: “Oan-mane husi ema, ó sei prontu atu fó sai haʼu-nia desizaun ba Ohola no Oholiba, no hatudu sai sira-nia hahalok foʼer sira ka lae? 37 Sira halo ona sala-foʼer, no sira oho ema. Sira la halo deʼit sala-foʼer ho estátua sira neʼebé haʼu hakribi, maibé sira mós sunu sira-nia oan rasik neʼebé mós nuʼudar haʼu-nia oan, hodi hasaʼe nuʼudar sakrifísiu ba sira-nia estátua sira. 38 Liután neʼe, sira mós halo buat tuirmai neʼe hodi kontra haʼu: Sira hafoʼer haʼu-nia fatin santu iha loron neʼebá, no la respeitu haʼu-nia loron Sábadu. 39 Bainhira sira oho tiha sira-nia oan hodi hasaʼe nuʼudar sakrifísiu ba sira-nia estátua neʼebé haʼu hakribi, sira mós tama ba haʼu-nia templu santu atu hafoʼer fatin neʼe iha loron neʼe duni. Neʼe mak buat neʼebé sira halo iha haʼu-nia uma. 40 Liután neʼe, sira haruka ema lori mensajen atu bolu mane sira mai husi fatin dook. Bainhira mane sira-neʼe mai daudaun, ó hariis, pinta matan, no hafurak an ho sasán murak oioin. 41 No ó tuur iha kadeira kmanek no iha meza ida iha ó-nia oin. Ó tau haʼu-nia insensu no mina iha meza neʼe nia leten. 42 Ema rona lian husi mane barak neʼebé mai atu buka haksolok. Ema lori sira mai fatin neʼe hamutuk ho lanu-teen sira husi rai-fuik. Sira tau kelu iha feto sira-neʼe nia liman no tau koroa furak iha sira-nia ulun.
43 “Tuirmai haʼu koʼalia kona-ba feto neʼebé sai kole ona tanba halo sala-foʼer, hodi dehan: ‘Agora nia sei hatudu nafatin hahalok nuʼudar feto-aat.’ 44 Nuneʼe sira kontinua tama ba hasoru nia, hanesan ema neʼebé bá hasoru feto-aat. Iha dalan hanesan neʼe mak sira bá hasoru Ohola no Oholiba, feto sira neʼebé halo hahalok aat. 45 Maibé mane laran-loos sira sei fó kastigu ba feto neʼe tuir ninia hahalok sala-foʼer no oho ema; tanba sira mak feto neʼebé halo sala-foʼer, no sira mak ohodór.
46 “Tanba Jeová, Naʼi Ukun-Naʼin Boot Liu, dehan nuneʼe: ‘Haʼu sei lori tropa hodi kontra sira atu halo sira sai buat neʼebé ema taʼuk no ema sei hadau sira-nia sasán. 47 Tropa sei tuda sira ho fatuk no taa sira ho surik. Tropa sei oho sira-nia oan-mane no oan-feto no sunu sira-nia uma. 48 Haʼu sei hapara hahalok aat iha rai neʼe, no feto hotu sei hatene kona-ba neʼe no la halo tuir imi-nia hahalok aat.
49 Tropa sira sei fó kastigu imi tanba imi-nia hahalok aat no tanba sala neʼebé imi halo ho estátua neʼebé haʼu hakribi; nuneʼe imi sei hatene duni katak haʼu mak Jeová, Naʼi Ukun-Naʼin Boot Liu.’”
24 Jeová koʼalia tan ba haʼu iha loron sanulu, fulan-sanulu, tinan sia, hodi dehan: 2 “Oan-mane husi ema, hakerek data kona-ba loron neʼe. Iha loron neʼe, liurai Babilónia komesa ona atu ataka Jeruzalein. 3 No konta lia-dadolin kona-ba umakain neʼebé kontradór, no koʼalia kona-ba sira, hodi dehan:
“‘Jeová, Naʼi Ukun-Naʼin Boot Liu, dehan nuneʼe:
“Hatuur sanan boot iha ahi no hatama bee ba laran.
4 Hatama naʼan pedasuk sira neʼebé diʼak liu,
Naʼan kelen, no naʼan isin iha kabaas; halo nakonu sanan neʼe ho naʼan ruin sira neʼebé diʼak liu.
5 Hili bibi-malae neʼebé diʼak liu, no tau ai haleʼu iha sanan okos.
Daʼan naʼan bibi neʼe no mós naʼan ruin sira iha sanan laran.”’
