Tanbasá mak ita tenke hatudu respeitu ba sira neʼebé mak ita-nia ulun?

1, 2. (a) Dala ruma ita hotu sente laran-rua kona-ba saida? (b) Ita sei buka-hatene kona-ba pergunta saida deʼit?

ITA haree tiha ona, kuandu aman ida husu nia oan atu halo buat ruma neʼebé nia oan lakohi halo? Labarik kiʼik neʼe sente oinsá? Karik ita haree husi nia oin katak nia sente laran-rua kona-ba halo tuir ka lae. Nia rona nia aman nia liafuan, no nia hatene katak nia tenke hatudu respeitu ba nia aman nuʼudar família nia ulun. Maibé, nia lakohi duni atu halo tuir. Dala ruma ita hotu sente laran-rua kona-ba halo tuir ka lae.

² Tuir loloos, baibain la fasil atu ita hatudu respeitu ba ema neʼebé mak ita-nia ulun. Dala ruma Ita sente susar ka lae, atu hatudu respeitu ba sira neʼebé iha direitu atu haruka Ita atu halo buat ruma? Se Ita sente nuneʼe, Ita la mesak. Kompara ohin loron ho tempu uluk, agora ita moris iha tempu neʼebé ema barak liu la hatudu respeitu ba sira neʼebé iha pozisaun nuʼudar ulun. Maibé, Bíblia hatete katak ita hotu presiza hatudu respeitu ba sira neʼebé iha kbiit atu ukun ita. (1 Pedro 2:17) Tuir loloos, importante duni atu halo ida-neʼe se ita hakarak hela nafatin iha Maromak nia domin. Entaun, mai ita hanoin kona-ba pergunta balun. Tanbasá mak susar atu ita hatudu respeitu ba sira neʼebé mak ita-nia ulun? Tanbasá mak Maromak Jeová hakarak ita atu halo ida-neʼe, no saida mak bele ajuda ita atu halo tuir sira neʼebé mak ita-nia ulun? Ikusmai, iha dalan saida deʼit mak ita bele hatudu respeitu ba sira?

TANBASÁ MAK SUSAR ATU HATUDU RESPEITU BA SIRA NEʼEBÉ MAK ITA-NIA ULUN?

3, 4. Oinsá mak ema sai sala-naʼin no la perfeitu? Nuʼudar sala-naʼin, tanbasá mak susar mai ita atu hatudu respeitu ba sira neʼebé mak ita-nia ulun?

³ Mai ita haree razaun rua kona-ba tanbasá mak susar mai ita atu hatudu respeitu ba sira neʼebé mak ita-nia ulun. Primeiru, ita hotu la perfeitu, segundu, sira neʼebé mak ita-nia ulun mós la perfeitu. Ema sai sala-naʼin no la perfeitu hahú husi tempu uluk iha jardín Eden, kuandu Adão no Eva kontra hasoru Maromak nia kbiit nuʼudar sira-nia ukun-naʼin. Tan neʼe, sala hahú husi tempu neʼebé sira kontra hasoru Maromak. Toʼo ohin loron ita hotu moris mai ho hakarak atu la halo tuir.​—Gênesis 2:​15-​17; 3:​1-7; Salmo 51:5; Roma 5:​12.

⁴ Tanba ita sala-naʼin, fasil mai ita hotu atu sai foti-an no loko-an, maibé susar ba ita hotu atu hatudu haraik-an. Nuneʼe ita presiza hakaʼas an atu haburas hahalok haraik-an no hatudu neʼe nafatin. No maski ita serbí Maromak ho laran-metin ba tempu kleur, dala ruma karik ita hatudu hahalok foti-an no loko-an. Porezemplu, hanoin toʼok kona-ba Corá. Kuandu Maromak Jeová nia povu iha susar nia laran, Corá laran-metin nafatin ba sira. Maibé, nia hakarak tebes atu iha kbiit neʼebé laʼós ninian no hodi la moe nia soran povu atu kontra Moisés, mane ida neʼebé laran-maus liu hotu iha tempu neʼebá. (Números 12:3; 16:​1-3) No mós, hanoin toʼok kona-ba Liurai Uzias. Tanba nia foti-an, nia tama iha Maromak Jeová nia templu no halaʼo knaar sagradu neʼebé tuir loloos amlulik deʼit mak bele halo. (2 Crônicas 26:16-​21) Mane sira-neʼe hetan kastigu neʼebé todan tanba sira la halo tuir. Husi sira-nia hahalok aat ita haree katak ita presiza luta hasoru hahalok foti-an tanba ida-neʼe bele hanetik ita atu la hatudu respeitu ba sira neʼebé mak ita-nia ulun.

