Jeová fó sai buat “neʼebé sei mosu lalais”

“Neʼe mak buat neʼebé Maromak hatudu ba Jesus Kristu atu nia bele fó-hatene ba nia atan sira kona-ba buat sira neʼebé sei mosu lalais.”—APOK 1:1.

OINSÁ ITA HATÁN?

Estátua nia parte ida-neʼebé mak reprezenta Bretaña ho Estadus Unidus Amérika nia ukun?

Iha João nia vizaun, saida mak relasaun entre Bretaña no Estadus Unidus Amérika nia ukun ho Nasoins Unidas?

Oinsá mak Daniel no João nia vizaun hatudu katak ema nia ukun hotu sei lakon?

1, 2. (a) Daniel no João nia profesia sira ajuda ita atu komprende saida? (b) Animál fuik nia ulun númeru ida toʼo neen reprezenta saida deʼit?

PROFESIA sira neʼebé Daniel no João fó sai bele ajuda ita atu komprende buat barak neʼebé akontese daudauk no sei akontese iha futuru. Saida mak ita aprende husi João nia vizaun kona-ba animál fuik neʼebé iha ulun hitu, husi Daniel nia vizaun kona-ba animál neʼebé iha dikur sanulu, no husi buat neʼebé Daniel esplika kona-ba estátua boot? Hodi komprende didiʼak profesia sira-neʼe sei book ita atu halo saida?

² Mai ita koʼalia kona-ba animál fuik neʼebé João haree iha ninia vizaun. (Apokalipse, kapítulu 13) Hanesan ita estuda tiha ona iha lisaun primeiru, animál fuik nia ulun númeru ida toʼo neen reprezenta Egiptu, Asíria, Babilónia, Média ho Pérsia, Grésia, no Roma. Satanás uza ukun sira-neʼe atu funu hasoru Maromak nia povu tanba nia odi feto nia bei-oan. (Gên 3:15) Iha tempu neʼebé João hakerek kona-ba vizaun neʼe, Roma ukun daudauk nuʼudar ulun númeru neen, no kontinua domina mundu ba tinan atus ba atus. Ikusmai, ulun númeru hitu mak troka Roma nia fatin. Entaun, sé mak ulun númeru hitu neʼe? Saida mak nia sei halo ba feto nia bei-oan?

BRETAÑA HO ESTADUS UNIDUS MOSU HODI UKUN

3. Animál fuik neʼebé iha dikur sanulu no halo taʼuk reprezenta sé? Dikur sanulu reprezenta saida?

³ Ita bele hatene sé mak animál fuik nia ulun númeru hitu se ita kompara saida mak João hatete iha Apokalipse kapítulu 13 kona-ba animál fuik ho saida mak Daniel hatete kona-ba animál fuik neʼebé iha dikur sanulu no halo taʼuk.a (Lee Daniel 7:7, 8, 23, 24.b) Animál fuik neʼebé iha dikur sanulu neʼe reprezenta Roma nia ukun. (Haree informasaun iha pájina 12-13.) Maizumenus tinan atus haat depois Kristu, Roma nia ukun komesa fahe ba ukun barak. Dikur sanulu neʼebé mosu iha animál fuik nia ulun neʼebé Daniel haree reprezenta ukun sira neʼebé mosu husi Roma nia ukun.

4, 5. (a) Saida mak dikur kiʼik halo? (b) Animál fuik nia ulun númeru hitu reprezenta sé?

⁴ Iha Daniel nia profesia kona-ba animál fuik ho dikur sanulu, dikur kiʼik ida seluk mosu no fokit sai dikur tolu husi dikur sanulu. Maski rai-Bretaña neʼebé uluk Roma mak ukun seidauk importante, maibé ikusmai sai nasaun neʼebé forsa boot. Uluk, Roma mós ukun España, Olanda, no Fransa, no toʼo maizumenus tinan 1700, nasaun tolu neʼe iha pozisaun importante liu fali Bretaña. Maibé maizumenus tinan 230 liubá, Bretaña sai nasaun neʼebé importante liu fali sira kuandu nia komesa halakon sira ida ba ida. Nuneʼe husi tempu neʼebá, Bretaña komesa atu sai nasaun neʼebé forsa boot liu iha mundu. Maski nuneʼe, nia seidauk sai ulun númeru hitu husi animál fuik.

