LISAUN 4

Dada atensaun ba eskritura

Mateus 22:41-45

SAIDA MAK ITA PRESIZA HALO: Prepara rona-naʼin nia hanoin antes Ita lee eskritura ida.

Hanoin kona-ba razaun Ita lee eskritura. Koʼalia iha dalan neʼebé dada rona-naʼin nia atensaun ba eskritura hodi ajuda sira komprende pontu importante husi versíkulu neʼe.

Haree didiʼak ba situasaun ka kontestu. Fó-hatene loloos sé mak koʼalia no hakerek liafuan sira iha eskritura neʼe.
Temi katak Bíblia mak Maromak nia Liafuan. Kuandu Ita koʼalia ho ema neʼebé fiar ba Maromak, diʼak atu dada sira-nia atensaun ba Bíblia nuʼudar “Maromak nia Liafuan” hodi hatudu katak só Maromak deʼit mak hun ba matenek.
Book rona-naʼin atu hakarak lee eskritura. Husu pergunta neʼebé ninia resposta bele hetan iha eskritura, temi problema ida neʼebé bele rezolve hodi uza eskritura, ka temi prinsípiu ida no loke eskritura neʼebé sei esplika kona-ba ida-neʼe.

Hanoin saida mak Ita-nia rona-naʼin hatene ona kona-ba tópiku no eskritura neʼe. Uza dalan foun atu esplika eskritura neʼebé ema hatene ona, atu ema bele komprende diʼak liután.