5. Iha dalan saida deʼit mak ema neʼebé la perfeitu uza sala sira-nia kbiit?

⁵ No mós, ema neʼebé la perfeitu neʼebé sai nuʼudar ulun halo buat barak neʼebé halakon ema nia respeitu ba sira-nia pozisaun. Sira barak hanehan ema, trata aat ka haterus ema. Tuir loloos, iha ema nia istória dala barak liu hatudu kbiit-naʼin sira neʼebé uza sala sira-nia kbiit, ka podér. (Eclesiastes 8:9) Porezemplu, uluk kuandu Maromak Jeová hili Saul atu sai liurai, nia mak ema diʼak no haraik-an. Maibé, nia sai foti-an no laran-­moras toʼo nia fó-terus ba David neʼebé laran-metin ba Maromak. (1 Samuel 9:20, 21; 10:20-22; 18:​7-​11) Ikusmai David sai liurai neʼebé diʼak liu iha rai-Izraél. Maibé nia uza sala nia kbiit kuandu nia hadau mane ida nia feen, mane neʼe mak ema Hitita naran Urias. No maski Urias la halo sala ida, David arranja nia atu tuir funu no tau nia iha inimigu nia oin hodi nuneʼe sira oho nia. (2 Samuel 11:​1-​17) Loos duni, tanba kbiit-naʼin la perfeitu susar tebes ba sira atu halaʼo sira-nia kbiit iha dalan neʼebé diʼak. No kuandu sira neʼebé iha kbiit la hatudu respeitu ba Maromak Jeová, sira sei ukun iha dalan neʼebé aat liután. Polítiku-naʼin ida husi rai-Inglaterra esplika kona-ba amu-papa balun husi relijiaun katóliku neʼebé organiza atu fó-terus ba povu. Nia hatete: “Kbiit bele estraga, no kbiit tomak estraga buat hotu.” Hodi hanoin kona-ba ema nia istória kona-ba kbiit-naʼin sira, mai ita hanoin ba pergunta ida-neʼe: Tanbasá ita tenke hatudu respeitu ba sira neʼebé mak ita-nia ulun?

TANBASÁ MAK ITA HATUDU RESPEITU BA SIRA NEʼEBÉ MAK ITA-NIA ULUN?

6, 7. (a) Ita-nia domin ba Maromak Jeová book ita atu halo saida? Tanbasá mak ita hakruʼuk ba Maromak nia ukun? (b) Oinsá mak ita bele banati-tuir Jesus nia ezemplu?

⁶ Iha razaun importante neʼebé book ita atu hatudu respeitu ba sira neʼebé mak ita-nia ulun. Razaun sira-neʼe mak tanba ita hadomi Aman Jeová, ita-nia maluk sira, no ida-neʼe sei lori diʼak ba ita-nia an. Tanba ita hadomi Maromak Jeová liu buat hotu-hotu, ita hakarak halo nia laran-kontente. (Provérbios 27:11; Marcos 12:29, 30) Ita hatene katak nia mak iha direitu atu ukun lalehan no rai. Maibé iha Eden, Satanás hasaʼe lia kona-ba Maromak nia direitu atu ukun no lia neʼe kontinua toʼo agora. Rezultadu mak ohin loron ema barak liu apoia Satanás no lakohi simu Maromak Jeová nia ukun. Ita kontente tebes atu apoia Maromak Jeová nia direitu atu ukun. Kuandu ita lee liafuan neʼebé kapás iha Apokalipse 4:​11, liafuan hirak-neʼe kona loos ita-nia laran. Ita hatene ho klaru katak Maromak Jeová mak iha duni direitu nuʼudar Ukun-Naʼin iha lalehan no rai! Ita apoia duni Maromak Jeová nia direitu atu ukun, hodi simu no hakruʼuk ba nia ukun iha ita-nia moris loron-loron.

