Moisés no Arão bá hasoru fali Faraó no hatoʼo Maromak nia lia-menon: ‘Se ó la husik haʼu-nia povu sai, haʼu sei haruka lalar boot barak ba rai-Ejitu.’ Tuirmai lalar lubun boot tama ema Ejitu sira-nia uma maski ema kiak ka riku, no nasaun tomak nakonu ho lalar. Maibé iha rai-Gosen neʼebé ema Izraél hela, la iha lalar. Hahú husi susar númeru haat, neʼe kona deʼit ema Ejitu. Faraó dehan: ‘Husu Jeová atu halakon tiha lalar sira-neʼe. Ema Izraél sira bele bá.’ Maibé depois Jeová halakon tiha, Faraó troka ninia hanoin. Tanbasá Faraó ulun-toos hanesan neʼe?

Jeová dehan: ‘Se Faraó la husik haʼu-nia povu sai, ema Ejitu sira-nia animál sei moras no mate.’ Loron tuirmai, neʼe akontese duni. Maibé ema Izraél sira-nia animál la mate. Maski nuneʼe, Faraó nafatin ulun-toos.

Entaun Jeová haruka Moisés bá hasoru Faraó no kari ahi-kadesan ba anin. Ahi-kadesan neʼe namkari ba fatin hotu no belit ba ema Ejitu nia isin, no hamosu fisur dodok iha sira-nia isin no sira-nia animál. Maski nuneʼe, Faraó nafatin lakohi husik ema Izraél sai.

Jeová haruka fali Moisés atu hasoru Faraó no hatoʼo lia-menon: ‘Ó nafatin lakohi husik haʼu-nia povu sai ka? Aban haʼu sei halo udan jelu-fatuk tun ba rai neʼe.’ Loron tuirmai, Jeová halo udan jelu-fatuk, rai-tarutu, no ahi tun. Ema Ejitu nunka haree dezastre boot hanesan neʼe. Ai-horis hotu sai aat, maibé iha rai-Gosen la akontese buat ida. Faraó dehan: ‘Husu Jeová atu hapara neʼe! Depois imi bele bá.’ Maibé bainhira Jeová hapara tiha, Faraó troka ninia hanoin.

Tuirmai Moisés dehan: ‘Gafañotu sei han ai-horis hotu neʼebé udan jelu-fatuk la estraga.’ Gafañotu barak tebes han mohu ai-horis hotu. Faraó dehan: ‘Husu Jeová atu haruka gafañotu sira-neʼe ba fatin seluk.’ Maibé bainhira Jeová halakon tiha gafañotu sira, Faraó ulun-toos nafatin.

Jeová koʼalia ba Moisés: ‘Lolo ó-nia liman ba lalehan.’ Derrepente deʼit lalehan sai nakukun. Ba loron tolu, ema Ejitu labele haree buat ida. Só ema Izraél nia fatin deʼit mak iha naroman.

Faraó dehan ba Moisés: ‘Ó no ó-nia ema sira bele bá. Maibé husik imi-nia animál sira iha neʼe.’ Moisés dehan: ‘Ami tenke lori ami-nia animál atu nuneʼe ami bele hasaʼe sakrifísiu ba ami-nia Maromak.’ Faraó hirus tebes no hakilar: ‘Sai husi haʼu-nia oin! Se ó mai fali, haʼu sei oho ó.’

Moisés promete ba Faraó katak nia sei la hasoru tan Faraó. Maibé antes bá, Moisés dehan: ‘Iha kalan-boot, ema Ejitu nia oan-mane primeiru hotu sei mate, husi Faraó nia oan toʼo atan sira-nia oan.’

Jeová haruka ema Izraél atu halo hahán espesiál. Nia hatete: ‘Oho bibi-malae ka bibi-timur aman neʼebé foin tinan ida. Tau ninia raan iha imi-nia odamatan nia arus. Tunu ninia naʼan, no han hamutuk ho paun neʼebé la iha fermentu. Imi tenke hatais no tau sandálias hodi sai prontu atu halo viajen. Kalan neʼe haʼu sei halo imi livre.’ Imajina toʼok, ema Izraél kontente tebes.

Iha kalan-boot, Jeová nia anju bá uma hotu iha Ejitu. Se uma neʼe nia odamatan la iha raan, oan-mane primeiru iha uma neʼe sei mate. Maibé se anju neʼe haree raan iha odamatan, nia sei liu deʼit. Ema Ejitu nia oan-mane primeiru hotu mate. Maibé, la iha ema Izraél nia oan ida mak mate.

Faraó nia oan rasik mós mate. Faraó labele tahan ona. Nia koʼalia kedas ba Moisés no Arão: ‘Sai husi neʼe. Bá no adora imi-nia Maromak. Lori imi-nia animál no bá!’

Iha kalan neʼebá fulan nakonu, ema Izraél laʼo sai husi Ejitu. Sira organiza ho didiʼak tuir família no suku ida-idak. Iha mane Izraél naʼin-600.000 no mós feto no labarik sira. Ema husi nasaun seluk mós bá hamutuk ho sira atu adora Jeová. Ikusmai sira livre!

Hahú husi tempu neʼebá, tinan-tinan sira sei han ai-han espesiál neʼebé hanesan atu bele hanoin-hetan oinsá mak Jeová salva sira. Tempu neʼe hanaran Páskua.