6 “Tan neʼe, Jeová, Naʼi Ukun-Naʼin Boot Liu, dehan nuneʼe:
‘Susar ba sidade neʼebé fakar ema nia raan, sidade neʼebé hanesan sanan ferrujen, no ninia ferrujen seidauk hasai!
Hasai naʼan pedasuk ida-idak husi sanan neʼe; keta koko sorte ba naʼan sira-neʼe.
7 Tanba raan sei iha sidade neʼe nia laran; sidade neʼe fakar sai raan iha fatuk-belar leten.
Nia la fakar raan ba rai hodi taka ho rai-rahun.
8 Haʼu tau sidade neʼe nia raan iha fatuk-belar leten neʼebé nabilan
Atu nuneʼe, ema sira-neʼe nia raan la bele taka tiha,
Atu bele hamosu haʼu-nia hirus hodi fó kastigu.’
9 “Tan neʼe, Jeová, Naʼi Ukun-Naʼin Boot Liu, dehan nuneʼe:
‘Susar ba sidade neʼebé fakar ema nia raan!
Haʼu sei butuk ai sira aas.
10 Imi butuk ai sira no halo lakan ahi,
Daʼan naʼan toʼo tasak didiʼak, fakar sai ninia been, no husik naʼan ruin sai mutuk.
11 Hatuur sanan mamuk iha ahi-klaak leten hodi halo manas
Atu nuneʼe sanan riti neʼe sai manas loos toʼo mean.
Ninia foʼer sira sei nabeen iha laran, no ferrujen sei lakon tiha.
12 Ema tenke serbisu makaʼas atu hamoos no sai kole,
Tanba ferrujen neʼe barak loos no susar atu hasai.
Soe sanan neʼe ba ahi hamutuk ho ninia ferrujen!’
13 “‘Ó sai la moos tanba ó-nia hahalok aat. Haʼu koko atu hamoos ó, maibé ó la sai moos husi ó-nia hahalok foʼer sira. Ó sei la sai moos toʼo haʼu-nia hirus lakon husi ó. 14 Haʼu, Jeová, haʼu mak fó sai liafuan sira-neʼe. Neʼe sei akontese duni. Haʼu sei la dada an, la hanoin no la sente triste ba ó. Sira sei tesi lia ba ó tuir ó-nia dalan sira no ó-nia hahalok sira’, Jeová, Naʼi Ukun-Naʼin Boot Liu, dehan.”
15 Jeová koʼalia tan ba haʼu, hodi dehan:
16 “Oan-mane husi ema, ho kastigu neʼebé derrepente deʼit mak haʼu sei oho ema neʼebé ó hadomi liu. Ó keta sai triste; no mós keta tanis. 17 Halerik iha ó-nia laran deʼit, no keta lelir hanesan ema lelir ba mate. Kesi ó-nia hena iha ulun, no uza ó-nia sandálias. Keta taka ó-nia hasan-rahun, no keta han paun neʼebé ema lori ba ó.”
18 Haʼu koʼalia ba povu sira iha dadeer, no iha kalan haʼu-nia feen mate. Iha dadeer tuirmai, haʼu halo tuir mandamentu neʼebé haʼu simu. 19 Povu dehan ba haʼu: “Fó sai ba ami buat sira neʼebé ó halo neʼe katak sá? Oinsá mak neʼe kona ami?” 20 Haʼu hatán ba sira: “Jeová koʼalia ona ba haʼu, hodi dehan: 21 ‘Hatete ba umakain Izraél: “Jeová, Naʼi Ukun-Naʼin Boot Liu, dehan nuneʼe: ‘Lakleur tan haʼu sei hafoʼer haʼu-nia fatin santu, neʼebé imi gaba, hafolin no gosta. Imi-nia oan-mane no oan-feto sira neʼebé imi husik hela iha sidade neʼe sei mate ho surik. 22 Tuirmai imi sei halo buat neʼebé haʼu halo ona. Imi sei la taka imi-nia hasan-rahun, no imi sei la han paun neʼebé ema lori ba imi. 23 Imi sei kesi hena iha ulun no uza sandálias. Imi sei la triste ka tanis. Imi sei sai dodok tanba imi-nia sala sira, no imi sei halerik ba malu. 24 Ezekiel sai ona nuʼudar sinál ba imi. Imi sei halo tuir buat neʼebé nia halo ona. Bainhira susar akontese, imi sei hatene duni katak haʼu, Jeová, mak Naʼi Ukun-Naʼin Boot Liu.’”’”