⁷ Atu hatudu respeitu neʼebé loos ba Maromak Jeová neʼe katak halo tuir nia iha buat hotu. Ita prontu atu halo tuir ho laran tanba ita hadomi Maromak Jeová. Maibé, sei mosu duni situasaun ruma neʼebé susar tebes ba ita atu halo tuir. Se nuneʼe, hanesan labarik kiʼik iha parágrafu primeiru, ita presiza aprende atu hakruʼuk an. Ita hanoin fali katak Jesus hakruʼuk ba nia Aman nia hakarak, maski susar atu halo ida-neʼe. Nia hatete ba nia Aman: “Halo tuir laʼós haʼu-nia hakarak, maibé Ita-nian bá.”​—Lucas 22:42.

8. (a) Ohin loron hakruʼuk ba Maromak Jeová nia ukun katak sá? Maromak Jeová sente oinsá kona-ba ida-neʼe? (b) Saida mak bele ajuda ita atu rona ba konsellu no simu dixiplina? (Haree “Rona ba konsellu no simu dixiplina bá”.)

⁸ Ohin loron Maromak Jeová la koʼalia ba ita ida-idak; maibé nia uza ninia Liafuan no ema balun neʼebé reprezenta nia iha mundu neʼe. Tan neʼe, ita hatudu katak ita hakruʼuk ba Maromak Jeová nia ukun hodi hatudu respeitu ba ema neʼebé nia hili nuʼudar ita-nia ulun, no mós nia husik sira atu kaer pozisaun neʼe. Porezemplu, se ita kontra hasoru ema sira-neʼe hodi lakohi simu konsellu no dixiplina neʼebé sira fó liuhusi Eskritura, ita sei hakanek Maromak. Kuandu ema Izraél muramura no kontra hasoru Moisés, iha Maromak Jeová nia haree sira kontra hasoru nia.​—Números 14:26, 27.

9. Tanbasá mak ita-nia domin ba ita-nia maluk sei book ita atu hatudu respeitu ba ema neʼebé Maromak hili atu tau matan ita? Fó ezemplu kona-ba ida-neʼe.

⁹ No mós, ita hatudu respeitu ba sira neʼebé mak ita-nia ulun tanba ita hadomi ita-nia maluk. Oinsá? Hanoin toʼok katak Ita mak soldadu iha tropa ida. Atu tropa ida-neʼe bele manán, ida-neʼe depende ba soldadu ida-idak atu serbisu hamutuk, halo tuir, no hatudu respeitu ba sira neʼebé iha pozisaun nuʼudar sira-nia ulun. Se Ita la halo tuir hodi kontra sira neʼebé iha kbiit ka pozisaun nuʼudar ulun, karik Ita-nia maluk soldadu hotu bele hetan perigu. Maski ohin loron ema nia tropa hamosu problema no halo situasaun runguranga iha mundu, maibé Maromak Jeová nia tropa halo diʼak deʼit ba ema. Bíblia temi dala atus ba atus katak nia mak “Naʼi funu-naʼin”. (Roma 9:29) Nia mak komandante ba anju rihun ba rihun neʼebé iha forsa boot. No mós, dala ruma Maromak Jeová bolu nia atan sira iha mundu nuʼudar tropa sira. (Salmo 68:11; Ezequiel 37:1-10) Se ita kontra hasoru ema neʼebé Maromak Jeová hili nuʼudar ita-nia ulun karik ita-nia maluk soldadu espirituál nian bele hetan perigu. Kuandu ema kristaun ida kontra hasoru katuas neʼebé Maromak hili liuhusi espíritu santu, ema seluk iha kongregasaun bele hetan susar. (1 Korinto 12:14, 25, 26) Kuandu labarik ida kontra hasoru nia inan-aman, família tomak bele hetan susar. Nuneʼe, ita hatudu domin ba ita-nia maluk hodi hakaʼas an atu hatudu respeitu no serbisu hamutuk ho sira neʼebé mak ita-nia ulun.

10, 11. Halo tuir sira neʼebé mak ita-nia ulun lori diʼak mai ita. Tanbasá?

