Watchtower BIBLIOTEKA ONLINE
Watchtower
BIBLIOTEKA ONLINE
Tetun Dili
Á
  • Á
  • á
  • É
  • é
  • Í
  • í
  • Ó
  • ó
  • Ú
  • ú
  • Ã
  • ã
  • Ç
  • ç
  • Ñ
  • ñ
  • ʼ
  • BÍBLIA
  • LIVRU SIRA
  • REUNIAUN SIRA
  • g 1/14 p. 6-9
  • Buat tolu saida mak la bele sosa ho osan?

La iha video neʼebé bele loke.

Deskulpa, la bele loke vídeo.

  • Buat tolu saida mak la bele sosa ho osan?
  • Matan-moris bá!—2014
  • Informasaun seluk neʼebé hanesan
  • Osan mak buat aat hotu nia hun ka lae?
    Pergunta kona-ba Bíblia
  • Oinsá atu uza osan ho kuidadu
    Ita-nia Moris Família nian Bele Sai Kontente
  • Xave atu moris kontente
    Matan-moris bá!—2021
Matan-moris bá!—2014
g 1/14 p. 6-9
[Dezeñu iha pájina 6]

KONA-BA INFORMASAUN IHA OIN

Buat tolu saida mak la bele sosa ho osan?

DALA barak, maski ema hasoru problema boot hanesan atu lakon serbisu, lakon uma, no karik lakon osan pensaun nian, maibé sira barak sei kontinua hanoin liu kona-ba oinsá atu hetan sasán oioin neʼebé bele sosa ho osan.

Ema sira neʼebé halo iklan buka atu dada ema hanesan neʼe. Sira-nia iklan halo ita hanoin katak ita tenke iha uma boot, karreta neʼebé jeitu, no roupa neʼebé iha naran-boot. Maibé, oinsá se la iha osan? Ema barak hanoin neʼe la problema tanba bele empresta deʼit. Ba ema barak, sira-nia hakarak mak atu ema seluk haree sira nuʼudar ema riku, maski tuir loloos sira monu ba tusan neʼebé boot.

Maibé, neineik-neineik sira-nia hanoin neʼe sei lakon. Livru ida naran The Narcissism Epidemic dehan katak, kuandu ita empresta osan hodi sosa sasán jeitu, tan deʼit hakarak atu ema bele haree ita nuʼudar ema riku, foufoun ita sente katak ida-neʼe bele ajuda. Maibé tuir loloos, ida-neʼe hanesan deʼit ho uza droga atu halo ita sente kontente liu, tanba neʼe ba tempu uitoan deʼit. Tuir loloos, ikusmai neʼe halo ita gasta osan barak no sai estrese.

Bíblia koʼalia kona-ba “loko-an moris nian” no hatudu sai kona-ba buat aat neʼebé bele mosu husi ida-neʼe. (1 Joao 2:16) Se ita okupadu ho sasán sira, ida-neʼe bele hanetik ita atu hanoin kona-ba buat neʼebé importante liu iha moris, neʼe mak buat neʼebé la bele sosa ho osan. Hanoin toʼok kona-ba ezemplu tolu tuirmai neʼe.

1. UNIDADE IHA FAMÍLIA LARAN

Joven ida iha rai-Estadus Unidus naran Brianne,a sente katak ninia aman tau atensaun barak liu ba serbisu atu manán osan. Brianne dehan: “Ami iha ona buat hotu neʼebé ami presiza no resin. Maibé, haʼu-nia aman nunka iha uma tanba nia sempre bá fatin oioin. Haʼu hatene katak neʼe tanba ninia serbisu, maibé nia mós iha responsabilidade ba ninia família!”

[Dezeñu iha pájina 6]

Pergunta atu hanoin kleʼan: Tuir Ita-nia hanoin, ikusmai saida mak Brianne nia aman sei sente? Hodi tau atensaun barak liu ba sasán, oinsá mak ida-neʼe kona nia relasaun ho ninia oan-feto? Saida mak ninia família presiza husi nia neʼebé importante liu fali osan?

Bíblia nia matadalan:

  • “Domin ba osan mak buat aat hotu nia hun; iha ema balun neʼebé, tan tuir nia, . . . fó ba sira-nia klamar kanek boot oioin.”—1 Timoteo 6:10.

  • “Diʼak liu atu han modo-tahan bikan ida hamutuk ho domin, duké han naʼan-karau neʼebé han deʼit husi balada han-fatin hamutuk ho odi.”—Provérbios (Amsal) 15:17.

Buat neʼebé importante: Família nia unidade la bele sosa ho osan. Tuir loloos, atu hetan unidade iha família laran, ita presiza uza tempu atu hamutuk ho ita-nia família hodi fó domin ba sira no tau matan ba sira.—Koloso 3:18-21.

2. PROTESAUN NEʼEBÉ LOOS

Sara neʼebé tinan 17 ona hatete: “Haʼu-nia amá sempre dehan ba haʼu katak haʼu presiza kaben ho mane neʼebé iha osan barak no haʼu presiza aprende kona-ba serbisu ruma hodi haʼu bele uza atu hetan serbisu diʼak se haʼu-nia laʼen la iha ona osan. Buat neʼebé haʼu-nia inan hanoin demais liu mak kona-ba hetan osan.”

[Dezeñu iha pájina 6]

Pergunta atu hanoin kleʼan: Kuandu ita hanoin kona-ba futuru, razaun saida mak halo ita sente taʼuk kona-ba ita-nia situasaun osan nian? Bainhira mak razaun neʼe bele sai fali nuʼudar buat neʼebé halo Ita estrese demais? Oinsá mak Sara nia inan bele fó konsellu neʼebé diʼak liu kona-ba hetan osan?