⁵ Nuʼudar Bretaña sai nasaun neʼebé forsa boot liu iha mundu, rai balu iha Amérika Norte neʼebé Bretaña mak ukun, komesa kontra hasoru Bretaña no sira sai nasaun Estadus Unidus Amérika. Maski nuneʼe, Bretaña la hapara Estadus Unidus atu sai nasaun neʼebé forte. Duké halo ida-neʼe, Bretaña uza ninia forsa navál atu proteje Estadus Unidus. Maibé, kuandu Naʼi nia loron hahú iha tinan 1914, Bretaña ukun ona rai barak tebes no Estadus Unidus sai ona nasaun neʼebé iha naran-boot kona-ba indústria.c Durante Funu Mundiál Primeiru, Estadus Unidus harii relasaun ho Bretaña. Tanba Bretaña ho Estadus Unidus Amérika komesa atu serbisu hamutuk iha dalan neʼebé espesiál, sira sai nuʼudar animál fuik nia ulun númeru hitu. Ulun neʼe halo saida ba feto nia bei-oan?

6. Saida deʼit mak animál nia ulun númeru hitu halo ba Maromak nia povu?

⁶ Lakleur depois Naʼi nia loron hahú, animál nia ulun númeru hitu ataka Maromak nia povu, katak restu husi Kristu nia alin sira neʼebé iha rai. (Mt 25:40) Jesus fó sai katak durante tempu neʼebé nia komesa atu ukun, restu husi bei-oan sei serbisu badinas iha rai. (Mt 24:45-47; Gal 3:26-29) Bretaña ho Estadus Unidus Amérika halo funu hasoru santu sira-neʼe. (Apok 13:3, 7) Durante Funu Mundiál Primeiru, Bretaña ho Estadus Unidus Amérika haterus Maromak nia povu, bandu livru sira neʼebé sira halo, no hatama irmaun sira neʼebé reprezenta atan laran-metin no matenek ba komarka. Animál fuik nia ulun hitu besik halakon serbisu haklaken. Jeová fó sai ba João iha vizaun katak ida-neʼe sei akontese. Maromak mós fó-hatene ba João katak parte segundu husi feto nia bei-oan sei mosu fali no sira sei aumenta liután serbisu haklaken. (Apok 11:3, 7-11) Istória husi Jeová nia atan sira iha tempu modernu hatudu katak buat sira-neʼe sai loos duni.

BRETAÑA HO ESTADUS UNIDUS AMÉRIKA NO AIN HUSI BESI HO RAI-MEAN

7. Estátua boot nia parte ida-neʼebé mak hanesan ho animál fuik nia ulun númeru hitu?

⁷ Estátua boot nia ain no mós animál fuik nia ulun númeru hitu mak Bretaña ho Estadus Unidus Amérika. Bretaña mosu husi Roma nia ukun, no tanba Estadus Unidus Amérika mosu husi Bretaña, neʼe hatudu katak nia mós mosu husi Roma nia ukun. Tanba ida-neʼe mak ain parte kraik iha besi. Maibé Daniel nia profesia hatete katak ain parte kraik mós iha rai-mean. (Lee Daniel 2:41-43.d) Buat neʼebé Daniel fó sai kona-ba estátua boot nia ain parte kraik, ida-neʼe liga ho tempu neʼebé animál fuik nia ulun númeru hitu mosu, katak tempu neʼebé Bretaña ho Estadus Unidus Amérika sai ukun boot. Maibé, hanesan buat neʼebé halo husi besi no rai-mean fraku liu fali buat neʼebé halo husi besi, nuneʼe mós ukun Bretaña ho Estadus Unidus Amérika fraku liu fali Roma nia ukun. Entaun, oinsá mak ida-neʼe akontese?

