Dada atensaun ba eskritura antes lee

BÍBLIA mak hun ba hanorin hotu neʼebé hatoʼo iha reuniaun sira. Nuneʼe mós kuandu ita halo serbisu haklaken, ita hanorin hodi uza Bíblia. Maibé, hodi bele hanorin Bíblia ho didiʼak, importante atu ita hatene oinsá atu dada ema nia atensaun ba eskritura antes ita lee ida-neʼe.

Maibé, temi deʼit eskritura atu lee, ka husu ema atu lee hamutuk, neʼe la toʼo. Kuandu ita atu koʼalia buat ruma antes atu lee eskritura ida, ita presiza hanoin kona-ba objetivu rua tuirmai neʼe: (1) Book rona-naʼin atu hakarak lee, no (2) ajuda rona-naʼin atu hatene tansá ita loke eskritura neʼe. Mai ita koʼalia kona-ba dalan oioin atu halo nuneʼe.

Husu pergunta. Ida-neʼe mak dalan diʼak, liuliu se rona-naʼin seidauk hatene loloos resposta. Koko toʼok atu husu pergunta iha dalan neʼebé ajuda ema atu hanoin didiʼak. Jesus halo nuneʼe. Kuandu ema farizeu sira hasoru Jesus iha templu hodi koko nia kona-ba Eskritura, Jesus husu ba sira: “Imi hanoin oinsá kona-ba Kristu? Nia sé-nia oan?” Sira hatán: “David.” Jesus husu tan: “Entaun, tansá mak liuhusi espíritu santu, David bolu nia Naʼi?” Tuirmai, Jesus temi fali liafuan husi Salmo (Mazmur) 110:1. Kuandu Jesus koʼalia hanesan neʼe, ema farizeu sira nonook kedas, maibé ema-lubun sai kontente hodi rona nia.—Mateus 22:41-46.

Iha serbisu haklaken, ita bele husu pergunta hanesan neʼe: “Ita hotu iha naran, loos ka lae? Entaun, Maromak mós iha naran rasik ka lae? Ita bele hetan resposta iha Salmo (Mazmur) 83:18.” “Tuir ita-nia hanoin, loron ida ita sei iha governu ida neʼebé ukun mundu tomak ka lae? Mai ita lee resposta iha Daniel 2:44.” “Bíblia koʼalia duni kona-ba situasaun ohin loron ka lae? Haree toʼok 2 Timóteo 3:1-5 no kompara ho situasaun ohin loron.” “Tuir ita-nia hanoin, aban-bainrua ema nia terus no mate sei lakon ba nafatin ka lae? Bíblia hatán kona-ba neʼe iha Apokalipse 21:4, 5.”

Kuandu ita hatoʼo diskursu, maski ita uza eskritura neʼebé rona-naʼin lee beibeik ona, maibé ita bele nafatin dada sira-nia atensaun atu lee fali eskritura neʼe hodi uza didiʼak pergunta sira. Oinsá mak ita bele halo ida-neʼe? Husu pergunta neʼebé kona sira-nia laran. Maski ita koʼalia daudaun buat neʼebé rona-naʼin gosta, maibé kuandu ita lee eskritura neʼebé sira rona beibeik, dala barak sira komesa hanoin fali buat seluk. Tan neʼe, ita presiza hanoin didiʼak liafuan neʼebé ita sei koʼalia hodi ema la sai baruk atu lee eskritura sira-neʼe.

Fó sai problema ida. Ita mós bele temi problema ida no tuirmai lee eskritura neʼebé koʼalia kona-ba oinsá atu rezolve problema neʼe. Maibé kuidadu atu la halo rona-naʼin hanoin katak eskritura ida deʼit bele rezolve hotu problema neʼe, tanba dala barak eskritura ida fó sai matadalan balu deʼit kona-ba problema ida. Maibé, antes ita lee eskritura ida, diʼak atu husu rona-naʼin atu buka-hatene matadalan saida mak eskritura neʼe fó sai.

Hanesan neʼe mós, ita bele fó sai matadalan ida kona-ba hatudu hahalok diʼak, no tuirmai uza ezemplu iha Bíblia laran atu hatudu tanbasá mak diʼak atu halo tuir matadalan neʼe. Se eskritura neʼe iha pontu rua (ka liu), ita bele husu uluk rona-naʼin atu buka-hetan pontu sira-neʼe. No ita mós bele book rona-naʼin nia hanoin hodi temi situasaun ida no fó sai dalan oioin kona-ba oinsá atu hadiʼa situasaun neʼe, no tuirmai loke eskritura hodi sira bele haree dalan ida-neʼebé mak loos.

