“Ohin haʼu halo foun buat tomak”

Ita hakarak atu Ita no Ita-nia família moris naruk ho saúde diʼak ka lae? Ita hakarak hela iha mundu neʼebé la iha tan terus no mate ka lae? Mundu furak hanesan neʼe laʼós mehi deʼit. Tuir loloos, mundu foun neʼebé justisa hela ba nafatin mak besik ona atu mai, tanba ida-neʼe mak Maromak Jeová nia hakarak. Maromak esplika oinsá mak ninia hakarak neʼe sei sai loos iha Apokalipse 21:3-5.—Lee.

“[Maromak] sei hamaran sira-nia matabeen husi sira-nia matan.” (Apokalipse 21:4) Dala ruma, ita-nia matabeen tun tanba ita haksolok ka buat seluk halo ita tanis. Maibé laʼós matabeen hanesan neʼe mak Maromak sei hamaran. Entaun, matabeen saida mak nia sei hamaran? Neʼe mak matabeen neʼebé tun tanba terus no triste. Sin, Maromak sei hamaran ita-nia matabeen hodi hapara susar no terus hotu neʼebé halo ita tanis.

“Mate la iha ona.” (Apokalipse 21:4) Mate mak inimigu ida neʼebé halo ita barak tanis beibeik. Jeová sei halo ema livre husi mate. Oinsá? Nia sei halakon buat neʼebé halo ita mate, neʼe mak sala neʼebé mai husi Adão. (Roma 5:12) Liuhusi Jesus nia sakrifísiu, Maromak Jeová sei halo ema neʼebé laran-loos atu sai prefeitu.a Ikusmai, Maromak “sei harahun” ita-nia “inimigu ikus”, katak mate. (1 Korinto 15:26) Ema neʼebé laran-metin ba Maromak sei moris ba nafatin ho saúde diʼak tanba ida-neʼe mak ninia hakarak.

“La iha ona . . . laran-susar.” (Apokalipse 21:4) Susar saida mak sei la iha tan? Ita-nia neon-susar, laran-susar no moras tanba ita hotu sala-naʼin. Ida-neʼe halo ema rihun ba rihun nia moris nakonu ho susar, maibé buat hirak-neʼe sei la iha tan.

Lakleur tan, moris neʼebé la iha tan tanis, terus no mate sei sai realidade. Maibé karik ita husu: ‘Ida-neʼe sei akontese iha neʼebé? Karik Maromak nia promete neʼe kona-ba moris iha lalehan?’ Tuir loloos, lae. Tanbasá? Primeiru, promete neʼe komesa ho liafuan: “Neʼe mak Maromak nia horik-fatin iha ema sira leet”, no ema hela iha mundu. (Apokalipse 21:3) Segundu, promete neʼe mós dehan: “Mate la iha ona.” Husi uluk kedas lalehan nunka iha mate, maibé iha mundu deʼit mak iha mate. Tan neʼe, klaru katak Maromak nia promete kona-ba moris neʼebé furak sei akontese iha mundu neʼe duni.

Maromak Jeová hakarak ita tau fiar ba ninia promete kona-ba mundu foun neʼebé justisa sei hela ba nafatin. Kuandu Maromak koʼalia kona-ba bensaun sira-neʼe, nia halo ninia promete neʼe metin liu hodi dehan: “Ohin haʼu halo foun buat tomak.” Tuirmai, nia dehan: “Buat neʼebé haʼu dehan tebes duni no sei mosu mai.” (Apokalipse 21:5) Loos duni, ita hakarak aprende liután oinsá mak ita no ita-nia família bele hamutuk ho sira neʼebé adora Maromak no haree ninia promete sai realidade!