Informasaun atu uza hamutuk livru Moris Kristaun no Haklaken
4-10 FEVEREIRU
RIKUSOIN HUSI BÍBLIA | ROMA 1-3
“Kontinua treinu Ita-nia konxiénsia”
(Roma 2:14, 15) Tanba kuandu ema husi nasaun sira neʼebé la hatene ukun-fuan, halo tuir buat neʼebé ukun-fuan haruka, ema sira-neʼe hatudu katak iha ona ukun-fuan iha sira-nia laran. 15 Ema sira-neʼe hatudu sai katak ukun-fuan neʼe hakerek ona iha sira-nia laran, no sira-nia konxiénsia fó sasin hamutuk ho sira, no liuhusi sira-nia hanoin rasik sira hatene katak buat neʼebé sira halo mak loos ka sala.
Oinsá mak Ita bele iha laran neʼebé moos nafatin?
6 Maromak Jeová haraik kbiit neon nian atu hatene hahalok neʼebé diʼak no aat, ida-neʼe prezente ba ninia atan sira deʼit ka lae? Haree toʼok ba liafuan neʼebé Maromak haruka apóstolu Paulo hakerek neʼebé dehan: ‘Bainhira jentiu sira neʼebé la hatene ukun-fuan, moris tuir buat neʼebé ukun-fuan haruka tanba buat neʼebé iha ona sira-nia laran, buat hirak-neʼe mak ukun-fuan ona ba sira maski sira la iha ukun-fuan. Sira-neʼe hatudu katak ukun-fuan hakerek nanis ona iha sira-nia fuan, sira-nia laran fó sasin ba sira; no hanoin oioin dehan ba sira katak sira sala ka sira loos.’ (Rom 2:14, 15) Maski ema la hatene Maromak Jeová nia ukun-fuan sira, dala ruma sira-nia laran bele book sira atu hatudu hahalok diʼak tuir Maromak nia matadalan sira.
(Roma 2:15) Ema sira-neʼe hatudu sai katak ukun-fuan neʼe hakerek ona iha sira-nia laran, no sira-nia konxiénsia fó sasin hamutuk ho sira, no liuhusi sira-nia hanoin rasik sira hatene katak buat neʼebé sira halo mak loos ka sala.
Oinsá mak Ita bele iha laran neʼebé moos nafatin?
8 Oinsá mak Ita halo desizaun tuir Ita-nia laran? Dala barak, ema balun halo desizaun hodi tuir deʼit sira-nia hanoin no sentimentu ka sira-nia hakarak kona-ba buat ruma. Depois neʼe, karik sira hatete: “Tuir haʼu-nia laran, ida-neʼe la sala.” Ita-nia hakarak bele sai makaʼas liu, toʼo bele book Ita-nia laran atu halo tuir deʼit Ita-nia hakarak. Bíblia hatete: “Laran mak makerek liu buat hotu-hotu no la bele kontrola. Sé mak bele hatene kona-ba nia?” (Jer 17:9) Nuneʼe, buat importante neʼebé ita tenke hanoin didiʼak laʼós kona-ba saida mak ita-nia laran hakarak. Maibé, ita hakarak hanoin uluk buat neʼebé halo kontente Maromak Jeová.
9 Kuandu ita treinu ita-nia laran no halo desizaun neʼebé tuir duni ida-neʼe, sei hatudu katak ita taʼuk ba Maromak, no la tuir deʼit ita rasik nia hakarak. Hanoin toʼok ezemplu kona-ba ida-neʼe. Neemias mak ema neʼebé laran-metin ba Maromak. Nuʼudar governadór ida, nia iha direitu atu haruka ema iha Jeruzalein atu selu impostu ba nia. Maibé, nia lakohi halo ida-neʼe. Tanbasá? Tanba karik Maromak sei sente laran-triste se nia fó-terus ba Maromak Jeová nia povu, no nia lakohi tebes atu halo ida-neʼe. Nia hatete: “Haʼu la halo hanesan neʼe tanba taʼuk ba Maromak.” (Ne 5:15) Importante tebes atu iha taʼuk neʼebé loos ba Maromak, katak ita ho laran tomak taʼuk atu halo ita-nia Aman iha lalehan sente triste. Se ita hatudu katak ita taʼuk ba Maromak iha dalan hanesan neʼe, sei book ita atu buka matadalan husi Maromak nia Liafuan kuandu ita halo desizaun ruma.