Bíblia nia matadalan:

  • “Keta haloot rikusoi iha rai, neʼebé ular no ferrujen han mohu no naʼok-teen sira sobu hodi naʼok.”—Mateus 6:19.

  • “Imi la hatene kona-ba aban, imi-nia moris saida?”—Tiago 4:13, 14.

Buat neʼebé importante: Hodi hakaʼas an atu hetan osan barak, ida-neʼe sei la ajuda atu hetan protesaun neʼebé diʼak ba futuru tanba ema bele naʼok ita-nia osan. No mós osan la bele kura moras ka hapara mate. (Eclesiastes [Pengkhotbah] 7:12) Bíblia hanorin katak ita bele hetan protesaun neʼebé loos hodi hatene Maromak no hatene ninia hakarak sira.—Joao 17:3.

3. ITA-NIA KSOLOK

Tanya neʼebé tinan 24 dehan: “Haʼu-nia inan-aman hanorin haʼu atu moris simples. Haʼu no haʼu-nia kaduak kontente iha ami-nia moris, maski dala barak ami iha deʼit buat neʼebé natoon ba ami-nia presiza.”

[Dezeñu iha pájina 6]

Pergunta atu hanoin kleʼan: Tansá mak susar ba ema atu sente kontente ho buat neʼebé simples deʼit? Ita hatudu ezemplu neʼebé diʼak ba ita-nia família kona-ba oinsá ita-nia haree kona-ba osan ka lae?

Bíblia nia matadalan:

  • “Wainhira ita iha ai-han no hatais, ita haksolok ona ho sira-neʼe.”—1 Timoteo 6:8.

  • “Ksolok ba ema sira neʼebé kiak iha laran”, ka hatene katak sira presiza Maromak nia matadalan.—Mateus 5:3.

Buat neʼebé importante: Tuir loloos, iha buat neʼebé importante liu fali osan no sasán. Ida-neʼe hanesan buat neʼebé Bíblia dehan: “Laʼós ema nia rikusoi mak halo ema moris liu.” (Lucas 12:15) Entaun, atu ita bele hetan ksolok neʼebé diʼak liu iha ita-nia moris, ita presiza hetan resposta ba pergunta sira tuirmai neʼe:

  • Tanbasá mak ita moris?

  • Ita-nia futuru sei sai oinsá?

  • Oinsá mak haʼu bele hatene Maromak nia matadalan?

Testemuña ba Jeová neʼebé halo livru neʼe, kontente atu ajuda ita hetan resposta ba pergunta sira-neʼe.

a Naran sira laʼós naran neʼebé loos.

Saida mak dalan atu hetan moris neʼebé kontente?

Livru ida naran The Narcissism Epidemic dehan katak “dala barak ema neʼebé kaan rikusoin, sira ladún kontente no iha estrese barak iha sira-nia moris. Neʼe inklui mós ema sira neʼebé hakarak deʼit atu hetan osan liután. Sira sente estrese iha neon; sira mós dehan katak sira hetan problema saúde nian hanesan kakorok moras, kotuk moras, ulun moras, no dala ruma sira hemu tua barak demais no uza droga sira. Tuir loloos, hakaʼas an atu sai riku, halo ema hetan deʼit terus”.

Ema nia hanoin neʼebé troka ona

“Kuandu ema halo entrevista ho ema sira neʼebé moris husi tinan 1960 no 1970 kona-ba razaun tansá mak sira tuir eskola boot, dala barak liu sira dehan katak tanba ‘sira hakarak sai matenek’ ka ‘buka-hatene kona-ba moris’. Iha tempu neʼebá, ema uitoan deʼit mak hanoin katak razaun atu sira tuir eskola boot mak hodi ‘hetan osan barak’. Maibé, hahú husi tinan 1990 ba leten, estudante barak liu dehan katak ‘hetan osan barak’ mak razaun ba sira atu tama eskola boot . . . Husi tinan 1990 mós moras depresaun aumenta liután, no ema barak liu oho an no iha problema mentál nian seluk neʼebé aumenta makaʼas liután.”—The Price of Privilege, husi Doutora Madeline Levine.

Toman atu gasta osan

Doutora Madeline Levine dehan, ema sente katak gasta osan mak hanesan ai-moruk ba sira tanba halo sira sente kmaan iha mundu neʼebé sira hetan susar husi família, komunidade, no igreja. Nia hakerek iha ninia livru ida naran The Price of Privilege hodi dehan: “Bainhira ema sosa sasán, sira haluha buat sira seluk. Kuandu ema sosa sasán, sira sente katak sira iha kbiit atu kontrola arranju neʼe. Maski nuneʼe, kbiit neʼe mak hanesan mehi deʼit . . . Loloos, kompañia boot sira mak iha kbiit tanba sira kontrola ema nia hanoin ho iklan sira. Sira hetan osan hodi halo ema neʼebé sosa sasán sente katak sira bele hetan buat diʼak no bele sai kontente.”

    Livru sira iha lian Tetun Dili (1993-2025)
    Log Out
    Log In
    • Tetun Dili
    • Fahe
    • Organiza tuir Ita-nia hakarak
    • Copyright © 2025 Watch Tower Bible and Tract Society of Pennsylvania
    • Kondisaun atu Uza
    • Informasaun Privadu
    • Setting kona-ba privasidade
    • JW.ORG
    • Log In
    Fahe