Hili didiʼak Ita-nia belun

Belun sira bele halo ita haksolok iha tempu diʼak no sira mós bele ajuda no fó kmaan ba ita iha tempu susar. Maibé Bíblia fó avizu mai ita katak laʼós ema hotu mak bele sai belun diʼak. Oinsá mak Ita bele hili didiʼak Ita-nia belun? Hanoin toʼok pergunta sira tuirmai.

1. Oinsá mak belun neʼebé Ita hili sei fó impaktu ba Ita?

Baibain ita-nia hahalok sai hanesan ho ema neʼebé ita ransu. No maski ita ransu ho sira oin ba oin, ka liuhusi média sosiál, sira bele fó impaktu mai ita iha dalan neʼebé diʼak no mós aat. Bíblia hatete: “Ema neʼebé laʼo hamutuk ho ema matenek sei sai matenek, maibé ema neʼebé ransu ho ema beik sei hetan problema boot.” (Provérbios 13:20) Belun sira neʼebé hadomi no adora Jeová bele ajuda ita atu hakbesik ba Nia no halo desizaun neʼebé diʼak. Maibé belun sira neʼebé la hadomi Jeová bele halo ita dook husi Jeová. Tan neʼe mak Bíblia anima ita atu hili didiʼak ita-nia belun. Kuandu ita sai belun ho ema neʼebé hadomi Maromak, neʼe sei lori benefísiu ba ita-nia an rasik no mós ba sira. Ita bele “kontinua fó aten-brani ba malu no hametin malu”.​—1 Tesalónika 5:11.

2. Jeová sente oinsá kona-ba Ita-nia desizaun atu hili belun?

Jeová hili didiʼak ninia belun sira. “Nia sai belun neʼebé besik ho ema laran-loos.” (Provérbios 3:32) Jeová sente oinsá se ita sai belun ho ema neʼebé la hadomi nia? Nia sente triste tebes! (Lee Tiago 4:4.) Jeová sei kontente ho ita no sai ita-nia belun se ita hakbesik ba nia no ba ema neʼebé hadomi nia no hadook an husi ransu neʼebé la diʼak.​—Salmo 15:1-4.

KEʼE KLEʼAN

3. Kuidadu kona-ba ransu neʼebé aat

Ransu ho ema neʼebé la hadomi Maromak no la hafolin Ninia matadalan sira mak ransu neʼebé aat. Loke VÍDEO, depois koʼalia hamutuk kona-ba pergunta tuirmai.

VÍDEO: Aprende atu sees husi ransu neʼebé aat (6:17)

• Oinsá mak ita bele envolve an iha ransu neʼebé aat maski la ho neon?

Lee 1 Korinto 15:33, depois koʼalia hamutuk kona-ba pergunta tuirmai:

• Ema hanesan saida mak bele fó impaktu la diʼak ba Ita? Tanbasá?

Lee Salmo 119:63, depois koʼalia hamutuk kona-ba pergunta tuirmai:

• Ita presiza hili ema neʼebé hatudu hahalok hanesan saida kuandu Ita buka belun?

4. Ema neʼebé la hanesan ho ita mós bele sai belun diʼak

Bíblia konta istória kona-ba mane Izraél naʼin-rua, David no Jonatan. Sira-nia idade la hanesan no situasaun moris mós la hanesan, maibé sira sai belun neʼebé diʼak tebes. Lee 1 Samuel 18:1, depois koʼalia hamutuk kona-ba pergunta tuirmai:

• Tanbasá diʼak mós atu sai belun ho ema neʼebé idade la hanesan ka situasaun moris la hanesan?

Lee Roma 1:11, 12, depois koʼalia hamutuk kona-ba pergunta tuirmai:

• Oinsá mak belun sira neʼebé hadomi Jeová bele anima malu?

Iha vídeo neʼe, haree toʼok oinsá mak irmaun joven ida hetan belun iha fatin neʼebé uluk nia la imajina. Loke VÍDEO, depois koʼalia hamutuk kona-ba pergunta tuirmai.

VÍDEO: Hetan belun iha fatin neʼebé ita la imajina (5:06)

• Iha vídeo neʼe, tanbasá mak Akil nia inan-aman hanoin barak kona-ba Akil nia belun sira iha eskola?

• Tanbasá foufoun Akil hanoin diʼak liu atu buka belun iha eskola?

• Oinsá mak nia manán hasoru sentimentu mesamesak?

5. Oinsá atu haburas relasaun belun neʼebé diʼak

VÍDEO: Belun neʼebé loos mak hanesan saida? (4:14)

Lee Provérbios 18:24 no 27:17, depois koʼalia hamutuk kona-ba pergunta tuirmai:

• Oinsá mak belun neʼebé loos ajuda malu?

• Ita iha belun diʼak hanesan neʼe ka lae? Se seidauk iha, oinsá mak Ita bele haburas relasaun belun hanesan neʼe?

Lee Filipe 2:4, depois koʼalia hamutuk kona-ba pergunta tuirmai:

• Atu iha belun neʼebé diʼak, Ita presiza sai uluk belun neʼebé diʼak. Oinsá mak bele halo nuneʼe?

PONTU IMPORTANTE

Se ita hili belun ho didiʼak, ita sei halo Jeová kontente no ita rasik mós hetan benefísiu.

Rezumu

• Tanbasá Ita-nia desizaun atu hili belun mak importante ba Jeová?

• Ita presiza hasees an husi belun hanesan saida?

• Oinsá mak ita bele haburas relasaun belun ho ema neʼebé hadomi Jeová?

BUKA-HATENE LIUTÁN

Haree oinsá mak belun neʼebé diʼak bele ajuda ita iha tempu susar.

“Haburas relasaun diʼak nuʼudar belun agora” (Livru Haklaken, Novembru 2019)

Hanoin toʼok kona-ba saida mak Ita bele halo atu hetan belun diʼak.

“Oinsá haʼu bele hetan belun diʼak?” (Pergunta Husi Joven Sira​—Resposta neʼebé bele ajuda, Volume 1, kapítulu 8)

Saida mak Ita presiza hatene kona-ba kolega neʼebé Ita hetan husi média sosiál?

Uza sítiu belun nian ho matenek (4:12)

Iha istória “Haʼu hakarak tebes atu iha aman”, haree toʼok tanbasá mak mane ida troka ninia hanoin kona-ba hili belun sira.

“Bíblia troka ema nia moris” (Informasaun husi Livru Haklaken)