Keʼe no hetan buat murak husi Bíblia
(Roma 3:4) Lae duni! Maski ema hotu bosok-teen, maibé Maromak mak loos, hanesan hakerek nanis ona: “Ita-nia liafuan sira sei hatudu katak Ita mak loos, no kuandu sira duun Ita kona-ba buat ruma Ita sei hatudu sai katak sira sala.”
w08-E 6/15 p. 30 par. 5
Pontu importante husi livru Roma
3:4. Bainhira ema nia liafuan kontra malu ho buat neʼebé Maromak fó sai iha Bíblia, ita bele hatudu katak “Maromak mak loos” liuhusi tau fiar ba mensajen iha Bíblia no halo tuir Maromak nia hakarak. Se ita laran-manas atu haklaken no halo dixípulu, ita bele ajuda ema seluk atu hatene katak Maromak mak loos.
(Roma 3:24, 25) Maibé Maromak haree sira nuʼudar ema laran-loos tanba folin neʼebé Kristu Jesus selu ona atu salva sira. Neʼe mak prezente neʼebé Maromak fó tanba ninia laran-diʼak neʼebé boot no la presiza selu. 25 Maromak fó Jesus nuʼudar sakrifísiu ida atu nuneʼe ema bele hadame malu ho Maromak liuhusi fiar ba Jesus nia raan. Ida-neʼe atu hatudu katak Maromak mak loos, tanba nia hatudu pasiénsia hodi fó perdua ba sala sira neʼebé ema halo iha tempu uluk.
w08-E 6/15 p. 29 par. 6
Pontu importante husi livru Roma
3:24, 25—Oinsá mak “folin neʼebé Kristu Jesus selu ona” taka “sala sira neʼebé ema halo iha tempu uluk” antes Jesus mate nuʼudar sakrifísiu? Profesia primeiru kona-ba Mesias neʼebé hakerek iha livru Gén 3:15, sai loos iha tinan 33 EC bainhira ema fó kastigu-mate ba Jesus iha ai-riin. (Gal 3:13, 16) Maibé iha momentu neʼebé Jeová fó sai profesia neʼe, tuir ninia haree, folin atu sosa fali selu tiha ona, tanba la iha buat ida mak bele hanetik Jeová atu kumpre ninia objetivu. Entaun, bazeia ba sakrifísiu neʼebé Jesus sei halo, Jeová bele fó perdua ba Adão nia bei-oan sira neʼebé hatudu fiar ba promesa neʼe. Jesus nia sakrifísiu mós loke dalan atu bele fó moris-hiʼas ba Maromak nia atan sira neʼebé moris antes tempu Kristaun nian.—Aps 24:15.
Diskursu
w06-E 6/1 p. 12-13
Iha hanoin neʼebé loos
Atu bele sente kontente, ita presiza iha hanoin neʼebé loos kona-ba ita-nia fraku no ema seluk nia fraku. Iha apóstolu Paulo nia karta ba kongregasaun Roma, nia hatete: “Ema hotu halo ona sala no labele haleno Maromak nia glória.” (Rom 3:23) Iha buat barak kona-ba Maromak nia glória neʼebé susar ba ita atu komprende. Ezemplu ida mak hatudu iha Gén 1:31: “Maromak haree buat hotu neʼebé nia halo ona, no ida-neʼe diʼak tebes.” Bainhira Jeová haree fila fali ba buat ida-idak neʼebé nia halo ona, nia bele hatete katak “ida-neʼe diʼak tebes”. La iha ema ida neʼebé bele hatete hanesan neʼe. Rekoñese Ita-nia limitadu mak hakat ida atu hetan kontente. Maski nuneʼe, iha buat seluk tan. Ita presiza komprende no simu Maromak nia hanoin kona-ba buat neʼe.