8, 9. (a) Oinsá mak ukun númeru hitu hatudu sai ninia kbiit neʼebé hanesan besi? (b) Rai-mean reprezenta saida?

⁸ Animál fuik nia ulun númeru hitu neʼe hatudu ona katak nia iha forsa boot hanesan besi. Porezemplu, nia hatudu nia kbiit hodi manán iha Funu Mundiál Primeiru no Segundu. No depois funu neʼe, dala balu nia hatudu ninia hahalok neʼebé toʼos hanesan besi.e Maibé, husi tempu neʼebé Bretaña ho Estadus Unidus Amérika sai ukun boot, besi neʼe kahur ona ho rai-mean.

⁹ Ba tempu kleur ona Jeová nia atan sira hakarak tebes atu komprende kona-ba estátua nia ain parte kraik katak sá. Daniel 2:41 fó sai katak ain neʼebé halo husi besi no rai-mean mak “ukun” ida deʼit, laʼós barak. Tan neʼe, rai-mean reprezenta buat sira neʼebé iha Bretaña ho Estadus Unidus Amérika nia laran neʼebé halo sira-nia ukun sai fraku liu fali Roma nia ukun neʼebé hanesan besi. Daniel fó sai katak rai-mean neʼe mak “ema oioin”, ka ema baibain. (Dan 2:43) Iha Bretaña ho Estadus Unidus Amérika nia ukun laran, ema sei hamriik hodi defende sira-nia direitu liuhusi organizasaun oioin, hanesan organizasaun neʼebé defende ema nia direitu, organizasaun neʼebé tau matan ba serbisu-naʼin sira, no grupu sira neʼebé hakarak ukun an rasik nuʼudar nasaun. Ema baibain neʼe hanetik Bretaña ho Estadus Unidus Amérika atu uza sira-nia kbiit neʼebé toos hanesan besi. Liután neʼe, ideia polítiku neʼebé la hanesan no rezultadu eleisaun neʼebé partidu ida la manán maioria, ida-neʼe mós halo fraku ukun-naʼin sira neʼebé iha kbiit, atu nuneʼe sira ladún bele kumpre sira-nia planu. Daniel fó-hatene nanis kona-ba ukun neʼe, hodi dehan: “Ukun neʼe sei iha forsa kona-ba buat ruma no fraku kona-ba buat seluk.”—Dan 2:42; 2 Tim 3:1-3.

10, 11. (a) Saida mak sei akontese ba estátua nia “ain”? (b) Saida mak ita komprende kona-ba estátua nia ain-fuan sira?

¹⁰ Toʼo ohin loron, Bretaña ho Estadus Unidus Amérika kontinua iha relasaun espesiál, no dala barak sira serbisu hamutuk atu mete ba buat barak neʼebé akontese iha mundu. Profesia sira kona-ba estátua boot no animál fuik hatudu ho klaru katak la iha ukun seluk neʼebé sei troka Bretaña ho Estadus Unidus Amérika nia ukun. Maski ukun ikus neʼe fraku liu se kompara ho ain besi, katak Roma nia ukun, maibé ukun ikus neʼe sei la naksobu rasik.

