LISAUN 37
Saida mak Bíblia hatete kona-ba serbisu no osan?
Dala ruma Ita hanoin barak ka lae kona-ba serbisu ka osan? Karik Ita sente susar atu buka moris no iha tempu hanesan halaʼo adorasaun ba Jeová ho laran tomak. Bíblia fó matadalan neʼebé bele ajuda ita atu halo nuneʼe.
1. Bíblia dehan saida kona-ba serbisu?
Maromak hakarak ita atu kontente ho ita-nia serbisu. Bíblia dehan: “Diʼak liu ba ema ida atu . . . hetan ksolok husi ninia serbisu makaʼas, tanba la iha buat ida mak diʼak liu fali ida-neʼe.” (Eclesiastes 2:24) Jeová halo serbisu ho badinas. Kuandu ita halo tuir ninia ezemplu hodi serbisu ho badinas, ita halo nia kontente no ita rasik mós sente kontente.
Serbisu mak importante. Maibé ita labele tau serbisu nuʼudar buat neʼebé importante liu fali adorasaun ba Jeová. (João 6:27) Jeová promete atu tau matan ba ita-nia presiza loroloron nian se ita tau uluk nia iha ita-nia moris.
2. Saida mak hanoin neʼebé loos kona-ba osan?
Maski Bíblia dehan katak “osan bele fó protesaun”, maibé Bíblia mós fó avizu katak osan labele halo ita sente ksolok neʼebé loos. (Eclesiastes 7:12) Tan neʼe, importante mak ita la hadomi osan, maibé ‘kontente ho buat neʼebé ita iha ona’. (Lee Ebreu 13:5.) Kuandu ita kontente ho buat neʼebé ita iha ona, ita sei livre husi estrese tanba hakarak atu iha buat barak liután. Ita sei la monu ba debe neʼebé tuir loloos la presiza. (Provérbios 22:7) No ita mós bele hasees an husi tentasaun atu taru osan, ka negósiu neʼebé fó esperansa ba ema atu sai riku lalais maibé iha risku barak.
3. Oinsá mak ita bele uza osan ho laran-luak?
Jeová mak Maromak neʼebé laran-luak, no ita banati-tuir nia kuandu ita ‘hatudu laran-luak, prontu atu fahe buat neʼebé ita iha’. (1 Timóteo 6:18) Ita bele uza ita-nia osan ho laran-luak hodi apoia kongregasaun no ajuda ema neʼebé presiza, liuliu ita-nia maluk fiar-naʼin. Jeová interese liu kona-ba ita-nia motivu, laʼós ita fó barak ka uitoan. Kuandu ita fó ho laran, ita sei sente kontente no ita mós halo Jeová kontente.—Lee Apóstolu 20:35.
KEʼE KLEʼAN
Haree toʼok benefísiu saida mak ita bele hetan se ita iha hanoin neʼebé loos kona-ba serbisu no kontente ho buat neʼebé ita iha ona.
4. Fó hahiʼi Jeová liuhusi dalan neʼebé ita halaʼo serbisu
Ita-nia relasaun besik ho Jeová sei fó impaktu ba ita-nia hanoin kona-ba serbisu. Loke VÍDEO, depois koʼalia hamutuk kona-ba pergunta tuirmai.
Iha vídeo neʼe, Jason hatudu hahalok diʼak saida iha ninia serbisu-fatin?
Oinsá mak nia tetu didiʼak kona-ba ninia serbisu?
Lee Koloso 3:23, 24, depois koʼalia hamutuk kona-ba pergunta tuirmai:
Tanbasá mak importante atu iha hanoin neʼebé loos kona-ba serbisu?
Serbisu mak importante. Maibé ita labele tau serbisu nuʼudar buat neʼebé importante liu fali adorasaun ba Jeová
5. Kontente ho buat neʼebé ita iha ona
Ema barak hakaʼas an tebes atu manán osan liután. Maibé Bíblia nia konsellu la hanesan ho buat neʼebé ema barak hanoin. Lee 1 Timóteo 6:6-8, depois koʼalia hamutuk kona-ba pergunta tuirmai:
Bíblia anima ita kona-ba saida?
Maski ita iha osan ka sasán uitoan deʼit, ita bele moris kontente. Loke VÍDEO, depois koʼalia hamutuk kona-ba pergunta tuirmai.
Tanbasá mak família sira-neʼe kontente maski iha osan uitoan deʼit?
Oinsá se ita iha ona buat barak, maibé hakarak barak liután? Jesus konta ai-knanoik ida atu fó sai perigu kona-ba neʼe. Lee Lucas 12:15-21, depois koʼalia hamutuk kona-ba pergunta tuirmai:
Ita aprende saida husi Jesus nia ai-knanoik?—Haree versíkulu 15.
Lee no kompara Provérbios 10:22 ho 1 Timóteo 6:10. Depois koʼalia hamutuk kona-ba pergunta tuirmai:
Tuir Ita-nia hanoin saida mak importante liu, relasaun besik ho Jeová ka iha osan barak? Tanbasá?
Hakarak atu manán osan liután lori problema saida deʼit?
6. Jeová sei tau matan ba ita-nia presiza
Problema kona-ba serbisu ka osan bele koko ita-nia fiar ba Jeová. Loke VÍDEO atu haree buat neʼebé ita bele halo hodi hasoru problema sira-neʼe, depois koʼalia hamutuk kona-ba pergunta tuirmai.
Irmaun iha vídeo neʼe hasoru problema saida?
Saida mak nia halo hodi bele tahan hasoru susar neʼe?
Lee Mateus 6:25-34, depois koʼalia hamutuk kona-ba pergunta tuirmai:
Jeová promete atu halo saida ba ema neʼebé buka uluk ninia hakarak?
EMA BALU DEHAN: “Haʼu tenke serbisu makaʼas atu bele sustenta haʼu-nia família. Tan neʼe haʼu labele tuir reuniaun semana-semana.”
Eskritura saida mak halo Ita fiar katak diʼak liu tau uluk adorasaun ba Jeová iha Ita-nia moris?
PONTU IMPORTANTE
Ita presiza halo serbisu no iha osan, maibé labele husik buat sira-neʼe hanetik ita-nia adorasaun ba Jeová.
Rezumu
Saida mak bele ajuda Ita atu iha hanoin neʼebé loos kona-ba serbisu?
Oinsá mak kontente ho buat neʼebé ita iha ona lori benefísiu mai ita?
Oinsá mak Ita bele hatudu Ita-nia fiar ba Jeová nia promesa atu tau matan ba ninia atan sira?
BUKA-HATENE LIUTÁN
Tuir Bíblia, sala ka lae atu iha osan?
“Osan mak buat aat hotu nia hun ka lae?” (Informasaun iha jw.org/tdt)
Aprende oinsá mak ita bele uza osan atu halo Maromak kontente.
“Saida mak Bíblia nia hanorin kona-ba fó ba ema seluk?” (Informasaun iha jw.org/tdt)
Taru osan mak halimar deʼit ka lae?
“Bíblia nia hanorin—Taru osan” (Matan-moris bá!, Abríl 2015)
Haree saida mak ajuda mane ida neʼebé toman taru osan no halo krime troka ninia moris.
“Haʼu gosta tebes haree kuda halai-taru” (Informasaun husi Livru Haklaken)