¹⁰ Ita mós hatudu respeitu ba sira neʼebé Maromak uza nuʼudar ita-nia ulun tanba ida-neʼe sei lori diʼak mai ita. Kuandu Aman Jeová haruka ita atu hatudu respeitu ba sira, dala barak nia mós fó-hatene rezultadu diʼak neʼebé ita sei hetan. Porezemplu, nia fó-hatene oan sira atu halo tuir sira-nia inan-aman hodi sira bele iha moris neʼebé naruk no ksolok. (Deuteronômio 5:16; Efeso 6:2, 3) Nia fó-hatene ita atu hatudu respeitu ba katuas sira iha kongregasaun tanba se ita la halo ida-neʼe, ita-nia relasaun ho Maromak Jeová mós sai ladiʼak. (Ebreu 13:​7, 17) No mós, atu proteje ita-nia an rasik, nia fó-hatene ita atu halo tuir naʼi-ulun sira neʼebé nia husik atu ukun ita.​—Roma 13:4.

¹¹ Diʼak atu hatene razaun tanbasá Maromak Jeová hakarak ita atu halo tuir sira neʼebé serbí nuʼudar ulun iha família, kongregasaun no governu. Hatene razaun sira-neʼe ajuda ita atu hatudu respeitu ba sira-nia pozisaun. Entaun, mai ita haree oinsá mak ita hatudu respeitu ba sira.

HATUDU RESPEITU IHA FAMÍLIA LARAN

12. Iha família laran, Maromak Jeová fó kbiit saida ba laʼen ka aman? Oinsá mak sira bele halaʼo knaar neʼe?

¹² Maromak Jeová mak hahú moris família nian. Nia sempre halaʼo buat hotu-hotu ho diʼak, no nia arranja família hodi sira bele halaʼo sira-nia moris ho susesu. (1 Korinto 14:33) Nia fó ba laʼen ka aman kbiit nuʼudar família nia ulun. Laʼen hatudu respeitu ba nia Ulun, Kristu Jesus, hodi banati-tuir dalan neʼebé Jesus halaʼo nia knaar nuʼudar ulun ba kongregasaun. (Efeso 5:​23) Entaun laʼen la sees husi nia responsabilidade maibé simu ida-neʼe hodi halaʼo ho laran tomak. Nia la ukun nia família hanesan ukun-naʼin balun neʼebé hanehan sira-nia povu, maibé nia tau matan nia família hodi hadomi sira, hanoin no hatudu laran-diʼak ba sira. Nia hanoin nafatin katak kbiit neʼebé Maromak fó ba nia kiʼik deʼit se kompara ho kbiit boot liu hotu neʼebé Maromak Jeová iha.

13. Oinsá mak feen ka inan bele kumpre nia knaar iha família laran iha dalan neʼebé halo kontente Maromak Jeová?

¹³ Maromak fó knaar ba feen ka inan atu ajuda nia laʼen. Nia mós simu kbiit iha família laran tanba Bíblia koʼalia kona-ba “inan nia lei”. (Provérbios 1:8) Maibé ninia kbiit laʼós boot liu nia laʼen. Feen kristaun hatudu respeitu ba nia laʼen nia kbiit hodi ajuda nia atu kumpre nia knaar nuʼudar ulun iha família. Feen la hatún laʼen nia hahalok, ka koko atu halo buat ruma atu kontrola nia, ka koko atu foti laʼen nia pozisaun. Maibé nia apoia no serbisu hamutuk ho nia laʼen. Kuandu laʼen foti desizaun neʼebé feen ladún gosta, feen neʼe bele fó sai nia hanoin ho respeitu, maibé nia nafatin hakruʼuk an ba nia laʼen. Se nia laʼen laʼós fiar-naʼin ida, karik feen sei hasoru situasaun ruma neʼebé susar ba nia. Maibé ninia hahalok neʼebé hatudu katak nia hakruʼuk an ba laʼen, bele book nia laʼen atu halo tuir Maromak Jeová.​—1 Pedro 3:1.

