LISAUN 44
Maromak kontente ho selebrasaun hotu ka lae?
Jeová hakarak ita atu moris haksolok no mós halo selebrasaun. Maibé nia kontente ho selebrasaun no loron-boot hotu ka lae? Oinsá mak ita bele hatudu ita-nia domin ba Jeová kuandu halo desizaun kona-ba neʼe?
1. Tanbasá mak Jeová la kontente ho selebrasaun barak?
Karik Ita hakfodak kuandu hatene katak selebrasaun barak mai husi hanorin neʼebé la bazeia ba Bíblia ka husi relijiaun falsu. Karik selebrasaun hanesan neʼe iha ligasaun ho espiritizmu ka bazeia ba ema nia fiar ba mate-klamar. Selebrasaun balu nia hun mak superstisaun ka fiar ba sorte. (Isaias 65:11) Jeová fó avizu ba ninia atan sira: “Keta kona buat neʼebé la moos.”—2 Korinto 6:17.a
2. Jeová sente oinsá kona-ba selebrasaun neʼebé fó glória ba ema?
Jeová fó avizu ba ita hodi labele monu ba lasu atu “tau fiar deʼit ba ema”. (Lee Jeremias 17:5.) Loron-boot balu fó glória ba ukun-naʼin ka eroi sira. Iha mós loron-boot atu selebra símbolu nasaun nian ka independénsia. (1 João 5:21) Ema mós dala ruma selebra loron-boot organizasaun polítika ka sosiál. Jeová sente oinsá se ita fó glória ba ema ka organizasaun, liuliu se ema neʼe ka organizasaun neʼe mak apoia ideia neʼebé kontra fali Ninia hakarak?
3. Selebrasaun balu envolve hahalok aat saida deʼit?
Bíblia fó sai katak sala atu ‘hemu tua barak demais, festa arbiru, no halibur malu hodi hemu tua barak’. (1 Pedro 4:3) Iha selebrasaun balu, ema hatudu hahalok arbiru no la tuir morál. Se ita hakarak nafatin sai Jeová nia belun, ita presiza hasees an husi hahalok la diʼak hanesan neʼe.
KEʼE KLEʼAN
Buka-hatene oinsá mak ita bele halo Jeová kontente hodi halo desizaun diʼak kona-ba loron-boot no selebrasaun sira.
4. Hasees an husi selebrasaun neʼebé Jeová la simu
Lee Éfeso 5:10, depois koʼalia hamutuk kona-ba pergunta tuirmai:
Antes halo desizaun kona-ba selebrasaun ruma, Ita presiza buka-hatene kona-ba saida?
Ema barak iha Ita-nia rai halo selebrasaun saida deʼit?
Tuir Ita-nia hanoin, selebrasaun sira-neʼe halo Jeová kontente ka lae?
Porezemplu, saida mak Maromak nia haree kona-ba selebra loron-moris ka halo-tinan? Bíblia nunka konta katak Jeová nia atan sira selebra loron-moris, maibé fó sai deʼit istória rua kona-ba ema neʼebé la serbí Jeová neʼebé halo festa tinan. Lee Génesis 40:20-22 no Mateus 14:6-10. depois koʼalia hamutuk kona-ba pergunta tuirmai:
Saida mak hanesan iha selebrasaun rua neʼe?
Husi Bíblia nia istória neʼe, tuir Ita-nia hanoin saida mak Jeová sente kona-ba selebra loron-moris?
Karik Ita hanoin: ‘Jeová interese ka lae se haʼu partisipa ka la partisipa iha selebrasaun loron-moris nian ka selebrasaun seluk neʼebé la tuir Bíblia?’ Lee Éxodo 32:1-8. Depois, loke VÍDEO no koʼalia hamutuk kona-ba pergunta tuirmai.
Tanbasá mak ita presiza buka-hatene buat neʼebé halo Jeová kontente?
Oinsá mak ita bele halo ida-neʼe?
Oinsá atu hatene selebrasaun neʼebé Maromak la simu
Neʼe bazeia ba hanorin neʼebé kontra Bíblia ka lae? Buka-hatene selebrasaun neʼe nia hun.