Liafuan Gregu neʼebé tradús nuʼudar “sala” mai husi liafuan ida neʼebé signifika “la kona ho loloos”. (Rom 3:9) Porezemplu: Hanoin toʼok ema ida neʼebé hakarak atu manán prémiu hodi hana rama-oan ida ba marka. Nia iha rama-oan tolu. Nia hana uza rama-oan primeiru, maibé rama-oan neʼe la kona marka no monu dook metru ida. Nia haree didiʼak no hana rama-oan segundu, maibé nafatin la kona marka no monu dook sentímetru 30. Tuirmai, nia tau fokus, no hana rama-oan terseiru, no rama-oan neʼe besik atu kona marka, liu sentímetru rua husi marka, maski nuneʼe, nafatin la kona.
Ita hotu mak hanesan ho hanadór neʼe. Dala ruma, ita hanesan dook no “la kona marka”. Tempu seluk, ita atu besik kona marka, maibé nafatin la kona. Ita sente estrese tanba maski ita hakaʼas an ona, maibé ita seidauk bele halo ho didiʼak. Agora, mai ita koʼalia fali kona-ba hanadór neʼe.
Neineik-neineik nia fila kotuk, nia oin murón tanba hakarak tebes prémiu neʼe. Maibé derrepente, mane neʼebé tau matan ba eventu neʼe bolu nia no fó prémiu ba nia, hodi hatete: “Haʼu hakarak fó prémiu neʼe ba ó tanba haʼu gosta ó, no haʼu haree katak ó hakaʼas an tebes.” Hanadór neʼe sente kontente tebes!
Ema hotu neʼebé simu “prezente” moris rohan-laek husi Maromak sei sente kontente tebes. (Rom 6:23) Iha tempu neʼebá, buat hotu neʼebé ema halo sei diʼak, sira sei sempre kona ho loloos ba marka. Sira sei sente kontente tebetebes. Se agora, ita sempre hanoin-hetan ezemplu kona-ba hanadór, neʼe sei ajuda ita atu iha hanoin neʼebé loos kona-ba ita-nia an rasik no mós ema seluk.
11-17 FEVEREIRU
RIKUSOIN HUSI BÍBLIA | ROMA 4-6
“Maromak hatudu ninia domin ba ita”
(Roma 5:8) Maibé Maromak hatudu ninia domin ba ita iha dalan tuirmai neʼe: Kristu mate ba ita bainhira ita sei sala-naʼin hela.
(Roma 5:12) Entaun, sala tama iha mundu liuhusi ema ida, no mate tanba sala. Nuneʼe ema hotu mate tanba ema hotu halo ona sala.
Maromak hatudu ninia domin mai ita
5 Paulo koʼalia kona-ba ida-neʼe, hodi dehan: “Nuʼudar husi ema ida deʼit mak sala tama iha mundu, no tan sala, mate; nuneʼe mate toʼo ba ema hotu, basá ema hotu sala.” (Rom 5:12) Ita bele komprende kona-ba ida-neʼe tanba Maromak fó sai iha Bíblia oinsá mak ema nia moris hahú. Jeová kria ema naʼin-rua, Adão ho Eva. Tanba ita-nia Kriadór mak perfeitu, nuneʼe sira mós perfeitu ka la iha sala. Maromak fó ba sira ukun-fuan ida deʼit no fó-hatene ba sira katak se sira la halo tuir lei neʼe, ida-neʼe sei lori kastigu-mate. (Gén 2:17) Maibé, sira hili atu la halo tuir Maromak nia ukun-fuan, no tan neʼe sira hatudu katak sira lakohi simu Maromak nuʼudar Ida neʼebé Fó Ukun-Fuan no Ukun-Naʼin neʼebé Boot Liu Hotu.—Deu 32:4, 5.
(Roma 5:13, 14) Sala iha mundu ona antes Ukun-Fuan iha, maibé se ukun-fuan la iha, ita labele duun ema ida katak nia halo sala. 14 Maski nuneʼe, mate ukun nuʼudar liurai husi Adão nia tempu toʼo Moisés nia tempu. Mate ukun mós sira neʼebé la halo sala hanesan sala neʼebé Adão halo. Adão mak ilas ba ida neʼebé atu mai.