25 “Oan-mane husi ema, iha loron neʼebé haʼu hasai tiha sira-nia uma aas neʼebé seguru, katak buat kmanek neʼebé halo sira kontente, sira hafolin, no gosta, haʼu mós sei hasai sira-nia oan-mane no oan-feto, 26 no ema ida sei halai sai husi neʼebá hodi mai fó-hatene ba ó. 27 Iha loron neʼebá ó sei loke ó-nia ibun no koʼalia ba ema neʼe, no ó sei la monok tan. Ó sei sai nuʼudar sinál ba sira, nuneʼe sira sei hatene duni katak haʼu mak Jeová.”
25 Jeová koʼalia tan ba haʼu, hodi dehan: 2 “Oan-mane husi ema, fila oin ba ema Ammon, no fó sai haʼu-nia liafuan kontra sira. 3 Ó tenke koʼalia kona-ba ema Ammon, hodi dehan: ‘Rona ba liafuan husi Jeová, Naʼi Ukun-Naʼin Boot Liu. Jeová, Naʼi Ukun-Naʼin Boot Liu, dehan nuneʼe: “Tanba imi hatete: ‘Merese duni!’ hodi kontra haʼu-nia fatin santu bainhira neʼe sai foʼer ona, no kontra rai-Izraél bainhira neʼe sai mamuk, no kontra umakain Judá bainhira sira sai dadur, 4 entaun haʼu sei entrega imi ba povu husi parte leste nuʼudar sira-nian. Sira sei harii sira-nia hela-fatin no tenda iha imi-nia leet. Sira sei han imi-nia ai-han, no hemu imi-nia animál nia susubeen. 5 Haʼu sei halo Raba sai fatin neʼebé kuda-kamelu sira han duʼut, no halo ema Ammon nia rai sai fatin deskansa ba bibi-lubun sira; nuneʼe imi sei hatene duni katak haʼu mak Jeová.”’”
6 “Jeová, Naʼi Ukun-Naʼin Boot Liu, dehan nuneʼe: ‘Tanba imi basa-liman, doko ain no haksolok hodi goza rai-Izraél, 7 entaun haʼu sei lolo liman kontra imi hodi entrega imi ba nasaun sira atu hadau. Haʼu sei oho imi no halakon imi husi rai oioin. Haʼu sei halakon imi, hodi nuneʼe imi sei hatene duni katak haʼu mak Jeová.’
8 “Jeová, Naʼi Ukun-Naʼin Boot Liu, dehan nuneʼe: ‘Tanba Moab no Seir dehan: “Haree bá! Umakain Judá mak hanesan deʼit ho nasaun sira seluk hotu”, 9 entaun haʼu sei husik ema atu ataka Moab nia sidade sira iha ninia fronteira, inklui mós ninia sidade sira neʼebé diʼak liu hanesan Bet-Jesimot, Baal-Meon, no Kiriataim. 10 Haʼu sei entrega ema Moab hamutuk ho ema Ammon ba povu husi parte leste atu sai sira-nian, atu nuneʼe ema la hanoin-hetan tan ema Ammon iha nasaun sira-nia leet. 11 No haʼu sei tesi lia ba Moab, nuneʼe sira sei hatene duni katak haʼu mak Jeová.’
12 “Jeová, Naʼi Ukun-Naʼin Boot Liu, dehan nuneʼe: ‘Edom kontra ona umakain Judá ho laran-aat no sira hetan sala tanba kastigu umakain Judá; 13 entaun, Jeová, Naʼi Ukun-Naʼin Boot Liu, dehan nuneʼe: “Haʼu mós sei lolo liman kontra Edom no oho tiha ema no animál-hakiak sira iha Edom, no haʼu sei halo Edom sai fatin mamuk. Sira sei mate ho surik hahú husi Teman toʼo Dedan. 14 ‘Haʼu sei fó kastigu ba Edom hodi uza haʼu-nia povu Izraél. Sira sei lori haʼu-nia hirus no laran-nakali hodi kontra Edom, atu nuneʼe Edom bele sente haʼu-nia kastigu’, Jeová, Naʼi Ukun-Naʼin Boot Liu, dehan.”’
