Fó laran-manas atu uza Bíblia

ITA hakarak atu dada ema hotu nia atensaun ba Maromak nia Liafuan, Bíblia. Tanba liafuan neʼebé ita haklaken mak Maromak nian, neʼe duni ita hakarak ema hatene katak buat neʼebé ita koʼalia laʼós husi ita-nia hanoin. Ema presiza tau fiar ba Maromak nia Liafuan.

Iha serbisu haklaken. Antes bá haklaken, diʼak atu prepara eskritura ida ka balu atu fahe ba ema. Maski ita uza liafuan badak deʼit hodi fahe ita-nia livru, diʼak mós atu hili eskritura ida neʼebé kona tópiku neʼebé ita sei koʼalia. Bíblia iha kbiit boot liu fali ita-nia liafuan rasik, no bele book ema haraik-an hodi buka-hatene lia-loos. Nuneʼe, se situasaun ida la husik ita atu loke Bíblia, karik ita bele temi liafuan balu husi Bíblia. Iha Jesus no apóstolu sira-nia tempu, besik ema hotu la iha Bíblia. Maski nuneʼe, Jesus no apóstolu sira temi beibeik eskritura barak. Ita mós presiza hakaʼas an atu dekór eskritura sira hodi uza iha haklaken ka temi fali kuandu ita koʼalia.

Kuandu ita iha oportunidade atu lee eskritura husi Bíblia, diʼak atu kaer Bíblia hodi hatudu ba uma-naʼin atu lee tuir. Se uma-naʼin mós bele loke ninia Bíblia no lee tuir, ida-neʼe sei ajuda liután nia atu simu liafuan neʼebé nia rasik lee.

Maibé, labele haluha katak ema barak neʼebé tradús Bíblia, sira tradús liafuan balu la tuir Bíblia orijinál. Bíblia barak hasai tiha Maromak nia naran, no tradús iha dalan neʼebé halo susar ba ema atu hatene lia-loos kona-ba ema mate nia kondisaun ka Maromak nia hakarak ba rai. Atu ajuda ema komprende liután kona-ba neʼe, karik ita presiza uza tradusaun Bíblia oioin, ka kompara tradusaun foun nian ho tradusaun uluk nian. Livru Bertukar Pikiran mengenai Ayat-Ayat Alkitab sei ajuda ita atu kompara oinsá Bíblia oioin tradús liafuan importante husi eskritura neʼebé ita uza beibeik. Se ema neʼe hakarak hatene lia-loos, nia sei kontente atu simu informasaun hanesan neʼe.

Iha reuniaun kristaun. Irmaun neʼebé hatoʼo diskursu presiza fó laran-manas ba rona-naʼin atu loke sira rasik nia Bíblia. Ida-neʼe lori diʼak ba rona-naʼin iha dalan oioin. Porezemplu, ida-neʼe ajuda sira atu see tilun ba tópiku neʼebé sira rona daudauk. Kuandu rona-naʼin lee rasik eskritura, neʼe sei book duni sira-nia neon no laran. No mós, hodi halo nuneʼe bele ajuda ema foun atu hatene katak ita-nia fiar nia hun mai husi Bíblia.

Atu ita-nia rona-naʼin lee tuir eskritura iha sira-nia Bíblia, ita rasik presiza fó laran-manas ba sira atu loke Bíblia. Dalan diʼak ida mak hodi husu rona-naʼin atu loke rasik sira-nia Bíblia no lee hamutuk ho ita.

Se ita hatoʼo diskursu, karik ita mak hili eskritura sira neʼebé ita atu lee. Entaun, hili eskritura sira neʼebé ajuda ita atu esplika pontu neʼebé importante liu. Tuirmai, ita mós bele aumenta eskritura balu tan neʼebé apoia ita-nia informasaun.

Maibé, hodi konvida deʼit rona-naʼin atu loke Bíblia, ka temi livru, kapítulu, no versíkulu, ida-neʼe la toʼo. Se ita foin lee eskritura ida no loke fali ida seluk antes sira seidauk hetan eskritura uluk nian, ikusmai sira sai baruk atu loke Bíblia. Tan neʼe, haree didiʼak rona-naʼin sira. Kuandu rona-naʼin barak hetan ona eskritura, neʼe mak tempu diʼak atu lee.

Entaun, importante ba ita atu prepara didiʼak. Karik ita bele temi eskritura neʼebé ita sei lee, no tuirmai koʼalia uitoan kona-ba eskritura neʼe nuʼudar ita hein sira atu loke Bíblia. Kuandu ita fó tempu ba rona-naʼin atu loke Bíblia, neʼe katak ita presiza hamenus informasaun neʼebé ita sei hatoʼo, maibé ida-neʼe ajuda sira hetan buat diʼak husi ita-nia diskursu.