Maromak hatudu ninia domin mai ita
6 Depois Adão sai sala-naʼin mak nia hetan oan, no nia hadaʼet sala neʼe ba ninia oan no bei-oan sira, no rezultadu husi ida-neʼe mak sira hotu mate. Klaru katak Adão nia oan no bei-oan la kontra Maromak nia ukun-fuan neʼebé Adão la halo tuir, no sira la kontra ukun-fuan ruma tanba Maromak seidauk fó ukun-fuan ida. (Gén 2:17) Maski nuneʼe, Adão nia bei-oan sira hetan sala. Nuneʼe, sala no mate ukun sira toʼo tempu neʼebé Maromak fó ukun-fuan ba ema Israel, no ukun-fuan neʼe hatudu ho klaru katak sira nafatin sala-naʼin. (Lee Roma 5:13, 14.) Ita bele kompara rezultadu aat husi sala ho moras ida neʼebé ema hetan husi sira-nia inan-aman, hanesan anemia (katak raan menus), ka emofilia (katak raan suli la para maski kanek kiʼik). Porezemplu, liurai-oan ida husi rai-Rúsia, naran Alexis, hetan moras emofilia husi ninia aman, Liurai Nicholas II no ninia inan, Alexandra. Maski oan balu la sai moras, maibé sira iha moras neʼe iha sira-nia raan no bele hadaʼet moras neʼe ba sira-nia oan sira. Maibé, sala husi Adão la hanesan neʼe. Rezultadu husi sala kona ema hotu no sempre lori mate. Oinsá mak bele hadiʼa problema neʼe?
(Roma 5:18) Entaun, liuhusi sala ida deʼit mak ema oioin hetan kastigu, nuneʼe mós liuhusi hahalok loos ida deʼit mak Maromak haree ema oioin nuʼudar ema laran-loos hodi hetan moris.
(Roma 5:21) Tanbasá mak Maromak halo nuneʼe? Hanesan sala no mate ukun nuʼudar liurai, nuneʼe mós Maromak nia laran-diʼak neʼebé boot sei ukun nuʼudar liurai ho hahalok loos, atu nuneʼe lori ema ba moris rohan-laek liuhusi ita-nia Naʼi Jesus Kristu.
Maromak hatudu ninia domin mai ita
9 Liafuan gregu neʼebé tradús nuʼudar “ema barak sei sai loos” no hetan “fali perdua”, iha arti saida loos? Ema ida neʼebé tradús Bíblia hatete katak liafuan sira-neʼe hanesan liafuan neʼebé uza iha tribunál. Nia mós hatete katak liafuan sira-neʼe hatudu katak ema sira-nia situasaun troka iha Maromak nia oin, laʼós katak ema troka sira-nia hahalok. Ida-neʼe bele kompara Maromak ho juis ida neʼebé tesi lia ba ema ida neʼebé hetan duun kona-ba sala ruma. Maibé, Maromak perdua nia no halo nia sai livre husi sala.
10 Oinsá mak Maromak neʼebé “Juis ba raiklaran tomak” bele perdua ema neʼebé la halo buat loos? (Gén 18:25) Primeiru, Maromak ho domin haruka ninia Oan-Mane mesak mai iha rai. Jesus halo tuir ninia Aman nia hakarak iha dalan neʼebé loos maski hasoru tentasaun, ema goza nia, no tarata aat nia. Jesus laran-metin nafatin toʼo nia mate iha ai-riin terus nian. (Ebr 2:10) Hodi saran ninia moris perfeitu nuʼudar sakrifísiu, Jesus bele soi ka salva Adão nia bei-oan sira husi sala no mate.—Mt 20:28; Rom 5:6-8.
Keʼe no hetan buat murak husi Bíblia
(Roma 6:3-5) Imi hatene ka lae katak ita hotu neʼebé hetan ona batizmu iha Kristu Jesus, ita hetan batizmu iha nia mate? 4 Entaun, ita hakoi tiha ona hamutuk ho nia liuhusi ita-nia batizmu iha nia mate, atu nuneʼe, hanesan Kristu moris fali husi mate liuhusi Aman nia glória, ita mós tenke laʼo iha moris neʼebé foun 5 Se ita mate ona hanesan nia, ita sei moris fali duni hanesan nia, no iha buat sira-neʼe mak ita sai ida deʼit ho nia.
