PERGUNTA HUSI JOVEN SIRA

Sai populár iha média sosiál mak importante ka lae?

Joven feto ida naran Elaine hatete: “Bainhira haʼu haree katak ema barak tuir haʼu-nia kolega eskola sira iha sira-nia média sosiál, haʼu hanoin: ‘Wow, sira populár loos.’ Tuir loloos, haʼu sente laran-moras uitoan.”

Ita mós sente hanesan neʼe ka lae? Se nuneʼe, informasaun neʼe bele ajuda Ita atu la hanoin demais kona-ba atu sai populár iha média sosiál.

Tanbasá hakarak sai populár mak perigu?

Iha Provérbios 22:1, Bíblia hatete katak “diʼak liu atu iha naran diʼak duké iha rikusoin barak”. Tan neʼe la sala se ita hakarak atu iha reputasaun diʼak ka hakarak ema seluk atu gosta ita.

Maibé karik ita-nia hakarak atu ema seluk gosta ita bele sai makaʼas demais toʼo ita la sente tan kontente se ita seidauk sai populár. Neʼe mak buat neʼebé perigu ka lae? Joven feto ida naran Onya neʼebé tinan 16 hatete:

“Haʼu haree ona ema balu halo buat oioin neʼebé perigu hodi bele sai populár, hanesan haksoit husi eskola nia andár segundu.”

Atu hetan atensaun husi ema seluk, ema balu grava sira-nia an neʼebé halo daudaun buat neʼebé perigu no beik no tuirmai posting iha internét. Porezemplu, joven balu upload vídeo kona-ba sira han sabaun fase roupa nian. Neʼe hanesan sira han venenu no neʼe perigu tebes.

Bíblia hatete: “Keta halo buat ida hodi . . . hakarak hetan naran-boot.”—Filipe 2:3, Liafuan diak ba imi, segundu edisaun.

Hanoin toʼok:

Tuir Ita-nia hanoin, importante ka lae atu sai populár iha média sosiál?
Ita hakarak atu estraga saúde no tau Ita-nia moris iha perigu laran atu ema gosta Ita ka lae?

Ita-nia kolega hanoin saida

“Hakarak atu sai populár mak perigu kuandu ema hakaʼas an atu halo buat naran deʼit atu ema barak bele gosta sira. Sira hanoin katak dalan neʼebé sira koʼalia, hatais no hahalok bele halo sira populár iha média sosiál. Ita sei arrepende se ita halo buat ruma neʼebé sala tanba deʼit hakarak atu halo ema barak gosta Ita.”—Leianna.

“Ema hanoin katak sira populár tebes”

Maski nuneʼe, laʼós ema hotu halo buat neʼebé perigu atu bele sai populár. Erica neʼebé tinan 22 esplika kona-ba dalan seluk neʼebé ema halo atu sai populár:

“Ema sei posting foto barak kona-ba sira-nia moris iha média sosiál, atu haree hanesan sira iha kolega neʼebé barak tebes. Neʼe halo ema hanoin katak sira populár tebes.”

Joven feto ida naran Cara neʼebé tinan 15 hatete katak ema balu la onestu ho sira-nia situasaun moris:

“Haʼu haree ona ema balu neʼebé hasai foto hanesan sira iha hela festa ruma, maibé tuir loloos sira mak iha uma.”

Matthew neʼebé tinan 22 mós halo buat neʼebé hanesan:

“Haʼu posting foto ida no haʼu tau esplikasaun katak iha Foho Evereste, maski loloos haʼu nunka vizita Ázia.”

Bíblia hatete: “Ami hakarak atu hatudu laran-moos iha buat hotu.”—Ebreu 13:18.

Hanoin toʼok:

Ita posting ona foto ruma neʼebé la loos kona-ba Ita-nia situasaun atu bele sai populár ka lae?
Ita-nia foto no komentáriu neʼebé Ita posting hatudu sai Ita mak ema hanesan saida no Ita moris tuir prinsípiu saida ka lae?