14. Oinsá mak oan sira bele halo kontente sira-nia inan-aman no mós Aman Jeová?

¹⁴ Oan sira halo kontente Maromak Jeová kuandu sira halo tuir sira-nia inan-aman. Sira mós fó naran diʼak ba sira-nia inan-aman no halo sira sente laran-kontente. (Provérbios 10:1) Dala ruma iha família neʼebé iha inan ka aman neʼebé mesak hakiak sira-nia oan. Se hanesan neʼe, oan mós halo tuir sira-nia inan ka aman hodi rekoñese katak inan ka aman presiza liután sira-nia ajuda no apoiu. Iha família neʼebé ema hotu kumpre sira-nia knaar neʼebé Maromak fó ba sira, família neʼe sei iha dame no ksolok. Ida-neʼe fó glória ba Maromak Jeová neʼebé mak hun ba família tomak.​—Efeso 3:14, 15.

HATUDU RESPEITU IHA KONGREGASAUN LARAN

15. (a) Iha kongregasaun laran, oinsá mak ita hatudu respeitu ba Maromak Jeová nia ukun? (b) Matadalan saida mak bele ajuda ita atu halo tuir katuas neʼebé tau matan ba kongregasaun? (Haree kaixa “Halo tuir sira neʼebé mak ita-nia ulun”.)

¹⁵ Maromak Jeová hili nia Oan-Mane nuʼudar Ukun-Naʼin ba kongregasaun kristaun. (Koloso 1:13) No Jesus uza ‘atan laran-metin no matenek’ atu fó ai-han espirituál ba Maromak nia povu iha mundu. (Mateus 24:45-47) Grupu Administradór husi Testemuña ba Jeová mak reprezenta grupu atan neʼe. Ohin loron hanesan iha apóstolu sira-nia tempu, Grupu Administradór fó konsellu no matadalan ba katuas sira iha kongregasaun kristaun liuhusi surat balun. Grupu Administradór mós uza katuas balun atu reprezenta sira, hanesan katuas sira neʼebé laʼo-rai. Kuandu ita ida-idak hatudu respeitu ba irmaun sira neʼebé iha pozisaun nuʼudar katuas iha kongregasaun, ita halo tuir Maromak Jeová nia hakarak.​—Ebreu 13:17.

16. Tanbasá mak ita bele hatete katak espíritu santu mak foti irmaun atu serbí nuʼudar katuas?

¹⁶ Katuas no atan ministeriál mak ema neʼebé la perfeitu. Sira iha fraku hanesan ita. Maibé, katuas sira mak hanesan “kmanek oioin” neʼebé Maromak Jeová fó atu ajuda kongregasaun hametin nafatin sira-nia relasaun ho nia. (Efeso 4:8) Espíritu santu mak foti irmaun atu serbí nuʼudar katuas. (Apostolu 20:28) Oinsá? Irmaun ida tenkesér kumpre kritériu neʼebé hakerek iha Maromak nia Liafuan neʼebé nia haleno ho espíritu ­santu. (1 Timoteo 3:​1-7, 12; Tito 1:5-9) Liután neʼe, katuas sira seluk neʼebé haree se irmaun ida-neʼe kumpre kritériu ka lae, sei halo orasaun hodi husu Maromak Jeová nia espíritu santu atu fó matadalan ba sira.

17. Dala ruma tanbasá mak irmán kristaun ida taka nia ulun ho hena kuandu halaʼo knaar ruma iha kongregasaun?

¹⁷ Dala ruma iha kongregasaun la iha katuas ka atan ministeriál neʼebé bele halaʼo sira-nia knaar, hanesan atu dirije grupu haklaken. Se hanesan neʼe, irmaun seluk neʼebé hetan batizmu tiha ona bele halaʼo knaar ida-neʼe. Se la iha irmaun, irmán ida neʼebé iha esperiénsia liu bele halo ida-neʼe. Maibé kuandu irmán halo knaar irmaun sira-nian, nia taka nia ulun ho hena ruma.a (1 Korinto 11:3-10) Maski irmán tenke halo ida-neʼe, neʼe laʼós atu hatún sira. Maibé ida-neʼe mak oportunidade ba sira atu hatudu respeitu ba Maromak Jeová tanba nia mak hili sira neʼebé sai ulun iha família no kongregasaun laran.

HATUDU RESPEITU BA UKUN-NAʼIN SIRA

18, 19. (a) Iha Roma 13:​1-7 hatudu matadalan neʼebé ita presiza halo tuir. Esplika toʼok. (b) Oinsá mak ita hatudu respeitu ba ukun-naʼin sira?