w08-E 6/15 p. 29 par. 7
Pontu importante husi livru Roma
6:3-5—Batizmu iha Kristu Jesus no batizmu iha nia mate katak sá? Bainhira Jeová hili Jesus nia dixípulu sira hodi haraik espíritu santu, sira sai ida deʼit ho Jesus no sai membru iha kongregasaun nuʼudar Kristu nia isin, no nia mak ulun. (1Ko 12:12, 13, 27; Kol 1:18) Neʼe mak sira-nia batizmu iha Kristu. Ema Kristaun kose mina sira mós hetan “batizmu iha [Kristu] nia mate”, neʼe katak sira halaʼo moris hodi la hanoin an deʼit no husik tiha esperansa kona-ba moris ba nafatin iha rai. Tan neʼe, sira-nia moris mak sakrifísiu ida, hanesan Jesus nia mate, maibé sira-nia mate la iha folin atu sosa fali ema. Sira-nia batizmu iha Kristu nia mate remata kuandu sira mate no moris-hiʼas fali ba lalehan.
(Roma 6:7) Tanba ema neʼebé mate, nia selu ona tusan hotu ba ninia sala.
Iha esperansa ba haʼu-nia beiʼala sira ka lae?
Bainhira ema sira-neʼe hetan moris-hiʼas, sira sei hetan tesi-lia tuir sira-nia hahalok antes sira mate ka lae? Lae, tanba Rom 6:7 hatete: “Ema neʼebé mate, selu ona tusan hotu husi ninia sala.” Bainhira sira mate, sira selu hotu tiha ona sira-nia sala. Entaun, Maromak la tesi lia ba sira-nia hahalok uluk nian. Aban-bainrua nia sei tesi lia ba sira tuir sira-nia hahalok depois sira hetan tiha moris-hiʼas. Sira neʼebé moris hiʼas fali sei iha oportunidade atu halo saida?
18-24 FEVEREIRU
RIKUSOIN HUSI BÍBLIA | ROMA 7-8
“Ita ‘hein namanas’ ka lae?”
(Roma 8:19) Tanba kriasaun hotu hein namanas ba tempu neʼebé Maromak sei hatudu sai ninia oan sira.
Husik Jeová atu lori ita ba liberdade neʼebé loos
17 Apóstolu Paulo hakerek kona-ba liberdade neʼebé aban bainrua Jeová sei fó ba ninia atan sira iha mundu, hodi dehan: “Mundu tomak hein manamanas tempu wainhira sei hatudu Maromak nia oan sira.” Depois nia mós hatete: “Mundu neʼe sei sai husi situasaun atan nian neʼebé sei dodok, hodi halo parte, nuʼudar Maromak nia oan, iha ema neʼebé laʼós atan nia kmanek.” (Rom 8:19-21) Iha eskritura neʼe, liafuan “mundu” mak kona-ba ema neʼebé iha esperansa atu moris ba nafatin iha mundu, no sira sei hetan bensaun kuandu Maromak “sei hatudu” ninia oan kose-mina sira. Tempu neʼe sei komesa kuandu ema kose-mina sira serbisu hamutuk ho Kristu atu halakon ema aat hotu no fó salvasaun ba ema-lubun boot hodi lori sira atu tama ba mundu foun.—Apk 7:9, 14.
(Roma 8:20) Tanba kriasaun sira entrega tiha ona ba moris neʼebé folin-laek, laʼós ho sira-nia hakarak rasik, maibé liuhusi Maromak nia hakarak tanba nia fó esperansa
Haksolok ho ita-nia esperansa
11 Jeová fó “esperansa” ba ema kuandu nia promete katak liuhusi “bei-oan”, nia sei salva ema husi Diabu Satanás, “samea uluk nian”. (Apk 12:9; Gén 3:15) Parte primeiru husi “bei-oan” neʼe mak Jesus Kristu. (Gal 3:16) Jesus nia mate no moris-hiʼas fali fó esperansa ba ema hotu katak sira bele sai livre husi sala no mate. Esperansa neʼe sei komesa sai loos “wainhira sei hatudu Maromak nia oan sira” ka ema kose-mina sira. Jeová sei hatudu sai sira nuʼudar parte segundu husi “bei-oan” bainhira sira serbisu hamutuk ho Kristu atu halakon Satanás nia mundu aat. (Apk 2:26, 27) Ida-neʼe sei lori salvasaun ba bibi seluk neʼebé sai husi terus boot.—Apk 7:9, 10, 14.