Ita-nia kolega hanoin saida

“Ema balu prontu atu halo buat naran deʼit hodi bele hetan like barak. Maibé Ita hakarak ema koñese Ita tanba Ita hatais no koʼalia arbiru no mós hatudu sai buat neʼebé Ita iha? Ka Ita hakarak ema koñese Ita tanba Ita iha hahalok diʼak no hanoin ema seluk? Ita bele sente kontente bainhira ema barak gosta ita, maibé ita hakarak sira gosta ita tanba hahalok diʼak neʼebé ita hatudu.”—Hannah.

**Importante ka lae atu iha follower no like barak?**

Ema barak fiar katak atu bele sai populár, sira presiza iha follower barak no hetan like barak. Joven mane naran Matthew neʼebé temi ona ohin esplika katak uluk nia mós sente hanesan neʼe:

“Uluk haʼu sempre husu ema: ‘Ó iha follower hira?’ ka ‘Ó-nia like neʼebé barak liu mak hira?’ Atu bele aumenta haʼu-nia follower, haʼu follow ema arbiru deʼit hodi nuneʼe sira mós sei follow fali haʼu. Haʼu komesa sente katak haʼu presiza sai populár no média sosiál halo sentimentu neʼe sai makaʼas liután.”

Foto sira: 1. Joven feto ida haree ba ema naʼin-hira mak like ninia foto iha ninia média sosiál no nia oin-midar. 2. Joven feto neʼebé hanesan han rebusadu manko ida. 3. Nia kaer ninia kabun no ninia oin triste. — Sai populár iha média sosiál mak hanesan han hahán sira neʼebé la saudavel. Karik foufoun ita sente kontente, maibé neʼe la halo ita sente satisfás

Maria neʼebé tinan 25 haree ona oinsá ema balu tesi-lia kona-ba sira-nia an rasik bazeia ba ema hira mak follow no like hira mak sira hetan:

“Se feto ida post ninia foto selfie no ema ladún like, nia sei hanoin katak ninia oin aat. Hanoin hanesan neʼe mak sala. Maibé iha ema barak neʼebé hanoin hanesan neʼe. Tuir loloos neʼe hanesan sira hatún sira-nia an rasik.”

Bíblia hatete: “Ita labele sai foti an, labele buka atu manán deʼit, no labele laran-moras ba malu.”—Galásia 5:26.

Hanoin toʼok:

Kuandu Ita uza média sosiál, Ita sai toman atu kompara Ita-nia an ho ema seluk ka lae?
Ida-neʼebé mak importante liu ba Ita, iha follower barak ka bele iha kolega neʼebé diʼak no hanoin Ita?

Ita-nia kolega hanoin saida

“Atu bele sai populár iha média sosiál, ita presiza sai ema neʼebé ema seluk admira, neʼe katak ita presiza sai hanesan sira. Neʼe sei book ita atu fokus deʼit ba ema seluk nia opiniaun kona-ba ita no mós fokus deʼit ba buat neʼebé ita presiza halo atu sira bele gosta liután ita. La sala atu hakarak ema seluk gosta ita, maibé neʼe bele lori perigu se ita fokus demais atu sai populár.”—Joshua.

Kuidadu atu la finje haraik an

Ita rasik haree ona ka lae ema balu neʼebé finje muramura kona-ba buat oioin neʼebé sira iha, maibé tuir loloos sira gaba an hela?

“Haʼu-nia kolega sira gosta loos saʼe haʼu-nia karreta tanba deʼit haʼu iha karreta foun.”
“Haʼu kole atu rona ema gaba hela deʼit haʼu tanba haʼu isin tun.”

Ema sira-neʼe muramura atu book ema hanoin katak sira haraik an, maibé loloos sira foti an.

Avizu: Foti an ka gaba an iha dalan hanesan neʼe, baibain lori rezultadu aat tanba ema seluk hatene katak ita-nia haraik an mak finje deʼit. No baibain ema la gosta liu ema hanesan neʼe se kompara ho ema neʼebé gaba an malorek deʼit.

Tempu seluk, kuandu ita hakarak atu posting foto ka komentáriu ruma, keta finje haraik an atu foti aas ita-nia an. Halo tuir Bíblia nia matadalan: “Husik ema seluk mak gaba ó, laʼós ó rasik mak gaba ó-nia an.”—Provérbios 27:2.