15 “Jeová, Naʼi Ukun-Naʼin Boot Liu, dehan nuneʼe: ‘Tanba ema Filístia sai inimigu ho haʼu-nia povu ba tempu kleur, sira ho laran-aat buka atu kontra no halakon haʼu-nia povu, 16 entaun, Jeová, Naʼi Ukun-Naʼin Boot Liu, dehan nuneʼe: “Haʼu sei lolo liman kontra ema Filístia, no haʼu sei oho ema Kereti no halakon ema restu sira neʼebé hela besik tasi. 17 Haʼu sei fó kastigu makaʼas ba sira ho hirus, no sira sei hatene duni katak haʼu mak Jeová bainhira haʼu selu fali ba sira.”’”
26 Iha loron primeiru husi fulan neʼe, iha tinan 11, Jeová koʼalia ba haʼu, hodi dehan: 2 “Oan-mane husi ema, tanba ema iha sidade Tiro koʼalia kontra Jeruzalein dehan: ‘Merese duni! Portaun neʼebé ema hotu laʼo liu rahun ona! Agora haʼu sei hetan susesu, no haʼu sei sai riku tanba Jeruzalein rahun ona’;
3 entaun, Jeová, Naʼi Ukun-Naʼin Boot Liu, dehan nuneʼe: ‘Oh Tiro, haʼu sei kontra ó, no haʼu sei lori nasaun barak mai hodi kontra ó, hanesan tasi hamosu ninia laloran boot.
4 Oh Tiro, sira sei halakon ó-nia moru no harahun ó-nia uma aas sira, no haʼu sei hasai tiha rai husi ó hodi halo ó sai moos hanesan fatuk kabeer.
5 Ó sei sai fatin neʼebé maran iha tasi klaran atu ema habai rede.’
“Jeová, Naʼi Ukun-Naʼin Boot Liu, dehan: ‘Ó sei sai buat neʼebé nasaun sira hadau tanba haʼu rasik mak fó sai ona liafuan sira-neʼe. 6 No ó-nia ema iha knua sira neʼebé iha foho sei mate ho surik, nuneʼe ema sei hatene duni katak haʼu mak Jeová.’
7 “Tanba Jeová, Naʼi Ukun-Naʼin Boot Liu, dehan nuneʼe: ‘Haʼu sei lori Liurai Nabukodonozor husi Babilónia hodi mai kontra Tiro husi parte norte; nia mak liurai ba liurai sira. Nia mai ho kuda, kuda-karreta, soldadu neʼebé saʼe kuda, no ho tropa neʼebé barak loos. 8 Nia sei halakon ó-nia povu iha knua sira ho surik, no nia sei harii moru no ateru rai atu ataka ó no nia sei tau eskudu sira hamutuk atu kontra ó. 9 Nia sei tuku ó-nia moru sira ho ekipamentu funu nian, no nia sei harahun ó-nia uma aas sira ho baliu. 10 Ninia kuda mak barak tebes toʼo sira halo rai-rahun taka ó, no lian husi ninia soldadu neʼebé saʼe kuda, lian husi roda sira, no kuda-karreta sira sei halo ó-nia moru sira nakdoko bainhira nia tama ó-nia portaun, hanesan ema barak neʼebé halai tama ba sidade liuhusi moru neʼebé rahun ona. 11 Ninia kuda sira sei sama ó-nia dalan sira hotu; nia sei oho ó-nia povu ho surik, no sei harahun ó-nia uma riin forte sira toʼo rai.
12 Sira sei foti ó-nia rikusoin, hadau sasán neʼebé ó faʼan, harahun ó-nia moru, no baku rahun ó-nia uma sira neʼebé furak; tuirmai sira sei raʼut ó-nia fatuk, ai, no rai hodi soe ba tasi laran.’
13 “‘Haʼu sei hapara lian husi ó-nia knananuk, no ema sei la rona tan lian husi ó-nia arpa sira. 14 Haʼu sei halo ó sai moos hanesan fatuk kabeer, no ó sei sai fatin neʼebé maran atu ema habai rede. Ema sei nunka harii fali ó, tanba haʼu, Jeová, mak fó sai liafuan sira-neʼe’, Jeová, Naʼi Ukun-Naʼin Boot Liu, dehan.