Temi Bíblia nuʼudar Maromak nia Liafuan. Se ita-nia rona-naʼin gosta ona atu rona ba informasaun neʼebé ita hatoʼo no ita mós temi ona ema oioin nia hanoin kona-ba neʼe, karik ita bele uza deʼit liafuan simples atu dada atensaun ba eskritura. Porezemplu, ita bele dehan: “Haree toʼok saida mak Maromak nia Liafuan hatete kona-ba neʼe.” Hodi koʼalia hanesan neʼe, ita hatudu katak informasaun neʼebé ita sei lee mak importante liu.

Atu hakerek Bíblia, Maromak Jeová uza ema, hanesan João, Lucas, Paulo, no Pedro. Maibé sira mak hakerek-naʼin deʼit, no liafuan iha Bíblia laran mai husi Jeová. Tan neʼe, kuandu ita atu hatudu eskritura ba ema neʼebé seidauk estuda Bíblia, no hatete deʼit “Pedro hakerek” ka “Paulo dehan”, neʼe la toʼo hodi book sira-nia laran. Kuandu profeta Jeremias hatoʼo Jeová nia lia-menon, Jeová haruka Jeremias atu hahú ninia mensajen hodi hatete: “Rona ba Jeová nia liafuan.” (Jeremias [Yeremia] 7:2; 17:20; 19:3; 22:2) Tan neʼe, kuandu ita haklaken ka hatoʼo diskursu iha reuniaun, hakaʼas an atu temi Bíblia nuʼudar Maromak nia liafuan.

Fó sai informasaun kona-ba eskritura neʼebé ita atu lee. Kuandu ita hili liafuan atu dada rona-naʼin nia atensaun antes lee eskritura ida, diʼak atu hatene lai informasaun kona-ba eskritura neʼe. Dala ruma ita bele konta deʼit kona-ba situasaun neʼebé mosu antes ka depois eskritura neʼe. No dala barak liafuan antes no depois eskritura bele kona dalan neʼebé ita sei koʼalia atu dada rona-naʼin nia atensaun. Porezemplu, liafuan neʼebé ita hatoʼo antes lee Job nia liafuan karik sei la hanesan ho liafuan neʼebé ita hatoʼo antes lee liafuan husi Job nia belun falsu sira. Ezemplu ida tan: Maski Lucas mak hakerek livru Apóstolu, maibé livru neʼe temi liafuan husi ema oioin, hanesan Tiago, Pedro, Paulo, Filipe, Estevão, Gamaliel, anju sira no ema judeu neʼebé laʼós ema kristaun. Entaun, hanoin toʼok kona-ba sé mak koʼalia iha eskritura neʼebé ita atu lee. La haluha katak parte balu iha livru Salmos laʼós David mak hakerek, no parte balu husi livru Provérbios laʼós Salomão mak hakerek. Diʼak mós atu hatene eskritura neʼebé ita sei lee hakerek ba sé no koʼalia kona-ba saida.

Esplika kona-ba situasaun no tempu. Ita bele halo ida-neʼe atu hatudu katak situasaun iha Bíblia nia tempu hanesan duni ho situasaun ohin loron nian neʼebé ita koʼalia daudaun. Dala ruma karik ema sei la komprende eskritura neʼebé ita lee se ita la esplika uluk kona-ba situasaun neʼe. Porezemplu, kuandu ita uza Ebreu 9:12, 24 atu koʼalia kona-ba Jesus nia sakrifísiu, karik antes atu lee, ita presiza esplika uitoan kona-ba Fatin Santu Liu Hotu iha tenda santu laran, neʼebé hatudu nanis kona-ba fatin neʼebé Jesus tama bainhira nia saʼe ba lalehan. Maibé, kuidadu mós atu labele hatoʼo informasaun barak demais toʼo halo ema sente bilán.

Atu aumenta ita-nia matenek hodi dada rona-naʼin nia atensaun ba eskritura neʼebé ita sei lee, diʼak atu haree ezemplu husi sira neʼebé iha esperiénsia ona. Buka-hatene oinsá sira uza dalan oioin atu dada rona-naʼin nia atensaun antes sira lee eskritura. Kuandu ita prepara ita-nia diskursu, hili eskritura sira neʼebé importante liu no hanoin kona-ba tansá mak ita sei lee eskritura sira-neʼe. Planu didiʼak kona-ba saida mak ita sei koʼalia antes lee eskritura sira-neʼe. Tuirmai, ita bele halo hanesan neʼe ba eskritura sira seluk neʼebé ita sei uza iha ita-nia diskursu. Hodi halo nuneʼe, ita bele ajuda rona-naʼin atu hafolin Maromak nia Liafuan.