Rezolve problema kona-ba kontratu

Iha 1 Korinto 6:1-8, apóstolu Paulo koʼalia kona-ba problema hanesan haksesuk-malu entre maluk kristaun toʼo lori ba tribunál. Nia la kontente hodi rona katak ema kristaun balun “barani lori [maluk] ba tribunál neʼebé ema laloos nian”. (Versíkulu 1) Paulo esplika ho klaru tansá mak ema kristaun labele lori problema entre maluk kristaun ba tribunál mundu nian, maibé tenke koko atu rezolve problema hodi tuir matadalan neʼebé fó tiha ona ba kongregasaun. Mai ita koʼalia kona-ba tansá mak Paulo presiza atu fó konsellu neʼe, no tuirmai, ita mós sei koʼalia kona-ba situasaun sira neʼebé ita bele bá tribunál.

Kuandu iha problema ho maluk kristaun kona-ba kontratu ruma, ulukliu, ita koko atu rezolve problema hodi tuir Maromak Jeová nia dalan, laʼós ita rasik nian. (Provérbios 14:12) Hanesan Jesus hatete ona, diʼak atu hadame malu lalais, antes problema neʼe sai boot liután. (Mateus 5:23-26) Buat neʼebé halo ita triste mak ema kristaun balun haksesuk malu makaʼas, toʼo lori malu ba tribunál. Paulo hatete: “Imi hasoru malu iha tribunál ladiʼak ba imi.” Tanbasá? Razaun primeiru mak hahalok hanesan neʼe sei halo ema hanoin ladiʼak kona-ba kongregasaun no kona-ba Maromak neʼebé ita adora. Tan neʼe, ita labele haluha pergunta neʼebé Paulo husu ba ema kristaun iha Korintu: “Tansá la tahan buat aat?”—Versíkulu 7.

Iha mós razaun ida tan. Paulo hakerek katak Maromak halo ona arranju neʼebé diʼak atu kongregasaun bele rezolve haksesuk-malu oioin. Lia-loos husi Bíblia halo katuas kristaun sira sai ema neʼebé matenek, no Paulo hatete katak sira “bele tesi lia . . . iha maun-alin sira leet” se problema neʼe “kona-ba buat neʼebé moris neʼe nian”. (Versíkulu 3-5) Jesus esplika oinsá mak ita tenke rezolve problema kuandu ita-nia maluk kristaun hasoru ita hodi halo sala boot, hanesan bosok ka naʼok. Iha hakat tolu: primeiru, koʼalia ho nia mesamesak; segundu, se seidauk bele rezolve, lori sasin ida ka rua; no terseiru, se problema iha nafatin, bá fó-hatene ba kongregasaun, katak katuas kongregasaun nian.—Mateus 18:15-17.

Klaru katak katuas kristaun sira laʼós juis ka kontratu-naʼin, no sira lalika fó konsellu kona-ba lei estadu nian no mós kona-ba kontratu. Sira la hakotu lia atu rezolve problema kontratu nian neʼebé mosu entre irmaun sira. Duké halo nuneʼe, sira buka atu ajuda ema hotu neʼebé envolve iha problema atu hadiʼa problema neʼe ho dame hodi tuir matadalan husi Bíblia. Se hasoru problema ruma neʼebé susar atu rezolve, katuas sira bele husu ajuda husi katuas neʼebé halaʼo serbisu atu vizita kongregasaun sira, ka sukursál husi Testemuña ba Jeová. Maibé, iha mós situasaun balun neʼebé ladún kona Paulo nia konsellu. Situasaun saida mak neʼe?

Dala balun, ita bá tribunál laʼós tanba ita ka maluk kristaun ida mak kaan-teen ka hatudu hahalok seluk neʼebé ladiʼak; maibé tanba neʼe mak prosesu atu resolve problema tuir estadu nia lei. Porezemplu, karik tribunál deʼit mak bele hakotu lia kona-ba soe-malu, kona-ba sé mak iha direitu atu tau matan ba oan, kona-ba selu osan ba kaben neʼebé foin soe malu. Tribunál mós halo desizaun kona-ba simu kompensasaun, tau ema nia naran iha lista nuʼudar ema neʼebé fó-empresta osan ba kontratu neʼebé foin taka, no mós halo desizaun kona-ba fahe rikusoin tuir surat neʼebé ema hakerek ona antes nia mate. Iha mós situasaun seluk tan neʼebé irmaun ida sente katak nia presiza lori ninia problema ba tribunál atu hetan protesaun husi estadu.a

Kuandu ema kristaun sira lori problema ba tribunál maibé laʼós tanba rai odi ba malu, sira la kontra Paulo nia konsellu neʼe.b Iha tempu hotu, importante liu ba ema kristaun mak atu halo Maromak Jeová nia naran moos nafatin, no haburas dame no unidade iha kongregasaun laran. Sinál importante liu nuʼudar ema kristaun mak domin neʼebé sira hatudu ba malu, no “domin . . . la buka nia rasik nia diʼak”.—1 Korinto 13:4, 5; Joao 13:34, 35.