‘Naran diʼak mak diʼak liu fali rikusoin barak’

NARAN diʼak mak folin boot tebes, tan neʼe iha rai balu iha lei neʼebé proteje ita-nia naran diʼak husi ema neʼebé hafoʼer ita-nia naran liuhusi buat neʼebé sira hakerek no koʼalia. Liafuan husi tempu antigu mós dehan: “Diʼak liu atu iha naran diʼak duké iha rikusoin barak; diʼak liu simu respeitu duké simu osan-mutin no osan-mean.” (Provérbios [Amsal] 22:1) Oinsá mak ita bele hetan naran diʼak no hetan respeitu husi ema seluk? Bíblia fó sujestaun diʼak kona-ba neʼe.

Porezemplu, Bíblia dehan: “Sé mak bele sai bainaka iha [Maromak nia] tenda? . . . Ema neʼebé . . . halo buat neʼebé loos no koʼalia lia-loos iha ninia laran. Nia la uza ninia nanál atu koʼalia aat kona-ba ema seluk, nia la halo aat ba ninia maluk, no nia la hafoʼer ninia belun nia naran. Nia la simu ema neʼebé la iha morál . . . Nia kumpre ninia promesa sira maski neʼe lori susar ba nia. . . . Nia lakohi simu osan hodi halo aat ba ema neʼebé la halo sala.” (Salmo [Mazmur] 15:1-5) Ita hakarak hatudu respeitu ba ema hanesan neʼe ka lae?

Hahalok diʼak ida seluk neʼebé bele book ema atu respeitu ita mak haraik-an. Provérbios (Amsal) 15:33 dehan: “Haraik-an halo ema hetan glória.” Ema neʼebé haraik an rekoñese sira rasik nia fraku no hakaʼas an atu hadiʼa ninia hahalok. Sira mós prontu atu husu deskulpa se sira halo ema ruma laran-kanek. (Tiago 3:2) Ema neʼebé foti-an la hanesan neʼe, sira sente an lalais. Provérbios 16:18 dehan: “Foti-an sei halo ema monu, no hanoin neʼebé foti-an sei halo ema sidi.”

Maibé, oinsá se ema ida hafoʼer Ita-nia naran? Ita presiza hadiʼa kedas situasaun neʼe ka lae? Husu ba Ita-nia an: ‘Se haʼu koko atu defende haʼu-nia naran, neʼe sei habelar liután lia-bosok neʼe ka lae?’ Dala ruma Ita presiza lori kazu ba tribunál. Maski nuneʼe, Bíblia haruka ita atu “keta ansi atu lori kazu ba juis”, maibé koʼalia uluk ho ema neʼebé hafoʼer ita-nia naran. (Provérbios [Amsal] 25:8, 9)a Se Ita halo nuneʼe, Ita mós la presiza gasta osan atu lori kazu ba tribunál.

Bíblia iha matadalan barak neʼebé bele ajuda ita atu haburas hahalok diʼak iha ita-nia moris loron-loron. Hodi halo tuir matadalan sira-neʼe, ita bele hetan naran diʼak no book ema seluk atu respeitu ita.