(Roma 8:21) katak kriasaun neʼe sei sai livre husi atan ba isin neʼebé dodok, no hetan liberdade neʼebé furak nuʼudar Maromak nia oan sira.
Haksolok ho ita-nia esperansa
12 Kristu nia Ukun ba Tinan Rihun Ida sei lori kmaan ba ema iha “mundu tomak”! Iha tempu neʼebá, Jeová mós sei hatudu sai “Maromak nia oan sira” bainhira sira serbisu hamutuk ho Kristu nuʼudar amlulik sira no fó bensaun ba ema hotu liuhusi Jesus nia sakrifísiu. Ema neʼebé hakruʼuk an ba Kristu nia Ukun, neineik-neineik sira sei “sai husi situasaun atan nian neʼebé sei dodok” ka sai livre husi rezultadu aat hotu husi sala no mate. Sira neʼebé laran-metin nafatin ba Jeová durante Jesus nia Ukun ba Tinan Rihun Ida no laran-metin nafatin kuandu Maromak husik Satanás atu koko ema ba dala ikus, sira-nia naran sei hakerek ba nafatin iha “livru moris nian”. Iha tempu neʼebá, sira sei haksolok ‘nuʼudar Maromak nia oan neʼebé laʼós atan tan’. (Apk 20:7, 8, 11, 12) Ida-neʼe mak esperansa neʼebé furak tebes!
Keʼe no hetan buat murak husi Bíblia
(Roma 8:6) Tanba hanoin kona-ba hakarak isin nian lori ba mate, maibé hanoin kona-ba buat espíritu nian lori ba moris no dame.
Ita hanoin-hetan ka lae?
Saida mak la hanesan entre “hanoin buat isin nian” no “hanoin buat espíritu nian”? (Rom 8:6)
Ema neʼebé hanoin buat isin nian tau fokus ba hakarak isin nian neʼebé sala. Nia iha interese deʼit no koʼalia la para kona-ba hakarak isin nian. Halo hanesan neʼe bele lori ba mate. Ema neʼebé hanoin buat espíritu nian tau fokus ba Maromak no ninia hakarak. Nia sei husik espíritu mak book ninia neon. Neʼe lori ba moris no dame.—w16.12, p. 15-17.
(Roma 8:26, 27) Nuneʼe mós, espíritu santu bele ajuda ita iha tempu neʼebé ita fraku. Tanba dala ruma ita la hatene atu husu saida iha ita-nia orasaun. Iha tempu neʼe, espíritu santu bele ajuda ita hodi husu ba Maromak maski ita la iha liafuan atu fó sai ita-nia halerik iha laran. 27 Maibé Maromak neʼebé buka-hatene ema hotu nia laran, nia hatene buat neʼebé ema hatoʼo liuhusi espíritu. Tanba espíritu santu husu buat neʼebé tuir Maromak nia hakarak ba ema santu sira-nia diʼak.
w09-E 11/15 p. 7 par. 20
Orasaun hatudu saida kona-ba ita-nia relasaun ho aman Jeová?
20 Dala ruma, ita la hatene saida mak ita hakarak hatoʼo iha ita-nia orasaun mesak. Paulo hatete: “Ita la hatene harohan loloos, maibé espíritu [santu] rasik harohan hodi tanis hakilar makaʼas hanesan liafuan labele hatoʼo. No [Maromak] Ida neʼebé hatene momoos ema nia fuan hatene buat neʼebé iha espíritu nia laran.” (Rom 8:26, 27) Maromak Jeová book ema atu hakerek orasaun barak iha Bíblia laran. No mós, Maromak simu orasaun sira-neʼe nuʼudar orasaun neʼebé ita halo kuandu ita la hatene saida mak ita bele hatete iha orasaun. Maromak hatene ita, no nia hatene orasaun neʼebé ninia espíritu book ema atu hakerek iha Bíblia. Maromak Jeová hatán ba buat neʼebé ita husu kuandu espíritu santu rasik “harohan” ba ita. Maibé, nuʼudar ita hatene diʼak liután kona-ba Maromak nia Liafuan, sei fasil liu ba ita atu hatene saida mak ita bele hatete iha orasaun.
