LISAUN 11

Koʼalia ho laran-manas

Roma 12:11

SAIDA MAK ITA PRESIZA HALO: Koʼalia ho laran-manas atu book rona-naʼin nia laran.

Koʼalia ho laran. Bainhira Ita prepara Ita-nia aprezentasaun, hanoin didiʼak kona-ba tanbasá Ita-nia mensajen importante. Komprende didiʼak Ita-nia informasaun atu nuneʼe Ita bele hatoʼo ho laran.
Hanoin kona-ba Ita-nia rona-naʼin. Hanoin kleʼan kona-ba tanbasá mak informasaun neʼebé Ita lee ka hanorin sei fó benefísiu ba rona-naʼin, no oinsá mak Ita bele hatoʼo ida-neʼe iha dalan neʼebé bele halo ema hafolin informasaun neʼe.
Hatudu laran-manas kuandu koʼalia. Hatoʼo Ita-nia aprezentasaun iha dalan neʼebé moris. Hatudu sai sentimentu liuhusi Ita-nia oin no dalan neʼebé Ita book an.

Kuidadu atu la book an beibeik iha dalan neʼebé hanesan deʼit, tanba rona-naʼin sei tau fokus liu ba ida-neʼe duké ba diskursu. Book liman iha dalan neʼebé baibain atu fó sai sentimentu husi laran. Hatudu laran-manas liuliu kuandu Ita hatoʼo pontu importante, no book rona-naʼin atu halo tuir buat neʼebé sira rona. Keta hatudu laran-manas demais liu husi primeiru toʼo ikus tanba ida-neʼe bele halo rona-naʼin sai kole atu rona.