¹⁸ Ema kristaun neʼebé loos halo tuir matadalan neʼebé hakerek iha Roma 13:1-7. Kuandu Ita lee eskritura sira-neʼe, Ita bele haree katak “ukun-naʼin sira” mak sira neʼebé ukun iha governu. Maromak Jeová mak husik sira ukun, no sira halaʼo knaar neʼebé importante hanesan hadiʼa dalan, harii eskola no ospitál no mantein seguransa. Ita hatudu katak ita iha respeitu ba ukun-naʼin sira hodi halo tuir sira-nia lei. Ita hakaʼas an atu selu impostu saida deʼit neʼebé governu husu, atu hakerek informasaun neʼebé loos iha formuláriu no dokumentu sira neʼebé governu husu, atu halo tuir lei governu nian kona-ba rejistu família, negósiu, no sasán neʼebé ita iha. Maibé ita sei la hakruʼuk ba ukun-naʼin sira neʼebé haruka ita atu la halo tuir Maromak. Ita sei halo tuir apóstolu sira-nia ezemplu kuandu sira hatete: “Ami sei halo tuir Maromak nia hakarak liu ema sira-nian.”​—Apostolu 5:​28, 29; haree kaixa “Haʼu tenke halo tuir sé?”.

¹⁹ Ita mós hatudu respeitu ba ukun-naʼin sira liuhusi ita-nia hahalok. Dala ruma karik ita sei hasoru ema neʼebé reprezenta governu. Apóstolu Paulo hasoru no koʼalia ho ukun-naʼin sira hanesan Liurai Herodes Agripa no Governadór Festo. Maski Paulo hatene mane sira-neʼe halo hahalok sala kontra Maromak, maibé Paulo koʼalia ba sira ho respeitu. (Apostolu 26:2, 25) Maski ema neʼebé reprezenta governu mak ema-boot ida ka funsionáriu baibain hanesan polísia, ita banati-tuir Paulo nia ezemplu hodi koʼalia ba sira ho respeitu. Iha eskola, joven kristaun hakaʼas an atu hatudu respeitu neʼebé hanesan ba mestre ka mestra, no ema neʼebé tau matan ka serbisu iha sira-nia eskola. Ita la hatudu respeitu deʼit ba sira neʼebé gosta buat neʼebé ita fiar. Maibé, kuandu ita hasoru ka koʼalia ho sira neʼebé la gosta ita tanba ita mak Testemuña ba Jeová, ita mós hatudu respeitu ba sira. Tuir loloos, baibain ema neʼebé fiar la hanesan ho ita mós bele hatene katak ita hatudu respeitu ba sira.​—Roma 12:17, 18; 1 Pedro 3:​15.

20, 21. Kuandu ita hatudu respeitu ba sira neʼebé mak ita-nia ulun, ita bele simu bensaun saida deʼit?

²⁰ Mai ita ho laran-luak hatudu respeitu nafatin ba ema seluk. Apóstolu Pedro hakerek: “Hamtaʼuk ema tomak bá.” (1 Pedro 2:​17) Kuandu ema sente katak ita ho laran hatudu respeitu ba sira, ida-neʼe mós bele kona sira-nia laran. Hanoin fali katak ohin loron ema ladún hatudu respeitu ba ema seluk. Entaun, kuandu ita hatudu respeitu ba ema, neʼe mak dalan ida neʼebé ita halo tuir Jesus nia liafuan: “Imi-nia roman sei nabilan moos hanesan neʼe iha ema sira oin, atu sira haree imi-nia hahalok diʼak sira no hahiʼi imi-nia Aman iha lalehan.”​—Mateus 5:16.

²¹ Iha mundu neʼebé nakukun, naroman espirituál nian dada ema neʼebé laran-diʼak. Entaun kuandu ita hatudu respeitu iha família laran, kongregasaun laran, no ba ema seluk, ida-neʼe bele dada ema balun, no book sira atu laʼo hamutuk ho ita iha naroman ida-neʼe. Neʼe bensaun neʼebé furak tebes! Se sira lakohi, maibé ita bele fiar duni kona-ba buat ida. Ita bele fiar katak kuandu ita hatudu respeitu ba ema seluk, ida-neʼe halo Maromak Jeová kontente, no ida-neʼe ajuda ita hela nafatin iha ninia domin. Iha bensaun neʼebé boot liu ida-neʼe ka lae?