25 FEVEREIRU–3 MARSU
RIKUSOIN HUSI BÍBLIA | ROMA 9-11
“Ai-knanoik kona-ba ai-oliveira”
(Roma 11:16) Liután neʼe, se parte husi trigu neʼebé masa ona mak sai santu tanba neʼe mak trigu primeiru neʼebé hasaʼe ona nuʼudar sakrifísiu, neʼe katak masa tomak neʼe mak santu. No se ai nia abut mak santu, neʼe katak ninia sanak hotu mós santu.
‘Ah, matenek Maromak nian kleʼan tebetebes!’
13 Apóstolu Paulo kompara sira neʼebé atu sai parte ba Abraão nia bei-oan nuʼudar ai-sanak ai-oliveira nian. (Rom 11:21) Ai-oliveira diʼak neʼe reprezenta oinsá mak Maromak nia hakarak kona-ba aliansa Abraão nian sei sai loos. Ai neʼe nia abut mak santu no reprezenta Maromak Jeová nuʼudar ida neʼebé fó moris ba Israel espirituál nian. (Isa 10:20; Rom 11:16) Ai-lolon reprezenta Jesus nuʼudar parte primeiru ba Abraão nia bei-oan. Ai-sanak sira reprezenta sira hotu neʼebé sai parte segundu ba Abraão nia bei-oan.
(Roma 11:17) Maibé, Maromak tesi tiha ai-oliveira sanak balu, no maski imi mak ai-oliveira fuik nia sanak, nia tutan fali imi ba ai neʼe no imi mós hetan buat diʼak husi ai neʼe nia abut.
(Roma 11:20, 21) Neʼe loos! Maromak tesi tiha sira tanba sira la iha fiar, maibé imi hamriik tanba imi-nia fiar. Tan neʼe, keta loko an, maibé kuidadu bá. 21 Tanba se Maromak la husik ai-sanak loloos atu kontinua moris, nia mós sei la husik imi atu kontinua moris se imi halo hanesan sira.
‘Ah, matenek Maromak nian kleʼan tebetebes!’
15 Ikusmai, Maromak Jeová halo saida atu kumpre ninia hakarak? Paulo esplika katak Maromak uza ai-sanak husi ai-oliveira fuik no hatama fali, ka tutan, ba ai-lolon husi ai-oliveira diʼak atu troka sanak sira neʼebé tohar tiha ona. (Lee Roma 11:17, 18.) Entaun, ema kristaun kose-mina husi ema jentiu, porezemplu ema kristaun husi nasaun jentiu sira iha kongregasaun Roma, sai hanesan ai-sanak neʼebé tutan ba ai-oliveira diʼak neʼe. Hanesan neʼe sira sai parte ba Abraão nia bei-oan. Uluk, sira hanesan ai-sanak ai-oliveira fuik nian, neʼebé la iha oportunidade atu sai parte ba aliansa espesiál neʼe. Maibé, Maromak Jeová loke dalan ba sira atu sai ema Israel espirituál nian.—Rom 2:28, 29.
(Roma 11:25, 26) Maun-alin sira, haʼu hakarak imi atu hatene segredu santu tuirmai neʼe, atu nuneʼe imi la sai matenek iha imi-nia matan rasik: Ema Izraél balu lakohi rona. Ida-neʼe sei kontinua toʼo númeru ba ema husi nasaun seluk nian sai kompletu ona, 26 no iha dalan neʼe mak ema Izraél hotu sei hetan salvasaun. Hanesan hakerek nanis ona: “Salvadór sei mai husi Siaun no nia sei halo Jacob nia bei-oan sira husik sira-nia hahalok aat.
‘Ah, matenek Maromak nian kleʼan tebetebes!’
19 Sin, Maromak Jeová kumpre daudauk ninia hakarak liuhusi Israel espirituál nian iha dalan neʼebé furak tebes. (Rom 2:29) Hanesan Paulo dehan, “Israel tomak sei hetan maksoin”. (Rom 11:26) Tuir tempu neʼebé Maromak Jeová deside ona, “Israel tomak”, katak ema Israel espirituál nian hotu, sei serbí nuʼudar liurai no amlulik iha lalehan. La iha buat ida neʼebé bele hapara Maromak Jeová nia hakarak atu sai loos!
