AJUDA BA FAMÍLIA | HABOOT OAN
Ita-nia oan no média sosiál—Parte 2: Hanorin Ita-nia oan joven oinsá atu uza média sosiál ho seguru
Inan-aman barak la fó lisensa ba sira-nia oan atu uza média sosiál tanba hanoin kona-ba perigu oioin neʼebé bele akontese. Maibé se Ita fó lisensa ba Ita-nia oan atu uza média sosiál, oinsá mak Ita bele ajuda sira atu sees husi perigu oioin no uza média sosiál ho matenek?
Iha informasaun neʼe
Saida mak prioridade ba Ita-nia oan?
Buat neʼebé Ita presiza hatene: Tanba fasil atu sai atan ba média sosiál, karik Ita presiza ajuda Ita-nia oan hodi nia bele kontrola tempu neʼebé nia uza ba ida-neʼe.
Bíblia nia prinsípiu: “Buka-hatene loloos buat sira neʼebé importante liu.”—Filipe 1:10.
Hanoin toʼok: Ita-nia oan uza média sosiál iha tempu neʼebé loloos nia presiza toba, halo TPC, ka ransu hamutuk ho família ka lae? Matenek-naʼin sira dehan katak joven sira presiza toba kalan maizumenus ba oras sia, maibé joven barak neʼebé uza média sosiál ba oras balu loroloron, sira toba la toʼo oras hitu.
Buat neʼebé Ita bele halo: Koʼalia hamutuk kona-ba saida mak prioridade, no tanbasá matenek atu limita tempu neʼebé uza ba média sosiál. Halo lei neʼebé la susar demais atu kumpre, hanesan labele lori telemovel ba kuartu iha kalan. Ita-nia objetivu mak ajuda sira atu aprende kontrola an. Neʼe mak hahalok neʼebé importante ba sira kuandu sira sai boot.—1 Korinto 9:25.
Oinsá ida-neʼe fó impaktu ba oan nia emosaun?
Buat neʼebé Ita presiza hatene: Bainhira joven sira haree kolega sira-nia foto neʼebé jeitu no edit ona no foto neʼebé hatudu tempu furak deʼit, sira bele sente mesamesak, laran-susar, no depresaun.
Bíblia nia prinsípiu: “Hasai tiha . . . laran-moras.”—1 Pedro 2:1.
Hanoin toʼok: Média sosiál halo Ita-nia oan sente la diʼak kona-ba ninia isin no oin ka lae? Nia sente ka lae, katak ema seluk halaʼo moris diʼak maibé ninia moris la diʼak?
Buat neʼebé Ita bele halo: Koʼalia hamutuk kona-ba tanbasá perigu atu kompara sira-nia an ho ema seluk. Hanoin-hetan katak dala barak média sosiál fó impaktu boot liu ba feto duké mane, tanba feto sira hanoin liu kona-ba relasaun ho ema seluk no sira-nia isin. Ita mós bele fó sujestaun atu la uza média sosiál ba tempu balu. Joven mane ida naran Jacob dehan: “Haʼu apaga aplikasaun média sosiál nian ba tempu balu. Neʼe ajuda haʼu atu hadiʼa haʼu-nia hanoin kona-ba haʼu-nia an no ema seluk no buat neʼebé prioridade liu.”
Ita-nia oan sei halo saida ho média sosiál?
Buat neʼebé Ita presiza hatene: Uza média sosiál mak hanesan halaʼo ita-nia moris iha ema-lubun nia oin. Tan neʼe mak akontese beibeik komprende sala no hirus malu.
Bíblia nia prinsípiu: “Hasai tiha husi imi-nia an hahalok odi malu, hirus, laran-nakali, hakilar malu, koʼalia aat . . . Maibé hatudu laran-diʼak ba malu.”—Éfeso 4:31, 32.
Hanoin toʼok: Média sosiál halo ona Ita-nia oan envolve an iha gosip, hirus malu, ka koʼalia buat neʼebé la diʼak ka lae?
Buat neʼebé Ita bele halo: Hanorin Ita-nia oan atu hatudu hahalok diʼak iha média sosiál. Livru Digital Kids dehan: “Nuʼudar inan-aman, ita-nia responsabilidade mak hanorin klaru ita-nia oan katak labele trata aat ema seluk iha situasaun naran deʼit, inklui hasoru ema oin ba oin ka liuhusi média sosiál.”
Hanoin-hetan katak média sosiál laʼós buat neʼebé presiza atu bele moris, no laʼós inan-aman hotu fó lisensa ba sira-nia oan atu uza ida-neʼe. Se Ita fó lisensa ba Ita-nia oan atu uza média sosiál, Ita presiza buka-hatene uluk se sira bele uza tempu ho matenek ba média sosiál, mantein relasaun diʼak ho kolega, no sees husi informasaun la diʼak.