Ita bele hatene didiʼak Maromak ka lae?
Se ema importante hatete ba ita katak ita bele koʼalia ba nia hodi uza ninia naran, ida-neʼe buat neʼebé espesiál tebes, loos ka lae? Dala barak, kuandu ema koʼalia ba ema-boot, sira uza títulu hanesan “Señór Prezidente”, ka “Doutór”. Nuneʼe, se ema neʼebé iha pozisaun boot hatete ba ita, “Bele bolu haʼu hodi uza haʼu-nia naran,” ida-neʼe sei halo ita sente espesiál tebes.
MAROMAK neʼebé loos hatete mai ita iha ninia Liafuan, Bíblia: “Haʼu mak Jeová. Neʼe mak haʼu-nia naran.” (Isaías 42:8) Maski Maromak iha títulu barak, hanesan “Naʼi”, “Kriadór”, no “Ukun-Naʼin Boot Liu Hotu”, nia sempre husik ninia atan sira atu hakbesik ba nia hodi uza ninia naran.
Porezemplu, dala ida profeta Moisés harohan ba Maromak hodi dehan: “Deskulpa, Naʼi Jeová.” (Êxodo 4:10) Kuandu halo inaugurasaun ba templu iha Jeruzalein, Liurai Salomão loke ninia orasaun ba Maromak hodi dehan: “Oh, Jeová.” (1 Reis 8:22, 23) No mós, kuandu profeta Isaías koʼalia ba Maromak hodi reprezenta povu Izraél, nia hatete: “Ita, oh, Jeová, mak ami-nia Aman.” (Isaías 63:16) Nuneʼe, klaru katak ita-nia Aman iha lalehan hakarak ita atu koʼalia ba nia hodi uza ninia naran.
Maski importante atu koʼalia ba Maromak Jeová hodi temi ninia naran, maibé atu hatene didiʼak nia envolve buat barak tan. Porezemplu, Maromak Jeová promete kona-ba ema neʼebé hadomi no fiar ba nia: “Haʼu sei proteje nia tanba agora nia hatene ona haʼu-nia naran.” (Salmo 91:14) Klaru katak atu hetan protesaun neʼe envolve hatene buat barak kona-ba Maromak, laʼós hatene deʼit liafuan ida, katak hatene deʼit Maromak nia naran. Nuneʼe, oinsá mak ita bele hatene didiʼak Maromak Jeová?