¹¹ Estátua nia ain-fuan sira reprezenta buat ruma ka lae? Hanoin toʼok buat tuirmai neʼe: Iha vizaun seluk, Daniel esplika ho klaru kona-ba númeru sira. Porezemplu, nia esplika kona-ba númeru dikur sira neʼebé mosu iha animál fuik oioin nia ulun. Ida-neʼe hatudu katak númeru dikur sira-neʼe reprezenta buat importante. Maibé, kuandu Daniel koʼalia kona-ba estátua, nia la esplika kona-ba númeru ain-fuan sira. Entaun, ida-neʼe hatudu katak númeru ain-fuan sira la importante, no neʼe hanesan ho liman rua no ain rua mós la importante. Maski nuneʼe, tanba Daniel dehan katak ain-fuan halo husi besi no rai-mean, ida-neʼe ajuda ita atu komprende katak Bretaña ho Estadus Unidus Amérika mak ukun neʼebé sei domina hela mundu bainhira “fatuk” neʼebé reprezenta Maromak nia Ukun kona estátua nia ain.—Dan 2:45.

BRETAÑA HO ESTADUS UNIDUS AMÉRIKA NO ANIMÁL FUIK HO DIKUR RUA

12, 13. Animál fuik nia dikur rua reprezenta saida? Nia halo saida?

¹² Maski Bretaña ho Estadus Unidus Amérika nia ukun mak hanesan besi neʼebé kahur ho rai-mean, maibé vizaun neʼebé Jesus fó sai ba João hatudu katak ukun neʼe sei kontinua atu iha kbiit boot durante loron ikus sira. Oinsá? João haree vizaun ida kona-ba animál fuik neʼebé iha dikur rua no koʼalia hanesan samea boot. Animál fuik neʼe reprezenta saida? Tanba animál fuik neʼe iha dikur rua, neʼe katak governu rua neʼebé halo serbisu hamutuk. Nuneʼe, animál fuik reprezenta Bretaña ho Estadus Unidus Amérika nia ukun, no sira hamutuk halo buat ruma neʼebé espesiál.—Lee Apokalipse 13:11-15.

¹³ Animál fuik neʼebé iha dikur rua book ema atu halo estátua animál fuik ho ulun hitu. João hatete katak estátua animál fuik neʼe sei mosu no depois lakon no tuirmai mosu fali. Neʼe akontese duni kuandu Bretaña no Estadus Unidus Amérika harii organizasaun ida atu halibur no reprezenta nasaun sira iha mundu.f Organizasaun neʼe mosu depois Funu Mundiál Primeiru ho naran Liga Nasaun sira-nian. Maibé, lakleur depois Funu Mundiál Segundu komesa, organizasaun neʼe lakon. Durante funu neʼe, Maromak nia povu fó sai katak tuir profesia iha Apokalipse, estátua animál fuik neʼe sei mosu fali. Sin, nia mosu fali duni nuʼudar organizasaun naran Nasoins Unidas.—Apok 17:8.

14. Tanbasá mak João bolu estátua animál fuik nuʼudar “liurai” ida?

¹⁴ João koʼalia kona-ba estátua animál fuik ho ulun hitu nuʼudar ‘liurai númeru ualu’. Maibé, neʼe la dehan katak nia mosu nuʼudar ulun númeru ualu husi animál fuik. Tuir loloos, ida-neʼe mak estátua ka ilas deʼit husi animál fuik ho ulun hitu. Kbiit neʼebé estátua neʼe hetan mai husi nasaun sira neʼebé sai ninia membru, liuliu husi nasaun boot Bretaña no Estadus Unidus Amérika. (Apok 17:10, 11) Tansá mak João bolu ida-neʼe nuʼudar “liurai”? João bolu estátua neʼe nuʼudar “liurai” ida tanba estátua neʼe simu kbiit atu halo buat ruma neʼebé kona mundu tomak.

ESTÁTUA ANIMÁL FUIK HAN FETO-AAT

15, 16. Feto-aat reprezenta saida? Ohin loron, saida mak akontese ba relijiaun sira?

¹⁵ Iha João nia vizaun, nia mós haree feto-aat ida tuur iha animál fuik neʼebé kór-mean nia leten. Animál fuik neʼe hanesan ho estátua animál fuik ho ulun hitu. Feto-aat neʼe iha naran “Babilónia boot”. (Apok 17:1-6) Feto-aat neʼe reprezenta relijiaun falsu hotu, no ida neʼebé boot liu mak relijiaun kristaun falsu sira. Hanesan feto-aat tuur iha estátua animál fuik nia leten, relijiaun falsu sira apoia organizasaun Liga Nasaun sira-nian no Nasoins Unidas, no koko atu kontrola organizasaun sira-neʼe.

