4 | Proteje Ita-nia esperansa

TANBASÁ IMPORTANTE

Kuandu hanoin barak kona-ba situasaun susar iha mundu, neʼe bele fó impaktu aat ba ema nia saúde fíziku no emosaun. Ema barak sente lakon esperansa. Saida mak sira halo?

• Balu lakohi tan atu hanoin kona-ba futuru.

• Balu tan hemu tua ka uza droga atu halai sees husi problema.

• Iha mós ema neʼebé hanoin diʼak liu mate deʼit.

Buat neʼebé Ita presiza hatene

• Problema balu neʼebé Ita hasoru laʼós permanente, no situasaun bele sai diʼak fali.

• Maski Ita-nia situasaun la troka, maibé Ita bele halo buat barak neʼebé bele ajuda Ita atu tahan.

• Bíblia fó esperansa neʼebé loos, neʼe mak solusaun permanente ba problema neʼebé ita hasoru.

Buat neʼebé Ita bele halo agora

Bíblia dehan: “Keta hanoin resin kona-ba loron aban, tanba loron aban iha ninia susar rasik. Loron ida-idak iha ninia problema rasik.”—Mateus 6:34.

Fokus ba loron ohin. Keta hanoin barak kona-ba loron aban toʼo lakon forsa atu halo buat neʼebé presiza halo ba loron ohin.

Hanoin demais kona-ba buat negativu neʼebé karik sei akontese, neʼe sei aumenta deʼit estrese no halo Ita lakon esperansa ba futuru kapás.

Bíblia fó esperansa neʼebé metin

Ema ida halo orasaun ba Maromak hodi dehan: “Ita-nia liafuan mak ahi-oan neʼebé leno haʼu-nia ain, no naroman ba haʼu-nia dalan.” (Salmo 119:105) Haree toʼok oinsá Maromak nia Liafuan Bíblia mak hanesan neʼe duni.

Kuandu iha nakukun laran, ahi-oan bele ajuda ita atu hatene ita sei hakat ba neʼebé. Bíblia mós fó sai konsellu neʼebé bele ajuda ita atu halo desizaun oioin neʼebé la fasil.

Ahi-oan bele fó naroman ba ita-nia dalan atu haree buat neʼebé dook iha ita-nia oin. Bíblia mós hatudu mai ita futuru neʼebé kapás.