LISAUN 4
Oinsá atu uza osan ho kuidadu
“Bainhira koʼalia ba malu ho didiʼak, planu sira sei hetan susesu.”—Provérbios (Amsal) 20:18
Ita hotu presiza osan atu bele tau matan ba família nia presiza. (Provérbios [Amsal] 30:8) Tuir loloos, Bíblia mós hatete katak “osan bele proteje ema”. (Eclesiastes [Pengkhotbah] 7:12) Nuʼudar feen-laʼen, dala ruma susar atu koʼalia kona-ba osan, maibé keta husik osan hamosu problema iha imi-nia moris kaben nian. (Éfeso 4:32) Feen-laʼen tenke tau fiar ba malu no halo desizaun hamutuk kona-ba oinsá atu uza osan.
1 PLANU DIDIʼAK
BUAT NEʼEBÉ BÍBLIA HANORIN: “Kuandu ema ida hakarak harii uma-andár, nia sei tuur uluklai hodi sura ninia osan, loos ka lae? Nia halo ida-neʼe hodi haree se nia iha osan toʼo atu halo hotu uma neʼe.” (Lucas 14:28) Importante tebes atu halo planu hamutuk oinsá imi sei uza osan. (Amós 3:3) Hanoin kona-ba saida mak imi presiza sosa no imi-nia osan toʼo ka lae. (Provérbios [Amsal] 31:16) Maski imi-nia osan toʼo atu sosa sasán ruma, maibé neʼe la dehan katak imi tenke sosa buat naran deʼit. Hakaʼas an atu la debe osan no uza deʼit osan neʼebé imi iha.—Provérbios (Amsal) 21:5; 22:7.
BUAT NEʼEBÉ ITA BELE HALO:
Kuandu iha osan restu iha fulan nia rohan, halo planu hamutuk oinsá atu uza osan neʼe
Se imi-nia osan latoʼo, halo planu kona-ba oinsá atu la gasta osan barak. Porezemplu, duké bá han iha restorante, diʼak liu han deʼit iha uma
2 KOʼALIA NAKLOKE BA MALU
BUAT NEʼEBÉ BÍBLIA HANORIN: “Tau matan didiʼak ba buat hotu ho laran-moos, laʼós deʼit iha Jeová nia oin, maibé mós iha ema nia oin.” (2 Korinto 8:21) Koʼalia la taka ho Ita-nia kaben kona-ba osan hira mak Ita manán no osan hira mak Ita gasta.
Antes halo desizaun kona-ba uza osan barak, importante koʼalia uluk ho Ita-nia kaben. (Provérbios [Amsal] 13:10) Hodi koʼalia ba malu kona-ba oinsá atu uza osan, imi-nia moris kaben nian bele nafatin iha dame. Haree osan neʼebé Ita manán husi serbisu nuʼudar família nia osan, laʼós Ita rasik nian.—1 Timóteo 5:8.
BUAT NEʼEBÉ ITA BELE HALO:
Deside nanis kona-ba osan hira mak imi ida-idak bele gasta
Keta hein toʼo problema mosu mak foin koʼalia ba malu kona-ba osan