Oinsá atu iha dame nafatin ho Ita-nia família

Bainhira ema naʼin-rua kaben, sira harii umakain foun ida. Maski Ita nafatin hadomi no respeitu Ita-nia inan-aman, maibé agora, Ita-nia kaben mak importante liu ba Ita. Maibé karik Ita-nia família la hanoin hanesan neʼe. Bíblia nia matadalan bele ajuda Ita atu tetu didiʼak atu iha dame nafatin ho Ita-nia família, no mós ajuda Ita hametin moris kaben nian.

1 IHA HANOIN NEʼEBÉ LOOS KONA-BA ITA-NIA FAMÍLIA

BUAT NEʼEBÉ BÍBLIA HANORIN: “Hatudu respeitu ba ó-nia inan no aman.” (Éfeso 6:2) Maski Ita boot ona, maibé Ita presiza nafatin hatudu respeitu ba inan-aman. No Ita-nia kaben mós presiza fó tempu ba ninia inan-aman. Bíblia hatete katak “domin la laran-moras”, tan neʼe keta sai laran-moras tanba Ita-nia kaben iha relasaun besik ho ninia família.—1 Korinto 13:4; Galásia 5:26.

BUAT NEʼEBÉ ITA BELE HALO:

• Labele dehan liafuan sira hanesan: “Ó-nia família sempre hatún haʼu” ka “Ó-nia inan la gosta buat hotu neʼebé haʼu halo”

• Koko atu komprende Ita-nia kaben nia hanoin

2 DALA RUMA PRESIZA HALO DESIZAUN NEʼEBÉ METIN

BUAT NEʼEBÉ BÍBLIA HANORIN: “Mane ida sei husik nia aman no inan no nia tenke moris hamutuk ho nia feen, no sira sei sai isin ida deʼit.” (Gênesis [Kejadian] 2:24) Maski Ita kaben ona, maibé karik Ita-nia inan-aman hakarak atu tau matan nafatin ba Ita no sira hakarak atu mete iha Ita-nia moris kaben nian.

Ita ho Ita-nia kaben presiza halo desizaun kona-ba atu halo tuir sira iha buat hotu ka lae no depois fó-hatene imi-nia desizaun ba sira. Koʼalia nakloke maibé ho respeitu. (Provérbios [Amsal] 15:1) Ho haraik-an, laran-maus, no pasiénsia, Ita bele nafatin iha relasaun besik ho Ita-nia família no kontinua atu “tahan malu iha domin”.—Éfeso 4:2.

BUAT NEʼEBÉ ITA BELE HALO:

• Se Ita hanoin barak tanba família sira mete demais iha imi-nia moris, buka tempu diʼak atu koʼalia ba Ita-nia kaben kona-ba ida-neʼe

• Koʼalia ba malu no halo desizaun kona-ba oinsá atu rezolve problema sira-neʼe