Saida mak Maromak halo hodi salva ema hotu?

Maromak promete ba fiar-naʼin ida naran Abraão, katak nia sei iha “bei-oan” ida neʼebé sei lori bensaun ba “nasaun hotu”. (Gênesis [Kejadian] 22:18) Liutiha tempu balu, Abraão nia bei-oan Jacob muda ba rai-Ejitu, no ninia família sai boot iha rai neʼe, no ikusmai sira sai nasaun Izraél.

Maibé iha rai-Ejitu, liurai aat ida halo ema Izraél sai atan. Tan neʼe, Maromak hili profeta Moisés atu lori nasaun neʼe sai husi Ejitu hodi fahe Tasi Mean. Liutiha neʼe, Maromak fó Ukun-Fuan Sanulu no ukun-fuan sira seluk ba Izraél hodi proteje no fó matadalan ba sira. Ukun-fuan sira-neʼe inklui mós kona-ba oinsá mak sira hasaʼe sakrifísiu atu taka sira-nia sala. Moisés mós hatoʼo Maromak nia liafuan ba ema Izraél katak Maromak sei haruka profeta ida seluk. Loloos, profeta ida-neʼe mak “bei-oan” neʼebé promete nanis ona.

Liutiha tinan 400 liu, Maromak promete ba Liurai David katak “bei-oan” neʼebé promete nanis ona iha jardín Eden mak sei sai liurai ba nafatin. Ema neʼe mak sei sai Mesias, ka Salvadór neʼebé Maromak foti atu salva ema hotu no halo mundu neʼe sai paraízu, ka fatin neʼebé furak hanesan jardín Eden.

Liuhusi David no profeta seluk, neineik-neineik Maromak fó-hatene liután kona-ba Mesias. Porezemplu, Mesias neʼe sei hatudu hahalok haraik-an no laran-diʼak, no nuʼudar ukun-naʼin, nia sei halakon hamlaha, funu, no buat hotu neʼebé la iha justisa. Ema hotu sei moris hakmatek, no animál sira mós la siʼak tan. Tanba laʼós Maromak nia hakarak atu ema hetan moras, terus, no mate, Nia sei fó knaar ba Mesias atu halakon buat hirak-neʼe no atu fó moris-hiʼas ba ema mate.

Liuhusi profeta Miquéias, Maromak fó-hatene katak Mesias sei moris iha Belein. Profeta Daniel mós hatete nanis katak ema sei oho Mesias, maibé Maromak sei halo nia moris hiʼas fali no foti nia nuʼudar Liurai iha lalehan. Daniel mós fó sai katak liuhusi Mesias nia ukun mak sei halakon ema nia governu hotu ba nafatin. Maibé Mesias neʼe mosu duni hodi tuir profesia sira-neʼe ka lae?

—Informasaun neʼe husi Gênesis (Kejadian) kapítulu 22-50, no mós Êxodo (Keluaran), Deuteronômio (Ulangan), 2 Samuel, Salmos (Mazmur), Isaías (Yesaya), Daniel, Miquéias [Mikha], Zacarias 9:9.