Maromak nia haree kona-ba raan

Raan mak importante tebes. Se raan la iha, ita labele moris. Nuʼudar Kriadór, Maromak iha direitu atu fó-hatene ita oinsá atu uza raan. Saida mak nia hatete kona-ba raan? Ita bele han raan ka hatama raan ba ita-nia isin ka lae? Oinsá mak Ita bele halo desizaun diʼak kona-ba neʼe?

1. Jeová haree oinsá kona-ba raan?

Jeová hatete ba ninia atan sira iha Bíblia nia tempu: “Kriatura hotu nia moris mak iha ninia raan.” (Levítico 17:14) Ba Jeová, raan reprezenta moris. Tanba moris mak sagradu nuʼudar prezente husi Maromak, entaun raan mós sagradu.

2. Maromak bandu ema atu labele uza raan iha dalan oinsá?

Husi tempu uluk kedas, Jeová bandu ninia atan sira labele han raan. (Lee Génesis 9:4 no Levítico 17:10.) Nia fó-hanoin fali kona-ba mandamentu neʼe bainhira grupu administradór haruka ema Kristaun atu “kontinua hasees an . . . husi raan”.​—Lee Apóstolu 15:28, 29.

Hasees an husi raan katak sá? Se doutór haruka Ita atu hasees an husi tua, neʼe katak Ita labele hemu tua. Maibé Ita bele ka lae han hahán ruma neʼebé iha tua, ka hatama tua ba Ita-nia isin liuhusi soru ka dalan seluk? Labele. Nuneʼe mós ho Maromak nia mandamentu atu hasees an husi raan, katak Ita labele hemu raan no labele han naʼan neʼebé seidauk hasai ninia raan. Ita mós labele han hahán ruma neʼebé uza raan.

Oinsá ho tratamentu médiku neʼebé uza raan? Tratamentu balu kontra duni Maromak nia ukun-fuan. Neʼe inklui transfuzaun raan tomak ka raan nia komponente prinsipál haat, neʼe mak glóbulu mean, glóbulu mutin, plaketa, no plazma. Maibé iha mós tratamentu ka prosesu balu neʼebé karik la kontra Maromak nia ukun-fuan. Porezemplu, tratamentu balu envolve frasaun raan, ka parte kiʼik neʼebé foti husi raan nia komponente prinsipál haat. Iha mós tratamentu balu neʼebé uza pasiente nia raan rasik. Kona-ba opsaun sira-neʼe, ita ida-idak presiza halo desizaun rasik.a​—Galásia 6:5.

KEʼE KLEʼAN

3. Foti desizaun neʼebé halo Jeová kontente

Oinsá mak Ita bele halo desizaun kona-ba tratamentu médiku hodi tuir Maromak nia hakarak? Loke VÍDEO, depois koʼalia hamutuk tanbasá importante atu halo tuir hakat sira tuirmai.

VÍDEO: Oinsá atu halo desizaun kona-ba tratamentu médiku neʼebé uza raan (5:47)

• Halo orasaun hodi husu matenek.​—Tiago 1:5.

• Buka-hatene Bíblia nia prinsípiu sira no oinsá atu aplika.​—Provérbios 13:16.

• Buka-hatene kona-ba opsaun sira iha Ita-nia área.

• Deside opsaun saida deʼit mak Ita sei la simu.

• Haree didiʼak se Ita-nia desizaun sei halo Ita-nia konxiénsia moos nafatin ka lae.​—Apóstolu 24:16.b

• Hanoin-hetan katak la iha ema ida inklui Ita-nia pár, katuas kongregasaun, ka ema neʼebé estuda ho Ita bele halo desizaun ba Ita se neʼe liga ho Ita rasik nia konxiénsia.​—Roma 14:12.

• Hakerek Ita-nia desizaun iha dokumentu ruma.

4. Testemuña ba Jeová hakarak tratamentu neʼebé kualidade diʼak

Ita bele halo tuir Maromak nia mandamentu kona-ba raan no iha tempu hanesan simu tratamentu médiku neʼebé iha kualidade diʼak hodi la uza raan. Loke VÍDEO.

VÍDEO: Entrevista ho Profesór Massimo P. Franchi, M.D. (1:36)

Lee Tito 3:2, depois koʼalia hamutuk kona-ba pergunta tuirmai:

• Tanbasá mak ita presiza hatudu respeitu no laran-maus bainhira koʼalia ho doutór sira?

Labele simu	Ema Kristaun deside rasik
A. Plazma	Frasaun sira husi plazma
B. Glóbulu mutin	Frasaun sira husi glóbulu mutin
C. Plaketa	Frasaun sira husi plaketa
D. Glóbulu mean	Frasaun sira husi glóbulu mean

5. Kuandu envolve frasaun raan

Raan iha komponente prinsipál haat, neʼe mak glóbulu mean, glóbulu mutin, plaketa, no plazma. Komponente sira-neʼe mós bele haketak tan ba parte kiʼik barak, naran frasaun raan.c Frasaun balu uza iha ai-moruk neʼebé ajuda atu kontra moras ka hapara raan suli.

Kona-ba frasaun raan, ema Kristaun ida-idak mak halo desizaun tuir ninia konxiénsia neʼebé hetan treinu husi Bíblia. Karik ema balu lakohi simu tratamentu médiku neʼebé envolve frasaun raan. Maibé karik iha mós ema neʼebé sira-nia konxiénsia permite atu simu frasaun raan.

Bainhira Ita halo desizaun, hanoin toʼok kona-ba pergunta tuirmai:

• Oinsá mak haʼu bele esplika ba doutór kona-ba razaun tanbasá haʼu simu ka la simu frasaun raan?

PONTU IMPORTANTE

Jeová hakarak ita atu la uza raan iha dalan neʼebé sala.

Rezumu

• Tanbasá mak Jeová haree raan nuʼudar buat neʼebé sagradu?

• Oinsá mak ita hatene katak Maromak nia mandamentu atu hasees an husi raan aplika mós ba transfuzaun raan?

• Oinsá mak Ita bele halo desizaun diʼak kona-ba tratamentu médiku neʼebé uza raan?

BUKA-HATENE LIUTÁN

Ita presiza hanoin kona-ba saida deʼit kuandu halo desizaun kona-ba tratamentu médiku neʼebé envolve Ita rasik nia raan?

“Pergunta husi lee-naʼin” (Livru Haklaken, 15 Outubru 2000)

Ita presiza hanoin kona-ba saida deʼit kuandu atu halo desizaun kona-ba frasaun sira?

“Pergunta husi lee-naʼin” (Livru Haklaken, 15 Juñu 2004)

Oinsá mak doutór ida deside atu simu Jeová nia haree kona-ba raan?

“Haʼu simu Maromak nia hanoin kona-ba raan” (Matan-moris bá!, 8 Dezembru 2003)

Aprende oinsá mak katuas sira neʼebé serbí iha Grupu neʼebé Komunika ho Ospitál apoia irmaun-irmán sira.

Jeová apoia ema neʼebé moras (10:23)