Keʼe no hetan buat murak husi Bíblia
(Roma 9:21-23) Imi la hatene ka? Badaen iha kbiit atu uza rai-mean ida deʼit hodi halo sanan-rai neʼebé uza iha tempu espesiál, no mós sanan-rai neʼebé uza iha tempu baibain, loos ka lae? 22 Nuneʼe mós ho Maromak. Maromak hakarak hatudu sai ninia laran-nakali ba ema no halo ema hatene ninia kbiit, maibé, nia tahan ho pasiénsia ba ema neʼebé hanesan sanan-rai no merese atu halakon tiha. 23 Nia halo ida-neʼe atu hatudu sai ninia glória neʼebé boot ba ema neʼebé hanesan sanan-rai neʼebé nia hatudu laran-sadiʼa, no sira sei simu kolen neʼebé nia prepara ona ba sira.
Simu Jeová nia dixiplina atu hadiʼa ita-nia hahalok
5 Se ema ruma ulun-toos no lakohi simu Jeová nia matadalan, oinsá mak Jeová sei uza ninia kbiit nuʼudar Badain Sanan-Rai? Hanoin toʼok, kuandu badain sanan-rai ida la kontente ho sanan neʼebé nia halo, nia halo saida? Karik nia halo fali seluk, ka soe deʼit! Baibain, kuandu nia halo sanan neʼebé la diʼak, ida-neʼe tanba ninia sala. Maibé, ita-nia Badain Sanan-Rai Jeová nunka halo sala. (Deu 32:4) Kuandu ema ida la simu Jeová nia matadalan, ema neʼe mak sala. Jeová bele halo mudansa kona-ba saida mak nia halo ba ema, neʼe depende oinsá sira simu ka la simu Ninia matadalan. Ema neʼebé simu Jeová nia matadalan, Jeová bele uza sira iha dalan neʼebé diʼak. Porezemplu, ema kristaun kose-mina sira sai hanesan “sanan laran-luak nian”, neʼebé ikusmai Maromak bele uza nuʼudar “sanan ba buat kmanek”. Maibé, ema neʼebé la halo tuir Jeová sei sai hanesan “sanan laran-nakali nian atu sobu rahun hotu”.—Rom 9:19-23.
(Roma 10:2) Tanba haʼu fó sasin kona-ba sira katak sira laran-manas ba Maromak, maibé laʼós tuir koñesimentu neʼebé loos.
it-1-E p. 1260 par. 2
Laran-moras
Laran-manas neʼebé sala. Ema ida karik laran-manas tebes, ka laran-moras, kona-ba buat ruma, maibé neʼe sala no la halo Maromak kontente. Tuir loloos, ema Judeu barak iha apóstolu sira-nia tempu mós hanesan neʼe. Sira hakaʼas an atu sai ema laran-loos liuhusi sira-nia hahalok rasik tuir Moisés nia Ukun-Fuan. Maibé Paulo hatudu katak sira-nia laran-manas neʼe mak sala tanba sira la iha koñesimentu loos. Tan neʼe, sira la sai ema laran-loos tuir Maromak nia haree. Sira tenke komprende katak sira sala no tenke fila fali ba Maromak liuhusi Kristu atu bele sai ema laran-loos no sai livre husi kastigu Ukun-Fuan nian. (Rom 10:1-10) Saul husi Tarsu mak ema ida hanesan neʼe, nia sai laran-manas tebes ba relijiaun Judeu nian toʼo nia “fó terus makaʼas ba Maromak nia kongregasaun no koko atu halakon kongregasaun neʼe”. Nia badinas atu halo tuir Ukun-Fuan ho didiʼak tan neʼe nia hatete: “Haʼu fó ona prova katak haʼu sempre halo hahalok loos.” (Gal 1:13, 14; Flp 3:6) Maibé ninia laran-moras ba relijiaun Judeu nian mak la loos. Maski nuneʼe, nia mak ema laran-moos, tan neʼe Jeová hatudu laran-diʼak neʼebé boot ba nia liuhusi Kristu hodi halo nia laʼo iha dalan loos atu adora Maromak.—1Ti 1:12, 13.