Depois hetan tiha batizmu, Jesus komesa haklaken: ‘Maromak nia Ukun besik ona.’ Dixípulu sira laʼo tuir nia hodi bá área Galileia no Judeia tomak. Bainhira Jesus fila fali ba Nazaré, nia bá sinagoga no loke livru Isaias hodi lee iha ema nia oin: ‘Jeová fó ona espíritu santu mai haʼu atu nuneʼe haʼu bele haklaken liafuan diʼak.’ Neʼe katak sá? Ema barak hakarak haree Jesus halo milagre. Maibé eskritura neʼe hatudu katak razaun importante Jesus simu espíritu santu mak atu haklaken liafuan diʼak. Nia hatete ba rona-naʼin sira: ‘Ohin, profesia neʼe sai loos ona.’

Tuirmai, Jesus bá Tasi Galileia. Iha neʼebá nia hasoru peskadór naʼin-haat neʼebé ikusmai sai ninia dixípulu. Nia konvida sira, hodi dehan: ‘Mai tuir haʼu, no haʼu sei halo imi sai peskadór ba ema.’ Dixípulu naʼin-haat neʼe mak Pedro, André, Tiago, no João. Sira husik kedas sira-nia serbisu no laʼo tuir Jesus. Sira laʼo haleʼu Galileia atu haklaken Jeová nia Ukun. Sira haklaken iha sinagoga, merkadu, no iha dalan. Ema barak laʼo tuir sira ba fatin hotu. Ema iha fatin hotu rona kona-ba Jesus, inklui ema iha Síria neʼebé dook husi rai-Izraél.

Tuirmai, Jesus fó kbiit ba ninia dixípulu balu atu kura ema no duni sai anju aat. Dixípulu seluk haklaken hamutuk ho nia husi sidade ba sidade no husi knua ba knua. Iha mós feto fiar-naʼin balu neʼebé tau matan ba Jesus no ninia dixípulu sira. Feto sira-neʼe inklui Maria Madalena, Joana, no Susana.

Jesus treinu ninia dixípulu sira no haruka sira atu bá haklaken. Sira bá Galileia, no ema barak mak sai dixípulu no hetan batizmu. Maibé sei iha ema barak liután neʼebé presiza rona kona-ba Maromak nia Ukun, tan neʼe Jesus kompara ema sira-neʼe ho toʼos neʼebé prontu atu koʼa. Nia dehan: ‘Halo orasaun ba Jeová atu haruka ema barak tan atu halo serbisu koʼa nian.’ Nia mós hili dixípulu naʼin-70 no haruka sira rua-rua atu bá haklaken iha Judeia tomak. Sira hanorin ema oioin kona-ba Maromak nia Ukun. Bainhira dixípulu sira fila fali, sira ho kontente tebes konta ba Jesus kona-ba buat neʼebé akontese. Diabu labele halo buat ida atu hapara serbisu haklaken.

Jesus hakarak ninia dixípulu sira kontinua halo serbisu importante neʼe kuandu nia fila fali ba lalehan. Nia dehan ba sira: ‘Haklaken liafuan diʼak iha mundu tomak. Hanorin Maromak nia Liafuan no fó batizmu ba ema.’

Jesus mai mundu atu haklaken kona-ba Maromak nia Ukun. Jeová fó kbiit ba Jesus atu halo milagre oioin. Milagre sira-neʼe hatudu sai buat neʼebé Jesus sei halo nuʼudar liurai ba Maromak nia Ukun. Nia bele kura moras hotu. Iha fatin naran deʼit neʼebé Jesus bá, ema moras sira mai atu husu ajuda, no Jesus kura sira. Ema matan-delek bele haree, ema tilun-diuk bele rona, ema ain-kudeik bele laʼo fali no ema neʼebé anju aat domina bele sai livre. Maski ema kona deʼit Jesus nia roupa, sira sai diʼak fali. Ema laʼo tuir Jesus ba fatin oioin. Maski dala ruma nia hakarak mesamesak, maibé nia sempre prontu atu ajuda ema.

Loron ida, ema balu lori mane isin-matek ida ba uma neʼebé Jesus hela bá. Maibé uma neʼe nakonu ho ema no sira labele tama. Tan neʼe, sira halo kuak iha uma-kakuluk no hatún mane neʼe ba Jesus. Tuirmai, Jesus dehan ba nia: ‘Hamriik no laʼo bá.’ Bainhira nia laʼo, ema hotu hakfodak.

Iha tempu seluk, kuandu Jesus tama knua ida, mane naʼin-10 neʼebé moras-lepra hamriik dook no hakilar: ‘Jesus, ajuda ami!’ Iha tempu neʼebá, ema neʼebé moras-lepra labele hakbesik ba ema seluk. Jesus haruka sira bá templu hodi tuir Maromak nia Ukun-Fuan kona-ba ema moras-lepra neʼebé kura ona. Nuʼudar sira laʼo ba templu, sira-nia isin sai diʼak. Bainhira sira ida hatene katak nia diʼak ona, nia fila fali atu fó obrigadu ba Jesus no hahiʼi Maromak. Husi ema naʼin-10, só nia deʼit mak fó obrigadu ba Jesus.

Feto ida neʼebé moras ba tinan 12 hakarak tebes atu sai diʼak. Bainhira Jesus iha ema-lubun nia leet, feto neʼe hakbesik Jesus husi kotuk no kona Jesus nia roupa ninin, no ninia moras diʼak kedas. Tuirmai Jesus husu: ‘Sé mak kona haʼu?’ Feto neʼe sente taʼuk, maibé nia hakbesik Jesus no hatete buat neʼebé nia halo. Jesus fó kmaan ba nia hodi dehan: ‘Laʼo bá ho dame.’

Ema-boot ida naran Jairo husu Jesus: ‘Favór mai haʼu-nia uma. Haʼu-nia oan-feto moras todan.’ Maibé antes Jesus toʼo iha Jairo nia uma, labarik neʼe mate ona. Bainhira toʼo, Jesus haree ema barak tanis. Jesus dehan ba sira: ‘Keta tanis, nia toba deʼit.’ Tuirmai, Jesus kaer labarik neʼe nia liman no dehan: ‘Noi, hadeer bá.’ Labarik neʼe hadeer kedas, no Jesus haruka ninia inan-aman atu fó hahán ba nia. Ninia inan-aman kontente tebes!