15 “Jeová, Naʼi Ukun-Naʼin Boot Liu, dehan nuneʼe ba Tiro: ‘Illa sira sei rona lian bainhira ó monu, sira sei lian halerik bainhira ó-nia ema sira besik mate, bainhira ema oho ó-nia povu iha ó-nia leet, neʼe sei halo sira nakdoko. 16 Ulun-naʼin hotu iha tasi sei tun husi sira-nia kadunan no hasai tiha sira-nia unuk no roupa neʼebé borda ho didiʼak, no sira sei nakdedar loos. Sira sei tuur iha rai no kontinua nakdedar hodi hateke ba ó ho hakfodak. 17 No sira sei kanta knananuk triste nian kona-ba ó no dehan ba ó:
“Oh sidade neʼebé hela iha tasi, no neʼebé ema gaba, ó lakon ona;
Uluk ó no ó-nia ema sira mak kbiit boot iha tasi,
No halo ema hotu iha rai sai taʼuk!
18 Illa sira sei nakdedar iha loron neʼebé ó monu,
Illa sira iha tasi sei neon-susar bainhira ó lakon.”’
19 “Tanba Jeová, Naʼi Ukun-Naʼin Boot Liu, dehan nuneʼe: ‘Bainhira haʼu halo ó sai hanesan sidade sira neʼebé ema la hela tan, bainhira haʼu halo ó mout ho laloran neʼebé siʼak no bee neʼebé boot taka ona ó, 20 haʼu sei lori ó hamutuk ho sira neʼebé tun daudaun ba rate hodi bá fatin neʼebé ema mate kleur ona; haʼu sei halo ó hela iha rai okos liu, hanesan fatin sira neʼebé rahun ba tempu kleur ona, hamutuk ho sira neʼebé tun daudaun ba rate, atu nuneʼe ema la hela tan iha ó. Tuirmai haʼu sei hafurak rai neʼebé ema moris sira hela bá.
21 “Jeová, Naʼi Ukun-Naʼin Boot Liu, dehan: ‘Haʼu sei halo susar kona ó derrepente deʼit, no ó sei la iha tan. Sira sei buka ó, maibé sei nunka hetan ó.’”
27 Jeová koʼalia tan ba haʼu, hodi dehan: 2 “Oan-mane husi ema, kanta knananuk triste nian kona-ba Tiro, 3 no dehan ba Tiro:
‘Ó hela besik tasi-ibun,
Ó mak sidade neʼebé halo negósiu ho ema husi illa barak,
Jeová, Naʼi Ukun-Naʼin Boot Liu, dehan nuneʼe:
“Oh Tiro, ó rasik dehan: ‘Haʼu furak liu hotu.’
4 Ó-nia rai mak iha tasi nia klaran,
No ó-nia badain sira halo ó sai furak tebes.
5 Hanesan ró ida, sira halo ó-nia ai-kabelak hotu ho ai-junipero husi Senir,
No sira foti ai-sedru husi Líbanu atu halo ró-riin.
6 Sira halo ó-nia fose sira ho ai-karvallu husi Basan,
No ó-nia ró-ulun halo ho ai-sipreste no enfeita ho marfín husi illa Kitim.
7 Ó-nia laan halo ho hena-liñu kór oioin husi rai-Ejitu,
No sira halo tenda kiʼik iha ó hodi uza kabas kór-azúl no bibi-malae nia fulun kór-violeta husi illa Elisá.
8 Ema Sidon no ema Arvadeu mak hean ó-nia ró.
Oh Tiro, ó-nia ema neʼebé matenek mak sai nuʼudar ró atan.
9 Ema Gebal neʼebé iha esperiénsia no matenek mak taka ó-nia ró atu bee la tama.
Ró-naʼin hotu no ró hotu iha tasi mai halo negósiu ho ó.
10 Ó-nia tropa sira mak ema Pérsia, Lud, no Put. Sira mak ó-nia ema asuwaʼin.
Sira tara sira-nia eskudu no kapasete iha ó, no sira lori glória ba ó.
11 Ema Arvadeu neʼebé sai ó-nia tropa mak hamriik iha moru haleʼu ó,
No mane aten-brani sira mak hein ó-nia uma aas sira.
Sira tara sira-nia eskudu kabuar haleʼu ó-nia moru
No sira halo ó sai furak liután.