¹⁶ João mós haree Babilónia Boot tuur hela iha “bee barak”. Bee barak neʼe reprezenta ema neʼebé apoia Babilónia Boot. Maibé, durante Naʼi nia loron, ema ladún apoia ona Babilónia Boot hanesan uluk. Ida-neʼe hanesan bee “sai maran”. (Apok 16:12; 17:15) Porezemplu, kuandu estátua animál fuik nian foin mosu, relijiaun sira neʼebé bolu sira-nia an kristaun mak domina rai modernu sira hanesan Europa, Amérika no seluk tan. Maibé ohin loron, ema ladún apoia no respeitu relijiaun sira-neʼe no sira-nia ulun-naʼin relijiaun nian. Tuir loloos, ema barak fiar katak relijiaun mak hamosu problema oioin. No ema balu seluk fó sai katak tenke halakon tiha relijiaun hotu.

17. Lakleur tan, saida mak sei akontese ba relijiaun falsu? Tanbasá?

¹⁷ Maibé, relijiaun falsu sei la lakon ninia forsa neineik-neineik toʼo la iha ona. Feto-aat neʼe sei kontinua atu iha forsa no koko atu halo ukun-naʼin sira halo ninia hakarak. Maibé lakleur tan, Maromak sei ‘tau iha sira-nia laran atu halaʼo Nia hakarak’. (Lee Apokalipse 17:16, 17.) Jeová sei book governu sira iha Satanás nia mundu neʼe atu ataka relijiaun falsu. No feto-aat neʼe sei la bele ona domina governu sira-neʼe, no sei lakon ninia rikusoin hotu. Iha tinan 20 ka 30 liubá, ema barak hanoin katak relijiaun sei nunka lakon ninia kbiit no ema sei nafatin respeitu relijiaun. Maibé ohin loron, la hanesan neʼe. Feto-aat neʼe sei la lakon ninia forsa neineik-neineik, maibé nia sei lakon derrepente deʼit.—Apok 18:7, 8, 15-19.

ANIMÁL FUIK SIRA SEI LAKON

18. (a) Animál fuik ho ulun hitu sei halo saida? Ida-neʼe sei lori rezultadu saida? (b) Tuir Daniel 2:44, Maromak nia Ukun sei halakon ukun saida deʼit? (Haree kaixa iha pájina 17.)

¹⁸ Depois halakon tiha relijiaun falsu, Satanás sei book animál fuik ho ulun hitu, katak governu sira iha mundu neʼe, atu ataka Maromak nia Ukun. Tanba “liurai sira hotu rai neʼe nian” sei la bele ataka iha lalehan, sira sei hatudu sai sira-nia hirus ba ema iha rai neʼebé apoia Maromak nia Ukun. Rezultadu ba ida-neʼe mak sira halo funu hasoru Maromak ba dala ikus. (Apok 16:13-16; 17:12-14) Daniel fó sai kona-ba buat ida neʼebé mosu iha funu ikus neʼe. (Lee Daniel 2:44.g) Animál fuik ho ulun hitu neʼebé temi iha Apokalipse 13:1, ninia estátua, no mós animál fuik neʼebé iha dikur rua sei lakon.