Neʼe fó glória ba ema, organizasaun, ka símbolu nasaun nian ka lae? Ita fó glória deʼit ba Jeová, no fiar katak nia mak sei rezolve problema hotu iha mundu.
Neʼe envolve kostume no hahalok neʼebé kontra Bíblia ka lae? Ita-nia morál tenkesér moos nafatin.
5. Ajuda ema seluk atu respeitu Ita-nia fiar
Dala ruma Ita sente susar kuandu ema seluk obriga Ita atu hola parte iha selebrasaun neʼebé Jeová la simu. Ita presiza esplika Ita-nia desizaun ho pasiénsia no respeitu. Atu haree ezemplu kona-ba oinsá mak bele halo nuneʼe, loke VÍDEO.
Lee Mateus 7:12, depois koʼalia hamutuk kona-ba pergunta tuirmai:
Tuir eskritura neʼe, Ita bele bandu família neʼebé fiar la hanesan atu la selebra loron-boot ruma ka lae?
Ita bele halo saida atu hatudu ba Ita-nia família katak Ita nafatin hadomi no hafolin sira maski la selebra hamutuk ho sira?
6. Jeová hakarak ita atu kontente
Jeová hakarak ita atu goza moris hamutuk ho ita-nia família no kolega sira. Lee Eclesiastes 8:15, depois koʼalia hamutuk kona-ba pergunta tuirmai:
Oinsá mak eskritura neʼe hatudu katak Jeová hakarak ita atu kontente?
Jeová hakarak ninia povu atu halimar hamutuk no goza tempu diʼak. Loke VÍDEO atu haree evidénsia liuhusi reuniaun boot internasionál.
Lee Galásia 6:10, depois koʼalia hamutuk kona-ba pergunta tuirmai:
Atu halo “buat neʼebé diʼak” ba ema seluk, Ita presiza selebra loron-boot ka lae?
Ida-neʼebé mak halo Ita kontente liu: Kuandu fó prezente hodi obriga an tanba loron-boot ruma, ka fó prezente ho hakarak rasik?
Testemuña barak organiza buat espesiál ruma ba sira-nia oan, ka halo supreza ba sira hodi fó prezente. Se Ita iha oan, buat espesiál saida deʼit mak Ita bele halo ba sira?
EMA BALU DEHAN: “Ita lalika hanoin barak kona-ba selebrasaun neʼe nia hun. Importante mak kontente hamutuk ho família no belun sira.”
Ita sei dehan saida?
PONTU IMPORTANTE
Jeová hakarak ita atu haksolok hamutuk ho família no belun sira. Maibé nia mós hakarak ita atu sees husi selebrasaun sira neʼebé nia la simu.
Rezumu
Oinsá mak Ita bele hatene selebrasaun neʼebé Maromak la simu?
Oinsá mak ita bele esplika ba família no belun sira atu komprende ita-nia desizaun kona-ba loron-boot?
Oinsá mak Ita bele hatene katak Jeová hakarak ita atu goza moris no sente kontente?
BUKA-HATENE LIUTÁN
Buka-hatene kona-ba loron-boot balu neʼebé ema Kristaun la selebra.
“Tanbasá Testemuña ba Jeová la selebra loron-boot balu?” (Informasaun iha jw.org/tdt)
Haree toʼok razaun haat tanbasá mak ita fiar katak Maromak la kontente ho selebrasaun loron-moris.
“Tanbasá Testemuña ba Jeová la selebra loron moris?” (Informasaun iha jw.org/tdt)
Haree toʼok oinsá labarik neʼebé hadomi Jeová bele halo Nia kontente durante tempu selebrasaun.
Ema Kristaun barak deside atu la selebra Natál. Sira sente oinsá kona-ba sira-nia desizaun?
“Sira hetan buat neʼebé diʼak liu fali” (Informasaun husi Livru Haklaken)
a Haree Apéndise 5 atu buka-hatene buat neʼebé ita bele halo iha situasaun oioin kuandu ema seluk selebra loron-boot.