12 “‘“Tarsis halo negósiu ho ó tanba ó-nia rikusoin neʼebé barak loos. Sira fó osan-mutin, besi, kaleen, no besi todan hodi troka ho ó-nia sasán sira. 13 Javan, Tubal, no Mesek halo negósiu ho ó, sira fó atan no sasán husi riti hodi troka ho sasán sira neʼebé ó faʼan. 14 Umakain Togarma fó kuda no kuda-mulu hodi troka ho ó-nia sasán sira. 15 Ema Dedan halo negósiu ho ó; ó foti serbisu-naʼin hodi halo negósiu iha illa barak; sira fó marfín no ai-ébano nuʼudar prezente ba ó. 16 Edom halo negósiu ho ó tanba ó iha sasán barak; sira fó fatuk-turkeza, bibi-malae fulun kór-violeta, hena neʼebé borda ho kór oioin, hena diʼak, ahu-ruin, no fatuk-rubi hodi troka ho ó-nia sasán sira.
17 “‘“Rai-Judá no rai-Izraél halo negósiu ho ó. Sira fó trigu husi Minit, ai-han neʼebé diʼak, bani-been, mina, no bálsamu hodi troka ho ó-nia sasán sira.
18 “‘“Damasku halo negósiu ho ó tanba ó-nia sasán no ó-nia rikusoin barak; sira fó tua-uvas husi Helbon no bibi-malae fulun husi Zahar hodi troka ho ó-nia sasán. 19 Vedan no Javan husi Uzal fó besi, ai-kásia, duʼut-kana morin hodi troka ho ó-nia sasán sira. 20 Dedan fó hena atu tau iha animál kotuk atu ó saʼe, hodi troka ho ó-nia sasán. 21 Ó foti ema Arábia no xefe hotu husi Kedar nuʼudar ó-nia serbisu-naʼin. Sira faʼan bibi-malae oan, bibi-malae aman no bibi-timur. 22 Negósiu-naʼin husi Sabá no Raamá halo negósiu ho ó; sira fó mina-morin diʼak oioin, fatuk-murak, no osan-mean hodi troka ho ó-nia sasán sira. 23 Haran, Kane, Eden, negósiu-naʼin husi Sabá, Asur, no Kilmad halo negósiu ho ó. 24 Iha ó-nia merkadu mak sira faʼan roupa furak, unuk halo husi hena kór-azúl no soru ho kór oioin, no tapete ho kór oioin, buat hotu neʼe lulun no kesi metin ho tali.
25 Ró sira husi Tarsis mak lori ó-nia sasán atu faʼan,
Atu nuneʼe ó sai nakonu no todan loos iha tasi klaran.
26 Ó-nia ema neʼebé hean ó, lori ó ba tasi klaran loos;
Anin husi parte leste halo rahun ó iha tasi klaran.
27 Ó-nia rikusoin, sasán oioin, sasán neʼebé ó faʼan, ró atan sira,
Sira neʼebé taka ó atu bee la bele tama, ó-nia negósiu-naʼin, no ema asuwaʼin hotu,
Ema hotu neʼebé hamutuk ho ó,
Sira hotu sei mout iha tasi klaran iha loron neʼebé ó lakon.
28 Bainhira ó-nia ró atan sira hakilar, rai sira besik tasi sei nakdoko.
29 Sira neʼebé hean ró, no ró atan hotu
Sei tun husi sira-nia ró no hamriik iha rai-maran.
30 Sira sei hasai lian no tanis makaʼas tanba ó
Nuʼudar sira tau rai-rahun ba sira-nia ulun no duir an iha ahi-kadesan laran.
31 Sira sei koir sira-nia fuuk no hatais hena karón;
Sira sei tanis makaʼas no lelir tanba ó.
32 Bainhira sira triste hela, sira sei kanta knananuk triste nian no lelir tanba ó, hodi dehan:
‘Sé mak hanesan Tiro neʼebé agora nonook ona iha tasi klaran?
33 Ó halo ema barak kontente bainhira ó lori ó-nia sasán sira mai liuhusi tasi.
Ó halo riku liurai sira iha rai ho ó-nia rikusoin neʼebé barak no ho sasán sira neʼebé ó faʼan.
34 Agora ó rahun ona iha tasi, iha tasi neʼebé kleʼan,
No ó mout ona hamutuk ho ó-nia povu no sasán sira neʼebé ó faʼan.
35 Ema hotu iha illa sira sei hateke ba ó ho hakfodak,
No sira-nia liurai sei nakdedar ho taʼuk, no oin triste.
36 Negósiu-naʼin iha nasaun sira-nia leet sei hakfuʼik tanba buat neʼebé akontese ba ó.
Ó-nia rohan sei toʼo mai derrepente deʼit no aat loos,
No ó sei lakon ba nafatin.’”’”