19. Ita bele fiar kona-ba saida? Agora mak tempu atu halo saida?

¹⁹ Ita moris iha tempu neʼebé ulun númeru hitu mak ukun. La iha tan ulun seluk neʼebé sei mosu husi animál fuik neʼe toʼo nia sai lakon. Bretaña ho Estadus Unidus Amérika mak sei domina hela mundu kuandu relijiaun falsu lakon. Profesia sira husi Daniel no João sai loos ona. Entaun, ita bele fiar katak lakleur tan relijiaun falsu sei lakon, no funu Armagedon sei mai. Maromak fó-hatene nanis ona kona-ba buat sira-neʼe antes atu akontese. Tan neʼe, ita sei tau atensaun ba avizu sira neʼebé profeta fó-hatene nanis ka lae? (2 Ped 1:19) Sin, agora mak tempu atu halo tuir Jeová no apoia ninia Ukun.—Apok 14:6, 7.

Pergunta husi lee-naʼin

Bainhira mak Bretaña ho Estadus Unidus Amérika sai ukun boot númeru hitu hanesan Bíblia fó-hatene nanis?

▪ Liurai Nabucodonosor haree estátua boot ida iha ninia mehi, no Jeová hatudu sai ba Daniel katak parte ida-idak iha estátua neʼe reprezenta ukun boot oioin neʼebé domina mundu. Maibé, estátua neʼe la reprezenta ukun boot hotu neʼebé mosu hodi domina mundu. (Dan 2:31-45) Estátua neʼe hatudu deʼit kona-ba ukun boot lima neʼebé ukun, hahú husi Daniel nia tempu ba oin no neʼebé funu hasoru Maromak nia povu.

Husi buat neʼebé Daniel esplika kona-ba estátua boot, ita bele hatene katak ukun boot Bretaña ho Estadus Unidus Amérika sei mosu husi Roma nia ukun, laʼós katak sira manán Roma. Daniel hatete katak estátua boot neʼe nia ain toʼo ain parte kraik no ain-fuan halo husi besi. (Iha ain parte kraik no ain-fuan, besi kahur ho rai-mean.)a Ida-neʼe hatudu katak Bretaña ho Estadus Unidus Amérika sei mosu husi Roma, katak ain neʼebé halo husi besi. Ema nia istória hatudu katak neʼe sai loos duni. Uluk Bretaña mak rai kiʼik neʼebé Roma mak ukun, maibé maizumenus tinan 230 liubá, nia komesa sai nasaun neʼebé iha kbiit boot. Tuirmai, Estadus Unidus Amérika mós sai nasaun neʼebé iha kbiit boot. Maibé, Bretaña no Estadus Unidus Amérika seidauk sai nuʼudar ukun boot númeru hitu neʼebé domina mundu hanesan Bíblia fó-hatene nanis. Tanbasá? Tanba sira seidauk serbisu hamutuk iha dalan neʼebé espesiál. Maibé, durante Funu Mundiál Primeiru mak Bretaña no Estadus Unidus Amérika foin harii relasaun neʼebé espesiál.

Iha tempu neʼebá “reinu nia oan sira” halaʼo Maromak nia serbisu ho badinas liuliu iha rai-Estadus Unidus Amérika. Sira dirije serbisu haklaken husi sede-jerál iha Brooklyn, Novaiorke. (Mt 13:36-43) Ema kose-mina sira mós haklaken ho laran-manas iha rai sira neʼebé Bretaña mak ukun. Durante Funu Mundiál Primeiru, Bretaña no Estadus Unidus Amérika harii relasaun diʼak hodi halo funu hasoru nasaun sira neʼebé sai sira-nia inimigu. Funu halo Bretaña no Estadus Unidus Amérika hadomi liu sira-nia nasaun, no tan neʼe sira mós halo funu hasoru “feto” nia bei-oan hodi bandu sira-nia livru no hatama sira neʼebé dirije serbisu haklaken ba komarka.—Apok 12:17.

Husi profesia sira neʼebé ita lee iha Bíblia laran, ita hatene katak ukun boot númeru hitu la mosu maizumenus tinan 230 liubá, kuandu Bretaña komesa sai nasaun neʼebé iha kbiit boot. Maibé, ukun boot númeru hitu neʼe mosu kuandu Naʼi nia loron hahú.b