Liafuan diʼak ba ema hotu

Hodi hatene katak Jesus moris hiʼas fali, ida-neʼe hametin dixípulu sira-nia fiar no halo sira sai laran-manas. Porezemplu, apóstolu Paulo laʼo rai dook hodi haklaken iha Ásia Menór no área neʼebé besik Tasi Mediterráneu. Iha fatin sira-neʼe, nia harii kongregasaun sira no fó laran-manas ba ema kristaun hotu atu hamriik metin maski ema barak iha sira-nia leet hatudu hahalok aat no fó-terus makaʼas ba sira. Maski sira hasoru susar hirak-neʼe, ema kristaun nafatin sai barak liután.

Ikusmai, ema kaer Paulo no hatama nia iha dadur laran. Iha neʼebá, Paulo kontinua atu fó konsellu no laran-manas ba ninia maluk kristaun sira hodi hakerek karta barak ba kongregasaun sira. Nia mós fó avizu kona-ba mestre falsu sira. Liuhusi Maromak nia espíritu santu, Paulo fó-hatene nanis katak “asu-fuik sira” sei tama iha sira-nia leet no “dada sai eskolante sira ba sira-nia sorin”.—Apóstolu 20:29, 30.

Latoʼo tinan 60 depois Jesus mate, mestre falsu sira hahú mosu ona. Jesus neʼebé moris hiʼas ona hatudu vizaun oioin ba apóstolu João kona-ba buat neʼebé sei akontese iha futuru. Iha livru Apokalipse, João hakerek katak ema kontradór no mestre falsu sira sei la bele hapara Maromak atu kumpre ninia hakarak ba ema no mós ba rai. João mós hatete nanis katak “nasaun, rasa, lia no suku” hotu sei rona liafuan diʼak kona-ba Maromak nia Ukun. (Apokalipse 14:6) Mundu sei sai fali hanesan jardín Eden no ema neʼebé prontu atu halo tuir Maromak nia hakarak sei sai parte iha mundu furak neʼe!

Ida-neʼe mak “liafuan diʼak” ba Ita ka lae? Se nuneʼe, diʼak atu aprende liután kona-ba Maromak nia liafuan neʼebé hakerek iha Bíblia no buka-hatene oinsá mak ida-neʼe sei kona ita-nia moris agora no iha futuru.

Ita rasik bele loke sítiu www.jw.org iha internét no lee Bíblia iha língua neʼebé Ita komprende. Iha sítiu neʼe, Ita mós bele lee livru Liafuan Diʼak Husi Maromak!, livru Tuir loloos, Saida mak Bíblia Hanorin? no mós livru seluk neʼebé esplika tanbasá ita bele fiar Bíblia no oinsá mak ita bele halo tuir Bíblia nia matadalan iha ita-nia moris rasik no moris família nian. Ita mós bele husu Testemuña ba Jeová hodi hetan informasaun liután.

—Informasaun neʼe husi Apostolu, Efeso, Filipe, Koloso, Filemon, 1 Joao, Apokalipse.